परेरित 10
10
कुरनेलियुस पतरासिय एर राःतेडा
1कयसेरिया सहर रे कुरनेलियुस मेनते कू कहनी वडिया, हेंनी मियाँहोड़ होड़ दोहो एना, हेंय सव झन सिपाहिकू रेनिय बडेअय अधिकारी दोहो एना, नेय इतालियानी दल रेनिय अधिकारिय दोहो एना। 2नेय सेवेखियाय दोहो एना, अवुर सींड़कू ओड़ाः भर ते भगवान कू आदर इजेत दोहो एनु, अवुर एहूदी होड़कू दान ओवाकू लगड हरग दीलिय दोहो एना, नेय भगवान थरे हमेसा बिनतीः महल रेय दोहो एना। 3नेय एक दिन लगभग तीन बजे मियाँटंग डिटोह ते परभाय ञेंलतेडा, हेना परभा रे भगवान रेनिय सरगदूत बँदेत रे मेजकेन तेय कहनी तेडा, “ए कुरनेलियुस!”
4हेंय धियान सेते ञेंलकेडिय तेय बोरो यनु, अवुरिय कहनी तेडा, “चीवा परभु?” तहाँ सरगदूत कहनी तेडा, “अम एमकेड हेना दान, अवुर अमाः बिनती भगवान उहयर केडा। 5अम आफा सहर हनते कुछ होड़कुम कूलु, अवुर हेना वरी पतरस मेनते होकू कहनी वया, हेंय सिमोन मी एर राः आगू। 6हेंय समुन्धर अड़ी रे खाल राः धंधाअय सिमोन ओड़ाः रे पोहनाईय सेनकेना।” 7तहाँ सरगदूत कुरनेलियुस सुदा टेबोः वरिय चलो यनु, हेना वरी कुरनेलियुस अनेज रेनकींञ बा होड़ हरवाह कींञ अवुर अनेज सुदा दोहोनकू मेंडे रे मियाँहोड़ ईमानदाराय सिपाहिय राःतेडा। 8अवुर सींड़ टेबोः लाय केडकू ते आफा हनतेय कुलतेड कुआ।
पतरस परभाय ञेंलतेडा
9हेना ञींदावत हेंकू चलते चलते आफा सहर कू तयाः गोत्तेडू, लगभग तीकिन जुवर पतरस छत रे बिनतीः लगाडिय रकब तना। 10हेना तोलोग पतरस रँगेजिय दोहो एनु, अवुर कनर कनारा जोम गिसानिय दोहो एनु, अवुर कू इसीने दोहो एनु, हेन तोलोग मियाँटंग परभाय ञेंलतेडा; 11हेना परभा रे अगस जीजयानू, अवुर बडेआ चादर घियाआ चरियो कोना ते सब अगड़ू यडा घयते धरती रे अगड़ुः दोहो एनु। 12हेना चादर रे धरती रेनकू जे-निरीत चार गोड़ियाकू अवुर से-नेःकू जीव जन्तुकू अवुर उढियोःकू दोहो एना। 13तहाँ पतरस नआँ घयते आवाजिय अँजोम तेडा, “ए पतरस रिमुःमी नेकुम ञेंड जोमू।” 14तहाँ पतरस कहनी तेडा, “एरोआ परभु, कहेकि कनारा पवितर कोवाः हेना चहे असुद्ध चीज कबोह बेगारिंञ जो-मा।” 15तहाँ अवुर मियाँ एसिय अँजोम तेडा, “भगवान सुद्ध गिआ मेनतेय कहनी केड हेना, अम असुद्ध मेनते अलोम कहनिवा।” 16तहाँ पेय एस नेन घयते होया एना; हेना वरी तुरेत्ते सरग हनतेय रिम गोःयाडू।
