Jenesis 11
11
Uma ain aas Babél
1Hori uluk, ema hotu iha mundu nee koalia lian ida deit. 2Sira balu muda fatin ba iha loro-sae. Too iha rai tetuk ida iha Sinear, sira hela iha nebaa.#11:2:‘Ba iha loro-sae’ iha lian Ebreu bele dehan mos ‘hosi loro-sae’. Sinear nia naran seluk ‘Babél’.
3-4Sira hotu koalia ba malu dehan, “Maun-alin sira! Mai ita harii sidade boot ida. Ita tenki halo tijolu, i sunu halo forti. Ita hada tijolu sira nee, halo metin ho alkatraun. Depois ita harii uma ain aas ida too iha loro-leten, para ita bele hetan naran boot. Nunee ita sei sai nasaun boot ida, para ita la bele namkari ba rai bara-barak.”
5Tanba nee, NAI Maromak tuun mai haree sidade ho uma aas nebee sira halo nee. 6I Nia hatete, “Ema sira nee hotu rai ida, i uza lian ida. Saida mak sira halo dadauk nee, foin komesa hakat ida. Aban-bainrua, se sira hotu hamutuk hanesan agora nee, sira hakarak halo saida deit, bele. 7Diak liu Ita tuun baa halo sira nia lian sai keta-ketak tiha, para sira la bele komprende malu tan.”
8Entaun Nai Maromak tuun para halo sira nia lian rungu-ranga tiha. Ho nunee, Nia halo ema sira nee namkari ba iha fatin hotu-hotu iha mundu nee. I sira la halo tan sidade nee ona. 9Nee mak sira tau naran ba sidade nee, Babél. (Iha lian Ebreu, nee rona atu hanesan liafuan ida nebee dehan ‘rungu-ranga’). Tanba NAI Maromak halo rungu-ranga tiha sira nia lian, i halo sira namkari ba iha fatin-fatin iha mundu nee.
Husi Sem too Abrão
10Nee Sem nia jerasaun. Bainhira rai nabeen liu tiha ona tinan rua, natoon Sem tinan 100, nia hetan oan mane ida, naran Arpaxad. 11Depois nia sei moris tan tinan 500, i nia hetan tan oan mane ho oan feto.
12Bainhira Arpaxad tinan 35, nia hetan oan mane ida, naran Xela. 13Tuir mai, Arpaxad sei moris tan tinan 403, i nia hetan tan oan mane ho oan feto.
14Bainhira Xela tinan 30, nia hetan oan mane ida naran Eber. 15Tuir mai, Xela sei moris tan tinan 403, i nia hetan tan oan mane ho oan feto.
16Bainhira Eber tinan 34, nia hetan oan mane ida, naran Peleg. 17Tuir mai, Eber sei moris tan tinan 430, i nia hetan tan oan mane ho oan feto.
18Bainhira Peleg tinan 30, nia hetan oan mane ida, naran Reú. 19Tuir mai, Peleg sei moris tan tinan 209, i nia hetan tan oan mane ho oan feto.
20Bainhira Reú tinan 32, nia hetan oan mane ida, naran Seruge. 21Tuir mai, Reú sei moris tan tinan 207, i nia hetan tan oan mane ho oan feto.
22Bainhira Seruge tinan 30, nia hetan oan mane ida, naran Naor. 23Tuir mai, Seruge sei moris tan tinan 200, i nia hetan tan oan mane ho oan feto.
24Bainhira Naor tinan 29, nia hetan oan mane ida, naran Tera. 25Tuir mai, Naor sei moris tan tinan 119, i nia hetan tan oan mane ho oan feto.
26Komesa Tera tinan 70, nia hetan oan mane nain tolu mak, Abrão, Naor ho Aran.
Tera nia jerasaun
27Nee mak Tera nia jerasaun sira. Tera nia oan mak Abrão, Naor ho Aran. Aran hetan oan mane ida, naran Lo. 28Aran mate iha nia moris fatin, naran Ur, iha ema Kasdim sira nia rain. Bainhira nia mate, nia aman Tera sei moris. 29Abrão kaben ho Sarai. Naor kaben ho Aran nia oan feto, naran Milka. Aran mos hetan oan mane ida, naran Iská. 30Maibee Sarai la iha oan.
31Iha loron ida, Tera lori nia oan Abrão, nia feto foun Sarai, ho nia bei-oan Lo, sira sai husik hela rai Ur, atu baa rai Kanaán. Maibee too iha rai Haran sira hela deit iha nebaa. 32Iha fatin nee, Tera mate, ho tinan 205.
Actualmente seleccionado:
Jenesis 11: BTDT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2024 Wycliffe Timor-Leste.