परेरित 15
15
एरुसलेम रे सभा
1हेना वरी कुछ होड़कू अहूदिया वरी अन्ताकिया कू मेजेना, अवुर बिसवासी भाईकू नआँ घयतेकू चेडकू दोहो एनु, “अगर अपे मूसा एमकेडा रीति बिधी राः अनुसार ते अपे राः खतना मेने होयाः रेदो, एरो पे उबर एना।” 2नआँ राः बारे ते पवलुस अवुर बरनबास, हेंकू सुदा अखीर कींञ कलह एना, अवुर कू अड़ा चवकी यनु। हेनाते पवलुस अवुर बरनबास, गोटाचार बिसवासिकू सुदा नआँ बिसेय राः बारे ते चरचाय लगड परेरितकू अवुर अघुवाकू थरे, एरुसलेम सेनुः लगड कू फसला तेडा। 3कलीसिया रेनकू होड़कू हेंकू कुछ दूर अँगम कू पड़गाही तेडकुआ। हेंकू फीनीके अवुर सामरिया तेकू चलो एना, अवुर हेंकू बिसवासी भाई कुकू लाय गोःवा दोहो एनु कि ची घयते अनजातकू भगवान हनतेकू मिड़ाः केना। नआँ टेबोः अँजोम केते सींड़ भाईकू अखीर कू खुसी एना। 4एरुसलेम कू तयाः तेडा, तहाँ कलीसिया रेनकू अवुर सपायँड़कू अवुर परेरितकू कुकू सोवागत तेडकुआ। तहाँ हेंकू भगवान अले राः दोवारा ते बडे बडेआ कामिय करो तेडा मेनते कू लाय वडकू। 5फरीसिकू दल रेनकू बिसवास तडा, हेंकू मेंडे कुछ होड़कू रिमकेन तेकू कहनी तेडा, “अनजातकू खतनाः अवुर मूसा एमकेडा नियम मनो लगड हुकूम देहेक चही।”
6हेना वरी परेरितकू अवुर अघुवाकू नआँ बिसेय राः बारे तेकू बिचारे लगड कू जवर एना। 7#परेरित 10:1-43अखीर अड़ा चवकी केन राः बाद रे, पतरस चड़ाँ कनतेय कहनी तेडा, “एगा भाई बंधुकू! अपे पपाड़ी तनापे, केय दिन होया यना, भगवान अपे मेंडे ईंञिय चुनो तेडा, ताकि इंञ अहा वरी अनजातकू अनेज राः बढ़ियाँः खभेर कू अँजोमू, अवुर कू बिसवासे। 8#परेरित 10:44; 2:4भगवान होड़कू राः बिचारिय पपाड़िआ, अवुर हेंय अबुय तिःवड बुआ कि हेंकू अनजातकू हो, अबू घयते पवितर आत्मा एमके कुतेय अपनो केडकुआ। 9हे-ना बिसवास राः दोवारा ते हेंकू राः हिरदेय सुद्ध केते, अबू अवुर हेंकू राः मँझर रे कनर बेगारिय अराक फराका। 10अपे ची लगड भगवान परखोविय मेनते पे सँबाहुः तना? अपे चेलाकू न घियाआ कीलिसा नियम मनो लगड ची लगड पे कहनी वकू तना? नआँ धरम नियम नेकू लगड अखीर हँबाला जुवा घयगिआ। अवुर नआँ घियाआ जुवा अबू रेनकू दादी पुरखाकू घली मेने कू रिम सको गना, अवुर अबू हो एरोबू रिम सको एना। 11अबू बिसवास यडा कि अबू रेनिय परभु ईसु राः किरपा ते अबू उबर केना, हेन घयते नेकू होकू उबारुआ।”
12हेना वरी तयोम ते, जवर तनकू सींड़ होड़कू जपनो केनते बरनबास अवुर पवलुस राः टेबोः कू अँजोम तेडा, कि भगवान काःते हेंकींञ राः दोवारा ते अनजातकू राः मँझर रे चिन्ह चमत्कार अवुर अहचरज राः कामिय करो तेडा। 13हेंकींञ टेबोः पिटो केड राः बाद रे एकूब कहनी तेडा, “एगा भाई बंधुकू, ईञाः टेबोःपे अँजोमू। 14भगवान अनजातकू वरी अनेज रेनकू होड़कुय बनो लगड, हेंकू थरे काःतेय दया एना, हेना सिमोन मड़ंग तेय लाय वडपेआ। 15नआँ वरी भविस्यवक्ताकू राः टेबोः हो मिलोः तना, हेना नआँ घयतेकू लिखो केडा,
16‘नआँ तयोम ते इंञ फेरिंञ मिड़ाः मेजुआ,
अवुर दाऊद राः लोजोर केना ओड़ाईंञ बनो वेआ,
अवुर धसगों केन हेनांञ बनो वेआ, अवुर इंञ हेनांञ चड़ाँया।
17हेनाते बंचो केनकू होड़कू मतलोब सींड़ अनजातकू, इंञ अपनो केडकुआ, हेंकू इंञ कू छपाआ मेनते परभु भगवान कहनिया।#आमो 9:11-12
18नआँ सींड़ टेबोः चँवदीस बनो बोंहड़ी तेड तोलोग वरिय टेबोः दरवर तेडा।’
19हेनाते ईञाः बिचार हवे, अनजातकू जे होड़कू भगवान हनतेकू मिड़ाः तना, अबू हेंकू थरे नियम राः बोझवा एमके कुते दुख अलोबू ओवाकू। 20बल्कि अबू हेंकू लगड लिखो केतेबू कुल गोत्ते, हेंकू मुरती कुकू रकब वआ चीज, अवुर बयसा बयसी काम, अवुर पूजा ञेंड कुआ जील अवुर रक्ती वरी बीच रेकू दोहोनू।
