यहुन्ना 19
19
कोड़ै लवांणै जां मजाक उडाणा
1ऐत पन पिलातुसै सिपाहियनि आदेश दित्ता कि यीशु लै गहा जां कोड़ै मारा। 2सिपाहियै कंडा केरू मुकुट बंणा करि यीशुरै शिरा पन लुवाउ जां जांमुनि रंगेरै लिकड़ै लुवाय। 3जां तैस किनि अईछी करि बोलणा लगै, “यहूदिया केरै राजैनि प्रणाम! तैन्हैं यीशु पन थप्पड मारै।” 4फिरी पिलातुसै भेईर निकोहि करि मैहणुवां सिंउ बौलु, “तका! आंउ तुवाड़ै सांमणै तैस भेईर अंणता, ताकि तुहां पता लगी गहिया कि सै दोषी ना।”
5तां यीशु कंण्डा केरू मुकुट जां जांमुनि लिकड़ै संण भेईर अंणा। पिलातुसै तैन्हांं मैहणुवां सिंउ बौलु, “तका। ऐस मैहणु!” 6जेख्णी प्रधानयाजके जां मंदरेरै पेहरेदारै यीशु तका, ता सै चिंडै दी करि बोलणा लगै, “ऐस क्रूसा पन चाढ़ा! ऐस क्रूसा पन चाढ़ा!” पिलातुसै तैन्हांं सिंउ बौलु, “ऐस तुवे ऐपु लै गहा जां क्रूसा पन चाढ़ा। मूं ता ऐस मझ कौ गलत दोष लाधी ना ऐईंता।” 7यहूदी अगुवे तेसनी उत्तर दित्ता कि, “असेड़ि अक्कै व्यवस्था आ जां तैस व्यवस्थायरै अनुसार ऐ मोउतिरी सजायरै काबिल आ, केईनी कि सै अपड़ै-आपानि परमेश्वरैरा पुत्र मनता।”
8जां पिलातुस ऐ गल शुणि करि हौरा बि डरि ग्या। 9जां फिरी पिलातुसै राजभवना अंदर गहि करि यीशु किना पुच्छु, “तु कोठणिरा?” पण यीशु तेसनी कौ उत्तर ना दित्ता, 10पिलातुसै तैस सेईतै बौलु, “तु मूं सेईतै किना बोलता? क्या तु ना जांणता कि ताउ छडणैरा हक जां ताउ क्रूसा पन चाढ़नैरा हक मूंनी आ।”
11यीशु उत्तर दित्ता, “अगर ऐक्या हक ताउनि स्वर्गा किना परमेश्वरै ना भूंता दितौरा तां तिंडा मूं पन किछ बि हक ना थ्या, ऐठणीरै तेईनी जेनि मैहणु आंउ तिंडै हवालै क्यौरा तेसैरा पाप जादा।” 12ऐत पन पिलातुस तैस छडणैरै बारै मझ सौचणा लगा, पण यहूदी चिंडै दी करि बोलणा लगै, “अगर तीं ऐ छडि दित्ता ता तु रोमेरै सम्राट कैसरैरा दोस्त ना, जै ऐपुनि राजा बोलता, सै सम्राटैरा विरोध काता।” 13ऐ गलै शुणि पिलातुसै यीशु भेईर अंणनैरा आदेश दित्ता। सै तैस जगाय पन जैसनि चबूतरा बोलतै जां इब्रानी भाषाय मझ गब्बता बोलतै, तैठि न्याय कांनेरै सिघासना पन बेठा। 14फसहेरै त्यौव्हारेरी धियाड़ि थी। धियाड़ि लगभग दुवें बजेरा टैंम थ्या। पिलातुसै यहूदी अगुवो सिंउ बौलु, तका, “ऐहै तुवाड़ा राजा।” 15ऐत पन सै चिंडै दींणा लगै, “ऐस लै गहा! ऐस लै गहा! ऐस क्रूसा पन चाढ़ा!” पिलातुसै तैन्हांं सिंउ बौलु, “क्या आंउ तुवाड़ै राजै क्रूसा पन चाढ़ी दियुं?” प्रधानयाजके उत्तर दित्ता, “रोमन सम्राट कैसरा छडि करि हौरा असैड़ा कौ राजा ना।” 16तां फिरी तेनी यीशु क्रूसा पन चाढ़नेरै तेईनी तेन्हैरै हवालै करि दित्ता।
