LUKA 20

Isua thuneihna chungchâng

(Mt. 21:23-27; Mk. 11:27-33)

1Ni khat chu Tempula Chanchin Ṭha hrila a zirtîr lai chuan puithiam lalte leh Dân zirtîrtute chu, upate nên a hnênah an lo chho va. 2“Eng thuneihnain nge hêng thil hi i tih? Tu-in nge thu pe che min hrilh rawh,” an rawn ti a. #Jn. 2:18. 3Ani chuan a chhâng a, “Kei pawhin thu ka zâwt ve ang che u: 4Johana baptisma kha, vâna mi thu nge mihring thu, min hrilh rawh u,” a ti a. 5An inberâwn a, ‘Vâna mi thu kan tih chuan, ‘engah nge a thu in awih loh,’ min ti si ang a, 6‘leia mi thu,’ kan tih lahin mipui hian an za-in lungin min dêng mai awm si a, Johana chu zâwlnei ni ngeiah an pawm tlat hlawm si,” an ti a. #Mt. 14:5; Lk. 7:29. 7Tichuan, “Khawi lam zâwk thu nge kan hre lo,” an ti a. 8Isua chuan, “Kei pawhin tu thuin nge hêng thil hi ka tih ka hrilh bîk lo vang che u,” a ti a.

Grep huan thlawh hlawh tehkhin thu

(Mt. 21:33-46; Mk. 12:1-12)

9Vântlâng hnênah he tehkhin thu hi a hrilh ta a: “Mi pakhatin grep huan a siam a, huan enkawltute a thlawh hlawhtîr a; ram dangah rei tak a thang bo va. #Isa. 5:1-7. 10A lawh hun chuan a chan ai la tûrin bawih pakhat huan enkawltute hnênah chuan a tîr a; nimahsela, huan enkawltute chuan an lo vêl a, kut ruakin an hâwtîr a. 11Bawih dang a tîr leh a, chu pawh chu an lo vêl a, zahthlâk takin an sawisa a, kut ruak bawkin an hawtîr leh ta a. 12A ṭum thumnaa a tirh lek phei chu, thisen an lo chhuahsak a; huan ata an theh chhuak a.

13“Grep huan neitupa chuan, ‘Engtin nge ka tih ang aw? Ka fapa duh tak hi ka tîr mai teh ang; ani hi zawng an lo zah êm ang chu maw,’ a ti a. 14Huan enkawltute chuan an lo hmuhin, ‘He mi hi ro luahtu tûr chu a ni, i that ang u khai, keinin a ro chu kan nei hlauh dâwn nia,’ an ti hlawm a. 15Grep huan ata chu an theh chhuak a, an tihlum ta a. 16Tichuan, grep huan neitupa chuan engtin nge anni chu a rawn tih ang? A lo kal ang a, huan enkawltute chu a rawn tiboral ang a, huan chu mi dangte a pe ang,” a ti a. Thu ngaithlatute chuan, “Chu êm chu ni lo ve!” an ti a. #Tirh. 13:46; 18:6; 28:28.

17Nimahsela, anniho chu a en a,

“In satute lung duh loh kha,

Chu ngei chu a kil lung ṭangkai ber a lo ni si,’

tih ziak hi eng tihna nge ni? #Sam. 118:22; Tirh. 4:11; 1 Pet. 2:6-7. 18Chu lung chunga tlu apiang an keh sawm ang a, a delh lek phei chu a râwt dip ang,” a ti a. #Isa. 8:14,15.

Kaisara hnênah chhiah pêk

(Mt. 22:15-22; Mk. 12:13-17)

19Chutih lai chuan Dân zirtîrtute leh puithiam lalte chuan, chu tehkhin thu chu anmahni demin a sawi tih an hriat avângin man nghâl mai an duh a; amaherawhchu, vântlâng an hlau si. #Lk. 19:47.

