यहुन्ना 16
16
1“मीं तुहां सिंउ ऐ सभ गलै ऐठणीरै तेईनी बोलि कि तुवे कोसकेरी वजहि ला बहकी ना गहिया। 2तुवे तैन्हांं यहूदी सभाई घरा किना कढि लांणै। ऐतियु ना भूंणु, सै बि टैंम ऐईंणा जेख्णी मैहणुवां तुवाड़ा खून करि सौचणु कि असै परमेश्वरेरी सेवा अत्तै कातै। 3तैन्हांं ऐ ऐठणीरै तेईनी कांनु कि सै ना पिता परमेश्वरा जांणतै ना मूं जांणतै। 4पण मीं ऐ गलै तुहांनि ऐठणीरै तेईनी बोलि कि, जेख्णी ऐ गलै भूंणी ता तुहां ऐ चैता भुईया कि मीं ऐन्हां गला केरै बारै मझ पेहिलै शुणा छडोरू थियु।”
पवित्र आत्मायरै कंम
5अबै आंउ तैस किनि वापस गांहथा आ जेनि आंउ भेईजौरा आ, जां तुहां मझा ऐ मूं किना कौ ना पुछता कि तु कोई आ गांहथा। 6पण मीं ऐ गलै तुहांनि शुणाउरी अत्ति, ऐठणीरै तेईनी तुवाड़ा मंन दुखी भौ गियौरा। 7तांबि आंउ तुहां सिंउ सच-सच बोलता आ: मिंडु गांहणु तुवाड़ै तेईनी छै आ। अगर आंउ ना ग्या ता सै सहायक तुहां किनि ना ऐईंणा। जेख्णी मूं गांहणु ता सै मूं तुहां किनि भेईजणा। 8जेख्णी तैस ऐईंणु ता संसारैरा मैहणुवंनी पापेरै, धर्मेरै कंमा जां न्यायरे बारै मझ यकीन दिवांणा। 9तैस पापेरै बारै मझ यकीन दिवांणा कि सै मूं पन विश्वास कांननी नमां कातै। 10धार्मिकतायरै बारै मझ बि यकीन दिवांणा कि आंउ पिता परमेश्वरा किनि गांहथा आ जां फिरी आंउ तुहां ना लेहिंणा; 11जां न्यायरे बारै मझ यकीन दिवांणा कि संसारैरा सरदार शैतान दोषी मनि गियौरा आ। 12मूं तुहांनि होरू बि बड़ु किछ शुणाणु आ, पण तुवे ऐमिहां ऐन्हां सभनियांं गला समझि ना सकतै। 13पण जेख्णी सै सच्चाईरा आत्मा ऐईंणा, ता तुहांनि परमेश्वरेरी सच्चाईरै बारै मझ सभ-किछ शुणा दींणु; केईनी कि तैस अपड़ि तरफ सिंउ ना बोलणु पण जै किछ तैस परमेश्वरेरी तरफ सिंउ शुणनु सैहै बोलणु, जां जै गलै ऐईंणै बाऐ टैंमा मझ भूंणी सै तुहांनि शुणा दींणी। 14तैस मिंडी महिमा कांनी केईनी कि, जै मीं तेसनी शुणाउरू आ, सैहै तैस तुहांनि शुणाणु। 15जै किछ पिता परमेश्वरेरू आ सै सभ-किछ मिंडु आ। ऐठणीरै तेईनी मीं बौलु कि मिंडी बोलोरी गलै तैस तुहांनि शुणांणी।
दुख सुखा मझ बदली गांहणा
16“थोड़ी देरी बाद तुहां आंउ ना लेहिंणा जां फिरी तुहां आंउ थोड़ी देरी बाद लाधी ऐईंणा।” 17ऐत पन यीशुरै किछ चैलै योकिया मझ बौलु, “सै जै असु सिंउ बोलतै अत्तै कि, थोड़े टैंमा बाद तुहां आंउ ना लेहिंणा जां फिरी थोड़े टैंमा बाद आंउ तुहां लाधी चलि ऐईंणा जां ऐ ऐठणीरै तेईनी कि आंउ पिता परमेश्वरा किनि गांहथा ऐठणीरा कितु मतलब भुआ?” 18तां चैलै बौलु, “सै जै ‘थोड़ा टैंम’ बोलतै तेसैरा मतलब कितु आ? असु तेसैरी गल समझ ना ऐईंती।”
