लूका 22
22
यीशुरै खिलाफ साजिश
(मत्ती 26:1-5; 14-16; मरकुस. 14:1-2; 10-11; यूह. 11:45-53)
1अखमीरी रोटिरा जै त्यौव्हार जैसनि फसहैरा त्यौव्हार बि बोलतै, किछ धियाड़िये बाद नीड़ थ्या। 2जां प्रधानयाजक जां यहूदी शास्त्री यीशु मांनेरै तेईनी मौका तोपतै थ्यै कि सै किहीं मारियो, पण सै मैहणुवां किना डरींथ्यै।
यहूदैरा विश्वासघात
3जां यहूदा इस्करियोति जै बाराह चैला मझ अक थ्या, शैतान तैस अंदर चलि ग्या। 4तेनी गहि करि प्रधानयाजका जां पेहरेदारा केरै सरदारा सिंउ गल-बात केयि, कि यीशु किहीं-चारै तेन्हेरै हत्था पकड़वांणा। 5तैन्हैं खुश भौ करि तेसनी पेईंसै दींणैरा वचन दिता। 6तेसैरी गल भौ गैई जां अबै सै मौका तौपणा लगा कि बिना हूलै यीशु पकडवांणेरै तेईनी तैस पन नजर रखणा लगा।
चैला सिंउ फसहैरी लाष्ट धाम
(मत्ती 26:17-25; मरकुस. 14:12-21; यूह. 13:21-30)
7तां फिरी अखमीरी रोटिरै त्यौव्हारेरी धियाड़ी यैई, तैस त्यौव्हारा मझ फसहैरू उरनु बलि कांनु जरूरी थियु। 8फिरी यीशु पतरस जां यूहन्नेनि बौलु कि, गहा, “गहि करि असेड़ै खांणेरै तेईनी फसहेरी रोटी बंणा।” 9तैन्हैं तैस किना पुच्छु, “तु कोठि चांहथा, कि असै रोटी बंणाईया?” 10यीशु तैन्हांं सिंउ बौलु, तका, नगरा मझ गांहथै अक मैहणु पैणिरा घड़ा चुकोरा तुहां मेईंणा, जैस घरा मझ सै ग्या; तुहां तैस पिचोरै चलि गांहणु। 11जां तैस घरेरै मालिका सिंउ बोलै, गुरू ताउनि बोलोरू आ; कि सै मेहमानै वा कमरा कोठि आ जेठि आंउ अपड़ै चैला सिंउ फसहेरी रोटी खऊं? 12घरेरै मालिका तुहांनि अक सजा-सजाउरा जां तियार क्यौरा प्रनियां कमरा लुहाय दींणा, तैठि तुवे असेड़ै तेईनी तियारी करै। 13तैन्हैं गहि करि, जिहीं यीशु तैन्हांं सिंउ बोलोरू थियु, तिहियें तकाउ जां फसहैरी धाम तियार की।
प्रभु भोज
(मत्ती 26:16-30; मरकुस. 14:22-26; 1 कुरि. 11:23-25)
14जेख्णी सै टैंम या, ता यीशु अपड़ै बाराह खास चैला सेईतै रोटी खांणा बेठा। 15जां यीशु तैन्हांं सिंउ बौलु, “मिंडी बड़ी ईच्छा थी, कि दुख सेहन कांना जां मरना किना पेहिलै फसहैरी रोटी तुहां सिंउ बेशि करि खांउ। 16केईनी कि आंउ तुहां सिंउ बोलता, कि ज्यो-तेईनी परमेश्वरेरै राज्य मझ फसहेरै त्यौव्हारैरा मकसद पूरा ना भौ गाहला, त्यो-तेईनी मूं ऐ फसहैरी रोटी दुबारे ना खांणी।” 17तां फिरी यीशु अंगूरेरै रसैरा कटौरा लै करि परमेश्वरैरा धन्यवाद केया, जां बौलु, “ऐस ल्या जां योकिया मझ बंडि ल्या। 18केईनी कि आंउ तुहां सिंउ बोलता, कि ज्यो-तेईनी परमेश्वरैरा राज्य ना या आज किना त्यो-तेईनी मूं दाख रस कदि न पींणा।” 19फिरी यीशु रोटी लेई जां धन्यवाद करि-करि भंन्नि, जां तेन्हांनि ऐ बोलि करि दित्ती कि, “ऐ मिंडी जान आ, जै तुवाड़ै तेईनी दींणी लाउरी आ, मूं याद कांनेरै तेईनी तुवे ऐहीं करियां करै।” 20ऐहियें-चारै तेनी रोटी खांणा किना बाद कटौरा दित्ता, “ऐ कटौरा नवें वायदेरा मिंडा सैक्या खून आ जै तुवाड़ै तेईनी बहाईयूंणा। 21पण तका मूं पकड़वांणार मैहणु मूं सेईतै मेजा पन बेठौरा। 22केईनी कि मैहणुरै पुत्रा ता परमेश्वरेरी योजना अनुसार मरनूंऐ आ, पर धिक्कार आ तैस मैहणु पन जै तैस पकड़वांता।” 23तां सै ऐपु मझ पूछ ताछ कांना लगै, “सै असु मझांं केणु आ जै ऐक्या कम करैला?”
