परेरित 9
9
साऊल राः मन बदलो एना
(परेरित 22:6-16; 26:12-18)
1साऊल निहों मेनते परभु रेनकू चेला कुय दब-दिबो कू अवुर ञेंड गोजकू राः रुवाँ धुवाँ रेय दोहो एना। हेंय एरुसलेम रे सींड़कू वरी बडेअय आजक थरेय सेनेना। 2अवुर हेंय वरी दमिस्क राः आराधना ओड़ाः राः ञुमू ते अनुमति चिट्ठीय असी तेडा, ताकि बिसवास रे कोड़ाकू चहे कोड़िकू इदान कुआ, हेंकू एरुसलेम रेय तोल अगकू। 3हेंय से-ने से-ने ते दमिसीकिय तयाः तेडा, तहाँ अचाकते अगस वरी हेंय थरे चरियो गतर वरी इंजोत चमको एना। 4तहाँ हेंय ओतेत रेय लोजोर यनु, अवुर नआँ घयते आवाजिय अँजोम तेडा, “ए साऊल, ए साऊल, अम इंञ ची लगड मी ससीत यडिञाँ?” 5हेना वरी साऊल होंबोर तेडा, “परभु, अम ईया हवे?” तहाँ हेंय कहनी तेडा, “अम ससीत यडिञाँ, हें-नी ईसु हवे। 6निहों अम रिमकोःते सहर रेम सेनुऊ, जे काम करेक इदाना, हेना अम लाय वमिअञूँ।” 7हेंय सुदा कू दोहोएन हेंकू तेरेज बेड़ाय कू; कहेकि आवाज दोकू अँजोमे, लेकिन कनय मेने कू ञेंल दोहो एनु। 8तहाँ साऊल ओतेत वरिय रिमेना, लेकीनिय ञेंञेंल तेड दो कनर मेनेय ञें-लू, अवुर गतीत कू तीत रे सबकेते दमिस्क सहर रेकू इदी तेडिया। 9अवुर हेंय तीन दिन अँगम मेनेय ञेंञेंल सको गना, अवुर कनर मेनेय जोमगाडा न कनाराय ञुँतेडा।
10दमिस्क रे मियाँहोड़ चेला दोहो एना, हेंय हनन्याह मेनते कू कहनी वडिया, हेंय थरे परभु परभा रेय कहनी तेडा, “ए हनन्याह!” तहाँ हेंय कहनी तेडा, “ओय, परभु।” 11हेना वरी परभु हेंय थरेय कहनी तेडा, “रिमुःमी, सीधी मेनते कू कहनी वआ, हेना गली रेम सेनुऊ, अवुर हेनारे एहूदा ओड़ाः रे सेनकोःते तरसुस रे दोहोनय साऊल मेनते ञुमूत इदाना, हेनिम होंबोरू, कहेकि हेंय बिनतीः तनायू। 12हेंय परभा रेय ञेंलतेडा कि हनन्याह मेनते ञुमूत दोहो एना, हेनी कोड़ाहोन भीतर मेजकेन ते हेंयिय छुवों तेडिया, अवुर मेडतू जीजयानू।” 13हेना वरी हनन्याह जबाब तेडा, “ए परभु, नेय राः बारे ते अखीर होड़कू वरिंञ अँजोम केडा, कि नेय एरुसलेम रे अमाःकू पवितर होड़कू अखीरिय ससीत केडकुआ। 14अवुर ना रेहो अम ञुमू कू ञूमुः हेंकू तोल कू लगड, बड बडे आजककू हनवरी हँक ञँमकेना।” 15लेकिन परभु हनन्याह थरेय कहनी तेडा, “जू सेनुः मी, कहेकि हेंय अनजातकू अवुर राजाकू अवुर इसराएलिकू राः मड़ंग रे, ईञाः ञुमू परचारे लगड इंञ चुनो केडिया। 16अवुर इंञ ञुमू लगड तीमिन दुख सहेक पड़ोआ, हेना इंञ लाय वया।” 