MATHAI 8

Isua ne Hangkat je Tewka’mmibe

(Mrk 1.0-45; Luk 5.12-16)

1Zai peloa ’mbene pa wangkeu dege, baudime pe chai suitat ti de lei; 2zai pie le lau, ka’mpapeu hangkat pe dage wang lu, pe suage, keikutkeu ze, “A Wang gau, nang ne nei dizai â, achu tew’nchi duî lei,” kacheu de lei. 3Dadege Isua ne pe ba getuapat ze, pechu deîtau lu acheu sa ze, “I nei lei, nang ’nchi de zu lau,” acheu bei de lei. Zai luakatne pa ka’mpabe ze yi’nchi di de lei. 4Dadege Isua ne pechu, “Pie le lau, mî dage du nang salia mak ra lei; kane tat ze tingkupeu dage nang sing ne liâ lau, zai kela du Mosabe ne diegaidiakbe luigum ze pei lau, baudime ne ’nchetpatlerabe zat hangge zeu,” acheu bei de lei.

Rom gu Saîbe Guâ Ka’ngguapeu je Isua ne Tewka’mmibe

(Luk 7.1-10)

5Zai Kaperna-um ge pa gut dege, pe dage sipaihaîmuiteipeu wang lu, pechu kiâm ze, 6“A Wang gau, a guâ ka’ngguapeu pe pum pikatlam chai ze kilûng ge jei la lei, tew’nteu ze la de lei,” ze kacheu de lei. 7Dadege Isua ne pechu, “I wang ze tew’mmi gai gu lei,” kacheu de lei. 8Kane sipaihaîmuiteipeu ne pechu kak ze, “A Wang gau, I gumbe kau ki ge nang gut ra hang bui me de lei; kane sam runne rang gai be lau, chidezai a guâ ka’ngguapeu yi du lei, 9I du rezieteime kangge bam lei, zai a kangge sipaime lamui lei; zai hangkat je I ne, ‘Tat lau’ bei dege pa tat ti, zai kêdapeu je, ‘Wang lau’ bei dege wang lei, zai a gu kebang je du ‘Aize tew lau’ bei dege pa tew lei,” kacheu de lei. 10Chize Isua seu lu dege ’nninglu-lu bam lei, zai pe chaisuime je, “Pelingsing ze ningnui je I rang lei, Israel ge ’nsangdu keneibe peranchibe aigumbe I ngau mak lei. 11Ningnui je I rang lei, tingbia benai tingrun ’mbene misonggame wang gu lei, zai tinggîm heguangram ge Abrahambe, Isaakbe, zai Jakobbe dage luu ze penui ngua’ntau gu lei, 12heguangram name je â hela ’mbe kemuîbe ge tuâpat kai bei ze bambe luage zeu; chige ziemmename hap ze penui geu kegit ze bam gu lei,” ze kacheu de lei. 13Isua ne sipaihaîmuiteipeu je, “Tat chu lau; nang ne neibe luigum ze ning peireige peize wangchang de zu lau,” acheu bei de lei. Zai chipau lua sing gene chi pe guâ ka’ngguapeu ze yi di de lei.

Isua ne Misonggame je Tewka’mmibe

(Mrk 1.29-34; Luk 4.38-41)

14Zai Peterbe ki ge Isua gut dege Peterbe nâu pui kaherêube ne ’nrâ ze jeilaleu lei; 15zai Isua ne pe ba deîtau gai bei dege pa kaherêube ze sau di de lei; dadege pa zuachu lu, pechu ’ngguabam di de lei. 16Zai hegîlia dege herasiabe bamme misonggame je pe dage nguawang de lei; zai pe sam gene herasiabe leine je kelitua, zai ka’nrâme leine je pa ne tew’mmi bei de lei. 17Kemeu’mpeu Isaiabe ne rangbe, “Pa ne anui ran-gabe leine lu lu, zai anui keteu-keneube ramme pung bei de lei,” kacheube sam ze tewpui gai le ra hangge zeu.

