Luka 19
19
İsa u Zaxa
1İsa suka Eriha ra vêrdenê ra. 2Eriha de jü mêrıko de variyetın esti bi, no mêrık serê taşildaran bi. Namê niy Zaxa bi. 3İy wast kı İsay bıvênero, feqet lesa xo kılm biye. Ay ra sılxetiye ra nêşkiya İsay bıvênero. 4Waxto kı İsa uca ra ravêrenê, Zaxa vırniye ra vast, veciya dara hêcirı ser kı İsay bıvênero.
5İsa key kı ama verê darı, cor ro sêr kerd, vat: “Zaxa rew uca ra bê war! Ez gereko kı eyro kê to rê bıberi meyman.” 6Zaxa bı lez'a ama war. İy İsa kê xo de bı kêf'a kerd meyman.
7Kami kı na diye, nia vat: “İsa jü gunakari rê bi meyman!”
8Zaxa vest ra pay, İsay rê nia vat: “Wayir, nêmê mal-mılkê xo danan feqiran. Ekı mın jüyê ra bı nêheqi'a thaba gıroto, çar qatê iy peyser danan.”
9İsay nia vat: “Eyro no kê rest xeleşiyayenı. Çıkı no mêrık ki domanê İbrahimio. 10Xora, Lacê Mordemi ama kı owo kı biyo vindi, iy bıvênero, bıxelesno ra.”
Mesela des peranê siman
11Sılxetiye key kı gos nenê ni qesan ser, İsa amay bi nejdiyê Yeruşalimi. Mıleti qa vatenê, Hukumdariya Heqi nejdiye de êna meydan. Ay ra İsay inan rê mesela nanênı qeşi kerdı: 12“Pilanê mıleti ra jü mêrık sono welatê duri kı qıral hukumdarinı bıdero ni mêrıki. No mêrık peyser bêro kı welatê xo rê hukumdarinı bıkero. 13No mêrık veng dano des xızmetkaranê xo, ê hergo tekê jü perê simi#19:13 Perê simi: Greki de “Mina”; perıo kı vera nejdiyê se rocê guri de êno gırotenı. dano cı, vano, ‘Hata kı ez ênan, ni peran bızêdınê.’
14“Feqet mıletê ni welati i mêrıki ra qe hez nêkerdenê. Ay ra tay pilê welati rusnê lê qırali. İnan cı rê nia vato, ‘Ma nêwazenım no mêrık ma rê hukumdarinı bıkero.’
15“Feqet ancia ki no mêrık ni welati rê biyo hukumdar. No key kı peyser amo, veng do xızmetkarê kı peri day bi cı. İnan ra pers kerdo, wasto kı bımuşiyo, inan peri çıqa zêdınê. 16Xızmetkaro sıfteyın amo, vato, ‘Wayir, sıma jü perê simi day bi mın, mın o kerd des teni.’
17“Hukumdari iy rê vato, ‘To rınd kerdo, tı xızmetkaro de rınday! Tı guriyê qıckeki de sadıq biyay. Ay ra des sukan tı idarı kenay.’
18“Xızmetkarê dıdeyıni nia vato, ‘Wayir, sıma jü perê simi day bi mın, mın o kerd phanc teni.’
19“Hukumdari vato, ‘Tı ki phanc sukan idarı kenay.’
20“Bado xızmetkaro de bin êno, vano, ‘Wayir, perê to nawo. Mın o kerd wertê jü dısmalı, dard we. 21Tı mêrıko de çetınay; ay ra, ez to ra tersan. Çiyo kı heqa to tey çina, iy gênay; owo kı to nêramıto, iy çinenay.’
22“Hukumdari iy rê nia vato, ‘Tı çı xızmetkaro de xırabınay! Qesawa kı fekê to ra veciya, ez bı a qesa'wa to makum kenan. To zanenê, ez mêrıko de çetınan, çiyo kı heqa mın tey çina, iy gênan; owo kı mın nêramıto, iy çinenan. 23A sırı perıo kı mın day bi to, çay to nêzedına? Key kı peyser aman, mın perê xo bı faiz'a gırotenê.’
