মার্ক 15
15
পীলাত মাং হ্রিঃগা যীশু
(মথি ২৭:১-২৬; লূক ২৩:১-২৫; যোহন ১৮:২৮; ১৯:১৬)
1গংখ্যুক ফুংগ্রিরোচা কংগং চঃজঃগা গংখ্যুক ওয়াগ্রি, কেয়েংছারানা মহা আতৈংবাংগ্রি আলুং লুঃউগো তেরেমা খঃরো আতৈংবাং লুককেলিইরি। য়াংনক য়াংসুউরো যীশুগো খ্যুয়েং য়ুউ লাঃরো, রোমীয়রোমা আগ্রি ওখ্যুকসু পীলাত মাংমা একেলিরি। 2য়াংখা পিলাত যীশুগো মিংলিরি, “নাং যিহূদীরোমা মাং লঃ?”
যীশু আফ্রি পিইলিইরি, “কোবাং আম্হেং চাঃগা প্ররি।”
3গংখ্যুক ফুংগ্রিরোচা যীশু নাঃমিনা কংগং আপ্রই তাংগেরি। 4য়জংছুখা পীলাত মাংচা প্রেংরো যীশুগো মিংলিরি, “নাং তুখুউলি অাফ্রিঃ মিপিই লঃ? ক্রি, দিঃ লুঃউরো, নাককো কংগং আম্যা আপ্রই তাংগেতি।”
5ছুগি যীশু অর তুখুউলি অাফ্রিঃ মিপিইলিব্যা। য়াংখা পীলাত মাংচা এংঅলিরি।
6ক্যুয়েম্রক পুয়িইমা লুঃউরো যা থংক্যাসাগো তংগেতি, পীলাত মাংচা য়াং থংসিগো রুওয়েতি। 7য়াং আখিংমা বারাব্বা নাঃমিনা তয়ক থংমা ক্যাহিকলিরি। চৈই ফ্রইতিখা, য়াংসুউচা লুঃউ ব্রাক্কা নিংরো কোঃ লুঃউগো সেঃবৈলিরি। 8লুঃউরোচা পীলাতদুঃ লাঃরো প্রগেলিরি, “কোবাং খ্যাংখামুছু যা লুকতিলি, আগুলি য়াংচা লুকফিই।”
9পীলাত য়াংসুউরোগু প্রলিইরি, “নাংরো যা লুঃগেতিলি, ঙা যিহূদীরোমা মাংগো রুওয়েলৈফু লঃ?” 10গংখ্যুক ফুংগ্রিরো যীশুগো মুংরো, পীলাত মাংমা এচাগো পীলাত মাং সিকরি। 11ছুগি গংখ্যুক ফুংগ্রিরোচা লুঃউরোগু চাঃগা থুউরো মেং তাংলিরিচাগা, য়াংসুউরো যীশুগো পিঃরো বারাব্বাগো তংগেঞ্যং।
12পীলাত প্রেংরো লুঃউরোগু মিংলিরি, “য়জংছুগি নাংরো যাসুগো যিহূদীরোমা মাং প্রগেতি, য়াংসুউগো য়ুউরো ঙা যা লুকফুলি?”
13লুঃউরোচা অঃরো প্রগেলিইরি, “য়াংসুউগো থুউ খেবলৈ।”
14পীলাত প্রলিইরি, “যাফুলি, য়াংসুউ যা আফ্রই লুকরিলি?”
য়িগিলি লুঃউরোচা অর আম্যা অঃরো প্রগেলিইরি, “য়াংসুউগো থুউ খেবলৈ।”
15পীলাত য়াংখা লুঃউরো চিই সায়াঞ্যং বারাব্বাগো য়াংসুউরোবামা রুওয়েলৈতি, অর যীশুগো কংগং আম্যা ক্রোউ দুকনা বুকফু অানা পিইরো, থুউ খেঃফু কিজু পিইলিরি।
সুরুয়িইরো আরিঃ আসুয়েং প্রুক্কেচা
(মথি ২৭:২৭-৩১; যোহন ১৯:২,৩)
16য়াংনক সুরুয়িইরোচা যীশুগো য়ুউরো ওকখ্যুকসু আগ্রি ইং আথিঃদুঃ ওয়ংখাগেতি। য়াংদেমা য়াংসুউরো আখ্রা সুরুয়িইরোগু তেরেমা চুককেলিরি। 17য়াংসুউরো যীশুগো খেরেং রং আওয়ে ওয়েচিগেলিরি, অর চুউ আরুওয়কনা তুখু গংখ্যুক লুকরো যীশু আগংমা ওয়েচিগেলিরি। 18য়াংনক যীশুগো য়াংসুউরো প্রগেলিরি, “যিহূদী মাং, অংম্রাংবাজি!”
