Jenesis 12
12
Nai Maromak haruka Abrão sai hosi nia rain
1Depois NAI Maromak dehan ba Abrão, “O sai tiha hosi o nia familia, hosi o nia aman nia uma, no hosi o nia aldeia. Baa iha fatin ida nebee Hau sei hatudu ba o.
2Hau sei foo bensaun ba o,
i halo o nia naran sai boot.
O nia jerasaun sei amenta barak,
i sai nasaun boot no konhesidu.
Liu hosi o, ema seluk sei hetan bensaun.
3Hau sei foo bensaun ba ema nebee foo bensaun ba o.
Maibee Hau sei foo malisan ba ema nebee foo malisan ba o.
Rona didiak mai!
Nasaun hotu-hotu iha mundu sei hetan bensaun liu hosi o.”
4-5Iha tempu nee, Abrão tinan 75. Nia lori nia feen Sarai, ho nia alin nia oan Lo, ho nia rikusoin hotu, ho nia atan sira nebee nia hetan iha sidade Aran. Depois sira husik tiha Aran, tuir NAI Maromak nia orden. Nunee sira lao nafatin, too iha fatin ida naran Kanaán.
6Too iha nebaa, Abrão lao haleu tiha rai nee, too besik fatin ida naran Sikem. I sira hela la kleur besik ai huun boot ida iha Moré. Iha tempu nee, ema Kanaán sira sei hela iha rai nee. 7Iha fatin nee, NAI Maromak hatudu Aan ba Abrão. Nia dehan, “Hau sei foo rai nee ba o nia jerasaun sira.” Tuir mai, Abrão hada fatuk hanesan altar ida, hodi halo sakrifisiu ba NAI Maromak, ida nebee hatudu ona Aan ba nia.
8Liu tiha nee, Abrão sira muda ba foho iha parte sul#12:08:‘Sul’ ho lian Indonézia dehan ‘selatan’., i sira hela la kleur iha aldeia Betél ho aldeia Ai nia klaran. Iha fatin nee nia halo altar ida hodi adora NAI Maromak. 9Nee liu tiha, nia muda hosi fatin ida ba fatin seluk, too iha rai Negebe iha Kanaán parte sul.
Abrão baa iha rai Ejitu
10Iha tempu ida, rai Kanaán hamlaha boot. Nee mak Abrão sira lao dook tiha ba iha parte sul, too iha rai Ejitu, i sira hela provizoriu iha nebaa. 11Bainhira sira atu tama ba rai Ejitu, nia foo hatene ba nia feen Sarai, dehan, “O nee feto bonita teb-tebes. 12Se ema Ejitu haree o bonita nunee, sira sei oho tiha hau, tanba hau o nia laen. Nunee sira bele hadau tiha o. 13Entaun, diak liu o foo hatene ba sira dehan, hau o nia maun. Nunee sira la oho hau, maibee sira sei haree hau diak, tanba o.”
14Bainhira Abrão sira too ona iha rai Ejitu, ema sira haree feto nee bonita la-halimar. 15Bainhira liurai nia funsionariu sira haree nia, sira baa gaba feto nee iha liurai nia oin. I sira lori feto nee ba iha liurai nia uma. 16Nunee liurai haree Abrão diak, tanba Sarai. Nia foo ba Abrão bibi, bibi malae, karau vaka, kuda buru ho kuda kamelu. I foo mos atan mane ho atan feto.
17Maibee tanba liurai hola fali ema nia kaben hodi baa iha nia uma, nee mak NAI Maromak kastigu nia ho nia uma kain hotu ho moras aat oi-oin. 18Entaun liurai bolu Abrão hodi husu ba nia, “Nusaa mak o halo hanesan nee mai hau? Nusaa mak o la foo hatene mai hau katak feto nee o nia feen?! 19Tan saida mak o dehan, nia o nia feton? Hela ituan deit hau hola nia sai hau nia kaben. O nia feen mak nee. Lori nia baa ona!” 20Tuir mai, liurai foo orden ba nia ema sira, para lori Abrão ho nia kaben, ho sira nia sasaan hotu, sai hosi rai nee.
Actualmente seleccionado:
Jenesis 12: BTDT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Wycliffe Timor-Leste.