महान केणु आ? तैस पन बेहस
24तैन्हांं मझ ऐ बेहस बि भुई कि असु मझा महान केणु आ। 25तां यीशु सै ऐपु किनि शदाय जां तेन्हांनि बौलु, कि होरनियां जातिया केरै राजै जां बड़ै-बड़ै नैतै अपड़ै मैहणुवां पन हक जमांतै, जां अपड़ै आपानि मैहणुवां केरा मित्र बोलांणा चांहथै। 26पण तुऐ ऐहीं मेईं कातै, बल्कि जै तुहां मझ महान आ सै हल्केरै समान, जां जै प्रधान आ सै सेवकेरै समान बणनै। 27केईनी कि मालिक मेजा पन बेशि करि रोटी खांतै जां तेसेरै सेवक तेसैरी सेवा कातै, पण आंउ तुवाड़ै बिच सेवका सेयि आ।
28पण तुवे सै अतै, जै मिंडी परेशानियां मझ लगातार मूं सेईतै रिय्है। 29जां जीं मिंडै पिता परमेश्वरै मिंडै तेईनी अक राज्य दितौरा, तिहियें आंउ बि तुहांनि राजा बणनैरा हक दींता। 30ताकि तुवे मिंडै राज्य मझ मिंडै मेजा पन खा-पी सकिया, जां न्याएरी कुर्सी पन बेशि करि इस्राएलेरै बाराह गौत्रा केरा न्याय कांना।
पतरसेरा नमां कांनेरी भविष्यवाणी
(मत्ती 26:31-35; मरकुस. 14:27-31; यूह. 13:36-38)
31“शमौन, हे शमौन! शैताने परमेश्वरा किना तुहां सभनियांं केरी परीक्षा लींणैरी अनुमति मगोरी आ, अच्छै किना बुरै अलग कांनेरी, केईनी कि जिहीं अक किसान किणकि किना पलाल अलग काता। 32पण मीं तिंडै तेईनी प्रार्थना केयि, कि तिंडा विश्वास त्रुटि ना गहिया जां जेख्णी तु अपड़ै पापा किना मंन फिराईया ता अपड़ै भाई बि मूं पन विश्वास कांननी मजबूत करै।” 33पतरसै यीशु सिंउ बौलु, “हे प्रभु! आंउ ताउ सिंउ जैल्ही मझ ता छड पण मरननी बि तियार आ।” 34यीशु पतरसा सिंउ बौलु, “आंउ तुहां सिंउ सच बोलता, कि आज जेख्णी कुख्ड़ा ल्यौ दींणी त्यो-तेईनी तांउ त्रा बारी मूं किना मुकरी गांहणु, कि आंउ यीशु ना जांणता।”
बटुआ, झोई, जां तलवार
35जां यीशु चैला सिंउ बौलु, “जेख्णी मीं तुवे बिना बटुवै, झोई जां बूटा बगैर खुशखबरिरा प्रचार कांननी भेईजोरै थ्यै, ता क्या तुहांनि कोसक्यै चीजैरी कमि भुईथी।” तैन्हैं उत्तर दित्ता, “कोस बि चीजैरी ना।” 36तेनी तैन्हांं सिंउ बौलु, “पण अबै मैहणु असेड़ै विरोधा मझ अत्तै, ऐठणीरै तेईनी ऐपु सेईतै झोई जां पेईंसै रखि लैई जां अगर कोसक्यै किनि तलवार ना ता सै अपड़ा कौट बैचि करि अक तलवार खरीदी लिया। 37केईनी कि आंउ तुहां सिंउ बोलता, कि पवित्र शास्त्रा मझ जै मिंडै बारै मझ लिखोरू आ: सै अपराधिया सेईतै गिणियूंणा, ऐ मिंडै बारै मझ लिखोरी भविष्यवाणी आ, सै पूरी भूंणारी आ।” 38चैलै बौलु, “हे प्रभु! असु किनि ऐड़ि दो तलवारी अत्ति।” यीशु तैन्हांं सिंउ बौलु, “बड़ी अत्ति।”
