यहुन्ना 17
17
यीशुरी अपड़ै तेईनी प्रार्थना
1यीशु अपड़ै चैलानि ऐ सभ गलै बोलि करि सुरगा धेरै खड़ु तकाउ जां बौलु, “हे पिता! सै टैंम ऐईछी ग्या, अपड़ै पुत्रेरी महिमा कर, कि पुत्र बि तिंडि महिमा करि सकिया। 2केईनी कि तीं मूंनी सारी मानव जाति पन अधिकार दितौरा कि जै तीं मूंनी दितोरै अत्तै, आंउ तैन्हांं सभनियांंनि अनन्त जीवन दियुं। 3जां अनन्त जीवन ऐ आ कि मैहणु ताउ मतलब एकमात्र परमेश्वरा जांणि सकिया जां यीशु मसीह जै तीं भेईजौरा, सारै जांणि लिया। 4जै कम तीं मूंनी कांननी दितोरै थ्यै, सै कम मीं पूरै क्यै जां तैन्हैं कमैं ला धरती पन तिंडि महिमा की।” 5जां अबै, “हे पिता! तु अपड़ि उपस्थिति मझ मिंडी महिमा कर, सैहै महिमा जै संसार शुरू भूंणा किना पेहिलै जै ताउ सेईतै बेश्तै मूं किनि थी।”
अपड़ा चैला केरै तेईनी प्रार्थना
6“मीं तिंडु नाँ तैन्हांं मैहणुवां पन प्रकट कियु जै तीं संसारा मझां चुणी करि मूंनी दित्तै, सै तिंडै थ्यै जां तीं सै मूंनी दित्तै जां तैन्हैं तिंडै वचन मनि ल्यै। 7अबै तैन्हांं पता कि जै किछ तीं मूंनी दितोरू आ, सै सभ-किछ तिंडु दितोरू आ। 8केईनी कि जै संदेश तीं मूंनी दित्तै, सै मीं तेन्हांनि शुणा। तैन्हैं सै मनि करि सच मझ पता लगी ग्या कि आंउ ताउ किना यौउरा जां ऐ विश्वास केया कि तीं आंउ भेईजौरा।” 9“आंउ तैन्हांं केरै तेईनी प्रार्थना ना काता, जै संसारा सिंउ रिश्ता रखतै, पण तैन्हांं केरै तेईनी प्रार्थना काता, जै तीं मूंनी दितोरै अत्तै; केईनी कि सै तिंडै अत्तै।” 10जै किछ मिंडु आ सै सभ तिंडु आ जां जै तिंडु आ सै मिंडु आ। ऐन्हैं ला मिंडी महिमा प्रकट भोरी आ। 11“अबै मूं संसारा मझ ना बेशणु; पण मिंडै चैलै संसारा मझ रींहणै जां आंउ ताउ किनि ऐईंता; हे पवित्र पिता! अपड़ि सामर्थी ला तैन्हांं संम्भाय रख जै तीं मूंनी दितोरै अत्तै, जेनि ला सै अक भौ गहिया, जिहीं आंउ जां तु अक अत्तै।
12ज्यो-तेईनी आंउ तैन्हांं सेईतै रिय्हा, तिंडै तेनी सामर्थी नाँईयें ला जै तीं मूंनी दितोरू आ, मीं तेन्हैरी रक्षा की। जेसैरू नष्ट भूंणु तय थियु तैस छडि करि तैन्हांं मझां हौरा कौ नष्ट ना भुआ, ताकि जै पवित्र शास्त्रा मझ लिखोरू आ सै पूरू भुईया।” 13“अबै आंउ ताउ किनि ऐईंता जां ऐ गलै आंउ संसारा मझ बेठौरा बोलता कि सै मिंडी खुशी ला पूरी तराहि भरी गहिया। 14मीं तिंडा संदेश तैन्हांं किनि पुज्जा दित्ता, जां संसारेरै मैहणुवें तैन्हांं सिंउ बैर केया, केईनी कि जिहीं चारै आंउ संसारैरा ना, तिहियें सै बि संसारेरै नत्तै। 15आंउ ऐ प्रार्थना ना काता कि तु तैन्हांं संसारा किना उछुई लै, पण ऐ प्रार्थना काता कि तैन्हांं शैताना किना बचा रख। 16सै संसारेरै नत्तै, जिहीं आंउ संसारैरा ना। 17तिंडा वचन सच्चा ऐठणीरै तेईनी तैन्हांं सच्चाई ला पवित्र कर। 18जिहीं-चारै तीं आंउ संसारा मझ भेईजा, तिहियें-चारै मीं बि सै संसारा मझ भेईजै। 19जां तेन्हैरै फायदेरै तेईनी आंउ अपड़ै-आपा पवित्र काता ताकि सै बि सच्चाई ला पवित्र भुईया।”
सभनियांं विश्वासिया केरै तेईनी प्रार्थना
20“आंउ सिर्फ अपड़ा चैला केरै तेईनिऐ प्रार्थना ना काता पण तैन्हांं केरै तेईनी बि जै तेन्हैरा संदेश शुणि करि मूं पन विश्वास कातै। 21कि सै सारै जंणै अक अत्तै, जिहीं हे पिता परमेश्वर! तु मूं मझ आ जां आंउ ताउ मझ आ, तिहियें-चारै सै बि असु मझ अक भुईया, जेनि ला संसारेरै मैहणु ऐ विश्वास करिया कि तीं आंउ भेईजौरा।” 22“जै महिमा तीं मूंनी दितोरी आ, सै मीं तेन्हांनि दी दितोरी आ। कि जिहीं असै अक अत्तै सै बि अक भुईया 23आंउ तैन्हांं मझ जां सै मूं मझ, जेनि ला सै पूरी तराहि अक भौ गहिया जां संसारा पता लगी गहिया कि तीं आंउ भेईजौरा जां जिहीं-चारै तीं मूं सिंउ प्रेम केया, तिहियें चारै तैन्हांं सिंउ बि प्रेम केया।”
24“हे पिता परमेश्वर! मिंडी ईच्छा आ कि जै तीं मूंनी दितोरै अत्तै, सै जेठि आंउ आ मूं सेईतै रिय्हा, जेनि ला सै मिंडी महिमा तकाईया, जै तीं मूंनी दितोरी आ; केईनी कि तीं संसारेरी शुरूवाति किना मूं सिंउ प्रेम क्यौरा।” 25“हे धर्मी पिता परमेश्वर! संसारै तु ना जांणा पण मीं तु जांणा जां मिंडा चैला बि पता कि तीं आंउ भेईजौरा।” 26“मीं तेन्हांनि शुणाउ कि तु केणु आ, जां मूं तैहांनि लगातार शुणांतै रींहणु ताकि जिहीं-चारै तीं मूं सिंउ प्रेम क्यौरा, तेतिया ऐ प्रेम सै होरनियां सिंउ बि करि सकिया जां आंउ बि तैन्हांं सिंउ बंणौरा रिहूँ।”
Actualmente seleccionado:
यहुन्ना 17: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.