17हेना वरी हनन्याह रिमकेनते हेना ओड़ाईय सेनेना, अवुर साऊल तीत ते छुवों केडिय तेय कहनी वडियू, “ए साऊल भाई, फेर मी ञेंञेंल लगड अवुर पवितर आत्मा तेम भरोः लगड, मेजुः घनी होर रेम ञेंलवाडिया, हें-नी परभु ईसु कुलकेडिञाँ।” 18तहाँ तुरेत्ते हेंय मेड वरी हकु सेसरा घयते कनारा लोजोर एना, तहाँ फे-रिय ञेंञेंल तेडा, अवुर रिमे नयू अवुर बतिस्माय तिला तेडा। 19हेना वरी रिमकेन तेय जोम टँड़क एना।
दमिस्क सहर रे साऊल ईसु राः ञुमुय परचार तेडा
साऊल कुछ दिन अँगम दमिस्क रेनकू चेलाकू सुदाय दोहो एना। 20अवुर हेंय तुरेत्ते आराधना ओड़ाः ते सेनकेन ते ईसु राः बारे तेय परचार तेडा। अवुरिय कहनी तेडा, “ईसु भगवान होपोन हवे” 21अअँजोमकू सींड़कू अहचरज यन तेकू कहनी तेडा, “नेय हें-नी होड़ हवे, नेय एरुसलेम रे हेंय ञुमू कू ञुमू दोहो एनु, हेंकुय ञेंड दोहो एनु। अवुर ना रेहो बड बडे आजककू थरे तोल गोःकू लगाडिय मेजेना।” 22लेकिन साऊल पपरचार लगड अनावुर सक्तिय ञँमतेडा। अवुर मसीहा ने-नी हवे मेनाआँ, साबूत दे-दे तेय लाय वकू दोहो एनु, दमिस्क रे दोहोनकू एहूदी कुय टेबोः जपनो कू दोहो एनु।
23नगदे दिन बितो केन रे, एहूदिकू हेंय ञेंड गोजेय लगड कू मतर एना। 24लेकिन साऊल हेंकू मतर एन हेनाय पपाडियानू। हेंकू ञेंड गोजेय लगड सींञ ञींद सहर राः गेट रे तक तक रेकू दोहो एना। 25लेकिन ञीनिंद हेंय अनेज रेनकू चेलाकू छनवाँ रेकू दुड़ूब तेडिया, अवुर सहर राः हथा वरी कू लटको अगड़ू तेडिया।#2 कुरि 11:32,33
एरुसलेम रे साऊल
26हेना वरी एरूसलेमिय तयाःतेड दो चेलाकू सुदा जुमोः मेनतेय कोसीस तेडा; लेकिन हेंकू सींड़ कुकू बोरोवय दोहो एनु, कहेकि हेंकू नेय हो चेला हवे मेनाआँ मेने कू बिसवासे दोहो एनु। 27लेकिन बरनबास हेंय अनेज सुदा परेरितकू थरेय इदी तेडिया, अवुर का का याःते होर रे परभुय ञेंलवाडा, अवुर हेंय सुदाय टेबो एना, अवुर दमिस्क सहर रे ईसु राः ञुमू ते, तीमिन हियो केतेय परचार तेडा, हेंदोराय लाय वडकुआ। 28हेना वरी एरुसलेम रे हेंकू सुदाय सेनुः मेजुः महल रेय दोहो एना। 29अवुर निडर ते परभु राः ञुमू तेय परचारे दोहो एनु; अवुर उनानी भासा ते टेबोः हेंकू एहूदिकू सुदाय चरचायू, अवुरिय अड़ा चवकीऊ। लेकिन हेंकू हेंय ञेंड गोजेय मेनते कू सँबाह एना। 30नआँ बिसवासी भाईकू पपाड़ी केनते, हेंय कयसेरिया हनतेकू गोःतेडिया, हेना वरी तरसुस हनतेकू कुलतेडिया।
31नेन-नेन घयते गोटा अहूदिया रे, गलील रे, अवुर सामरिया अवुर कलीसिया रेनकू सान्ति कू ञँमतेडा, अवुर कलीसिया बड़हो चलो एना; अवुर हेंकू परभु राः डर-भय ते जिनगी कू बितो दोहो एनु, अवुर पवितर आत्मा हेंकू सहेता वकू दोहो एनु, अवुर हेंकू संख्या रेकू बड़हो चलो एना।
लुदा अवुर आफा रे पतरस
32हेना वरी पतरस सगोर जघा ते होयोर होयोर ते लुदा रे दोहोनकू पवितर होड़कू थरे होय सेनेना। 33हेनारे एनियास मेनते ञुमूत दोहोएन हेनी लवका ञेंडताडिया, हेंय सुदाय जुमो एना। अवुर हेंय आठ बरिस परकोम रेय पड़ो तना। 34हेना वरी पतरस हेंय थरेय कहनी तेडा, “ए एनियास, ईसु मसीह अम चिकन यडमिआँ। रिमुःमी, बिनील तम मी सोझ साझू।” तहाँ हेंय तुरेत्तेय रिम चड़ाँ यनु। 35हेना वरी लुदा रे अवुर सरोन रे दोहोनकू हेंय ञेंलके ते परभु हेनातेकू मिड़ाः एना।
36आफा रे मियाँहोड़ तबीता मतलोब दोरकास#9:36 उनानी ते तबीता मेनाआँ, दोरकास मेनते कू कहनी वआ, हेना राः मतलोब हवे, सीलिब मेनते ञुमूत दोहोएन हेनी बिसवासी कोड़ीहोन दोहोन दोहो एनु। हेंय अखीर धरम काम अवुर दानिय एम दोहो एनु। 37हेन तोलोग हेंय हसु एनायू, अवुरिय गोजियानु। होड़कू हेना मटी उमके ते अगस राः कोठरी रेकू दोहो गोत्तेडू। 38लुदा वरी आफा ठाँव रे दोहो एना, हेनाते चेलाकू पतरस लुदा रेया मेनाआँ अँजोम केते, बा होड़ होड़कींञ हलिते राः अगेय लगड कू कुलतेड किञाँ। 39तहाँ पतरस रिमकेन ते हेंकींञ सुदा आफा रेय सेनेना। हेना रेय सेनेन दो हेंकू अगस कोठरी रेकू इदी तेडिया, हेनारे एकल केनकू भर दो ईयाम तींग ते हेंय बँदे रेकू जवर यनु। अवुर दोरकास हेंकू सुदाय दोहोन तोलोगिय बनो तेडा, हेना कुरता अवुर कपड़ा कू तिःवय दोहो एनु। 40तहाँ पतरस सींड़कुय उडूंग गोत्तेड कू, हेना वरी पतरस उकड़ूम केनतेय बिनती एना, अवुर हेना मटी हन तको केतेय कहनी तेडा, “ओ तबीता रिमुःमी।” तहाँ हेंय ञेंञेंल गोत्तेडियू; अवुर हेंय पतरस ञेंलके तेय रिम दुड़ूब यनु। 41हेना वरी पतरस हेंयिय सब रिमतेडिया, अवुर पवितर होड़कू अवुर एकल केनकू राःकेड कुते जिवो केडिय तेय तिःवड कुआ।
42नआँ टेबोः गोटा आफा रे मिरीज यनु; अवुर अखीर होड़कू परभु थरे कू बिसवास तेडा। 43हेना वरी पतरस आफा रे सिमोन मेनते कू ञुमू तडिय हेनी खाल राः धंधाअय एचे रे नगदे दीनिय दोहो एना।
Actualmente seleccionado:
परेरित 9: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.