URA TIN AYRA 38
38
Yuda u Tamar
1Hu coki ndaɗta Yuda hin gorsemma tuɗ ki eg sa ma Adullamma sem ana Hira. 2Ha hu li namma Yuda ɗum goora vi Kua ma Kanaanna taɓ u ndaɗu. 3Ndaɗ vi wiina vuɗ goona tinim sem ana Er. 4Ndaɗ hoŋ vi wiina olo vuɗ goo ma daŋŋa yam ana Onan. 5Ndaɗ hin vuɗ go njufna olo tinim sem ana Sela. Hu li ma ndaɗ vuɗumma na ni Yuda kaki ni hu Kezib.
6Yuda vi cara maŋ goromma ŋgolna Er, yaɗ ana Tamar. 7Er, goŋ Yuda ma ŋgolna, ka ii Yawe jiviɗi. Yawe cam kiyo. 8Yuda di Onan ana, «Vi caŋ wayaŋŋara kak u ndaɗu, ɗok njaf wayaŋŋa.» 9Onan wi ana goo namma ka a li a njafambi ni, nam buu u ndaɗ ni vo sumurum ki ni kaŋgaa. Ka min a ɗok njaf wayammaɗi. 10Dlara nam laɗ ndaɗta ka ii Yawe jiviɗi, nam cam ki may. 11Yuda di Tamar caŋ gorommara ana, «Tuɗ kak ha vi buk ta ta juɓ Sela nam jeŋ ki tuwa.» Nam ɓak na ni u ndaana kay ana Sela hin miɗ ki ko gorsemma na oloɗi. Tamar tuɗ kak ha ki vi buɗu.
12Buuna jak ki ŋgol cocoo, goŋ Kuara, caŋ Yudara, miɗa. Yuda daɓ hahaw caamba ki daɓmi nam tuɗ ko tam u banamma Hira ma Adullamma hu Timna a gol suu cawam ta timigii mamsina. 13Asi di Tamar ana, «Kunukŋa ka tuɗ Timna a caw ta timigii mamsina.» 14Ndaɗ fok baraw ma hahawra ki fokŋi, cuk baraw ma gawlaŋga ki egeɗu baa yaɗ kiyo. Ndaɗ kak gaa vun grekŋa Enaimma hu voɗta Timnara, kay ndaɗ wi ana Sela jeŋ ki wa nam ɦaɗ ka mam a caraɗi.
15Yuda waɗ na ni ana ndaɗ li ka ni gawlaŋga, kay ndaɗ baa yaɗ kiyo. 16Nam hin voɗta tani tuɗ varaɗu daɗ ana, «Hinin an taɓ u ndaku.» Kay nam wi ka ana ni caŋ gorommaraɗi. Ndaɗ dam ana, «Aŋ hin ɦanni me a taɓ u an nige?» 17Nam daɗ ana, «An hin sunuk goo ɦu ay dew duk yoori mansina.» Ndaɗ dam ana, «Aŋ hin deŋen me ka kon a hin sunun goo ɦu namma ayrage?» 18Nam hoŋoɗ dira ana, «An hin deŋek ka ni meɗaŋge.» Ndaɗ dam ana, «Ҥan walakka seŋ ɓiiri egeɗta u zeweɗ lay, u tokolo maŋga koŋga may.» Nam hin ɦaɗsina tani buu u ndaɗ may. Ndaɗ vi wiina ni na gaw. 19Ndaɗ col jolni fok baraw maɗ ma gawlaŋga ki gaw hoŋ cuk baraw maɗ ma hahawra egeɗu.
20Yuda sun goo ɦuna ay ko banam ma Adullamma a mbuɗ tlegeyem ha ko cara. Nam mba faɗ kaɗi. 21Nam joɓ suu hu zi nammana ana, cara gawlaŋga kaki hu Enaim keŋ voɗtara ni arage? Asi hoŋom dira ana, cara gawlaŋ ka tanɗi. 22Nam hoŋ ha eg Yuda dam ana, an faɗ kaɗi, suu hu ɦoŋzi nammana lay di ana cara gawlaŋ ka varasiɗi. 23Yuda di ana hiniɗ ha u tlegeyeɗ asina, mbuɗuy tay a suuna san uyɗi. An sunuɗ ɦuna haa aŋ faɗ ay kaɗi.
24Li tilna dagan va ma hindi ni asi mba di Yuda ana, «Tamar caŋ goroŋga mbuɗ taɗ ki gawlaŋga cemi vi wiina kiwa lay.» Yuda di ana, «Kalaɗ ay ki ŋgalaɗ kiyo.» 25Asi kalaɗ ay ki kiɗik may ni ndaɗ di kunuɗna ana, «Tlesuu kon wanna ni vi sa ma gan wiinana. An joɓoŋu, walakka semma ɓiiri kaɗ u zeweɗ wanda u tokolora ni vi gege?» 26Yuda wi tlegeyem wini di ana, «Ndaɗ ni ɗegee suunu. Kay an haɗ ka maŋ goronna Selaɗi.» Nam taɓ ka u ndaɗ dagan oloɗi.
27Ndaɗ ndak a vuɗta ndakŋi gor ŋgonira ay huruɗ mba'. 28Ndaɗ a vuɗta wanni goo maa dew kal kom ay kiyo, cara vuɗuɗta njunum baraw tlawna komu di ana, «Goo ma hin kal ay ki jewna.» 29Nam hoŋ kom duk ɦoŋŋi wayamma kal ay kiyo. Cara vuɗuɗta di ana, «Ҥii, aŋ co ay ki ni zi gorra ɗaŋ.» Ndaɗ tinim sem ana Peres. 30Ŋgoo dagan wayam ma zew ma tlawna njuni komma kal ay kiyo, asi tinim sem ana Zera.
Actualmente seleccionado:
URA TIN AYRA 38: BMS
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible Moussey © Bible Society of Chad, 2002.
