Mattiu 4

Natǝmat italtal ke aYesu tigol nǝsaan

(Mak 1.12-13; Luk 4.1-13)

1Beti aNunun aGot esǝhar aYesu vi lan naut masmas tob̃ǝb̃esw hǝn natǝmat b̃italtal ke tigol nǝsaan. 2Len nǝmariboŋ tovi 40 mai nalenmariug tovi 40 aYesu sǝhan, gol ke nǝmal ihati. 3Beti natǝmat egǝm hǝni, ike, “Gǝb̃evi aNatun aGot, kel mai nǝvat galegai ke legǝm vi bǝta.” 4Ris tosor vari ke, “Natosian siGot ike, ‘Nǝvanuan edǝdas b̃imaur len nabǝta ŋai, be imaur len nasoruan p̃isi aGot tokele.’”#Deu 8.3 5Beti natǝmat esǝhari vi lan nab̃iltivile siGot, a Jerusalem, ale eriŋi eil gilgile a mǝhat buni len naim siGot. 6Ale ikel maii ke, “Gǝb̃evi aNatun aGot, gigol gaiug gabag giteh vi pan. Husur natosian siGot ike,

“‘AGot dereh tikele hǝn aŋel san gail husur gaiug

ale lipat gaiug vi mǝhat len navǝlalito

hǝn asike nariem̃ b̃esǝhot nǝvat.’”#Psa 91.11-12

7AYesu isor vari ke, “Natosian siGot ikele am ke, ‘Sagitaltal kitev nǝdaŋan siNasub̃ aGot sam̃ ke timabe.’”#Deu 6.16 8Ale natǝmat esǝhar tǝtas hǝni van hǝn naṽehuh tosahsah habat, ale eṽusani hǝn nǝkantri p̃isi len navile a pan len nǝyalyalan salito. 9Ale ikel maii ke, “Dereh nilav natgaleg p̃is mai gaiug, gǝb̃etǝŋedur, lotu hǝn ginau.” 10Beti aYesu ikel maii ke, “Setan gevi tut! Husur natosian siGot ike, ‘Gilotu hǝn Nasub̃ aGot sam̃ m̃au, ale gigol nalotuan van hǝn gai sǝb̃on.’”#Deu 6.13 11Beti natǝmat eriŋi, ale aŋel gail logǝm vi tarhǝt san.

AYesu etub̃at hǝn nauman san

(Mak 1.14-15; Luk 4.14-15)

12Nǝboŋ tosǝsǝloŋ hǝni ke lototah gat aJon, riŋi len naim bǝbaŋis, aYesu eriŋ naut enan, evi Kalili.#Mat 14.3; Mak 6.17; Luk 3.19-20 13Elul dan naut a Nasaret a Kalili van vatoh len naut a Kapernaum tarhǝb̃iltiwai. Kapernaum ipat len naut sinahǝmar gǝlaru, a Sepulun mai a Naftali. 14Imagenan, nǝsa ahai kelkel ur, aIsaiah, tokele, isarpoh. Ike,

15“Naut sinahǝmar Sepulun mai naut sinahǝmar Naftali,

metp̃isal vi lan nab̃iltiwai, tarhǝwisel Jortan,

len naut a Kalili simetb̃os gail,

16nǝvanuan gail lotobǝtah len nǝmargobut

loris nab̃iltim̃ial;

len galit lotobǝtah len naut hǝn nǝm̃ol hǝn nǝmatan,

nam̃ial siGot evisi, em̃ias galito.”#Isa 9.1-2

17Len nǝboŋ enan van, aYesu etub̃at kel uri ke, “Pair dan nǝsaan samito husur natohan pipihabǝlan aGot len nǝmav egǝm pǝpadaŋ!”

Ahai susur metǝkav gail

(Mak 1.16-20; Luk 5.1-11)

18Len nǝboŋ sua aYesu iyar husur nǝtarhǝt nab̃iltiwai lotokisi hǝn Nab̃iltiwai Kalili. Eris alarmiṽan, aSimon, nahǝsan togon aPita, mai aAdru aṽan. Arubar hǝn nalevlev vi lan nab̃iltiwai, husur arovi vanuan nǝsahiehan. 19Ale ikel mai gǝlar ke, “Gǝm husur ginau, ale gamǝr mǝrtosah hǝn naieh, dereh nigol mirisah hǝn nǝvanuan gail.” 20Vǝha-sua ŋai aroriŋ nalevlev sǝlaru, arohusuri.

21Nǝboŋ toyar van am, eris alarmiṽan am, nahǝsalar aJemes anatun aSepeti, mai aJon, aṽan. Arutoh len nab̃ot mai atǝmalaru aSepeti, lobutan nalevlev salit gail lunor. Ale aYesu ekis gǝlar gǝmai. 22Vǝha-sua ŋai aroriŋ nab̃ot mai atǝmalaru, arohusuri.

AYesu igol alat lotomǝsah lumaur

23Ale aYesu iyar turtur len naut a Kalili p̃isi. Ep̃usan len naim nab̃onb̃onan seJu gail, ikel ur na-kel-uri-an tovoi hǝn natohan pipihabǝlan aGot, ale igol nǝvanuan gail lotokad namǝsahan tiltile gail o nibelit tomatmat, lumaur. 24Na-kel-uri-an husuri ibar naut a Siria kavkav. Ale nǝvanuan gail losǝhar alat lotomǝsah gǝm hǝni: alat lotokad namǝsahan tiltile, alat nibelit topǝŋas, alat lotokad natǝmat gail, alat lotokad nahumatmat mai alat nahudhubelit tomat, ale igol galit lumaur. 25Nab̃iltiluṽoh gail lohusuri, alat a Kalili, a Tekap̃olis, a Jerusalem, a Jutea mai alat tarhǝt Nawisel Jortan.

Actualmente seleccionado:

Mattiu 4: klv

Destacar

Copiar