परेरित 16
16
पवलुस तीमुथियुस मियाँ तेय गोःतेडिया
1पवलुस दिरबे अवुर लुस्तरा रेहोय सेनेना। हेना रे तीमुथियुस मेनते कू कहनी वया, मियाँहोड़ चेला दोहो एना, हेंय इंगत बिसवासी दोहो एना, हेंय एहूदी जात रेनिय दोहो एना, लेकिन अपत उनानी दोहो एना। 2लुस्तरा अवुर इकुनियुम रेनकू भाईकू मेंडे तीमुथियुस अच्छा बढ़ियाँ नामी होड़ दोहो एना। 3पवलुस नेय मियाँ ते गोगेय लगाडिय चहोः दोहो एनु। अवुर हेना जघा ते दोहो एनकू एहूदिकू अपत उनानी हवे मेनाअकू पपाड़ी दोहो एनु, हेनाते पवलुस तीमुथियुसिय एर खतना तेडा। 4हेना वरी हेंकींञ एरुसलेम वरी परेरितकू अवुर अघुवाकू बनो तडा, नियम मनोवे लगड होड़कू थरे सहर सहर ते ललाय कींञ सेनुऊ। 5नेन घयते कलीसिया रेनकू बिसवास रेकू मजबूत चलो एना, अवुर रोज दिन संख्या बड़हो चलो एना।
तोरोवास रे पवलुस दरसानिय ञेंलतेडा
6पवलुस अवुर हेंय गतिकू फुरूगिया अवुर गलातिया परदेस तेकू चलो एना। कहेकि हेंकू आसिया परदेस रे भगवान राः बचन लाय लगड पवितर आत्मा मँदा तेडकुआ। 7हेंकू मूसिया थव कू तयाःतेड दो, हेना वरी हेंकू बितूनिया हनते सेनुः मेनते कू सँबह एना, लेकिन ईसु राः आत्मा हेना हन मेने एनेम सेनगड कुआ। 8हेना वरी हेंकू मूसिया ते तोरोवास रेकू मेजेना। 9हेना रे पवलुस ञींद दरसानिय ञेंल दोहो एनु, कि मियाँहोड़ मकिदुनिया रेनिय कोड़ाहोन चड़ाँ केनते हेंय थरे न घयतेय अरजीः दोहो एनु, “मकिदुनिया रे मेजकोःते अलेम सहेतावा।” 10नआँ दरसानिय ञेंलकेड राः बाद रे अले हलिते मकिदुनिया सेनुः मेनते ले सँबह यनु, अवुर अले पपाड़ियन कि भगवान हेना रेनकू लगड बढ़ियाँः खभेर लाय लगाडिय राःकेड लेआ मेनते।
लुदिया ईसु थरेय बिसवासेआ
11तोरोवास वरी अले पानी जहाज रे रकब केनते सोझेह सुमातराके ले तयाः तेडा, अवुर हेना ञींदावा नियापुलिस सहर रेले मेजेना। 12हेना वरी अले फिलिप्पी ले तयाः तेडा, हेना रोमिकू राः बसती हवे, अवुर नआँ मकिदुनिया परदेस राः मियाँटंग खास सहर हवे, हेना रे अले कुछ दिन अँगम ले दोहो एना। 13सब्द राः दिन अले सहर राः गेट वरी बहेर हँडे जोड़ इदाना, हेना रेले सेनेना। अले ए-ले पसींद तेडा कि हेना रे बिनतीः लगड जघा इदाना मेनते। अवुर हेना रे कोड़िकू जवर तना। अवुर अले दुड़ूब बड़ियाड़ केनते हेंकू सुदा ले टेबोः एना। 14अले राः टेबोः अअँजोमकू मेंडे लुदिया मेनते ञुमूत दोहो एना, हेंय थुआतीरा सहर रेनिय दोहो एना, हेंय बेजनी कपड़ा केकेजाअय कोड़ीहोन दोहो एना, हेंय भगवान रेनिय सेवेखहीन दोहो एना, हेंय अले राः टेबोईय अँजोम दोहो एनु। पवलुस लायेआ टेबोः रे धियानिय लगो लगड परभु हेंय राः मानिय खोलो तेडा। 