Matius 2
2
Mie mande maiꞌaono te mata oleo
2:1-12
1Yesus nolente we liwuno Betlehem we kadieno Yudea ne dhamanino kolaki Herodes. Gahaꞌa dohatomo we Yerusalem seemie hodua mie mande maiꞌaono te mata oleo. Andoa ini dopoguhuꞌao waweno sabhaha kulipopo. 2Andoa dofee-feena ambado, “Ne amai bhahaa omputo Yahudi kaneꞌo lumenteꞌano? Ingka tawohaemo kulipopo katandaino te mata oleo. Kamaiꞌa mani ini tatumaohaoꞌao somba mani ne Anoa.” 3Nofetingke peda naꞌa kolaki Herodes nokohedu sepaliꞌa, miendo Yerusalem dopuli dua dokohedu. 4Anoa nofohompumo kosasawindo neangkando imamu bhe pande Kitabi miendo Yahudi maka nofee-feenada bhahaꞌi ne amai so kalenteꞌano Mesias Omputo fosalamatino. 5Dotobhoosimo ambado, “We liwuno Betlehem, we kadieno Yudea, kapaꞌamo weo Kitabindo anabii notibuhi peda aini,
6‘Betlehem, ne kadieno Yehuda,
hintu kotu-kotuꞌu suano liwu fofoliuno kahobu
ne olotando liwu bhalaꞌino ne kadieno Yehuda,
hampano namaiꞌao ne hintu namehe seemie so neangka,
Anoamo so mowano umatiku Israel.’ ” #Mi 5:2
7Pada peda naꞌa, Herodes nobhasimo mie mande naꞌa tamaka miina naefemata-mataa. Andoa ini nofeenada nofotinda-tindada bhahaꞌi endefiemo dowohae kulipopo katandaino. 8Pada peda maitu notududamo dakumala we Betlehem bhe nopugauanda ambano, “Kalamoomu, ondofieꞌomu anaꞌi anaꞌa fotinda-tindaeꞌomu. Moꞌawaaneomu kaowu mefebhihitai kanauꞌomu, neanomo amai dua atumaohao sombaku ne Anoa.” 9Pada dofetingke kaowilino kolaki Herodes naꞌa, dokalamo. Gahaꞌa kulipopo katandai newohando kohaꞌanomo te mata oleo, nopaꞌinduluanda ampa nohato te potalaꞌano kaeateꞌano anaꞌi naꞌa maka nofetumpu. 10Kaꞌiando maka dowoha toha kulipopo anaꞌa. 11Hato dopesua weo lambu, dowohamo anaꞌi naꞌa bhe Maria inano. Andoa dosudhu dotaohao sombado ne anaꞌi naꞌa. Pada anaꞌa dolengkasi kahatoꞌaondo maka defoampe kawaꞌao, o bulawa, o dupa bhe mina-mina nekonando mur. 12Tamaka Lahataꞌala nofodhagada weo nifi keana dosuli we Herodes, dadiꞌanomo dosulimo we liwundo doangka ne kaangkaꞌa sigaoꞌano.
Dogampi we Mesir
2:13-15
13Dokundo mie mande maitu, malaꞌekatino Ompu nofotiwohamo wutono ne Yusuf, ambano, “Wanumo, wowoꞌo anaꞌi aitu bhe inano maka fileiꞌomu we witeno Mesir. Meateomu ne watu ampa amohatoko toha, kapaꞌamo anaꞌi aitu naꞌumondofie Herodes patudhuno namongkoe.” 14Yusuf lasao nowanu, nowowoꞌo anaꞌi amaitu bhe inano maka alo aitu dua dogampi we Mesir. 15Andoa deate-ate we naꞌa ampa nomate Herodes. Aini nokadhadhia so nokoꞌulaꞌao nekobhoasaꞌaono Ompu nefosampeno anabii, “Anaku abhasie maiꞌao we witeno Mesir.” #Hos 11:1
Anaꞌi we Betlehem dopongkoda
2:16-18
16Sanopandeꞌao lalono gahaꞌa dobhohe-bhoheꞌie mie mande maitu, Herodes noꞌamaha sepaliꞌa. Dadiꞌanomo nofotudumo damongko kosasawindo anaꞌi moꞌane tapaꞌo kumapono haa taꞌu we Betlehem bhe liwu-liwu ne owano. Aini nopokantibha bhe wakutuu katiwohaꞌano kulipopo, peda nefeenaꞌaono ne mie mande naꞌa. 17Pedamo aini nokoꞌula bhoasaono Ompu nefosampeno anabii Yeremia,
18“We Rama notifetingkemo kaꞌulei bhe kangkoꞌae timopeaꞌaono lalo;
gahaꞌa Rahel noꞌaefi anaꞌiꞌino,
nokiido dalumawesie hampano anaꞌiꞌino miinadamo.” #Yer 31:15
Dosuli maiꞌao we Mesir
2:19-23
19Nomate kaowu Herodes, malaꞌekatino Ompu nofotiwohamo wutono ne Yusuf weo nifi we Mesir. 20Ambano malaꞌekati naꞌa, “Wanumo, wowoꞌo anaꞌi aitu bhe inano maka suli we witeno Israel, kapaꞌamo mie so malano inawano anaꞌi aitu domatemo.” 21Yusuf nowanumo, nowowoꞌo anaꞌi aitu bhe inano maka dosuli we witeno Israel. 22Pada anaꞌa Yusuf nofetingke Arkelaus, anano Herodes nololi amano nembali kolaki we kadieno Yudea. Dadiꞌanomo noteꞌi nasumuli we naꞌa. Gahaꞌa Ompu nofohato Yusuf weo nifi namansuhu we kadieno Galilea. 23Dohato we Galilea deatemo ne seꞌonu kota koneaꞌano Nasaret. Pedamo naꞌa nokoꞌulaꞌao bhoasaono Ompu nefosampendo ana-anabii mulaoꞌaono anaꞌi amaitu, “Anoa dakumonae miendo Nasaret.”
Actualmente seleccionado:
Matius 2: mnbSD
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.