URA TIN AYRA 41
41
Faraw doyra damu
1Basara li ki mba' ni Faraw doyra damu. Nam wi tammi nam coli fun mbo lum ŋgolna Nil. 2Nam gola ni dogoni mbutlina kiɗisiya jivi cocoo, ɗoori lay, sel ay ki hu lumma gijaŋ ti haɗna. 3Ŋgoo daganda dogoni mbutli suu cona kiɗisiya sel ay kiyo, asi ki iɗi cocoo, asi mba lak eg suu jewna fun lumma. 4Dogoni mbutli suu cona suu iɗina kom dogoni mbutli suu kiɗisiya suu jivi suu ɗoorina kiyo. Faraw dliɗ ki gaw.
5Nam hoŋ senna hoŋŋi doyra daŋga hin dam olo, nam wi wanna day dew cuk gogorra kiɗisiya neey jivi cocoo. 6Ŋgoo dagan wa ma daŋŋa day dew, cuk gogorra kiɗisiya ka neeyɗi, semeɗ ma u maɗiinana soom kiyo. 7Yam wa ma kiɗisiya ma ka neeyɗina ti yam wa ma kiɗisiya ma neey jivi cocona kiyo. Doyra di Farawni na nam dliɗ ki gaw.
8Maɗiira fo ki foni Faraw tam mbuɗ ki ndaa cocoo. Nam gi sunda yi suu li dlara mbuɗ mbuɗta u suu wi yal dlara hu Egipte ay egem halaŋ. Nam cuɗusi vun doy ndaɗta. Sa ma ndak a gamba uɗ ki kaɗi.#Dan. 2.2 9Sa ŋgol ma ɦal tlesuu cira maŋ mulnana di Faraw ana, «Humun gan karam kay coonda an laɗta wa. 10Hu li ma Faraw hurum ɓeŋ eg suu sun mamsina, nam gan daŋgayna hu zina vi sa ŋgol asgaana ami u sa ŋgol ma ɦal tina maŋ mulnana. 11Doyra dami hu njeŋgera dewra uɗ ki zeɗ zeɗ kama. Gegelay fi u doy mamba ki ko ndaɗ damba na. 12Goozoŋ ma Hebrena ay umi hu daŋgayna nammi mbaɓuna vi sa ma ŋgol asgaana. Ami cuɗum vun doy mamira nam hin gamira uɗ kiyo. 13Dla ndaɗta hin li ko nam gamira uɗ kira na may. Faraw hoŋon hu sun manda jewra may, hin ɓal sa ŋgol ma ɦal tina maŋ mulnana ki kolo eg guna may.»
Yosef di vun doyra ki maŋ mulna Faraw
14Faraw yi Yosef aya, asi gam ay ki hu daŋgayna zak gaw. Nam wel yam kiyo, cuk baraw ma daŋŋa tamu, tuɗ eg Faraw. 15Faraw di Yosef ana, «Doyra danu, sa ndaki a ganda uɗ ki kaɗi. An hum ana cuɗuŋ vun doyra wani aŋ ndak a gaɗ uɗ kiyo.» 16Yosef hoŋ di Faraw ana, «Ni ka anɗi. Lona ndak a gaɗ uɗ ki jivi maŋ Faraw, ni namu.»
17Faraw di Yosef ɗaŋŋi ana, «Hu doy manda danda an colira ni doŋ lumma Nil. 18An wi dogoni mbutlina kiɗisiya jivi cocoo, ɗoori lay sel ay ki duk mbo lumma Nil gijaŋ ti haɗna. 19Ay ŋgorosi dagan ni, dogoni mbutli suu daŋŋa kiɗisiya, iɗi cocoo, gol co ɦay lay, sel ay ki duk mbo lumma, an bay wi mbutli suu co ko asina na hu mbassa Egiptera tuwa. 20Dogoni mbutli suu kiɗisiya suu iɗi suu cona kom dogoni mbutli suu jew kiɗisiya ɗoorina kiyo. 21Asi ligisi ki hurusi halaŋ. Sa ka wi li ma asi sel hunaɗi. Asi hin gol cora ni ko jewra na lay. An dliɗ ki ni na gaw. 22An wi hu doyra olo, wana day ay dew cuk gogorra kiɗisiya yam neey jivi cocoo. 23Ŋgoo dagan wa ma daŋŋa day dew cuk gogorra kiɗisiya ka neeyɗi. Semeɗ ma u maɗiinana soom kiyo. 24Yam wa ma kiɗisiya ma ka neeyɗina lik yam wa ma kiɗisiya ma neey jivi cocona kiyo. An cuɗuɗ maŋ suu li dlara mbuɗta ni sa ma ndak a ganda uɗ ki kaɗi.»
25Yosef di Faraw ana, «Sa ŋgolna, doy maŋga jakŋi va dewna. Lona tak maŋ Farawni va ma nam hin a lamma. 26Dogoni mbutli suu kiɗisiya suu jivina ni basara kiɗisiya. Yam wa ma neey jivi, ma kiɗisiyana ni basara kiɗisiya, ni doyra dewra. 27Dogoni mbutli suu iɗi suu cona ni basara kiɗisiya. Yam wa ma kiɗisiya ma ka neeyɗi ma semeɗ ma u maɗiina soom kina takŋi basara kiɗisiya, mayra hin ci suuna. 28Ni ko an li di Faraw ayra na. Lona tak maŋ Farawni va ma nam hin lamma. 29Gola hu basara kiɗisiya ni suu hu mbassa Egiptera hin li tlena cocoo. 30Basara kiɗisiya daganda mayra hin ndi kay suuna halaŋ. Asi hin maa ki kay tlesuu asi lasi ay jew cocona. Mayra hin ɓeŋ mbassa ki halaŋ. 31May ndaɗta hin li suuna cocoo, asi hin maa ki kay tlesuu asi lasi ay cocona halaŋ. 32Doyra dewra di Faraw yaɗ mba' lay ni tak ki ni ana Lona tin dla ndaɗta ay ni namu. Lona ka vi yam a li dla ndaɗtaraɗi.
