लूका 17
17
ठौकरिरा कारण बंणनु
(मत्ती 18:6-7; 21-22; मरकुस. 9:42)
1फिरी यीशु अपड़ा चैला सिंउ बौलु, कि “ऐकेई गल ता पक्की आ, कि हर मैहणुरी परीक्षा भूंणी जै तेन्हैरै पापा केरी वजहि ला भूंणी, पण हाय! तैस मैहणु पन जेसैरी वजहि सिंउ ऐ परीक्षाय ऐईंती। 2जै कोई मूं पन विश्वास कांनारा मझां एकि बि पाप कांना पन मजबूर करिया, ता तेसेरै तेईनी ऐ बधिया भूंणु की अक भारी घौड़ तेसेरै गआ मझ बंन्ही करि डुबणेरै तेईनी समुन्द्रा मझ सुट्टी दियो। 3ध्यान रखा कि तुवे कितु कातै अत्तै? अगर कौ विश्वासी भाई पाप काता ता तैस समझा, जां अगर सै अपड़ै पाप मनि लींता जां पछतांता ता तेसनी माफ करि देया। 4अगर सै धियाड़ि मझ सत्त बारी बि पाप काता जां हर-बारी ताउ किनि अईछी करि बोलिया, आंउ पछतांता आ, ता तेसनी माफ करि दै।”
विश्वास
5तां खास चैलै प्रभु यीशु सिंउ बौलु, कि “असैड़ा विश्वास होरा बि जादा मजबूत कर।” 6यीशु बौलु, अगर तुवाड़ा विश्वास राईरै दांणै बराबर बि भुईया ता ऐस क्रुमेरु बुटा सिंउ बोलिया कि ऐठां किना सीरै समैत उतड़ि करि संमुन्द्रा मझ लगी गा, ता तैस तुवाड़ी गल मनि लींणी।
एकि दासैरा फर्ज
7“पण तुहां मझियां ऐतिया केणु आ, अगर तुवाड़ा नौकर पट्टि रटि करि या भ्रैडा चारि करि घरै ऐईंता, ता क्या तुवे बोलेलै, जल्दी आ जां रोटी खांणनी बेश? 8ना, पण मालिका तेसनी ऐहीं बोलणु, कि पेहिलै मूंनी रोटी बंणा, जां मूं खांणा किना बाद फिरी तु खा लैई। 9तुहैं अपड़ै दासानि जै कंम कांनेरै तेईनी शुणाउरा थ्या, तेनी सै पूरा केया। ऐठणीरै तेईनी तेसैरा धन्यवाद ना कांना। 10तिहियें-चारै, जेख्णी तुहैं बि सै सभ-किछ करि लियौरू आ जै तुहांनि कांननी बोलोरू थियु, ता तुहां ऐ बोलणु चेहिंथु, कि ‘असै निकम्मै नौकर अत्तै; जै असु कांनु चेहिंथु थियु असै सिर्फ सैहै क्यौरू आ।’ ”
कोढ़ेरै दश रोगी ठीक कांने
11जेख्णी यीशु जां तेसेरै चैलै यरूशलेम शहरा धेरै गांहणै बाई बत्तै चलोरै थ्यै, ता सै सामरिया जां गलील प्रदेशेरी सीमाय बत्तै गांहथै थ्यै, 12ता तैन्हांं ग्राँईयां मझ गांहथै टैमां दश कोढ़ी मैहणु मैऐ। 13तैन्हैं दूर खड़ै भौ-करि जौरै हक दित्ती, कि “हे यीशु! हे मालिक! असु पन दया कर।” 14यीशु तैन्हांं धेरै तका करि बौलु, “यरूशलेम मंदरा मझ गहा; जां अपांणा याजका किना लुहाआ जां सै गांहथै-गांहथै बत्तै मझ ऐ ठीक भौ गियै।” 15तां तैन्हांं मझांं एकि ऐ तका करि कि आंउ ठीक भौ ग्या, जौरै हकै दी करि परमेश्वरेरी बडियेई काता यीशु किनि वापस चलि या; 16जां यीशुरै पैयिड़ा पन मुँहेरै भारै पैयि करि तेसैरा धन्यवाद कांना लगा; सै अक सामरिया प्रदेशेरा निवासी थ्या। 17ऐत पन यीशु बौलु, कि “केया दशो मैहणु ठीक ना भुवै, जां सै नाउ कोढ़ी कोठि अत्तै? 18क्या ऐस गैर यहूदी छडि-करि तैन्हांं मझ हौरा कौ ना निकोत्था, जै परमेश्वरेरी महिमा करिया?” 19तां यीशु तैस सिंउ बौलु, “खड़ा उठ जां चलि गा, केईनी कि तीं विश्वास केया, तां तु ऐस बिमारी किना ठीक भुआ।”