21कहेकि अखीर पहील वरी सहर सहर ते, मूसा राः नियम कू परचार अगियाडा, अवुर नआँ सब्द दिन चेका आराधना ओड़ाः तेकू पड़हो वेआ।”
अनजात बिसवासिकू लगड चिट्ठी
22तहाँ परेरितकू अवुर अघुवाकू सींड़ कलीसिया रेनकू सुदा कू फसला तेडा कि अकू मेंडे कुछ होड़कू कू चुनो, अवुर हेंकू पवलुस अवुर बरनबास सुदा अन्ताकिया हनतेकू कुलकू। एहूदा नेय बरसबा मेनते होकू कहनी वया, अवुर सीलास कू चुनो तेडा। नेकींञ भाई बंधुकू वरी मुखिया कींञ दोहो एना। 23हेंकू राः ती रे नआँ चिट्ठी कू कुलतेडा, “अन्ताकिया अवुर सीरिया अवुर किलिकिया रे दोहोनकू, अनजात बिसवासी भाईकू, अले परेरितकू अवुर अघुवा भाईकू हनवरी जोहार। 24अले अँजोम केडा, अले मेंडे कुछ होड़कू हेना रे सेनकेनते, अपेकू टेबोः बोरो गोत्तेड पेआ, अवुर अपे राः मन कू उलटा पुलटा गोत्तेडा, लेकिन अले हेंकू न घयते मेने ले कहनी गडकुआ। 25हेनाते अले सींड़कू एक मन केनते ठिके ले सलाह एना कि कुछ होड़कू चुनो केकुते अले रेनकींञ प्यारा गति कींञ बरनबास अवुर पवलुस सुदा कुछ होड़कू चुनो केकुते अपे थरे ले कुलकू। 26नेकू परभु ईसु मसीह लगड अनाकू राः जीव संकट रेकू डलो केड हेंकू होड़कू हवे। 27हेनाते अले एहूदा अवुर सीलास ले कुलकेडा, नेकींञ अपन मुँह तेहो नआँ टेबोः कींञ लाय सकोआ। 28पवितर आत्मा अवुर अले बढ़ियाँ वडलेआ, कि नआँ जरूरी टेबोः बगी वते, अवुर कनर बोझवा अपे थरे अलो ले लदगोवे। 29अपे मुरती कू पूजा कू रकब वआ हेना वरी अवुर रक्ती वरी, अवुर कू पूजा ञेंड कुआ जील वरी, अवुर लंद फँदुः वरी सँगिंञ रेपे दोहोनू। नेंदोरा वरी सँगिंञ रेपे दोहोन रेदो, अपे राः भला होयाआ, हँसी-खुसी तेपे दोहोनू।”
30हेना वरी कुलतड कुआ, हेंकू होड़कू बिदा केनते अन्ताकिया रेकू सेनेना, अवुर हेना रे हेंकू जवर केडकू ते चिट्ठी कू ओवडकू। 31हेना चिट्ठी रे लिखो तडा, भरोसा टेबोः पड़हो केते होड़कू अखीर बहालिकू मनो तेडा। 32एहूदा अवुर सीलास भविस्यवक्ता कींञ दोहो एना, हेंकींञ हो अखीर टेबोः लाय केकू ते भाई बंधुकू सिक्छा कींञ लाय केकू तेकींञ मजबूत तेडकुआ। 33हेंकींञ हेना रे कुछ दिन बितो केते, हेना वरी बढ़ियाँ तेकींञ बिदा एना, तहाँ हेंकींञ कुकूलकू थरे कींञ मिड़ाः मेजेना। 34(लेकिन सीलास हेना रे दोहोन बढ़ियाँ वडिया)। 35लेकिन पवलुस अवुर बरनबास अन्ताकिया रेकींञ दोहो यनु, अवुर एटाःकू अखीर होड़कू सुदा परभु राः सिक्छा कू लायू, अवुर बढ़ियाँः खभेर कू लाय दोहो एनु।
पवलुस दुबारा पपारचारिय चलो एना, पवलुस अवुर बरनबास फट फुटो एना
36कुछ दिन बितो केन राः बाद रे पवलुस बरनबासिय कहनी वडू, “दू, जहाँ जहाँ सहर ते अबू परभु राः टेबोः बू लाय तेडा, अलंग हेना रे फेर सेनकोःते भाई कुलंग ञें-लू, ची घयते कुआ।” 37बरनबास दो एहुन्ना अनेज सुदा गोगेय लगाडिय पसींद तेडा, नेय मरकुस मेनते होकू कहनी वया। 38#परेरित 13:13लेकिन पवलुस एहुन्ना अनेज सुदा गोगोः मेने बढ़ियाँ गडिया, कहेकि हेंय पंफूलिया रे हेंकुय बगी अटु वडकू दोहो एनु, अवुर हेंकू सुदा काम रे मेनेय सेनगाना। 39हेना बारे ते हेंकू टगझा यनु, अवुर कू बेघ बेघर यनु; बरनबास मरकुस सुदा जहाज रे रकब केनते साइपरास कींञ चलो यनु। 40लेकिन पवलुस दो सीलास अनेज सुदा गोगेय लगाडिय चुनो तेडिया, अवुर भाईकू हेंकींञ भगवान राः ती रेकू जिमा तेडकिञाँ। 41अवुर हेंकींञ कलीसिया कींञ मजबूत गोःतेडा, अवुर सीरिया अवुर किलिकिया तेकींञ चलो एना।
Actualmente seleccionado:
परेरित 15: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.