Isua Chaisuime Changrame

(Luk 9.57-62)

18Dadege Isua ne baudime misongga pe taige bambe ngau lu dege, pa ne wîgiam tat te ra die gai bei de lei. 19Zai mige leisirawpeu hangkat pe dage wang lu, pechu, “Geteiliapeu gau, nang tat-tatbe ge I suitat ku lei,” ze kacheu de lei. 20Zai Isua ne pechu, “Munserung ramme penui ki la, zai ’nruine ramme penui chip la lei; kane ziemmena Na â pe peî ’mbeîgairabe bâm ’ngga lei,” acheu bei de lei. 21Zai kenieme ruage kêdapeu ne pechu, “A Wang gau, a peu je kechaibai ra tat ra achu peiraî lau,” kacheu de lei. 22Kane Isua ne pechu rang ze, “A chai sui le lau, kechaime ne penui kechaime je peize bai le lau,” acheu bei de lei.

Tingkaichibe Tewka’ntaube

(Mrk 4.35-41; Luk 8.22-25)

23Pa ’nnei lungge gut ti dege, pa kenieme pe chai suigut ti de lei. 24Zai pie le lau, sungkling ge hedui natri ’nruichu di de lei, chidadege â hedui kagesuâkbe ne ’nnei ze nupgetie bam di de lei; kane pa â jeikeu di lei. 25Dadege pe tailam penui wang lu, pechu ’ngkia je, “Heguang gau, tew’nring gai lau; anui ga gu de lei,” ze kacheu de lei. 26Zai pa ne penui je, “Ndaitew ze ningnui hing lau, Hei keneibe chamme gau?” kacheu lei. Dadege pa zuachu lu, tingkai benai sungkling je ka’ngngiam de lei, dege â sauzîng di de lei. 27Zai ziemmename ramme ’nninglu-lu bam di de lei, acheu sa ze “Aipaupeu ’ndaigumbe zat lau, tingkai benai sungkling ne du pe sam pheu zeu,” ze kacheu de lei.

Herasiabe ramme bambe Hangna je tewka’mmibe

(Mrk 5.1-20; Luk 8.26-39)

28Zai kat lam’mbia giam Gadarin ge pa pat dege herasiabe ramme kanguabe kau hangna heraw ’mbe pat ze pechu kahedau de lei, penai tîmphi-desang bam lei, chidadege chipau ’mpuî ge mî de tatkachi lak lei. 29Zai, pie le lau, penai rankai ’nrung ze, “Hei Hera Na gau, anai hangge nang ze châu nung ze lau? Beting wangchang makgene anai je tewsâ ra hang aige nang wang mei?” ze kacheu de lei. 30Zai penai bambe bâm gene kedeu ’mbe kebakdung deteu bam lei. 31Zai chi herasiabe ramme zene pechu, “Nang ne anui je kelipat ra dizai â kebak ramme dage anui je lang gai lau,” ze pechu kiam de lei. 32Dadege â pa ne penui je, “Tat chu lau,” acheu bei de lei. Dadege penui pat lu, kebak ramme lungge penui gut ti de lei; zai pie le lau, kebak ramme leine hekâu ’mbe pak’nsukkeu ze sungkling ge gut kai kam di de lei, zai hedui ge ga gai kam di de lei. 33Dadege â chi kebakdung reîme ze paktat ti de lei, zai penui gu namdi ’mbe gut ti de lei, herasiabe kanguapeu kena pumgîm ge tâwangchangbe ramme benai chigene patbe rasam leine ze salia kam bei de lei. 34Zai pie le lau, namdi ge bamme leine Isua je hedau ra hang zuapat te lei; zai pechu penui ngau lu dege penui ramrai gene tat te ra hang pechu kiam de lei.

Actualmente seleccionado:

MATHAI 8: ZEMEBSI

Destacar

Copiar