17हेना वरी पतरस नआँ परभा राः ची मतलोब हवे मेनतेय पसींदे दोहो एनु, हेन तोलोग कुरनेलियुस कुलतड कुआ, हेंकू सिमोन ओड़ाः होंबोर ञँमकेड ते दुवार रे चड़ाँ केनतेकू होंबोरे दोहो एनु। 18“चे, सिमोन पतरस मेनते कू कहनी वया, हेंय पोहना ने-डेया किदो?” 19पतरस परभा राः बारे तेय पनासींदे दोहो एनु, हेन तोलोग पवितर आत्मा कहनी वडियू, “अँजोम मी, बहेर हँडे पेय होड़ होड़कू ञँम बेड़ा यडमिआँ। 20अम अगड़ू कोःते हेंकू सुदा बेगर धुकपुच तेम सेनुऊ, कहेकि हेंकू इंञ कुलकेड कुआ।” 21हेना वरी पतरस पेंदी रे अगड़ू केनते हेंकू थरेय कहनी तेडा, “अँजोम पे, अपे जेय पे छपा यडा हेंय इंञ हवे, ची काम तेपे मेजकेना?” 22तहाँ हेंकू होड़कू कहनी तेडा, “अले, बडेअय अधिकारी कुरनेलियुस कुलकेड लेआ। हेंय धरमी अवुर भगवानिय बोरो वआ हेनी होड़ हवे, अवुर सींड़ एहूदिकू आदारिया कू। हेंय अनेज ओड़ाः रे राःके मिते, भगवान राः बचानिय अँजोम लगड, मियाँटंग पवितर सरगदूत हुकूम वडिया।” 23हेना वरी पतरस ओड़ाः रेय राःतेड कुआ अवुर हेंकुय मान मरजाद तेडकुआ।
कुरनेलियुस ओड़ाः रे पतरस
हेना ञींदावत पतरस हेंकू सुदाय चलो एना, अवुर आफा रेनकू कुछ भाईकू हो हेंय सुदा कू सेनेना। 24हेना ञींदावत हेंकू कयसेरिया कू तयाः तेडा। कुरनेलियुस अनेज रेनकू हित नातकू अवुर अनेज रेनकू संग-साथी कू सुदा जवर केनते हेंकू कू तँगी दोहो एनु। 25पतरस ओड़ाः भीतारिय बोल दोहो एनु, तहाँ कुरनेलियुस हेंय सुदाय जुमो एना, अवुर कटत दुबी रे उकड़ूम केनतेय जोहार वडिया; 26तहाँ पतरस हेंय रिमेय तींग तेय कहनी वया, “रिमुःमी, इंञ हो होनोड़ हवे।” 27तहाँ पतरस हेंय सुदाय टेबोः बोल दोहो एनु, तहाँ अखीर होड़कू जवर तन ञेंल तेय कहनी तेडा, 28“अपे पपाड़ी तनापे, कनय एहूदी अनजातकू सुदा जुमो बेड़ाः चहे हेंकू ओड़ाः कू सेनुऊ नआँ अले एहूदिकू राः नियम राः बिरोध रेआ। लेकिन इंञ भगवान लाय वडिञाँ कि अम कनय होड़ असुद्ध चहे पवितर कोवाया मेनते अलोम कहनी वकू। 29हेनाते इंञ रराः पे सेनेना, दो कनर मेनते बेगर कहनी बेड़ा गडतेंञ मेजियाना। इंञ होंबोर यडपेआ इंञ ची काम लगड पे राःकेडिञाँ?”
