Lucas 23
23
Nai Jesus iha governador Pilatus nia oin
(Mateus 27:1-2,11-14; Marcos 15:1-5; João 18:28-38)
1Hotu tiha, ema Judeu nia ulun boot sira hotu hamriik hodi lori Jesus ba governador Pilatus. 2Too iha governador nia oin, sira komesa foo sala ba Jesus dehan, “Ami kaer toman Ema nee tau lia ba povu para kontra estadu. Nia haruka povu la bele selu impostu ba liurai boot César. Nia mos deklara katak, Nia mak Kristu, ema Judeu sira nia liurai.”
3Entaun Pilatus husu ba Jesus, “O mak ema Judeu sira nia liurai duni ka?”
Jesus hataan, “Ita dehan nee loos.”
4Depois Pilatus foo sai nia desizaun ba nai lulik nia xefi sira ho ema lubuk boot nee, dehan, “Hau la hetan Ema nee nia sala ida atu bele kastigu Nia.”
5Maibee sira ulun toos nafatin hodi protesta dehan, “Lae, Nia tau lia ba povu no hanorin iha nebee ba nebee para povu halo rungu-ranga, komesa hosi provinsia Galileia, too iha rai Judeia tomak, mai too iha nee.”
Nai Jesus iha liurai Erodes nia oin
6Rona nunee, governador Pilatus husu ba sira, “Se hanesan nee, Nia ema Galileia ka?”
7Sira hataan dehan, loos. Nunee governador haruka Jesus baa iha liurai Erodes, tanba nia mak ukun iha provinsia Galileia, i tempu nebaa nia iha hela sidade Jerusalém.
8Bainhira Erodes haree Jesus, nia kontenti teb-tebes, tanba kleur ona nia hakarak atu hasoru Nia. Erodes rona ona buat barak kona ba Jesus, i hakarak atu haree Nia halo milagre ruma. 9Entaun Erodes husu pergunta oi-oin ba Jesus, maibee Nia la hataan liafuan ida. 10Nai lulik nia xefi sira ho mestri relijiaun sira mos hamriik besik hodi duun nafatin dehan, Nia halo ona sala oi-oin. 11Depois liurai Erodes ho nia soldadu sira komesa hamoe Jesus i goza Nia. Sira foo hatais Nia ho ropa nabilan ida nebee baibain liurai sira mak hatais, depois haruka Nia fila ba governador Pilatus. 12Uluk Erodes ho Pilatus inimigu malu, maibee iha loron nee sira nain rua diak malu fali.
Governador Pilatus foo kastigu mate ba Nai Jesus
(Mateus 27:15-26; Marcos 15:6-15; João 18:39—19:16)
13Depois, governador Pilatus halibur nai lulik nia xefi sira, ukun nain sira ho tan povu. 14I nia foo sai nia desizaun dehan, “Imi lori Ema nee mai hau hodi foo sala ba Nia dehan, Nia sempre tau lia ba povu para kontra estadu. Maibee hau investiga tiha ona Nia iha imi nia oin, i hau la hetan Nia sala ida atu bele kastigu Nia. 15Liurai Erodes mos la hetan Nia sala ida. Tanba nee mak liurai haruka Nia fila fali mai ita. Imi haree ona, ema nee la halo sala ida atu hau bele foo kastigu mate ba Nia. 16Nunee, hau sei haruka baku Nia ho sikoti, depois husik fali Nia.”
17[Iha tempu nebaa, bainhira ema Judeu sira halo festa Paskua, governador sempre hasai ema dadur ida tuir sira nia hakarak.]#23:17:Dokumentu Gregu balu hakerek versikulu ida nee, maibee dokumentu nebee antigu liu, lae. 18Entaun sira hotu hakilar rame-rame dehan, “Oho tiha Nia! Hasai mak Barabás!” 19(Barabás nee tama kadeia tanba nia kontra estadu Roma, i nia mos oho ema.)