19য়াংসুউরো দুক তুখুনা যীশু আগংমা আপ্রেইং আপ্রেইং বুককেলিরি অর যীশু কাইংথামা তুওয়েংছি বৈকেলিরি, অর পছতু তুকরো যীশুগো ম্যাকন্হা পিইরিঞ্যং প্যাংগেলিরি। 20দিঃ পুয়েং আঃরি-আসুয়েং প্যাংব্রিনক, য়াংসুউরো থুউ খেরেং রং আওয়েকো খ্যুয়ে য়ুউরো, যীশুগো কোঃ আওয়েকো ওয়েচিগেলিরি অর থুউ খেফু কিজু য়ুউ লাঃগেলিইরি।
থুউ আথাকমা আস্যাং যীশু
(মথি ২৭:৩২-৪৪; লূক ২৩:২৬-৪৩; যোহন ১৯:১৭-২৭)
21য়াং অাখিংমা শিমোন নাঃমিনা কূরীণী ম্রুগা লুঃউ তয়ক, রুওয়াগা প্রেংরো য়াং লেংগা লাঃলিইরি। দিঃ লুঃউচা ফ্রইতি আলেকসান্দরনা রূফেরমা ফাখাং। সুরুয়িইরোচা য়াংসুউগো যীশু থুউগো রুওয়ক লাঃরাফু প্যাংগেলিইরি। 22য়াংসুউরো যীশুগো গলগাথা, প্রফুছুগি আগং আখুয়েং নাঃ মিনা আঃরা তুখুদুঃ য়ুউ লাঃখাগেতি। 23য়াংনক য়াংসুউরো যীশুগো আমুয়িং আড়ি থিঃরো আয়ঃছিইগো সকচিগেলিরি, ছুগি যীশুচা মসকলি। 24য়াংনক য়াংসুউরো যীশুগো থুউ খেকেলিরি। সুরুয়িইরোচা যীশু আওয়ে-আচাগো রুইগেফু কিজু মিঃফক লুকফু ক্রিগেলিইরি, যাসুমা কেইং কংফুলি।
25ঞিগা কুঃনাড়িমা য়াংসুউরো যীশুগো থুউ খেকেলিইরি। 26যীশু ছেংগ্যাংফাক ঈ চেপ্যইংমা রুই হিকলিরিচাগা, “যিহূদীরোমা মাং।” 27য়াংসুউরো দাম্রা নৈয়ককো যীশুনা আতু থুউ খেকেলিরি, তয়ককো বিফাককা অর তয়ককো ঞাফাক্কা। 28য়জংছুগি সেংস্যাংস কেইংমা চাঃগাচা আব্রিচুং ফ্রইরি, “য়াংসুউগো আপ্রইস্যাংরোনা নুউংলিরি।”
29যাসুউরো য়াং লেংগা লাঃগেলিইরি, য়াংসুউরো আগং ল্হুলো যীশুগো আড়ি-আসুয়েং প্রুরো প্রগেলিরি, “অ, নাং মুলঃ ওয়িপাসানা ক্যংগো ফ্রুরো সুংরাক আতুওয়ংমা লুকনৈংরি! 30আগু থুঃউগা সাকরো কোঃগুকোঃ মাঃ!”
31গংখ্যুক ফুংগ্রিরোনা কেয়েংছারারোচা যীশুগো আড়ি-আসুয়েং প্রুঃফু কিজু কোঃরো কোঃরো প্রগেলিরি, “দিঃ লুঃউচা লুঃউরোগু কিঃছিরি, কোঃগু কিঃমিছিনৈং। 32দিঃ লুঃউচা মশীহ মুহুক লঃ, ইস্রায়েলরোমা মাং! থুউ খেচাগা য়াংসুউ সাকলেপেচি, যাফুলিছুগি ঙারো ম্রাংরো আক্যুং রাঃঅং।”
যীশুনা আতু যাসুরোগু থুউ খেলিইরি, য়াংসুউরোলি যীশুগো আনৈং চাঃগা প্রগেলিইরি।
আস্যাং যীশু সিইখ্রাং
(মথি ২৭:৪৫-৫৬; লূক ২৩:৪৪-৪৯; যোহন ১৯:২৮-৩০)
33নক্কা ম্যুয়েংদি তিছি ন্হৈনাড়ি কাবাং সুংনাড়ি তৈঅং প্রিলুংচা ম্যুয়েংরো হিকলিরি। 34সুংনাড়ি তিইখা যীশু আঃনা অঃরো প্রলিইরি, “এলোই, এলোই, লামা শবক্তানী,” প্রফুছুগি থাওরাচা ঙাক ফুরাস্যাং, “থাওরাচা ঙাক ফুরাস্যাং, যাফু ঙাগো ফ্রুরো লাঃবালি?”
