यहुन्ना 20
20
खाली कब्र
1ऐईत्वारेरी धियाड़ि भियागै मरियम जै मगदल ग्राँईयेरी थी, तैस सिंउ होरी बि जनेनी भियागै पिचारी सिंउ तैस सेईतै कब्रि किनि यैई जां तैन्हैं घौड़ कब्रिरू दुवारा पना घिरौरा लधा। 2ऐ तका करि सै दाउड़ी करि शमौन पतरसा जां होरै तैस चैलै किनि यैई जैस सेईतै यीशु बड़ा प्रेम करींथ्या, तैस किनि ऐईछी करि बौलु, “सै प्रभुरी लास कब्रि किना कढि करि लै गियोरै अत्तै जां असु ना पता कि तैन्हैं सै कोठि आ रखौरा।” 3तां पतरस जां सै हौरा चैला कब्रि धेरै ग्यै। 4सै दोईयो किट्ठै दाउड़ै पण हौरा चैला पतरसा पीछै छडि करि आघै निकोहि ग्या, जां सै कब्रि किनि पेहिलै पुजि ग्या। 5तेनी ढुकि करि तकाउ तैठि लिकड़ै पियौरै लधै पण सै कब्रि अंदर ना ग्या। 6तां शमौन पतरस बि तैस पीछै-पीछै पुज्जा जां कब्रि अंदर ग्या जां लिकड़ै लधै। 7जां यीशुरै शिरा पन जै परना बंन्होरा थ्या सै लिकड़ा किनि ना थ्या पण होरी जगाय तैह ला करि अलग रखौरा मैआ। 8तां सै दुवां चैला बि जै तैस कब्रि पन पेहिलै पुजौरा थ्या सै अंतर ग्या जां विश्वास केया, कि यीशु मौरा मझां जींति गियौरा। 9केईनी कि हालै-तेईनी सै पवित्र शास्त्रा मझ जै लिखोरू थियु तैस ना थ्यै समझोरै कि यीशु मरि करि दुबारे जीतियुंणु जरूरी थियु। 10ऐत किना बाद चैलै अपड़ै-अपड़ै घरेनी चलि यै।
मरियम मगदलीनी पन प्रकट भूंणा
11पण मरियम कब्रि भेईर खड़ी बेशि करि लैरी दींति रेय्ही। तेनी लैरी दींतै-दींतै ढुकि करि कब्रि मझ तकाउ। 12जां जेठि यीशुरी लास रखौरी थी, तैठि हच्छै लिकड़ै लाउरै दो स्वर्गदूत बेठोरै तकाय अक शिरांणैरै पासै थ्या बेठौरा ता अक पलेयिंतेरै पासै बेठौरा थ्या। 13तैन्हैं तैस सेईतै बौलु, “हे नारी! तु केईनी आ रूंती?” तेसै बौलु, “सै मिंडै प्रभुरी लास उछुई करि लै गियोरै अत्तै जां आंउ ना जांणति कि तैन्हैं सै कोठि आ रखौरा।” 14ऐ बोलि करि सै पीछै मुड़ि बि ता यीशु तेनी खड़ा तका, पण तेनी यीशु परियांणा ना कि सै यीशु आ। 15यीशु तैस सेईतै बौलु, “हे नारी! तु केईनी आ रूंती! कोस आ तोपती!” तेनी माली समझि करि तैस सेईतै बौलु, “हे महाराज! अगर तीं तेसैरी लास उछुई लियौरी आ ता मूंनी शुणा कि तुहैं सै कोठि आ रखौरा ता मूं सै लै गांहणा।” 16ऐत पन यीशु तैस सेईतै बौलु, “मरियम!” तेनी पीछै मुड़ि करि इब्रानी भाषाय मझ बौलु, “रब्बूनी!” मतलब हे गुरू। 17यीशु तेसनी बौलु, “मिंडै पैयिड़ा सिंउ चिपकि करि मूं मेईं रौकै। आंउ हालै-तेईनी पिता परमेश्वरा किनि ना गियौरा, पण मिंडा भाईया किनि गहा, जां तैन्हांं सिंउ बोला कि आंउ अपड़ै जां तुवाड़ै पिता परमेश्वरा किनि जां अपड़ै परमेश्वरा जां तुवाड़ै परमेश्वरा किनि स्वर्गानि गांहथा।” 18मरियम जै मगदल ग्राँईयेरी थी, तेसै गहि करि तैन्हांं चैलानि ऐ शुणांउ कि, “मीं प्रभु लधा जां तेनी मूं सिंउ बिचारू बि।”