33«Cemi Faraw man sa ma neey ma yal cocona tinim a ŋgolla kay mbassa Egiptera. 34Faraw yow suu sunda a gol mbassa Egiptera, a taa yam wana hu basara kiɗisiya ta jivira. 35Asi tok yam tlesuu hin fasi hu basara jivi ta mbay wandara halaŋ. Asi li dla ndaɗta ni u saɓakŋa vi Faraw. Mol wana u tlesuu tira hu ɦoŋzi ma ŋgolona halaŋ. Tin suu juɓ u wa namma may. 36Tlesuu ti asina ɗokosi ni kay basara kiɗisiya ta mayra hin ndi kay mbassa Egiptera. Kay a mayra ɓeŋ mbassa kiɗira.»
Yosef mbuɗ sa ŋgolna kel Faraw hu Egipte
37Boy namma jivi ii Faraw u suu sun mamsina halaŋ. 38Faraw di suu mamsina ana, «Hin fay ki sa ma Musukka vi Lona kam ko namma nana su?» 39Faraw di Yosef ana, «Lona takaŋ tle asina ki maŋ halaŋ. Sa ma daŋ ma neey ma yal ko aŋŋa kaɗi. 40An kakaŋ a ŋgolla kay ziinna, suu mansina halaŋ hum u gaɗ maŋga. Dlam manda mulla suuŋŋi ndaɗ doy hol.»#Sun. 7.10 41Faraw di Yosef ana, «An kakaŋ a ŋgolla kay mbassa Egiptera halaŋ.» 42Faraw paɗ kaaɗum mamba kay komba kalaɗ ko Yosef, cukum baraw dlemba ma jivira egemu, cukum ɦeɗew lorra kelem may.#Dan. 5.29 43Nam kakammi hu pus pus kulumma, tuɗ kay ceremma gaw. Suu asgaana sawalla kolo ana hinigi voɗta kiyo. Ko ndaɗta na Faraw ɦam ŋgolla hu mbassa Egiptera halaŋŋi komu.
44Faraw di Yosef ana, «Ni an Faraw, sa ma di va ki hu mbassa Egiptera bay aŋ ɦam voɗta bani kaɗi.» 45Faraw tin sem Yosef ana Safnat-Panea. Nam ɗumum Asnat, goŋ Potifara ma mul ma li ɓivunna hu ɦoŋzi ma Onna. Yosef kal ki a gol yam mbassa hu Egiptera halaŋ.
46Hu li ma Yosef mba fok Farawni basaɗam tew ki ni dok-hindi. Nam hin Faraw ka tani tuɗ poy yam mbassa Egiptera ki halaŋ.
47Hu basara kiɗisiya ndaɗta ni tlena jiv hu mbassa Egiptera cocoo. 48Hu basara kiɗisiya ndaɗta ni Yosef tok yam tlesuu tira hu mbassa Egiptera halaŋ. Hu ɦoŋzi ma ŋgolona halaŋ halaŋ nam tok yam tlesuu tira ay huwa. 49Yosef mol wana cocoo, ko ŋgetlna doŋ lummana ɦawa na, sa ndak ka a ŋgaam oloɗi kay ndumum ka ii saɗi.
50Jew basara kiɗisiyara mayra a ndira ni Yosef vuɗ gor njufiina mba' u Asnat ta goŋ Potifara mul ma li ɓivun ma Onna. 51Yosef tin sem gorom ma ŋgolna ana Manase, kay nam di ana, «Lona maaran humun ki kay las manda u ziŋ bunna wa.» 52Nam tin sem gorom ma mbana ana Efrayim kay nam di ana, «Lona mbuɗun ki sa ma zulina hu mbassa an wi hawra hura.»
53Basara kiɗisiya ta tlena li hu mbassa Egiptera cocora jak ki wa. 54Basara kiɗisiya ta mayra gijaŋŋa ko Yosef di ay ki jewra na may. Mayra ndi ki kay yam mbassa halaŋ, na may hu mbassa Egiptera ni tina kaa.#Sun. 7.11
55Hu li ma suu Egiptena va mbuɗ ka kosi oloɗi ni asi tii tasi eg Faraw kay nam ɦasi tina. Faraw di suu Egiptena halaŋ ana, «Tuɗugi eg Yosef, lagi dlara nam hin dagirara.»#Jaŋ 2.5 56Mayra ndi ki kay mbassa halaŋ halaŋ. Yosef mal vun wa ma ŋgay hu ɦoŋzi ma ŋgolona ki halaŋ, gusum ki ko suu Egiptena. Kay mayra tuɗ fokŋi tuɗi na ɗow ɗow. 57Suu hu mbassa daŋga daŋga halaŋ mbay eg Yosef hu Egipte a gus wana kay mayra ci suuna coco ki hu lina halaŋ.
Actualmente seleccionado:
URA TIN AYRA 41: BMS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
