Mala 2
2
1AMBUJE Ŵamaciligosope akuti kwa ŵakutaga mbopesi, “Lilamusi ali lili lya jemanja: 2Mkwenela kumbikanila une kupitila mu yitendo yenu. Naga ngimkumbikanila yinguti, tinjimlwesa jemanja. Tinjiyilwesa yindu yitimcipocelaga kuti yimkamucisyeje pa umi wenu lisiku ni lisiku. Nditu, nayilwesile kalape ligongo nganimumbikanila ni mtima wenu wosope. 3Tinjipeleka cilango kwa ŵanace ŵenu ni kumpaka ndoŵe sya yinyama yimkupeleka mbopesi ku ngope syenu, ndoŵe sya yinyama yimwapelekaga mbopesi ni tinjija kumjasa pampepe ni ndoŵe. 4Pelepo timcimanyilila kuti nampele lilamusili, kuti cilanga* cangu ni ŵakutaga mbopesi, ŵele ŵali yisukulu ya Lefi, cikajonasika.#Num 3:11-13
5“Mu cilanga cangu nasasile yakwapa umi ni mtendele, yeleyi ni yinapele jemanjajo kuti anjimbicisyeje. M'masiku gelego ŵanjimbicisye ni kunjogopa.#Num 25:12 6Ŵajiganyaga yindu yiyaliji yakulungama, ngaŵaga ayo yiyaliji yangalumbana. Jemanjajo ŵatamaga mwa mtendele ni Une ni kutendaga yambone mwamti ŵalekasyaga ŵandu ŵajinji kutenda yindu yangalumbana. 7Gali masengo ga ŵakutaga mbopesi kwiganya lunda lusyesyene lwa Mlungu. Ŵandu akwenela kwawula kwa jemanjajo kuti akalijiganye yingusaka une, ligongo ŵakutaga mbopesiwo ali ŵamitenga ŵa AMBUJE Ŵamaciligosope.
8“Nambo jemanja ŵakutaga mbopesi mlilesile litala lyangu. Mwatendekasisye ŵandu kuti akuŵale ligongo lya majiganyo genu. Mwacisokonasisye cilanga cinatesile ni jemanja. 9Sambano une cinimtende jemanja kuti mŵe ŵakunyosyeka pameso pa ŵandu wosope, ligongo ngimkupikanila yingusosa, myoyo mlepele kwika ni upile kwa ŵandu kupitila mu majiganyo genu.”
Ungakulupicika wa ŵandu kwa Mlungu
10Ana uwe wosope baba ŵetu ngaŵaga ŵamopewo? Ana ngaŵa Mlungu jujojo ni juŵatupanganyisye? Nambi ligongo cici tukaŵa cilanga ca Mlungu ni acinangolo ŵetu pangakulupililana? 11Ŵandu ŵa ku Yuda aŵele ŵangakulupicika soni aŵele alimkutenda yindu yakusakala ku Isalaeli ni Yelusalemu. Ŵandu ŵa ku Yuda asakesye Nyumba ja AMBUJE jiŵajinonyelaga. Acalume aŵele alimkulombela acakongwe ŵakujilambila milungu jine. 12AMBUJE amtyosye mundu jwalijose juŵatesile yeleyi mwiŵasa lya Yakobo.* Akajigala nawo mbali pa yakupeleka yele mtundu wosope yikusayika nayo kwa AMBUJE Ŵamaciligosope.
13Yine mwatendaga nayi: mwadandawulaga ni kulila mnope mpaka gumbasya ni misosi malo gakupelecela mbopesi ga AMBUJE, ligongo jwalakwe ŵakanaga kulola mbopesi syenu, kapena kupocela yakupeleka ya jemanja. 14Mkuwusya ligongo lyakwe cici ngakupocela? Ligongo lyakwe ni lyakuti AMBUJE ŵaliji mboni jwa cilanga cimwatesile ni ŵamkwenu ŵa pa ucanda wenu. Nganimkulipicika kwa jwalakwe, atamose ali mjenu soni ŵamkwenu pakuya cilanga cicoco cimwatesile. 15Ana ngaŵa Mlungu juŵamtesile m'mwejo ni ŵamkwenu kuŵa cilu cimo ni mu msimu soni? Nambi Mlungu akusaka cici pakutenda myoyo? 16AMBUJE Mlungu jwa Aisalaeli, akuŵeceta kuti, “Ngusaŵengana ni kulekangana ulombela. Ngusaŵengana ni mundu jwakutenda yangalwe yeleyi kwa jwamkongwe jwakwe. Myoyo mkalamuce, mkaŵa ŵangakulupicika. Ni yinguti Une AMBUJE Ŵamaciligosope.”
Lisiku lyakulamulidwa liŵandicile
17Mwapesisye AMBUJE ni yakuŵeceta yenu. Nambope mkusawusya kuti, “Ana twapesisye uli?” Mwapesisye pakuŵeceta kuti, “Jwalijose jwakutenda yakusakala ali jwambone pameso pa AMBUJE, nipo AMBUJEWO akusasengwa najo jwelejo.” Kapena soni pakuwusya kuti, “Ali kwapi Mlungu jwakutenda yakulungamajo?”
Actualmente seleccionado:
Mala 2: YAWO
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Chiyawo Bible: Buku Jeswela © Bible Society of Malawi, 2014