जैतूनेरै पहाड़ा पन यीशुरी प्रार्थना
(मत्ती 26:36-46; मरकुस. 14:32-42)
39तां फिरी यीशु अपड़ि आदतिरै अनुसार जैतूनेरै पहाड़ा पन ग्या, जां चैलै बि तैस पिचोरै चलि पियै। 40यीशु तैठि पुजि करि तैन्हांं सिंउ बौलु, “प्रार्थना करा, कि तुवे परीक्षाय मझ ना फसिया।” 41जां यीशु चैला किना 30 मीटर दूर ग्या, जां जेणु टंकि करि प्रार्थना कांना लगा, 42कि “हे पिता! अगर तु चहिया ता मूं ऐन्हां दुखा किना छडा सकता, पण आंउ चांहथा कि मिंडी ना पण तिंडि ईच्छा पूरी भुईया।” 43तां यीशु अक स्वर्गदूत लधा, तेनी दूतै यीशुनि सामर्थ दित्ती। 44यीशु बड़ा बेचैन भौ करि प्रार्थना कांना लगा। जां तेसैरा आत्मा यौउता दुखी भौ ग्या कि तेसैरा पसीना खूनेरिये बूंदै सैयि धरती पन चुड़ना लगा। 45फिरी यीशु प्रार्थनाय किना उठिकरि चैला किनि या तेनी अईछी करि सै दुखा मझ उदास भौ करि झुलोरै लधै। 46जां यीशु तैन्हांं सिंउ बौलु, “तुवे केईनी अत्तै झुलोरै। उठा जां प्रार्थना करा, कि तुवे कोसक्यै परीक्षाय मझ फसी करि पाप ना करिया।”
यीशु धोखै सिंउ पकड़वायूंणा
(मत्ती 26:47-56; मरकुस. 14:43-50; यूह. 18:3-11)
47यीशु हालै बोलता ऐ थ्या कि, मैहणुवां केरी अक भीड़ तैठि पुजि पेयि। तैन्हांं बाराह चैलै मझांं अक जेसैरू ना यहूदा थियु, तैस भीड़ि किना अघ्रियालीं-अघ्रियालीं चलौरा थ्या, सै यीशु किनि या जां तेसनी फोकु दिता। 48फिरी यीशु तेसनी बौलु, “हे यहूदा! तु फोकु दी करि मैहणुरै पुत्रा मतलब मूं पकड़वांता?” 49जै किछ भूंणारू थियु, सै तका करि यीशुरै साउगियै यीशुनि बौलु, “हे प्रभु! क्या असुवां ऐन्हां पनि तलवारी ला बजि ता ना बांनि?” 50जां तैन्हांं मझांं एकि तलवार कढि करि महायाजकेरै दासा पन चला दित्ती, जां तेसैरा कंन बढि सुटा। 51ऐत पन यीशु बौलु, “अबै बस करा बड़ु भौ गियु!” जां यीशु तेसैरा कंन छू करि ठीक करि दिता। 52तां यीशु प्रधानयाजका जां मंदरेरै पेहरेदारा केरै सरदारा जां यहूदी वुजुर्गा सेईतै जै तैस पन हमला कांना यौउरै थ्यै, तैन्हांं सिंउ बौलु, “क्या आंउ कौ चौर या डाकु आ कि तुवे मूं पकड़नेरै तेईनी तलवारी जां शोठै लै करि यौउरै अत्तै? 53जेख्णी आंउ मंदरा मझ हर धियाड़ी तुहां सेईतै भुईंथ्या, ता तुहैं आंउ किना पकड़ा? पण ऐ तुवाड़ा टैंम आ जां तुहां पन शैतानैरा अधिकार आ।”
पतरसैरा नमां कांना