20Dala ida tan, Pilatus koalia ho lian makaas ba sira, tanba nia hakarak husik Jesus.
21Maibee sira hotu hakilar dehan, “Prega tiha Nia ba krus! Prega tiha Nia ba krus!”
22Pilatus koalia ba sira ba dala tolu, dehan, “Nia halo krimi saida? Hau la hetan razaun ida para hau bele kastigu mate Nia. Nee mak hau haruka ema baku deit Nia ho sikoti, depois husik fila fali.”
23Maibee ema barak nee hakilar bebeik ho lian makaas hodi obriga para prega mate Jesus iha krus. Ikus mai, sira mak manaan. 24Entaun Pilatus desidi tuir sira nia hakarak. 25Nia hasai ema nebee mak sira husu, ida nebee dadur hela tanba kontra estadu i oho ema. I nia entrega Jesus ba sira nia liman hodi halo tuir sira nia hakarak.
Ema prega Nai Jesus iha krus
(Mateus 27:32-44; Marcos 15:21-32; João 19:17-27)
26Depois soldadu sira lori Jesus sai hosi governador Pilatus nia uma. Iha dalan klaran sira hasoru ema ida naran Simão hosi Sirene, nia foin mai hosi foho atu tama ba sidade. Sira obriga Simão lori Jesus nia krus hodi lao tuir Nia.
27Ema barak lao tuir Jesus, i senhora balu tanis halerik ba Nia. 28Jesus fila oin ba sira hodi dehan, “Senhora Jerusalém oan sira, lalika tanis mai Hau. Diak liu tanis halerik ba imi nia aan rasik, i tanis ba imi nia oan sira. 29Tanba aban-bainrua susar boot sei kona imi too ema dehan, ‘Feto nebee sorti mak sira nebee la iha oan, sira nebee nunka tuur ahi i nunka foo susu bebee.’ 30Bainhira susar nee mai, ema sei halerik ba foho dehan, ‘Monu hanehan ona ami baa!’ Sira sei dehan ba foho kiik sira, ‘Hakoi tiha ami baa!’#Oséias 10:8; Apokalipse 6:16 31Se ai nebee matak mos ahi haan, saa tan ai nebee maran tiha ona. Ema foo terus mai Hau, maski Hau la sala. Saa tan ba imi sala nain sira.”
32Bainhira soldadu sira lori Jesus, sira lori mos ema aat nain rua para kastigu mate hamutuk ho Nia. 33Too iha fatin ida naran Ulun Ruin, sira prega Jesus ba iha krus. Sira prega mos ema aat nain rua nee, ida iha Jesus nia sorin loos, ida iha Nia sorin karuk.
34[Jesus halo orasaun dehan, “Hau nia Aman, foo perdaun ba ema sira nee nia sala, tanba sira la hatene saida mak sira halo.”]#23:34a: Dokumentu Gregu balu hakerek liafuan hirak nee, maibee dokumentu antigu liu, lae. Depois soldadu sira dada rifa hodi fahe Jesus nia hena ba malu.#Salmu sira 22:19
35Ema barak hamriik hela hodi haree. I ema Judeu nia boot sira tarata Jesus dehan, “Nia salva ona ema seluk. Se Nia mak Kristu duni, Ida nebee Nai Maromak hili, entaun tuir loloos agora Nia salva Nia Aan rasik.”#Salmu sira 22:8
36Soldadu sira mos besik Jesus hodi goza Nia. Sira lolo tua siin ba Nia#Salmu sira 69:22 37hodi dehan, “Se O mak ema Judeu sira nia liurai, salva O nia Aan baa!”
38Sira prega ai kabelak ida ba krus iha Jesus nia ulun leten. Iha ai kabelak nee hakerek dehan, “Ema nee ema Judeu sira nia liurai.”
39Ema aat ida nebee prega hela iha Jesus nia sorin mos hatete aat Jesus dehan, “O mak Kristu ka? Entaun, salva O nia Aan no salva mos ami!”
