परेरित 17
17
थिस्सलुनी सहर रे पवलुस एडकींञ कू बिरोध तेडा
1हेना वरी फेर पवलुस अवुर सीलास अम्फिपुलिस ते अपुल्लोनिया ते, हेना वरी थिस्सलुनी सहर रेकींञ मेजेना, हेना रे एहूदिकू राः मियाँटंग आराधना ओड़ाः दोहो एना। 2पवलुस अनेज राः आदत दोहो एना, हेन घयते हेंय हेना रेय सेनेना, अवुर पेय सब्द दिन भगवान राः कागद वरी हेंकू सुदाय अड़ा चवकीः दोहो एनु। 3अवुर हेना राः मतलोब साफ साफ तेय समझोकू दोहो एनु, कि मसीहा दुख ससाहो, अवुर गोजकेनकू मेंडे रेय जियो रिमुः जरूरी दोहो एना; अवुर “ने-नी ईसु, मसीहा हवे, अवुर ने-नी राः बारे तेंञ लाय वपे तना।” 4तहाँ हेना रेनकू कुछ एहूदिकू अवुर भगवान राः डर-भय ते दोहोनकू केय्यो झन उनानिकू, अवुर मुख मुख कोड़िकू हेंकींञ राः टेबोः कू मनो तेडा, अवुर हेंकू पवलुस अवुर सीलास सुदा कू मेसा यनु। 5लेकिन एहूदिकू एठेड तेकू जिर खिरो यनु, हेनाते हेंकू बाजार वरी लँवडा कुकू गति वनू, अवुर होड़कू जवर केते सहर रेकू हल्ला एना, अवुर होड़कू मड़ंग रे अगकींञ मेनते दो असोन ओड़ाः कू घेरो गोत्तेडू। 6तहाँ हेना रे मेने कू ञँमगड कींञ दो, असोन अवुर कुछ भाईकू सहर रेनकू अधिकारिकू थरे कू तीड़खो अगतेड कुआ, अवुर हल्ला केनते कू कहनी तेडा, “नेकू सींड़ जघा कू उथल पुथल गोत्तेडा, निहों न रेहोकू मेजकेना। 7असोन हेंकू अनेज ओड़ाः रेय एने वडकुआ। हेंकू सींड़कू ईसु राजा हवे मेनते कू कहनियाँ, अवुर हेंकू सींड़कू कयसर कहनी केडा, हेना राः बिरोध रेकू कामेआँ।” 8अवुर होड़कू अवुर सहर रेनकू अधिकारिकू नआँ अँजोम केतेकू अकबको यनु। 9हेनाते हेंकू असोन अवुर एटाःकू थरे जबानत तिला केतेकू बगी वडकींञ दोहो एनु।
बिरीया सहर रेहो कू बिरोध तेडकिञाँ
10हेना वरी फेर तुरेत्ते भाईकू ञीनिंद पवलुस अवुर सीलास बिरीया कू कुल गोत्तेड किञूँ; अवुर हेंकींञ हेना रे तयाः केते एहूदिकू राः आराधना ओड़ाः रेकींञ सेनेना। 11बिरीया रेनकू होड़कू थिस्सलुनी सहर रेनकू वरी बढ़ियाँ होड़कू दोहो एना, अवुर हेंकू रीझ वते भगवान राः बचन कू मनो तेडा। अवुर हेंकू रोज दिन पवलुस राः टेबोः सीरिता किदो जलियाआ हेना, भगवान राः कागद वरी कू मिलोवे दोहो एनु। 12हेनाते अखीर एहूदिकू अवुर उनानी कोड़िकू अवुर कोड़ाकू मुनूख मुखकू बिसवास तेडा। 13लेकिन थिस्सलुनी रेनकू एहूदिकू, पवलुस बिरीया रेहो भगवान राः बचानिय लाय यडा मेनाअकू पपाड़ियानू। तहाँ हेना रेहो मेजकेन ते होड़कू कू भड़को तेडा, अवुर हेंकू गुलगोहार गोत्तेड कू। 14तहाँ भाईकू तुरेत्ते पवलुस समुन्धर अड़ी हनतेय चलोः लगड कू कुलतेडिया; लेकिन सीलास अवुर तीमुथियुस हें-डेकींञ दोहो यनु। 15पवलुस इईदिकू एथेंस अँगम कू इदी तेडिया; अवुर सीलास अवुर तीमुथियुस हनालिते ना रेकींञ मेजुः मेनते हेंकू थरेय कहनी गोत्ते तेडा।
पवलुस एथेंस सहर रेय सेनेना
16एथेंस रे पवलुस तीमुथियुस अवुर सीलासिय तँगी दोहो एनु, तहाँ सहर रे जघीन जघा ते मूरती कू ञेंलके ते जीवित खोंट यनु। 17हेनाते हेंय आराधना ओड़ाः ते एहूदिकू अवुर भगवान राः डर-भय ते दोहोनकू उनानिकू, अवुर बाजार ते जे-नकू जुमोऊ, हेंकू सुदा रोज दीनिय अड़ा चवकीः दोहो एनु। 18तहाँ इपिकूरी अवुर स्तोईक पंडितकू#17:18 नेकू एथेंस सहर रे दोहोन दोहो एनु, हेंकू राः दल हवे, नेकू भगवान थरे मेने बिसवासेःकू हवे, नेकू राः उद्देस दोहो एना कि मोज मस्तिऊ अवुर खुसी ते दोहोनू। मेंडे रेहो हेंय सुदा कू होड़बाद एना, अवुर केय्यो झनकू कहनी तेडा, “नेय बतेनदार चीय कहनी मेनते?” लेकिन एटाःकू कहनी तेडा, “नेय एटाः देवताकू रेनिय पपारचारय घयतेय बुझोः तना,” कहेकि हेंय ईसु रआ अवुर गोजकोः वरी कू जियो रिमुआँ मेनाअय परचारे दोहो एनु। 