क्रूसा पन चाढ़ना
17तां सै यीशु लै ग्यै जां तैन्हैं यीशु किना तेसैरा अपड़ा क्रूस तेसै किना चुका जां तैस यरूशलेम शहरा किना भेईर मतलब खोपड़ी नाँईयेरी अक जगा आ, तैड़िनि लै यै, तैस जगायरू ना इब्रानी भाषाय मझ गुलगुत्ता बि थियु। 18तैठि तैन्हैं यीशु सेईतै दुवां होरनियां मैहणुवां पन बि क्रूस चाढ़ा, अक एकि पासै ता हौरा होरै पासै जां बिच मझ यीशु क्रूसा पन चाढ़ा। 19जां राज्यपाल पिलातुसै यीशुरै शिरा किना प्रन क्रूसा पन अक फट्टी ला दित्ती। तैस पन यीशु नासरिरी क्रूसा पन चाढ़नेरी वजह लिखोरी थी जां सै ऐ थियु लिखोरू; “यहूदिया केरा राजा।” 20ऐ दोष पत्र बड़ै यहूदियै पढ़ा केईनी कि जैस जगाय पन यीशु क्रूसा पन चाढ़ा सै जगा यरूशलेम शहरा नीड़ थी जां सै दोष पत्र इब्रानी जां लतीनी, जां यूनानी भाषाय मझ लिखौरा थ्या। 21तां यहूदिया केरै प्रधानयाजके पिलातुसा सेईतै बौलु, “तुवे यहूदिया केरा राजा मेईं लिखा; पण ऐ लिखा कि ऐनि बोलोरू थियु कि आंउ यहूदिया केरा राजा।” 22पिलातुसै उत्तर दित्ता कि, “मीं जै लिखि छडु सै बदलियूंणु ना।” 23जां यीशु क्रूसा पन चाढ़ना किना बाद सिपाहियै तेसेरै लिकड़ै लै करि चोउर हैसै बंणाय जां अक-अक हैसा लै ल्या जां भेईरियां लगौरा चौआ बि लै ल्या। सै चौआ सितोरा ना थ्या पण प्रन किना लै-करि हैट तेईनी पूरा बुणौरा थ्या। 24ऐठणीरै तेईनी सिपाहियै योकिया मझ बौलु कि, “ऐ फाड़ना ना ऐस पन पर्ची सुटि करि फैसला कातै कि ऐ कोसेरा भूंणा।” ऐ ऐठणीरै तेईनी भूं कि पवित्र शास्त्रा मझ लिखोरी गल पूरी भुईया कि, “तैन्हैं मिंडै लिकड़ै योकिया मझ बंडि ल्यै जां मिंडा लिकड़ा पन पर्ची सुटि।” सिपाहियै ऐहियें कियु।
25यीशुरी माँ, तेसैरी मयिरी भींण, क्लोपासैरी लाड़ी जां मरियम मगदलीनी बि क्रूसा किनि खड़ी थी। 26यीशु अपड़ि माँ जां तैस किनि खड़ै अपड़ा चैलै जैस सेईतै सै प्रेम करींथ्या, सै तैठि खड़ा तका। यीशु अपड़ि मयि सिंउ बौलु, “हे नारी! तका, ऐ तिंडा पुत्र आ।” 27तां तैस चैलै सेईतै बौलु, “तका, ऐ तिंडि माँ आ।” तेसै टैंमा सै चैला तैस अपड़ै घरेनी लै ग्या।
यीशुरी मोउत