15हेंय अवुर ओड़ाः तुरेन कू बतिस्मा कू तिला तेडा, तहाँ हेंय हेंकू थरेय गोड़ेन मुड़ेन एना, “अगर अपे इंञ परभु रेनिय बिसवासी पे मनो यडिंञ रेदो मेजुः पे अवुर इंञ ओड़ाः रेपे दोहोनू।” अवुर हेंय अले मनो बुझो केडले तेय गोःतेड लेआ।
पवलुस अवुर सीलास जेहेल रे
16मियाँ एस, अले बिनतीः जघा हनते ले चलोः दोहो एनु, तहाँ मियाँहोड़ हरवाहिन कोड़ीहोन ले ञँमतेडा, हेंय थरे सगुन ञें-ला राः आत्मा दोहो एना। हेंय सगुन केते अनेज रेनकू मालिककू लगड एनेक धँधेहिय कमाये दोहो एनु। 17हेंय कोड़ीहोन पवलुस अवुर अले तयोम रेय मेजेना, अवुरिय अहीज कोःतेय कहनियू, “नेकू होड़कू बडेअय भगवान रेनकू सेवेखियाकू हवे, अवुर अबू पाप वरी उबारुः राः होर कू लाय वबू तना।” 18हेंय अखीर दिन अँगम नेन घयतेय करोवे दोहो एनु। तयोम ते पवलुस परेसान केनते, हेंय कोड़ीहोन थरे लगो तना भूतिय कहनी वडू, “इंञ ईसु मसीह राः ञुमू तेंञ कहनी वम तना, नेय वरिम उडूंग चलोऊ!” अवुर हेनेन तोलोग हेनी भूत हेंय वरिय उडूंग यनु।
19हेंय रेनकू मालिककू ञेंलतेडा कि अबू राः कमाय राः असरा कोवाआ, तहाँ हेंकू पवलुस अवुर सीलास सबकेड कींञ ते, बड बडे अधिकारिकू थरे चवुक रेकू ओर इदी तेडकिञाँ। 20अवुर हेंकू न्यायेःकू मड़ंग रे इदी केडकींञ तेकू कहनी तेडा, “नेकींञ एहूदी कींञ हवे, अवुर अबू सहर रे अखीर कींञ गड़बड़ यडा। 21नेकींञ एयसा रीति बिधी कींञ लाय यडा कि हेना करोवे अवुर मनोवे लगड अबू रोमिकू लगड बढ़ियाँ कोवाआ।” 22हेना वरी भीड़ रेनकू होड़कू, पवलुस अवुर सीलास राः बिरोध रे होड़कू जवर मेज यनु, अवुर अधिकारिकू हेंकींञ राः कपड़ा कू तुलूज गोत्तेडू, अवुर डन्टा लगो लगड कू हुकूम तेडा। 23हेंकींञ अखीर डन्टा तेकू ञेंड केडकींञ राः बाद रे, जेहेल रेकू डलो गोत्तेड किञूँ, अवुर नेकींञ बढ़ियाँ तेम ञेंलिया कींञ मेनते, दारोगा कू कहनी वडू। 24दारोगा हेना अँजोम केते हेंकींञ भीतर राः कोठरी रेय अदीर तेडकिञाँ, अवुर कटत कींञ काठ बेधा रे कसो केतेय ताला गोत्तेड दोहो एनु।
पवलुस अवुर सीलास जेहेल वरी कींञ छडोआ
