PONGWANG LAIPEX 13
13
Abram hia Lot nyi Afan
1Abram a chix kakonu hia chix tuinabu koplaxle Ijip haxtok zongma shuakuxchi ikoxle Kanan haxtok zongma shuathongchi chaxwan to ngui. Lot chuwüi chix füi tomle pao. 2Abram a tüle ahak-aluale tüikya khünak tuita. Chix ma tsom-pom chun, zwon, maihu ibomachu hun hia khopbu huanuma tüikya. 3Ofüima chix ikha dantoxlaxle onui tuita angkya ata khato le achexle ahamkya Bethel alople ju. Ikhato chixe amipongma pom zaile toxkya Bethel hia Ai tingnu nyi zo to ngui 4ilaxle chixe tö-tsap tuita zing. Ikhato chixe Jowanpa to shwom.
5Lot machu wüi chun, zwon hia maihu, ibomachu chix kako-homkha hia dabu tüikya. 6Ikhoma hokhi pangnyi hanpakma okhonguile müibue fumtsüt angkya onui chitüi, chemthüikoxle hokhi ang tsom-pombu huanuma tüi. 7Ikhoma Abram müi hia Lot müi to humekya khünakbu tata füi ahe ang süt. (Ipong kople ija haxtok ma Kanan nok hia Periz nok tüile wüi ngokya.)
8Ofüima Abram-e Lot ang thüi: “Künyi a haxnu-homsa changle, idaile nang khünak hia ku khünakbu bama hyetdong-kaktsile ngo angkya oli münchang. 9Idaile athaxpi afanhax. Nang mong alualuachi haxtok zünle koplax. Nang lomta ma lelax, ilaxle ku a mama lomkua to leüi.”
10 #
Pon 2.10. Lot-e akhople hu ikoxle Jordan haxsha Zoar alople, tie awangle, Jowanpa#13.10: Jowanpa tsawat: Eden tsawat füi apyenkya tuita. tsawatkha lailaile chichangba Ijip nok haxtok lailaile ngünle lax. (Ija a Jowanpae Sodom hia Gomorah tingnu nyi amütüi thoto wüi changkya.) 11Ikhoma Lot-e chix hanpak ang Jordan haxsha komkaile zünle kop ilaxle handün chikao to achexle pao. Ija a Abram hia Lot nyi afanle paokya kax. 12Abram a Kanan haxtok ma wüi ngo, ikoxle Lot a Sodom zui ma haxsha angkya tingnubu khato homzai laxle ngo. 13Ibu khünakbu a Jowanpa zongto chichang-chizangkya tamchu ochax khünakbu changkya.
Abram a Hebron to Achexle Pao
14Lot-e danle toxkya füima Jowanpae Abram ang thüi: “Nang ojong tokyahex, pangnu chito akhople müile hukoplax. 15#Mwt 7.5.Nange ngünle tüikya haxtok komkaile kue nang ang tamchu nangsu-nangsa hwom ang kox angkya changle, idaile ija a othuithuima nang kux ang changle ngoüi. 16Kue nang ang owaechu akiak ang chithole su-sa hwom huanuma koxüi; hwom akiakkya füi a chaxwan tok angkya haxbu akiakkya wüi ochwon changüi! 17Athax, paolax ilaxle haxtok pangnu khato hulax, chemthüikoxle ija pangwüi kue nang ang kox angkya changle.” 18Ikhoma Abram-e chix pom a Hebron ma Mamre angkya otsao pünnu tong ma zai; ikhama chixe Jowanpa ang tö-tsap tuita zing.
Actualmente seleccionado:
PONGWANG LAIPEX 13: WANCBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