28ऐत किना बाद यीशु ऐ पता लगी ग्या कि अबै सारै कम पूरै भौ ग्यै; ता पवित्र शास्त्रेरी गल पूरी कांनेरै तेईनी यीशु बौलु, “आंउ त्रिशणा।” 29तैड़ि सिरकै ला भरौरू भांड थियु ता कुनि क्यै सिरकै ला सैलोरा स्पंज शोठै पन रखि करि तेसेरै मुहां सेईतै ला। 30तां यीशु सै सिरका चक्खा, फिरी बौलु, “पूरू भूं।” जां मुंडकि उन्धी ला करि मरि ग्या।
बरछियै ला छेदियूंणा
31ऐ तियारिरी धियाड़ि थी, जां होरी दुईं धियाड़ि सब्त जां फसहैरा त्यौव्हार दोईयो किट्ठै थ्यै। यहूदी अगुवे ऐ ना चांहथै थ्यै कि सै त्रईयो आरामेरी धियाड़ी क्रूसा पन लटकौरै रिय्हा; केईनी कि आरामेरी धियाड़ि त्यौव्हारेरै कारण मैन धियाड़ि थी। ऐठणीरै तेईनी तैन्हैं पिलातुसा सेईतै विनती की कि तैन्हांं केरी जंघै भंनि दींतै कि सै झट मरि गहिया जां तेन्हैरी लासी थल्लै उतारी लियो। 32तां सिपाहियै ऐईछी करि यीशु सिंउ क्रूसा पन टंगौरै पेहिलै मैहणुरी जंघै भंनि छडि जां फिरी होरेरी बि भंनि छडि। 33पण जेख्णी तैन्हैं यीशु किनि ऐईछी करि तकाउ कि सै मरि गियौरा ता तैन्हैं तेसैरी जंघै ना भंनि। 34पण एकि सिपाहि तेसैरी पस्सलिनि बरछी बहि ता इकदम खून जां पांणी निकूंहणा लगु। 35जेनि मैहणु ऐ सभ तकाउ, तेनी ऐठणिरी गवाहि दित्ती कि तुवे बि यीशु पन विश्वास करि सकिया। जां तेसैरी गवाहि सच्ची आ जां तैस पता कि सै सच बोलता। 36ऐ ऐठणीरै तेईनी भूं कि पवित्र शास्त्रा मझ लिखोरू सै सारू सच भौ गहिया। “तेसैरी कौ बि हड्डी ना भनियूंणी।” 37फिरी पवित्र शास्त्रा मझ एकि होरी जगाय ऐ बि लिखोरू आ कि, “जैन्हैं सै बरछियै ला बिन्हथिया तैन्हांं तैस धेरै तकांणु।”
यीशु कब्रि मझ रखियुंणा
38ऐत किना बाद अरिमतियाह ग्राँईयेरा यूसुफ या जै यीशुरा गुप्त चैला थ्या पण यहूदिया केरै डरै ला गुप्त रिहींथ्या, तेनी पिलातुसा किना यीशुरी लास उतारनेरी अनुमति मगि। पिलातुसै तेसनी अनुमति दी दित्ती, जां यूसुफ अईछी करि यीशुरी लास लै ग्या। 39नीकुदेमुस बि अईछी रिय्हा, जै पेहिली राती यीशु सिंउ मिलणनी यौउरा थ्या। तेनी लगभग 33 किलो गन्धरस जां खुशबूदार चीजै अंणोरी थी। 40तां तेनी यीशुरी लास लैई जां यहूदिया केरै दबणेरै रिवाजेरै अनुसार खुशबूदार चीजै ला करि कफणा मझ पलैटा। 41जेठि यीशु क्रूसा पन चाढ़ौरा थ्या, तैठि अक बगीचा थ्या तैस बगीचै मझ अक कब्र थी जैत मझ हालै-तेईनी कौ ना थ्या रखौरा। 42तैन्हैं यीशु बि तैठि रखा, केईनी कि ऐ यहूदी मैहणुवां केरी आरामेरी धियाड़िरी तियारिरी धियाड़ि थी जां सै कब्र तैठि नीड़ थी।
Actualmente seleccionado:
यहुन्ना 19: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.