Luka 20
20
Hukmê İsay pers beno
1Rocê, İsay Mabed de waaz denê mıleti, inan rê Mijdania Xeleşiyayenı qeşi kerdenê. Rayibê pili, ilimdarê itıqati, jü ki pilê mıleti amay kı İsay de qeşi bıkerê. 2İy ra nia pers kerdê: “Ma rê vacı, tı ninan bı kamci hukm'a kenay? Kami no hukım da to?”
3İsay ki inan rê vat: “Ezi ki sıma ra persê pers bıkeri. Mı rê vacerê, 4Yahyay kami ra iznı gıroti bi kı mılet vaftiz kerdenê? Heqi ra yan mordeman ra?”
5İnan mabênê xo de persê İsay ser qeşi kerd, na rey inan nia vat: “Ma nıka vacım, ‘Heqi ra gırot’, vano ‘A sırı sıma çay bı iy'a inam nêbiyê?’ 6Nê, ekı vacım, ‘Mordeman ra gırot’, mılet pêro ma sano kemeran ver. Çıkı pêro inam kenê kı Yahya pêxembero.”
7En peyniye de inan vat: “Ma nêzanım Yahyay kami ra iznı gırota.”
8İsay ki vat: “Ezi ki sıma rê nêvanan, ninan bı kamci hukm'a kenan.”
Mesela baxçê henguran u ê reşberan
9Bado İsay mıleto kı uca de inan rê mesela nanênı qeşi kerdı, vat: “Rocê, jü mêrıki henguri nê ro, ni bağê henguran bı kira'wa do reşberan, xeylê waxt welat ra şiyo duri. 10Waxtê henguran kı amo, mêrıki jü xızmetkar rusno, awa kı henguran ra kuna hesa iy, ay bigêro. Reşberan do xızmetkari ro, dest thal rusnê. 11Xızmetkarê de bini rusneno. Danê iy ro ki, cı rê qesan vanê, dest thal rusnenê. 12Mêrık jüyê de hirêyıni rusneno. Reşberi iy ki kenê dırbetın, ercenê teber.
13“Wayirê baxçi vano, ‘Ez nıka se bıkeri? Layıkê xowo kı cı ra zaf hez kenan, iy bırusni, belkia iy say kenê.’
14“Reşberi key kı lacê wayiri vênenê, mabênê xo de nia qeşi kenê, ‘No wayirê merasio, ma kı niy bıkisım, no meras ma rê mano.’ 15İnan o baxçı ra esto teber, kisto. Nıka wayirê baxçi inan rê se keno? 16Êno, reşberan kiseno, baxçı ki dano mordemanê binan.”
Mıleto kı nay eşiya pê, vat: “Heq mekero!”
17İsay wertê çımanê inan ro sêr kerd, nia vat: “A waxt ni qeseyê kı Kıtabo Bımbareki de mana ninan çıka?
‘Kemera kı ustan nêwastı,
Biye kemera çengi.’
18Kam kı a kemerı sero gıno, beno letı. Kemerı ki serê kami ro gıno, iy phan kena.”
19 İlimdaranê itıqati bı rayibanê pilan'a zanay kı İsa na mesela inan sero vano. Ay ra inan wast kı a deqa İsay pê bigêrê, feqet mıleti ra tersay.
Heqa Sezari bıderê Sezari
20Çımê pilanê Yahudiyan İsay sero bi. Ninan tay muxpiri rusnay lê İsay, inan xo zê mordemanê rastan muskıtê. Ninan wastê kı fekê iy ra qesawa de çewtı bıeşiyê pê kı İsay teslimê hukmê wali bıkerê. 21Muxpiran İsay rê vat: “Malım, zanım kı tı mıleti rê rastan vanay, waaz danay, kesi kesi ra zobina nêvênenay. Raya Heqi çıka, tı ay muskınay. 22Ma rê vacı, ma vergi bıdım Sezari, yan medım?”