चैला पन प्रकट भूंणा
19तेसै ऐईत्वारेरी धियाड़ी जै हफ्तेरी पेहिली धियाड़ि थी। संन्हैरै टैंमा जेख्णी चैलै यहूदी अगुवो धेरै डरोरै दुवार बन्द करि अंदर बेठोरै थ्यै, ता यीशु तेन्हैरै बिच अईछी करि खड़ा भौ ग्या। तेनी चैला सिंउ बौलु, “तुहांनि सुख-शांति मेईया!” 20जां ऐक्यु बोलि करि यीशु अपड़ा हत्थ जां पशोकड़िया केरै घाव लुहाऐ। तां प्रभु तका करि चैलै खुश भौ ग्यै। 21यीशु तैन्हांं सिंउ फिरी बौलु, “तुहांनि सुख-शांति मेईया! जिहीं पिता परमेश्वरै संसारा मझ आंउ भेईजौरा थ्या तिहियें आंउ बि तुहां संसारा मझ भेईजता।” 22ऐ बोलि करि यीशु तेन्हांनि फूक मारी करि बौलु, “पवित्र आत्माय ग्रहण करा।” 23तुवे जैन्हां मैहणुवां केरै पाप माफ करेलै सै माफ भूंणै जां जैन्हां मैहणुवां केरै पाप माफ ना करेलै सै माफ ना भूंणै।
थोमा पन प्रकट भूंणा
24पण जेख्णी यीशु येईथ्या ता तैस टैंमा बाराह चैला मझां अक थोमा जेसैरू नाँ दिदुमुस थियु, तैन्हांं सेईतै ना थ्या। 25जेख्णी होरै चैलै तैस सिंउ बौलु कि, “असै प्रभु लधा!” ता तेनी बौलु, “ज्यो-तेईनी आंउ तेसेरै हत्था कीला केरै निशांण ना तका लियुं जां कीला केरै भौका मझ उंगलि ना दियुं जां तेसैरी पसलि मझ हत्थ ना दियुं त्यो-तेईनी मूं विश्वास ना कांना, कि सै मौरा मझां जींति गियौरा।” 26अठ धियाड़ी बाद यीशुरै चैलै फिरी घरा अंदर किट्ठै थ्यै, जां थोमा तैन्हांं सेईतै थ्या जां दुवारै बंद थ्यै, तां यीशु ऐईछी करि बिच खड़ै भौकरी बौलु, “तुहांनि शांति मेईया।” 27तां यीशु थोमेनि बौलु आ अपड़ि उंगलि इठि रख। तका, ऐ मिंडै हत्थ अत्तै। अपड़ै हत्थ अंणि करि मिंडी पसलि मझ सुट, जां शक मेईं करै पण विश्वास कर कि आंउ जींता। 28ऐ बोलि करि थोमै उत्तर दित्ता, “हे मिंडै प्रभु हे मिंडै परमेश्वर।” 29यीशु तेसनी बौलु, तीं मूं हैरी करि विश्वास केया, धन्य अत्तै सै जैन्हैं बिना तकांणै मूं पन विश्वास केया।
ऐसै किताबिरा उद्देश्य
30यीशु अपड़ा चैला केरै सांमणै होरै बि केही चमत्कार लुहाऐ, जेन्हेरै बारै ऐस किताबि मझ लिखोरूऐ ना। 31पण ऐ जै लिखोरै अत्तै ऐठणीरै तेईनी कि तुवे विश्वास करा कि यीशु ऐ परमेश्वरैरा पुत्र मसीह आ जां तुवे तैस पन विश्वास करा जां अनन्त जीवन हासिल करा।
Actualmente seleccionado:
यहुन्ना 20: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.