19हेना वरी हेंकू हेंय अकू सुदा अरियुपगुस#17:19 अरियुपगुस मियाँटंग दल राः ञुमू हवे। अवुर नेकू निनियोंवा कू। राः सभा रेकू इदी तेडिया, अवुर कू होंबोर तेडिया, “होड़कू ची नवाँ टेबोः मी चेडयड कुआ, हेना अले होम लाय वले? 20कहेकि अले अहचरज वआ घियाआ टेबोः मी लाय वले तना, हेनाते अले हेना राः मतलोब ची हवे मेना अले पपाड़ी मेनते?” 21(एथेंस सहर रे जेतना दोहो एनकू अवुर हेना रे दोहोन हेंकू परदेसिकू हो, नवाँ नवाँः टेबोः अअँजोम अवुर हेना टेबोः चरचा छोड़, कनर काम रे समय मेने कू बितो दोहो एनु)।
एथेंस रे पवलुस भाँसड़ तेडा
22तहाँ पवलुस अरियुपगुस राः सभा रे चड़ाँ केनतेय कहनी तेडा, “ए एथेंस रेनकू होड़कू, इंञ ञेंलयड पेआ देवताकू मनो लगड दोपे ओसताज केना। 23कहेकि होयोर होयोर ते अपे राः पूजा पाठ राः चीज तपेंञ ञें-ले दोहो एनु, तहाँ धाम रे न याःते लिखो तडा हेना होंञ ञेंल ञँमतेडा, ‘अनजानाय भगवान लगड।’ हेनाते अपे बेगर ओर जेर तेपे मनोविया, हें-नी राः बारे ते अपे लाय वपे लगाडिंञ मेजकेना। 24#परेरित 7:48हेंय भगवान धरती अवुर हेना रे जे-ना इदाना, हेना सगोरिय बनो केडा, हेंय सरग अवुर धरती रेनिय मुँवर तू हवे, हेंय ती ते बनो तआ मँडिल रे मेनेय दोहोना। 25अवुर हेंय कनर चीज राः कमी कोवाआ, हेनाते होड़कू राः ती ते हेंय राः सेवा पूरा एरो होया सको एना। कहेकि हें-नी सींड़कू जीवन अवुर साँस अवुर सींड़ चीजिय ओवा कुआ। 26हेंय मिनियें होड़ होड़ वरी सींड़ जात रेनकुय बनो तेडा, अवुर हेंकू धरती रे बसोः लगाडिय बनो केडकुआ। हें-नी होड़कू लगड समायिय रखो केडा, अवुर हेंकू दोहोन लगड सिवानिय तोलकेडा। 27ताकि हेंकू भगवान कू छपा, हो सके हेंय छपा केतेकू ञँमेयू। तबो लेहो अबू मेंडे कनाय वरी हो हेंय सँगिंञ रे कोवाया! 28कहेकि अबू हें-नी थरे जीवत बू दोहोना, अवुर बू सेन बेड़ाआ, अवुर स्थिर तेबू दोहोना; जेयसे अपे रेनकू कुछ कबिता लिलिखोकू कहनी तेडा, ‘अबू हें-नी रेनकू चोंडिजकू हवे’ मेनते। 29हेनाते अबू भगवान रेनकू चोंडिजकू हवे रेदो, नआँ घयते अलोबू पसींदे कि भगवान सोना चहे चाँदी चहे दिरी रेनकू मुरती कू घयगी अयू मेनते। अवुर हेना होड़कू राः कारीगर ते अवुर बिचार तेकू बनो वेआ। 30पहिल जबाना रे भगवान नआँ घियाः होड़कू राः अगियानता रे मेनेय धियान गडा, लेकिन अब हेंय सींड़ जघा रे सींड़ होड़कू पाप वरी मन पे मिड़ाः मेनतेय हुकूम वकू तना। 31कहेकि भगवान अनेज चुनो केडिया, हेंय होड़ राः दोवारा ते, चँवदीस रेनकू राः सही सही तेय न्याये लगड दीनिय तोलकेडा, नआँ टेबोः राः सबूत सींड़ होड़कुय तिःवड कुआ कि गोजकेनकू मेंडेय जियो केडिया।”
32हेंकू गोजकोः वरी कू जियो रिमुआ मेनाअकू अँजोम केते केय झन मजाक कू उड़ोवियू, अवुर केय झनकू कहनी तेडा, “नआँ राः बारे ते अले अम वरी फेर कनर देवह ले अँजोमेआँ” मेनते। 33तहाँ पवलुस सभा वरी उडूंग केनतेय चलो यनु। 34हेंडे रेहो कुछ होड़कू पवलुस राः टेबोः कू मनो तेडा, अवुर कू बिसवास तेडा। हेंकू मेंडे दियुनुसियुस, हेंय अरियुपगुस सभा रेनिय सदस्य दोहो एना, अवुर दमरिस मेनते ञुमूत दोहो एनाय, मियाँहोड़ कोड़ीहोन होय दोहो एना। हेंकींञ सुदा अवुर होड़कू होकू दोहो एना।
Actualmente seleccionado:
परेरित 17: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.