24“Bado hukumdari iyê kı dormı derê, inan rê vato, ‘Peran, ni xızmetkari ra bigêrê, owo kı des teni zêdınay bi, bıderê iy.’
25“Mêrıkan hukumdari rê vato, ‘Feqet wayir, ê iy xora des perê xoyê simi estê!’
26“Hukumdari ki inan rê nia vato, ‘Kamo kı çiyo kı dest dero, iy keno zêdı, ê iy daa zêdı êno dayenı. Kamo kı çiyo kı dest dero, nêşkino bızêdıno, çıkê xo esto çino, dest ra êno gırotenı. 27Dısmenê mınê kı nêwazenê ez bıbi hukumdar, inan ki biyarê nıta, verê çımanê mın de bıkiserê.’ ”
İsa zê qıralan kuno Yeruşalim
28İsay kı ni qesi qeşi kerdê, kut ray kı sêro Yeruşalim. İsa vırniya teleban ra şiyenê. 29Dewa Beytfaci bı dewa Beytania, sênê Koyê Zeytıni de bi. İsa kı ama nejdiyê ni dewan, dı telebê xo vırniye ra rusnay. 30İnan rê nia vat: “Sêrê dewa boveri; sıma kı şi uca, jü kurıkê gırêdayi vênenê. Ê ni kurıki hona qe kes nênisto cı. İy akerê, biyarê mı rê. 31Ekı jüyê sıma ra pers kero, ‘Sıma çay ni kurıki verdanê ra?’, vacerê, ‘Wayiri rê lazımo.’ ”
32Dı telebi şi, her çi zê vatena İsay di. 33Senên kı inan kurık verda ra, wayiranê kurıki vat: “Kurıki çay verdanê ra?”
34Teleban vat: “Wayiri rê lazımo.”
35İnan kurık ard İsay rê, kıncê xo estê serê kurıki; bado ki İsa nisna ser. 36İsa key kı kut ray, mıleti ki kıncê xo fitenê raya iy ser. 37Raya kı Koyê Zeytıni ra amenê war, İsa amay bi nejdiyê ucay. Telebanê İsay ra jü sılxetiye, inan pêronan kırametê kı di bi, saba inan sa bi. İnan bı vengê berci'a Heqi rê şukır kerd u nia vat:
38“Qıralo kı bı namê Heqi'a amo, o bımbareko!
Asmên de sılametiye bıbo, cor de Heqi rê şukır bo!”
39Sılxetiye ra tay Ferisiyan İsay rê vat: “Malım, vengê telebanê xo bıbırrnı!”
40İsay inan rê nia vat: “Sıma rê nay vaceri: Ekı i vengê xo bıbırrnê, kemeri qirrenê!”
İsa saba Yeruşalimi berbeno
41İsa amay bi nejdiyê Yeruşalimi. İy kı sukı diye, berba, 42ay sera nia vat: “Keşkanê to ki eyro bızanenê raya kı sona sılametiye! Feqet tı na ray hona nêşkinay bıvênerê. 43Rocê êna kı dısmenê to dormê to bı çeperan'a munenê. To gênê mabênê xo, her het ra ênê to ser. 44To ki, mıletê to ki phan kenê, to kenê têser u têbını ra. Çıkı roca kı Heq ama to bıxelesno ra, to a rocı ferq nêkerdı.”
İsa Mabedı thal keno
45İsa kut hewliya Mabedı, mıleto kı uca de çi rotenê, i kerdi teber, 46inan rê nia vat: “Kıtabo Bımbarek nia vano: ‘Kê mın beno kê düan’; feqet sıma nıta kerdo lana dızdan.”
47İsay her roc Mabed de waaz denê mıleti. Rayibê pili, ilimdarê itıqati, jü ki pilanê mıleti wastenê kı iy bıkiserê. 48Mıleti zaf rınd gos nenê İsay ser, ay ra inan nêzanenê İsay senên bıkiserê.
Actualmente seleccionado:
Luka 19: kiu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active), Wycliffe Bible Translators, Inc. All rights reserved.