20Tichuan, remchâng an melh ta rân a: Ramawptu rorêlna leh a thuneihnaah an thlen theih nân a ṭawng sual palh man tûrin enthlatu, mi dik anga lang tûrin an tîr a. 21Chûng mite chuan, “Zirtîrtu, i thu sawi leh i thu zirtîr hi a dik tih kan hria; tu mah zah bîk nei chuang lovin Pathian thu dik tak i zirtîr ṭhîn. #Jn. 3:2. 22Kaisara hnênah chhiah chawi tûr kan ni nge ni lo?” tiin an zâwt a. 23An ngamthlêm a ni tih a hmu tlang a, an hnênah, 24“Duli mi han entîr teh u. Tu lem leh tu hming nge chuang?” a ti a. Anni chuan, “Kaisara,” an ti a. 25Ani chuan, “A nih ahnu, Kaisara ta chu Kaisara pe ula, Pathian ta chu Pathian pe ta che u,” a ti a.#Rom. 13:7; Lk. 23:2. 26Tichuan vântlâng hmaa a thu sawia man an tum chu an hlawhchham ta a; a chhânna chu mak an ti hle a, an ngawi ta daih a.

Thawhlehna thu

(Mt. 22:23-33; Mk. 12:18-27)

27Sadukai-ho, ‘thawhlehna a awm lo,’ tite zînga ṭhenkhat Isua hnênah an lo kal a. #Tirh. 23:6-10. 28“Zirtîrtu, Mosian, ‘Tu pawh nupui nei si, fa nei lovin thi sela, a unaupa chuan a nupui chu rochungin a unaupa tân chi a thlahsak tûr a ni,’ tiin min ziaksak a. #Deut. 25:5. 29Aw le, unau mipa pasarih an awm a, a upa ber chuan nupui a nei a, fa nei lovin a thi a; 30a pahnihna chuan a rochung a, 31pathumna pawhin; chutiangin pasarihte chuan an rochung ṭheuh va, fa nei lovin an thi zêl a. 32Chumi hnu chuan hmeichhia pawh chu a thi ve ta a; 33tichuan, thawhlehnaah chuan chu nu chu tu nupui ber nge ni ang? An pasarih khân nupuiah an nei ṭheuh si a?” tiin an zâwt a.

34Lalpan an hnênah, “He khawvêl mite hi nupui pasal an innei ṭhîn a; 35khawvêl lo la awm tûra thawhlehnaa tel tlâka ruatte erawh chu nupui pasal an innei dâwn tawh hlei nêm; 36thih pawh an thi leh thei dâwn tawh lo, vântirhkohte ang an ni; thawhlehna changtute an ni a, Pathian fate an ni. 37Mitthi kaihthawh thu chu Mosia pawhin a tilang alâwm. Hnimbuk meialh thu-ah khân Lalpa chu, ‘Abrahama Pathian, Isaka Pathian, Jakoba Pathian,’ tia a sawi kha. #Exod. 3:6. 38Ani chu mitthite Pathian a ni lo va, mi nungte Pathian a ni zâwk e. Ani tân chuan an nung vek a ni,” a ti a.

39Dân zirtîrtu ṭhenkhat chuan, “Zirtîrtu, i sawi dik hle e,” an lo ti bawk a, #Mk. 12:28. 40thu dang chu an zâwt ngam tawh lo. #Mt. 22:46; Mk. 12:34.

Mesia chungchâng zawh fiahna

(Mt. 22:41-46; Mk. 12:35-37)

41An hnênah, “Krista chu Davida fapa engtiziaa ti nge an nih? 42Fakna Hla bu-ah Davida ngeiin: #Sam. 110:1.

43‘Lalpa chuan ka Lalpa hnênah,

ka ding lamah lo ṭhu rawh,

I hmêlmate i ke nghahchhanah

ka han siam ang e,’

a ti a. 44Davidan ani chu, ‘Lalpa,’ a tih si chuan, engtin nge a fapa a nih theih ang?” a ti a.

Dân zirtîrtute laka fîmkhur tûr

(Mt. 23:1-36; Mk. 12:38-40)

45Vântlâng hriatin a zirtîrte hnênah chuan, 46“Dân zirtîrtute lakah fîmkhur rawh u. Anni chuan kawrfual haa lên vêl an chîng a, dâwr hmuna chibai bûk an ngaina a, sunagog-a ṭhutna langsâr ber leh ruai ṭhehna hmuna ṭhutna ṭha ber an ngiat ṭhîn. #Lk. 14:7-14. 47Hêngho, hmeithai sum ei zawhsaka, mi hmuh atân maia rei tak tak ṭawngṭai chîng site hian hremna an tuar nasa ber ang,” a ti a.

Actualmente seleccionado:

LUKA 20: MIZCLBSI

Destacar

Copiar