Matius 3
3
Yohanes Fokadiuno
3:1-12
Mrk 1:1-8; Luk 3:3-9, 15-17; Yoh 1:19-28
1Ne wakutuu anaꞌa notiumbamo Yohanes Fokadiuno we pandaso bhalano ne kadieno Yudea. Anoa nefolele Bhihita Metaa, 2ambano, “Fetompaꞌao dhosamiu, doliomu ne Lahataꞌala, kapaꞌamo Kafopahintaꞌano Lahataꞌala nomaꞌomo.” 3Yohanesmo ini nepulaoꞌaono anabii Yesaya ambano,
“Nandoo suaha mekei-keino we pandaso bhalano,
‘Mebhongkaomu kaangkaꞌa so Ompu
fekalaaꞌeomu so kaangkaꞌano.’ ” #Yes 40:3
4Pakeano Yohanes wuluno unta, kagegeno o kuli. #3:4 Pakeano Yohanes nopototo bhe pakeano anabii Elia; 2Raj 1:8 Nehumaano kapunda bhe golano kainiua. 5Dobhahi mie maino ne Yohanes, maiꞌaono we Yerusalem, maiꞌaono ne kosekaꞌewaꞌae kadieno Yudea bhe maiꞌaono ne sabhaha kadie ne owano umeleno Yordan. 6Mie andoa ini dekapuna domangakuꞌao dhosando maka nokadiuda Yohanes we umeleno Yordan.
7Dobhahi dua miendo Farisi bhe miendo Saduki mefekadiuno. Sanowohada, Yohanes nopugaumo ambano, “Hintimiu ini sampuꞌano ule modai. Ambamo laꞌae bhahaa lumapaomu ne amahano Lahataꞌala so humatoꞌano? 8Dadiꞌanomo fotiwohaeꞌomu ne podiumiu, ingka gahaꞌa fetompaanemoomu dhosamiu. 9Koise nokofekihi we lalomiu, ‘Ingka insaodi ini sampuꞌano Abraham, ⸤ tetewei tasumalamati⸥ ’. Kapaꞌamo Lahataꞌala nokokuasa naefokonandoo sampuꞌano Abraham mahinggamo namaiꞌao ne kontu ini. 10Polulu nokantaa-ntaamo ne pahakano sau. Sabhaha sau tapa mokesaꞌano bhake tetewei datumuꞌoe maka daꞌumohoe weo efi. 11Idi akadiuangkoomu oe mbali katandaino fetompaꞌao dhosamiu, tamaka so humatono mada kaowu nofoliu kanau kuasa. Mahingga alumense katapuno kaampinino pae amantasia. Anoa naꞌa nakumadiuangkoomu Rohino Lahataꞌala bhe efino. 12Katepi nontiintahaemo so natumepisaoꞌao gandum ampa naonggela. Onuno gandum nahumompunaane weo lambu kaenteiꞌa oti, tamaka kulino bhe kansiano laano natumunuane efi tapa mopoopeono.”
Yesus nokadiuꞌe Yohanes
3:13-17
Mrk 1:9-11; Luk 3:21-22; Yoh 1:32-34
13Wakutuu anaꞌa nohatomo Yesus we umeleno Yordan nomaiꞌao we Galilea, nefekadiu ne Yohanes. 14Tamaka Yohanes miina naꞌumundaꞌaanea ambano, “Ingka tabeano idi so nekadiumu, peda amai dua hintu maiꞌi kanau?” 15Nopugaumo Yesus ambano, “Hunsaꞌanomo aitu, kapaꞌamo nofaraluu peda aini so damangkafiꞌao kosasawiꞌae kapoindalono Lahataꞌala.” Dadiꞌanomo Yohanes noangkafie kamesalono.
16Pada nokadiuꞌe, Yesus lasao nolimba maiꞌao weo oe, gahaꞌa tanosimoengkaꞌamo lani maka nowoha Rohino Lahataꞌala nokatu futeꞌo, nosampu te wawono. 17Tanotifetingkemo dua suaha nomaiꞌao te lani ambano, “Ainimo Anaku timoasiꞌaono, neposahasiꞌaono laloku.”
Actualmente seleccionado:
Matius 3: mnbSD
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.