19यीशु ऐ पता थ्या कि सै तैस किना ऐठणीरा मतलब पुछणा चांहथै अत्तै, तां यीशु तैन्हांं सिंउ बौलु, “तुवे योकिया मझ जै मीं बौलु तेठणिरै मतलबेरै बारै मझ सोचतै अत्तै कि ‘थोड़े टैंमा बाद तुहां आंउ ना लेहिंणा जां फिरी थोड़े टैंम बाद आंउ तुहां लाधी चलि ऐईंणा।’ 20आंउ तुहां सिंउ सच-सच बोलता आ कि, मिंडी मोउती किना बाद तुहां लैरी दींणी जां पछताणु पण संसारैरा मैहणुवां खुशी मंनाणी। तुहां दुख मंनाणा पण जेख्णी आंउ तुहां जींता तकांणा ता तुवाड़ा दुख खुशी मझ बदली गाहणां। 21जेख्णी जनेनिरा लाउखियुंणैरा टैंम ऐईंता ता तेसनी बड़ी पीड़ै भूंती, केईनी कि तेसैरा पीड़ै भूंणैरा टैंम चलि ऐईंता, पण जेख्णी सै तैस बच्चैनी जन्म दींति ता सै संसारा मझ बच्चै ऐईंणैरी खुशी मझ सै अपड़ि सारी पीड़ै बिसरी गांहथी। 22ऐहियें-चारै तुवे मैहणु बि ऐमिहां दुखी अत्तै, पण फिरी मूं तुहां सिंउ मिलणु ता तुवाड़ा मंन खुशी ला भरी गांहणा, जां तुहां तैस खुशी मंनाणा किना कौ बि रौकि ना सकता। 23तैस टैंमा जेख्णी तुहां आंउ फिरी तकांणा ता तुहां मूं किना कौ सवाल ना पुछणा। आंउ तुहां सिंउ सच-सच बोलता कि, जै किछ बि तुवे पिता परमेश्वरा किना मिंडै चैलै भूंणेरै नातै मगेलै तेसनी सै सभ-किछ मेयि गांहणु। 24यौ-तेईनी तुहां मिंडै चैलै भूंणेरै नातै किछ ना मगोरू: परमेश्वरा किना मगेलै ता तुहांनि मेईंणु, ताकि तुवे खुश भौ गहिया।”
संसारा पन जीत
25“ऐ सभ गलै मीं तुहांनि उदाहरणा मझ बोलि, पण सै टैंम ऐईंता कि जेख्णी मूं उदाहरणा मझ किछ बि ना बोलणु, पण पिता परमेश्वरेरै बारै मझ सारी गलै साफ-साफ बोलणी। 26तैस टैंमा जेख्णी तुवे मिंडै चैलै भूंणेरै नातै ऐपु मिंडै पिता परमेश्वरा किना मगेलै ता तैस टैंमा मूं तुहांनि ना बोलणु कि मूं तुवाड़ी जगाय पिता परमेश्वरा सिंउ प्रार्थना कांनी। 27मिंडा पिता परमेश्वर ता तुहां सिंउ बड़ा प्रेम रखता, केईनी कि तुहैं मूं सिंउ बड़ा प्रेम क्यौरा, जां ऐ बि विश्वास कातै कि आंउ पिता परमेश्वरै भेईजौरा। 28आंउ पिता परमेश्वरा किना निकोहि करि संसारा मझ यौउरा। अबै फिरी आंउ संसारा छडि करि पिता परमेश्वरा किनि गांहथा।” 29यीशुरै चैलै तैस सिंउ बौलु, “तका, अबै तु खुलि करि बोलता जां होरी कौ गल उदाहरणा मझ ना बोलता। 30अबै असै समझि गियै कि तु सभ-किछ जांणता जां ताउ कौ जरूरत ना कि कौ ताउ किना सवाल करिया। ऐनि ला असै विश्वास कातै, कि तु परमेश्वरैरा भेईजौरा।” 31यीशु ऐ शुणि करि तेन्हांनि बौलु, “क्या तुवे अबै विश्वास कातै। 32तका! सै घड़ि ऐईंती आ ना पण अईछी गियोरी आ, जेख्णी तुहां ओरि-परि नशि गांहणु जां तुहां आंउ अकैला छडि करि अपड़ि-अपड़ि बत्त पकड़नि, तां बि आंउ अकैला ना भूंणा केईनी कि मिंडा पिता परमेश्वर मूं सेईतै आ। 33मीं तुहां सिंउ ऐ सभ गलै ऐठणीरै तेईनी बोलि कि, तुहांनि मूं मझ सुख-शांति मेईया। संसारा मझ तुहां दुख-दर्द सेहन कांना पूंणा, पण होंसला रखा; मीं इस संसारा मझ राज कांनारा शैतान हरा दितौरा आ।”
Actualmente seleccionado:
यहुन्ना 16: CDJNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.