23İsay çiyo kı inan aqlê xo ra vêrnenê ra zana, iy vat: 24“Jü perê simi bımuskınê mın. Ser de resmê kami, namê kami esto?”
Muxpiran vat: “Ê Sezari.”
25İsay vat: “A sırı, heqa Sezari bıderê Sezari; heqa Heqi ki bıderê Heqi.”
26İnan nêşkiyay kı mıleti ver de İsay fek ra qesanê de çewtan vecerê. Cüabo kı İsay da, verê iy de sas biyê mandê, vengê xo bırrnê.
Persê merdenı ra ravestenı
27Tay Saduqi amay lê İsay. İnan inam nêkerdenê kı kes merdenı ra tepia bıbo wes, ay ra inan İsay ra nia pers kerd: 28“Malım, Pêxember Musay kıtab de nia vato: ‘Ekı jü mêrık hona kı domanê xo nêbi bımıro, bıraê iy bı cinıka iy'a bızeweciyo kı ezbeta xo dewam bıkero.’ 29Ekı vacım, hawt bıray estê. En pilê bıran, jü cinıkê de zeweciyo, feqet hona domanê xo nêbiyo, mêrık merdo. 30-31Dıdeyıni bı hirêyın'a ki na cinıkı de zeweciyê, ê ninan ki hona domanê xo nêbiyo, merdê. Bıraê xoyê bini ki na cinıkı de zeweciyê, feqet ê ninan ki hona doman nêbiyo, ni ki merdê. 32En peyniye de, cinıkı ki merda. 33Ni hawt bıray pêro na cinıkı de zeweciyay bi. Nıka a dina de, na cinıkı bena ciniya kamcini?”
34İsay Saduqiyan rê nia vat: “Mordemê na dina zewecinê. 35Feqet mordemê kı Heqi layıq diyê, merdenı ra ravezno u a dina de weşiya xo bıramê, i nêzewecinê. 36Ni henêni endi ki nêmırenê, zê melekanê. İyê domanê Heqi, çıkı i merdenı ra vestê ra. 37Pêxember Musay ki eşkera kerdi bi kı mordemi merdenı ra vezenê ra. Musa key kı jü çaliyo kı vêsenê di, Heqi cı rê nia vat: ‘Ez Heqê İbrahimi, ê İshaqi, jü ki ê Yaqubiyan.’#20:37 İbrahim, İshaq, Yaqub: Ni khalıkê Yahudiyan bi, ninan waxtê verênan de weşiya xo ramıtê. 38Heq Heqê merdan niyo, ê wesano. Gorê Heqi, mılet pêro weso.”
39Tay ilimdaranê itıqati vat: “Malım, to rınd vat.” 40Endi kes nêthawra İsay ra persê pers bıkero.
Mesih lacê kamio?
41İsay ilimdaranê itıqati ra nia pers kerd: “Mılet senên vano, ‘Mesih Lacê Dawudio?’ 42-43Qıral Dawud bıxo Zebur de nia vano:
‘Heqi Wayirê mı rê vat kı:
Hata kı dısmenanê to
Bınê nınganê to de finan ra,
Hetê mınê rasti de ronisı.’
44Ekı Dawud Mesih rê Wayir vano, a sırı Mesih senên beno lacê Dawudi?”
45Key kı mıleti pêro gos nenê qesanê İsay ser, İsa gêra ya telebanê xo rê nia vat: 46“Xo ilimdaranê itıqati ra duri pêgerê. İ qayılê kı bı kıncanê dergan'a bıfeteliyê. Meydananê sukı de sılam gırotenı ra, xavran de en vırniye de ronistenı ra, dawetanê ziyafetan de en cayanê rındekan de ronistenı ra zaf hez kenê. 47Cinıkanê viyan xapınê, mal-mılkê inan dest ra gênê; düanê dergan ki kenê kı mılet bıvênero. Ceza ni henênan gıran bena.”
Actualmente seleccionado:
Luka 20: kiu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active), Wycliffe Bible Translators, Inc. All rights reserved.