30कुरनेलियुस जबाब तेडा, “चार दिन राः मड़ंग ते, इंञ नेन मेन जुवर तीन बजे, इंञ ओड़ागिंञ रेंञ बिनतीः तोलोग अचाकते मियाँहोड़ चमकोः हेना, कपड़ाय तुसिंञ तडाय इंञ मड़ंग रेय मेज चड़ाँ एना। 31अवुर हेंय कहनी तेडा, ‘ए कुरनेलियुस! भगवान अमाः बिनतिय अँजोम केडा, अवुर अम दान मी एम हेनाय उहयर केडा। 32हेनाते अम आफा सहर रे कनय कुलकेते हेना वरी सिमोन नेय पतरस मेनते कू कहनी वया, एर राः अगेय मी। हेंय खाल राः धंधाअय सिमोन ओड़ाः रे पोहनाईय सेनकेना, हेंय ओड़ाः समुन्धर अड़ी रेआ।’ 33तहाँ इंञ तुरेत्ते अम हनते होड़कुंञ कुलतेडा। अम ठिकेम करो केडा कि नआँ रेम मेजियाना। भगवान जे-नाय कहनी वडमिआँ, हेना अँजोम लगड अले सींड़कू अम मड़ंग रे नआँ रेले जवर केना।”
पतरस सिक्छाय लाय तेडा
34हेना वरी पतरस कहनी तेडा, “अब इंञ पपाड़ी यना, भगवान कनय मेनेय हिगर बिचारा।#बेवस्था 10:17 35कनय जात रेनकू भले न दोहोनू, जे हेंय राः डर-भय तेकू से-नेआ, अवुर धरम काम कू कामा, हेंकू सींड़कुय बेस वकुआ। 36भगवान इसराएलिकू थरे खभेरिय कुलतेडा; हेंकू ईसु मसीह राः दोवारा ते सान्ति राः बढ़ियाँः खभेरिय लाय तेडा, ने-नी ईसु सींड़कू रेनिय परभु हवे। 37नआँ टेबोः अपे सींड़ कुपे पपाड़िआ, एहुन्ना बतिस्मा राः बारे तेय परचार तेडा, हेना तयोम ते गलील जिला वरी बोंहड़ी केनते गोटा अहूदिया रे मिरीज यना। 38अपे नआँ होपे पपाड़िआ, ची घयते भगवान नसरेत रेनिय ईसु, पवितर आत्मा अवुर सक्ति तेय अभिसेक तेडिया, अवुर ईसु सगोर जघा ते धरम कामिय करो तेडा, अवुर होड़कू थरे भूत परेतकू लगो तनकुय चिकन तेडा, कहेकि भगवान हेंय सुदाय दोहो एना। 39हेंय एरुसलेम अवुर अहूदिया रे कामिय करो तेडा, हेना राः गोवाहिकू अले हवे, अवुर हेंकू हेंय कुरूस रेकू लटको तेडिया, अवुर नेन याःतेकू ससीत गोजतेडिया। 40लेकिन भगवान हेंय गोजतन वरी तीसरा दिन रेय जियो तेडिया, अवुर होड़कू ञेंलेय लगाडिय देखर तेडिया। 41हेंय सींड़कू मेने कू ञेंलगाडिया, बल्कि हेंय रेनकू गोवाही एएमकू थरेय देखर तेडिया, हेंकू भगवान मड़ंग तेय चुनो तडकुआ, हेंकू अले हवे, हेंय गोजेन वरी जियो रिमकेन रे अले हेंय सुदा ले जोमेन चरो एना। 42परभु ईसु अलेय हुकूम वडलेआ, अले सींड़ होड़कू थरे ले परचारे अवुर गोवाही ले ए-मा कि नेय हें-नी हवे, नेय गोजकेनकू अवुर जीवतकू राः न्याये लगड भगवान बनो केडिया। 43हेंय रेनकू भविस्यवक्ताकू, गोवाहिकू ए-मा कि कनय हो ईसु थरेय बिसवासेआ, हेंय ईसु मसीह राः ञुमू ते पाप राः माफिय ञाँमा।”
अनजातकू थरे हो पवितर आत्मा अगड़ू एना
44पतरस नआँ टेबोईय कनाहनिय दोहो एनु, तबले खभेर अँजोम कू सींड़ होड़कू थरे पवितर आत्मा अगड़ू एना। 45अवुर एहूदी बिसवासिकू पतरस सुदा कू मेजताना, हेंकू नआँ ञेंलतेकू अकबको यनु कि पवितर आत्मा राः बरदान अनजातकू होय ओवड कुआ। 46कहेकि हेंकू अनजातकू एटाः एटाः भासा तेकू टेबोऊ अवुर भगवान राःकू स्तुति तोलोग कू अँजो वडकुआ। 47हेना वरी पतरस कहनी तेडा, “नेकू अबू घयते पवितर आत्मा कू ञँमकेडा, कनय होड़ दाः वरी बतिस्मा तिला लगड कू मँदा सकोआ किदो?” 48तहाँ हेंय ईसु मसीह राः ञुमू ते बतिस्मा ओवाकू लगाडिय हुकूम वडकुआ। हेना वरी हेंकू अकू सुदा कुछ दीनिय दोहोन लगड पतरस थरे कू अरजी एना।
Actualmente seleccionado:
परेरित 10: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.