परमेश्वरैरा राज्य ऐईंणैरा टैंम
(मत्ती 24:23-28; 24:37-41)
20जेख्णी फरीसियै तैस किना पुच्छु, कि परमेश्वरैरा राज्य केख्णी ऐईंणा? तां यीशु तेन्हांनि जुबाव दिता, “परमेश्वरैरा राज्य सुदैह ना ऐईंता। 21जां मैहणुवां ऐ ना बोलणु, कि ‘तका इठि आ या ओठि आ। केईनी कि परमेश्वर तुवाड़ै दिला मझ राज्य काता’।” 22फिरी तेनी चैला सिंउ बौलु, “सैकेई धियाड़ि ऐईंणी, जेख्णी तुवे तैन्हांं धियाड़िया तकांणा चाहलै जैस धियाड़ि मूं मैहणुरै पुत्रा वापस ऐईणु, पण तुवाड़ै बोलै ऐ ना तकायूंणु। 23मैहणुवां तुहां सिंउ बोलणु, ‘तका मसीह ओठि आ! या तका ऐठि आ!’ पण तुवे चलि मेईं गांहथै जां ना तैन्हांं पिचालीं गांहथै। 24केईनी कि जिहीं बिजई पूर्व दिशाय किना लैकरी पश्चिम दिशाय तेईनी चंमकति, तिहियें मूं यानि मैहणुरै पुत्रा बि ऐईंणु। 25पण पेहिलै जरूरी आ कि सै बड़ा जादा दु:ख सैहिया, जां इस पीढ़िरै मैहणु तैस तुच्छ समझिया। 26जीं असेड़ै पूर्वज नूहेरी धियाड़िया मझ भौरू थियु, तेत्युऐ मिंडु मैहणुरै पुत्रेरी धियाड़िया मझ बि भूंणु। 27केईनी कि जल-प्रलय ऐईंणा किना पेहिलै जै धियाड़ी थी तैन्हांं धियाड़िया मझ ज्यो-तेईनी कि नूह जहाजा पन ना चढ़ा तैन्हांं धियाड़िया तेईनी मैहणु खांतै पींतै थ्यै, जां तैन्हांं मझ ब्याह जां शादी भुईंथी। 28जां जिहीं असेड़ै पूर्वजा लूतैरे टैंमा भौरू थियु, जै सदोम शहरा मझ रिहींथ्या कि मैहणु खांतै-पींतै जां लींण-दींण कातै जां बुटै लांतै जां घर बणांतै थ्यै; 29पण जेसै धियाड़ी लूत सदोम शहरा किना निकोत्था तेसै धियाड़ी आग जां गंन्धक सुरगा किना बरसी जां सारै मैहणु जै शहरा मझ थ्यै, सभ खत्म करि छडै। 30जेख्णी मूं यानि मैहणुरै पुत्रा दुबारे वापस ऐईणु ता तैस धियाड़ि बि ऐतियु ऐ भूंणु।
31तेसै धियाड़ी जै छत्ति पन भुईया; जां तेसैरा समान घरा मझ भुआ ता तैस लींणैरै तेईनी हैट ना ऐईछिया, जां जै पट्टि मझ आ सै पट्टि किना वापस ऐईंणा मझ अपड़ा टैंम बर्बाद ना करिया। 32असेड़ै पूर्वजा लूतेरी लाड़ी याद करा#17:32 असेड़ै पूर्वजा लूतेरी लाड़ी याद करा मतलब जेनि परमेश्वरेरी आज्ञा ना मनि करि पीछै मुड़ि करि तकायिथ्यु जां सै लूणैरा खंम्भा बंणी गेयिथी। 33जै अपड़ै प्रांण बचांणेरी कोशिश करैला, सै तैस गुंवा दींणै, जां जै कोई अपड़ै प्रांण प्रभुरै तेईनी गुंवाला सै तैस बचा लींणै। 34आंउ तुहां सिंउ बोलता, तैस राती दो जणैं एकि मन्जै पनि भूंणै, अक लैई गांहणा अक छडि छडणा। 35दो जनेनी सेईतै-सेईतै चक्की पींहथी भूंणी, अक लैई गांहणी, अक छडि छडणी। 36दो जणैं पट्टि भूंणै, अक लै गांहणा अक छडि छडणा।” 37ऐक्यु शुणि करि चैलै यीशु किना पुच्छु, “हे प्रभु! ऐकेई सारी घटनाय कोठि भूंणी?” तेनी तैन्हांं सिंउ बौलु, “जेठि लास भूंणी तैठि ग्रिझ बि किठै भूंणैं।”#17:37 जेठि आत्मिक रूपा मझ मौरै मैहणु अत्तै, तैठि परमेश्वरैरा न्याय छुईं आईछी गांहणा
Actualmente seleccionado:
लूका 17: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.