1 Kings 10

Angayuqam Solomon-aam Tukuutai

1Angayuqam nulirra Sheba-mi niituq qanngarutiitnek Solomon-aamek, ayagtuq-llu Jerusalem-aamun naspaayarturluku caknernarqellrianek apyutnek. 2Maligluni amllernek niicugniarkanek, qulugtellrianek-llu atmiumalrianek ayuqenrilngurnek, qevleqsanek, amllernek-llu suulutaanek. Tangrrucamek Solomon-aaq-llu, apqauraa apyutnek umyuaqurqem̄inek. 3Elliin tamalkuita kiugai; camek pitaituq caperqekiinek nalqigcesciigalkiinek. 4Angayuqam nulirran Sheba-mi niitaa Solomon-aam umyuartucia tangerrluku-llu atanruvik caliallra. 5Tangrrai-llu neqkat aruqutkumalriit estuuluanek, atanerruarin-llu uitauviit, elluqegcimacia-llu atanruvian calistaikun aturait-llu atuqait tangerrluki, pistet-llu utaqalgirturalriit nererpallratni, ekuagiluni-llu elliillra Agayuvigpagmi. Tamakut irr'ivkaraat. 6Ellii qanertuq Angayuqamun Solomon-aamun, “Ca niitelqa nunamni elpet pitekluten nallunrilucin-llu, piciulliniuq! 7Tau͡gaam ukveqesciigatellruaqa tailua tangerpailemku wangnek. Tau͡gaam niitellrulliniunga avkenrilkiinek; elpet elisngallren tukuullren-llu amllenrurpalliniuq, wii qanrucimallemni. 8Pikegcivagtat nuliaten! Pikegcivagtat-llu pisteten, uitarrlainalriit kesianek ciuqerpeni niicuumarrlainarluki-llu ellalegtaat qanelten! 9Nanraumali Ataneq Agayuten! Nasvaumaa ilukegcicini atanrurcamiten Israel-aamun. Tua-i-wa kenkii Israel-aamun iquilami, elliin atanrurtaaten ellaitnun ciumurucesqelluku picirkiun elluaruciq-llu.”

10Tunai-llu cikiutet Angayuqamun Solomon-aamun, malikellni: talliman ton-atgun cuqneret malleggluki suulutaamek amlleqapigtellrianek-llu ayuqenrilngurnek qevleqsanek-llu. Ayuqenrilnguut akurtullri arnam cikiutekellri ellminun amllenruqapiartut akurtulallrini nani tamalkuitni.

11Hiram-aam angyain, taicillret suulutaamek Ophir-aamek, taicimillruut amllernek nekevraarturngalngurnek qevleqsanek-llu. 12Solomon-aam atullrui muriit pekcaranun menglekluki Agayuvigpagmi atanruvigmi-llu, ilait-llu aturcetaaliluki qelutellegnek harp-anek lyre-anek-llu aturcetaarten̄un. Assinquqapiaraugut muriit tamalkuitni taicimalalriani Israel-aamun; ayuqaitnek tangenqigteksaitut kinguatgun.

13Angayuqam Solomon-aam cikiraa Sheba-m queen-aa canek tamalkuitnek kaigatainek, avatiitgun piyugluni piciryaraq maliggluku elliin cikiutekellrin qunuvkenani.

Angayuqam Solomon-aam Tukuutai

14Allamiaquaqan Angayuqaq Solomon-aaq akurtulartuq cipluki yuinaq tallimanek cipnelegnek (25) usperteggun suulutaamek, 15ilakluki akiliqurautet akiliutekumalriit kupcaatgun, unangutet-llu navrutaalallermegteggun, cikiutait-llu atanrullgutain Arabia-mek, cali-llu atanirturilriit, nunanek Israel-aami.

16Solomon-aaq piliuq yuinarnek qulnek (200) anguyagmi capkutanek, tamalkuita-llu qalilircetai malleggluku akimiaret (15) usperet suulutaamek. 17Cali-llu pililuni yuinarnek akimiarnek (300) mikellritnek capkutanek, qallilirtelluki-llu tamalkuita usperet cetaman malleggluki suulutaamek. Elliin-llu tamalkuita makut capkutat ellivkarai wavet: Enemun Napainek Lebanon-aam.

18Elliin-llu cali pilivkarai atanruvigmek aqumllermek. Ilii patuluku tulurngalngurmek, ilii-llu menuilngurmek suulutaamek. 19Aqumlleq arvinlegnek tuss'arangqertuq, tunuani-wa kuluviim qamiqua, aqumvian-wa cali avategkeni tallik uitayaragken caniagni akiqliqlutek yugtutuliruak nangermek, 20tamarmeng tuss'arat akiqliqluteng pilinguartarluteng nangerngalrianek, quyurmeng qula malrugnek cipluku (12) amllertaluteng. Tamakutun ayuqellrianek piliaqumalriartangqeqsaituq allani angayuqauvigni.

21Tamarmeng Solomon-aam saskai piliaqumaut suulutaanek, nerrsuutai-llu tamarmeng Ena Napainek Lebanon-aam, menuilnguugut suulutaat. Qerrirliq piliartaunani, nurnalriarullrunrilami Solomon-aam nalliini. 22Angyangqertuq imarpiliurcuutnek, maligutaqluteng Hiram-aam angyainun. Allrakut pingayuurtaqata angyai utertaqluteng ut'rulluteng suulutaamek, qerrirlimek, tulurnek-llu, ape-anek, monkey-nek-llu.

23Angayuqaq Solomon-aaq tukuunruuq, usvitunruluni-llu allani atanrulriani. 24Ellarpagmek-llu tamalkuan tailuteng niicugniyarturyularaat umyuartuneq cikiutii Agayutmek elliinun. 25Tamarmeng tailriit taitelaraat cikiutnek, qerrirlimek, suulutaamek, ulikutanek, saskunek, neqkanek ayuqenrilngurnek, horse-anek, ciulvagnek-llu. Man'a ayagtu'rluni, allamiaquaqan.

26Solomon-aaq piliuq yuinarnek pekcessuutnek, qula-llu malrugnek cipluku saskurluteng, horse-aanek. Ilait elliin uitavkalarai Jerusalem-aami, allat nunalgarcetai ayuqenrilngurnun nunanun. 27Nalliini atanrullran qerrirliq nallengqertuq teggalqutun, unailnguut-llu napat amllertaut allacetun napacetun acilqamelngurtun nuniini Judah-m. 28Angayuqam cingilgin elucilirtualarait horse-alget, Musri-mi Cilicia-mi-llu, 29pekcessuutet-llu Egypt-aamek. Atu'urkit'larait Hittite-at Syrian-aat-llu atanrit horse-anek pekcessuutnek-llu, tun'aqluki pekcessuutet tiissitsaam avga yuinaat-wa talliman (600) qerrirlinun atauciq, horse-at-llu yuinaat malrunelgen qulmek cipluku (150).

Actualmente seleccionado:

1 Kings 10: YPK

Destacar

Copiar