54फिरी तैन्हैं यीशु पकड़ा जां महायाजका किनि लै ग्यै जां पतरस बि दूरा किना तैन्हांं पिचोरै चलौरा थ्या। 55जेख्णी मैहणु आंगणा मझ आग जाई करि किठै बेठोरै थ्यै, ता पतरस बि तेन्हेरै बिच गहि करि बेशि ग्या। 56जां एकि दासी पतरस आगिरू प्रगड़ु बेठौरा लधा जां तैस धेरै तका करि पछियांणना लगी, दासी बौलु, “ऐ मैहणु ता यीशुरै चैला मझियां आ।” 57पण पतरसै नमां केया जां बौलु, “हे जनेनियें! आंउ ऐस ना जांणता।” 58थोड़ी हांणी बाद एकि होरै मैहणु तैस धेरै तका करि बौलु, “तु बि ता तैन्हांं मझियां अक आ!” पतरसै तैस सिंउ बौलु, “हे भाई आंउ ना।” 59कोई एकि घंटै बाद जै तैठि खड़ै थ्यै, तैन्हांं मझांं अक हौरा मैहणु बोलणा लगा, “सच ऐक्या बि ता यीशु सेईतै थ्या; केईनी कि ऐ बि गलीलवासी आ।” 60पण पतरसै बौलु, कि “हे भाई आंउ ना जांणता कि तु कोस बारै मझ बोलता?” तेसेरै ऐहीं बोलतै सिंउ कुख्ड़ै ल्यौ बि दित्ती। 61-62तां प्रभु घुमिं करि पतरसा धेरै तकाउ, पतरसा यीशुरी बोलोरी सै गल याद यैई, कि “कुख्ड़ेरी दो बारी ल्यौ दींणा किना पेहिलै ताउ त्रा बारी मिंडा नमां कांना।” सै ऐस गलैरा चैता करि दुखा मझ रूंणा लगा।
यीशुरी बीजती
(मत्ती 26:67-68; मरकुस. 14:65)
63जै मैहणु यीशु पकड़ी बेठोरै थ्यै, सै तेसैरा मजाक बंणा करि तैस चुथणा लगै। 64जां तेसेरै टीरै ढकि करि तैस किना पुच्छु, कि “भविष्यवाणी करि-करि शुणा कि तु कुनि मारा?” 65जां तैन्हैं बड़ी सारी होरी बि निंदाय बाई गलै तेसेरै खिलाफ बोली।
महासभाईरै सांमणै यीशु
(मत्ती 26:59-66; मरकुस. 14:55-64; यूह. 18:19-24)
66जेख्णी धियाड़ी भुई ता यहूदी मैहणुवां केरै वुजुर्ग जां प्रधानयाजक जां यहूदी शास्त्री किठै भुवै, जां यीशु अपड़ि सभाय मझ अंणि करि पुच्छा, 67“अगर तु मसीह आ ता, असु सिंउ बोलि दै!” यीशु तैन्हांं सिंउ बौलु, “अगर आंउ तुहां सिंउ बौलूं, ता तुहां विश्वास ना कांना। 68जां अगर आंउ पुच्छूं ता तुहां जुबाव ना दींणा। 69पण ऐम्हीं किना मैहणुरा पुत्र मतलब आंउ सर्वशाक्तिमान परमेश्वरेरै देहिणै पासै बेशैला।” 70ऐस गलै पनि सभनियें बौलु, “ता क्या तु परमेश्वरैरा पुत्र आ?” तेनी तैन्हांं सिंउ बौलु, “तुवे अपुवै ता बोलतै अत्तै, केईनी कि आंउ सैहै आ।” 71तां तैन्हैं बौलु, “अबै असु गवाहिरी कितु जरूरत आ? केईनी कि असै ऐपुवै ता ऐसेरू मुहां किना शुणि लियुं।”
Actualmente seleccionado:
लूका 22: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.