40Maibee ema aat ida seluk siak nia dehan, “O la tauk Nai Maromak ka? O simu kastigu mate hanesan mos Nia. 41Ita nain rua merese duni simu kastigu nee, tanba ita nia hahalok aat. Maibee Ema nee la halo sala buat ida.” 42Depois nia dehan, “Jesus, bainhira Ita Boot kaer ona ukun nudar Liurai, hanoin hau baa.”
43Jesus hataan ba nia, “Hau promete ba o, loron ohin kedas o sei hamutuk ho Hau iha lalehan.”
Nai Jesus mate
(Mateus 27:45-56; Marcos 15:33-41; João 19:28-30)
44Komesa meudia, nakukun taka metin tiha rejiaun nee tomak too tuku tolu lokraik, 45tanba loro matan la foo naroman tiha. Iha Uma Kreda Boot iha kortina boot ida hodi haketak fatin nebee lulik liu. Derepenti deit, kortina nee naklees fahe ba rua.#23:45:Kurtina nee naklees, hatudu katak Nai Jesus nia mate loke dalan atu ita ema bele tama liu ba Nai Maromak nia prezensa. (Haree mos Ebreu 9:1-15, Efezu 3:12.) #Ezodu 26:31-33
46Jesus bolu ho lian makaas dehan, “Hau nia Aman, Hau entrega Hau nia klamar ba Ita Boot nia liman.” Koalia tiha nunee, Nia iis mos kotu.#Salmu sira 31:5
47Komandante Roma haree buat nebee mak akontese, i nia hahii Nai Maromak dehan, “Tebes duni! Ema nee Ema ida ke moris loos.”
48Ema hotu nebee ohin mai asisti nee, sira haree saida mak akontese, i sira fila ba uma ho laran tristi teb-tebes. 49Maibee senhora sira nebee uluk tuir Jesus hosi Galileia too iha Jerusalém, sira sei hamriik hela hosi dook hodi haree. Nunee mos ema sira nebee konhese besik liu Nia.#Lucas 8:2-3
José hakoi Nai Jesus nia mate isin
(Mateus 27:57-61; Marcos 15:42-47; João 19:38-42)
50-51Iha ema ida naran José, hosi sidade Arimateia iha provinsia Judeia, buka dalan atu hakoi Jesus nia mate isin. Nia ema ida ke diak no moris loos, i nia hein hela Nai Maromak hatudu Nia ukun nudar Liurai. José mos membru tribunal relijiaun Judeu nian, maibee nia la konkorda ho nia kolega sira nia desizaun hodi kastigu mate Jesus. 52Entaun nia baa hasoru governador Pilatus hodi husu lisensa atu hakoi Jesus nia mate isin. 53Hetan tiha lisensa, José baa hatuun Jesus nia mate isin hosi krus. Depois nia falun ho hena mutin diak nian i nia lori baa tau iha rate. Fatin nee, fatuk lolon nebee ema bahat tiha ona sai rate, maibee seidauk iha ema ida hatama iha laran. 54Tempu nee, loron Sesta iha lokraik ona, besik atu tama ona ba loron Sabadu, ema Judeu nia loron deskansa.#23:54:Tuir ema Judeu, kuandu loro matan monu mak tama ona ba loron foun. Nunee bainhira loro matan monu iha Sesta, tama kedas ba loron Sabadu. Iha loron Sabadu sira la bele halo serbisu.
55Senhora sira nebee akompanha Jesus hosi Galileia, sira lao tuir José too iha rate. Sira haree rate nee i haree José latan Jesus nia mate isin baa. 56Hotu tiha, sira fila ba uma hodi prepara ai been morin ho mina morin oi-oin. Too iha loron Sabadu, sira deskansa tuir sira nia lei.#Ezodu 20:10; Deuteronomio 5:14
Actualmente seleccionado:
Lucas 23: BTDT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Wycliffe Timor-Leste.