25बरा बरी ञींद पवलुस अवुर सीलास बिनती अवुर भगवान राः सिरिंग कींञ सीरिंग दोहो एनु, अवुर एटाः बंधवाकू अँजोम एनेज दोहो एनकू। 26हेनेन तोलोग अचाकते भुईडोल होया एना। हेना एतना हिलो एना कि जेहेल राः नेंव घली हिलो चुवेर यनु। तहाँ तुरेत्ते सींड़ दुवर जिज यनु, अवुर सींड़कू राः हाँथ कड़ी जिज यनु। 27हेना वरी दारोगा जगो एना, अवुर हेंय जेहेल राः दुवर जीजताना ञेंल तेय अड़ींग एना कि बंधवाकू भर दोकू ञींरयाना मेनते, हेना वरी अनानेज राः तरवार ओर उडूंग केतेय ञेंड गोजुः मेनतेय सँबह तना। 28लेकिन पवलुस हाक केनतेय कहनी तेडा, “अलोम कनारुऊ अले सींड़कू ने-डेलेआ।” 29हेना वरी दारोगा दीया एर असी केते, भीतारिय बोलो एना, अवुर पवलुस अवुर सीलास थरे एखला सेनकेन ते कटत कींञ दुबी रेय हबकुनी लोजोर एना। 30अवुर हेंकींञ बहेर उडूंग केडकींञ तेय होंबोर तेडकिञाँ, “एगा सहेब कींञ, इंञ उबारुः लगड चिंञ बनोआ?” 31हेना वरी हेंकींञ कहनी तेडा, “अम परभु ईसु थरेम बिसवासे रेदो, अम अवुर ओड़ाः मी रेनकू उबारुआ।” 32तहाँ हेंकींञ हेंय अवुर हेंय ओड़ाः रेनकू होड़कू परभु राः बचन कींञ लाय वडकू। 33तहाँ हेनेन तोलोग ञींद दारोगा ओड़ाः तुरे हेंकीञिंय इदी केडते, घवतन हेनाय बुहल तेडा, तहाँ तुरेत्ते हेंय अवुर ओड़ाः रेनकू बतिस्मा कू तिला तेडा। 34दारोगा, पवलुस अवुर सीलास अनेज ओड़ाः रेय अगतेड किञाँ, अवुर हेंकींञ लेटेय परोस वडकिञाँ, अवुर सींड़ ओड़ाः भर रेनकू भगवान थरे कू बिसवास केते बहाली कू मनो तेडा।
35अँगा एन तहाँ, सींड़ वरी बड बडे अधिकारिकू सिपाहिकू थरे कू कहनी गोड तेडा कि दारोगा हेंकीञिंय अड़ाः गोडवा किञूँ मेनते। 36दारोगा नआँ टेबोः पवलुस थरेय कहनी तेडा, “सींड़ वरी बडेअय अधिकारी अबा अड़ाः गोडवा बा लगाडिय हुकूम केडा। हेनाते अबा उडूंग कोःते बढ़ियाँ तेबा चलोऊ।” 37लेकिन पवलुस सिपाहिकू थरेय कहनी तेडा, “हेंकू बेगर होंबोर बेड़ा ते अलिंञ होड़कू मड़ंग रेकू ञेंडतेड लिञाँ, जबकि अलिंञ रोम देस रेनकींञ होड़कींञ हवे, अवुर जेहेल रेकू डलो तेडलिञाँ। अब हेंकू अलिंञ कलेकल ते अड़ाः लिंञ लगड कू चहोः तना। न घयते एरो होया एना। हेंकू खुद नआँ रेकू मेजुऊ, अवुर अलिंञ बहेर कू उडूंग लिञूँ।” 38सिपाहिकू नआँ टेबोः सींड़ वरी बड बडे अधिकारी कुकू लाय वडू, अवुर हेंकू पवलुस अवुर सीलास रोम रेनकींञ हवे, मेनाआँ अँजोम केतेकू बोरो यनु। 39हेना वरी हेंकू मेजकेनते हेंकींञ कू मनो बुझो तेडकिञाँ, अवुर बहेर उडूंग केडकींञ ते, हेंकींञ थरे कू अरजी एना कि सहर वरी बा चलोऊ मेनते। 40जेहेल वरी उडूंग केन राः बाद रे पवलुस अवुर सीलास लुदिया ओड़ाः रेकींञ सेनेना, अवुर हेना रे भाई बंधुकू सुदा कींञ जुमो एना, अवुर हेंकू कींञ टेबोः बहाली तेडकुआ, तहाँ कींञ चलो यनु।
Actualmente seleccionado:
परेरित 16: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.