35যাসুরো যীশুবামা রেঃ হিকলিরি, য়াংসুউরো লৈগায়ক দিঃ চাঃগাগো ক্রাগেলিরি, “নাথং, নাথং, দিঃ লুঃউচা এলিয়গো খঃরি।”
36য়াংখা তয়কচা ব্রি লাঃরো আঃয়ঃ আড়িমি ফঃ তুখুগো ন্হলিরি অর দুক তুখু আফ্যামা খ্যুয়েংরো যীশুগো সকফো পিইলিরি।
য়াংসুউ প্রলিরি, “হিকবেচি, ক্রিমি এলিয় লাঃরো দিঃসুগো য়ুউ লাঃফু লঃ।”
37য়াংনক যীশুচা আঃনা অঃরো আসাক চুকতিলিরি। 38য়াংখা ওয়িপাসানা ক্যংমা লেংখাওয়া গাঃ আওয়েচা আথাককাবাং অক রকঅং চুকরো ন্হৈখ্রেং ফ্রইলিইরি। 39যা সুরুয়িই বোচা যীশু হ্রিইগা রেঃ হিকলিরি, য়াংসুউচা যীশু দিঃ পুয়েং সাক চুকতিচাগো ম্রাংরো প্রলিইরি, “দিঃসুচা আম্হেং থাওরা ফুরা ঈ সাঃ হিকলিরি।”
40লৈগায়ক মিঃমাচা আওয়িইগা রেঃরো দিঃচারোগু ক্রিহিকগেলিইরি। য়াংসুউরোমা হিকলিইরি মগদলীনী মরিয়ম, যাকোব নৈয়কমা আঞিচা অর যোষেফ মিখাং মরিয়মনা শালোমী। 41যীশু যাখা গালীলমা হিকলিইরি, য়াংখা থুউ মিঃমারোচা যীশুনা আতু আলুং আঃরাদুঃ লাঃগেলিরি অর যীশুগো প্রুকজুকেলিরি। অরলি আম্যা মিঃমা, যাসুউরো যীশুনা অাতু আতু যিরূশালেংদুঃ লাঃগেলিইরি, য়াংসুউরোলি য়াংদেমা হিকলিইরি।
আস্যাং যীশু সাংখ্যুয়েং
(মথি ২৭:৫৭-৬১; লূক ২৩:৫০-৫৬; যোহন ১৯:৩৮-৪২)
42য়াং রাকচা হিকলিরি পুয়িই য়াং রাক, প্রফুছুগি সাদাং হ্রিইগা রাক। 43যাখা নিং ওয়ংহ্লারি য়াংখা অরিমাথিয়া রুওয়াগা যোষেফচা মক্রকপ্রি পীলাতবাদুঃ লাঃরো যীশু আলংগো তংলিরি। য়াংসুউচা হিকলিরি মহা আতৈংবাংগ্রিমা আকং লুঃউ তয়ক অর য়াংসুউ কোঃদৈং থাওরা ফুরা ঈ নেংঙেংদ কিজু চংহিকলিরি। 44পীলাতচা কংগং এংঅলিচাগা, যীশু কংগং আয়াং আসাক চুকতিরি। আম্হেং আম্হেং যীশু সিইব্যা লঃ, য়াংচাগো চঃবোগু খঃরো পীলাতচা মিংলিরি। 45যাখা চঃবোগা, পীলাত ক্রালিরিচাগা, আম্হেং যীশু সিইব্যা, য়াংখা আলংগো যোষেফগো পিলৈতি। 46যোষেফ লাঃরো অাওয়ে ওয়িই য়ুখালিরি অর যীশু আলংগো খ্যারো য়াং আওয়েনা রঃলিরি, অর তংগো থুওয়ংরো লুকচা তুওয়ংমা যীশু আলংগো থাঃলিরি। য়াংনক যোষেফচা সাংখ্যুয়েং আওয়ামা ক্যকলুং তুলুং ল্হু য়ুউ লাঃরো ছুও থাঃলিইরি। 47যীশু আলংগো যাদেমা থাঃলৈতিলি, য়াংচাগো মগদলীনী মরিয়মনা যোষেফ মিখাং মরিয়ম ম্রাংগেলিইরি।
Actualmente seleccionado:
মার্ক 15: BBSRMZ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión