लूका 23
23
पितालुसेरै सांमणै यीशु
(मत्ती 27:1-2; 11-14; मरकुस. 15:1-5; यूह. 18:28-38)
1तां फिरी सारी सभा उठिकरि यीशु पिलातुसा किनि लै गैई। 2जां ऐ बोलि करि यीशु पनि दोष लांणा लगै कि “ऐनि असेड़ै मैहणु भड़काय, जां रोमी सम्राटनी कर दींणा किना नमां केया, जां सै अपड़ै आपानि मसीह, राजा बोलता शुणा।” 3पिलातुसै तैस किना पुच्छु, कि “क्या तु यहूदिया केरा राजा आ?” यीशु तैस सिंउ बौलु, “तु ऐपुवै ता बोलता।” 4तां पिलातुसै, महायाजका जां मैहणुवां सिंउ बौलु, “मूं ऐस मैहणु मझ कोई दोष लाधी ना ऐईंता।” 5पण सै होरै ज्यादा रौभ ला करि बोलणा लगै, “ऐ गलील प्रदेशा किना लै करि ऐड़ि यहूदिया प्रदेशा तेईनी सभनियांं मैहणुवां मझ अपड़ै उपदेश दी करि मैहणुवां भड़कांता।” 6ऐ शुणि करि पिलातुसै पुच्छु, “केया ऐ मैहणु गलील प्रदेशा किना आ?” 7जेख्णी तैस ऐ पता लगा कि यीशु हेरोदेसेरी रियासतिरा आ, तां तेनी यीशु राजै हेरोदेसा किनि भेईजि दित्ता, केईनी कि तैस टैंमा हेरोदेस बि यरूशलेम शहरा मझ थ्या।
हेरोदेसेरै सांमणै यीशु
8हेरोदेस यीशु तका करि बड़ा खुश भुआ, केईनी कि सै बड़ा धियाड़िया किना तैस तकांणा चांहथा थ्या, ऐठणीरै तेईनी कि तेसेरै बारै मझ शुणोरू थियु, जां सै सोचता थ्या कि यीशु कोई चमत्कार लुहाना। 9सै यीशु किना बड़ी सारी गलै पुछता रिय्हा, पण यीशु तेसनी किछ बि जुबाव ना दिता। 10प्रधानयाजक जां यहूदी शास्त्री खड़ै भौ करि जौरै-जौरै बोलि करि तैस पन दोष लांतै रिय्है। 11तां हेरोदेस अपड़ै सिपहिया सेईतै तेसेरी बीजती करि मजाक उडाणा लगा जां चिटक लिकड़ै लुवा करि सैक्या पिलातुसा किनि भेईजि दिता। 12तैस टैंमा तेईनी पिलातुस जां हेरोदेस योकिया केरै दुशमण थ्यै, पण तेसै धियाड़ि सै मित्र बंणी ग्यै।
पितालुसेरै जरिये यीशुनि मोउतिरा दंड
(मत्ती 27:15-26; मरकुस. 15:6-15; यूह. 18:39-19:16)
13पिलातुसै प्रधानयाजक जां सरदार जां मैहणु शदा करि तैन्हांं सिंउ बौलु, 14तुहैं ऐ मैहणु मूं किनि अंणा जां बौलु कि ऐ मैहणुवां भड़कांता पण मीं तुवाड़ै सांमणै ऐसेरी पूछ-ताछ केयि पण जैन्हां गला केरा तुवे ऐस पनि इल्जाम लांतै अत्तै, तैन्हांं गला केरै बारै मझ मूं ऐस मझ कोई दोष लाधी ना ऐईंता। 15हेरोदेसै बि ऐस मझ कौ दोष ना लधा, केईनी कि तेनी बि ता ऐक्या असुवां किनि वापस भेईजि दित्ता जां तका, ऐस पन ऐतिया कोई बि इल्जाम साबित ना भुआ कि ऐसनि मोउतिरी सजा दियो। 16ऐठणीरै तेईनी आंउ ऐस पन कोड़ै ला मार बजा करि छडि दींता। 17हर फसाहेरै त्यौव्हारेरै टैंमा पन पिलातुस एकि केईदी यहूदिया केरै तेईनी छडि दिईंथ्या। 18तां सारै मैहणु मिलि करि जौरै-जौरै हकै दी करि बोलणा लगै, ऐसनि मोउतिरी सजा दी देया जां असेड़ै तेईनी बरअब्बै जै जैल्ही मझ आ तैस छडि देया। 19ऐ सैहै थ्या जैसनि नगरा मझ दंगै करांणेरै जां खूनेरै इल्जामेरै दोषा मझ जैल्ह भोरी थी। 20पिलातुस यीशु छडणा चांहथा थ्या ऐठणीरै तेईनी तेनी मैहणु फिरी समझाय। 21पण तैन्हैं रौभ ला करि बौलु, “ऐस क्रूसा पनि चाढ़ा! क्रूसा पनि चाढ़ा!” 22तां तेनी त्रीं बारी तैन्हांं किना पुच्छु, “केईनी, ऐनि मैहणु केणु ऐतेई बुराय क्यौरी आ? मीं ऐस मझ मोउतिरी सजाय ज्योता कोई दोष ना बुझा। ऐठणीरै तेईनी आंउ ऐस पन मार बजा करि छडि दींता।” 23पण सै चिन्डै दी करि पीछै पै ग्यै कि ऐस क्रूसा पन चाढ़ा, जां तेन्हैरा हूला कांना सफल भौ ग्या। 24तां पिलातुसै आज्ञा दित्ती, कि ऐन्हैरू बोलोरू करा। 25जां तेनी सै मैहणु जै मार-पिटाय जां खून कांनेरै दोषा मझ जैल्ही मझ बंन्द क्यौरा थ्या जां जैसनि तैन्हैं बोत्थियु कि ऐस छडि दिया सै तेनि छडि दिता जां यीशु तेन्हैरू बोलणा पन तेन्हांनि दी दिता।
यीशु क्रूसा पनि चाढ़ियूंणा
(मत्ती 27:32-44; मरकुस. 15:21-32; यूह. 19:17-19)
26जेख्णी मैहणु यीशु लै गांहथै थ्यै, ता तैन्हैं शमौन नाँईयेरा अक कुरेनी मैहणु जै आस-पासेरै ग्राँईयां किना यरूशलेम शहरा मझ ऐईंता थ्या, सैक्या सिकन्दरेरा जां रूफुसेरा बब थ्या। सिपाहियै सै मजबूर केया कि सै क्रूस चुकि करि तैस जगायनी लै गहिया जेठि यीशु क्रूसा पनि चाढ़ना। 27जां मैहणुवां केरी बड़ी भीड़ तैस पिचालीं चलि पैयि, जां बड़ी सारी जनेनी बि थी, जै तेसेरै तेईनी हिक पिटती जां लैरी दींति थी। 28यीशु तैन्हांं धेरै फिरी करि बौलु, “हे यरूशलेमेरी जनेनियो, मिंडै तेईनी लैरी मेईं दिया, पण अपड़ै आपानि जां अपड़ा बच्चानि जै किछ भूंणारू आ तेठणिरै कारण लैरी दिया। 29केईनी कि ऐतेई दुखेरी धियाड़ी ऐईंणारी अत्ति जेख्णी मैहणुवां बोलणु, ‘त्यौतु छै भूंणु तैन्हांं जनेनियनी जै बांझ अत्ति, जां सै जनानि जैन्हैं बच्चै पेईदा नत्तै क्यौरै जैन्हैं दुध ना पिवाउ।’ 30तैस टैंमा मैहणुवां पहाड़ा सिंउ बोलणु, कि ‘असु पन छिढि गहिया’ जां ‘केन्ढियांनि बोलणु कि असु ऐपु हैटां ढकि लै।’ 31केईनी कि अगर धर्मी मैहणु सिंउ ऐहीं भूंतु ता सौचा जै दोषी आ तैस सेईतै केतियु भूंणु?” 32यीशु सेईतै दो होरै मैहणु जै कुकर्मी थ्यै तैस सिंउ मांनेरै तेईनी सपहिये सै नीणैं थ्यै लाउरै। 33जां सै तेसै ठाहरी जैसनि खोपड़िरी जगा बोलींथ्यै, तैठि पुजै ता तैन्हैं तैड़ी यीशु जां सै कुकर्मी बि अक तेसेरै देहिणै पासै जां अक तेसेरै बाऐं पासै क्रूसा पन चाढ़ै। 34तां यीशु बौलु, “हे पिता, ऐन्हांनि माफ कर! केईनी कि ऐ ना जांणतै कि ऐ कितु अत्तै कातै, तां फिरी तैन्हैं सै क्रूसा पन चाढ़ा जां तेसेरै लिकड़ै बंडणैरे तेईनी पर्ची सुट्टी,” कि कोसनि कितु मेईया, जां सैकेई बंडि लेई।
35तेसैरा मजाक उड़ा करि बोलींथ्यै; “ऐनि होरै बचाय, अगर ऐ परमेश्वरैरा पुत्र मसीह आ, जां तेसैरा चुणौरा ता अपड़ै आपा बचा लिया।” 36सिपाहि बि नीड़ अईछी करि जां सिरका दी करि तेसैरा मजाक उड़ा करि बोलतै थ्यै, 37“अगर तु यहूदिया केरा राजा आ ता, अपड़ा आप बचा लै।” 38जां यीशुरै शिरा किना प्रन क्रूसा पनि अक फट्टी ला दित्ती। तैस पन यीशुरै क्रूसा पन चाढ़नेरी वजह लिखोरी थी जां सै ऐक्यु थियु लिखोरू; “यहूदिया केरा राजा।”
मंन फैरनै वा कुकर्मी
39जै कुकर्मी लटकाउरै थ्यै, तैन्हांं मझ एकि जै तैस सेईतै क्रूसा पन चाढ़ौरा थ्या तेसैरी निंदा करि बौलु, “क्या तु मसीह ना! तां फिरी अपड़ै आपा जां असु बचा लै।” 40ऐत पन होरै तेसनी झिड़खै दी करि बौलु, “क्या तु परमेश्वरा हैरी बि ना डरींता? ताउनि बि ता सैहै सजा मेईंती आ। 41जां असुनि ता न्याय अनुसार सजा मेईंती आ, केईनी कि असै अपड़ै कर्मा केरा फल भोगतै अत्तै, पण ऐनि ता कौ गलत कम ना क्यौरा।” 42तां एकि तेनी मैहणु यीशु सिंउ बौलु, “हे यीशु! जेख्णी तु अपड़ै राज्य मझ अक राजा बंणी ऐईला ता मिंडी बि याद रखै।” 43यीशु तैस सिंउ बौलु, “आंउ तांउ सिंउ सच बोलता कि आजै तु मूं सेईतै स्वर्ग-लौका मझ भूंणा।”
यीशुरै प्रांण त्यागणै
(मत्ती 27:45-56; मरकुस. 15:33-41; यूह. 19:28-30)
44जां धियाड़ी बारैह बजै सारै देशा मझ अंधारू भौ गियु, जै अंधारू लगभग धियाड़िरै त्रियें बजै तेईनी रिहु। 45जां सूरजैरू प्रगड़ु घटणा लगु, जां सै मोट्टा पड़दा जै मंदरा मझ लटकौरा थ्या, जै सभनियांं परमेश्वरेरी उपस्थिति मझ ऐईंणा किना रोकींथ्या, सै प्रना किना लै करि थल्लै तेईनी दुवां टुकड़ा मझ फट्टी ग्या। 46जां यीशु बड़ै जौरै हक दी करि बौलु, “हे पिता! आंउ अपड़ि आत्मा तिंडै हत्था मझ दींता।” जां ऐ बोलि करि प्रांण छडि दित्तै। 47सूबेदारै जै किछ भूं, तैस तका करि परमेश्वरेरी बडियेई की, जां बौलु, “पक्का ऐ मैहणु धर्मी थ्या।” 48जां भीड़ जै ऐ तकांणेरै तेईनी किट्ठी भोरी थी, ऐ सभ-किछ तका करि हिक-पिटती लैरी दींति दुखा मझ घरेनी वापस चलि यैई। 49जां तेसेरै सभ जान पेहचान, जां जै जनेनी गलील प्रदेशा किना तैस सेईतै योउरी थी, दूर खड़ी भौ करि ऐ सभ तकेंती थी।
यीशुरू दबियूंणु
(मत्ती 27:57-61; मरकुस. 15:42-47; यूह. 19:38-42)
50जां तका यूसुफ नाँईयेरा अक महासभायरा सदस्या जै भला जां धर्मी मैहणु थ्या। 51जां सै तेन्हेरै विचारा जां तेन्हेरै ऐस कंमा किना खुश ना थ्या जां सै यहूदिया केरै नगरा अरिमतिया मझ रींहणै वा थ्या जां परमेश्वरेरै राज्यरा इन्तजार करींथ्या। 52तेनी पिलातुसा किनि गहि करि यीशुरी लास मगि। 53जां यीशुरी लास उतारी करि चादरी मझ लपैटि लैई, जां एकि कब्रि मझ रखि जै चटांनि मझ खणौरी थी, जां तेत मझ कौ ना थ्या रखियोउरा। 54ऐ शुक्रेरी धियाड़ि थी, जां आरामेरी तियारिरी धियाड़ी थी। 55जां तैन्हैं जनेनियें जै तैस सिंउ गलील प्रदेशा किना योउरी थी, पिचालीं-पिचालीं गहि करि सै कब्र तकाय, जां ऐ बि कि तेसैरी सै लास कोठि रखौरी आ। 56जां तैन्हैं घरै अईछी करि सुगंधित चीजै जां यीशुरी लासी पनि लांणेरै तेईनी इत्र तियार केया; जां आरामेरी धियाड़ी तैन्हैं मूसेरी व्यावस्थायरै अनुसार आराम केया।
Actualmente seleccionado:
लूका 23: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.