Mark 6
6
Agigihu Küha keu Tungkupuu
1Jisü ye tipa-a qhive püzü pa khopemiqo sasü pa punugha lo wue. 2Sabbath tsalani Jisü ye synagog lo kütsü ae, eno pa tsa chikulumi kutomo no akichiqhive.
Panongu no ishi iniju, “Timi hipau ye khilau no hipaqo kükümsü ithulu kea? Alokütsü pa tsüpüa keu hiye kiu kea? Pa no akümzapu kümlà hipaqo shi akeu ye kiu kea? 3Hiye asǜ kümlàu ke kumo keshea? Hiye Mary nopu eno James, Joseph,#6:3 Greek tsa kiqi lo Joses ghí pi cheni Judas, eno Simon noqo thiküzüu ke kumo? Eno pa chelimiqo ye hilau ningu gholo anike kumo keshea?” Tisheno panongu ye Jisü jupe anheshuve.#6:3 Momu panongu ye Jisü ikhilumo ke
4Jisü no panoqo vilo pi, “Tungkupumi lakhi ye pa punugha, pa bolomiqo gholo eno pa likhi pa kibo lo thono aqha kütau lo ye agigihu tsü chenie.” 5Jisü ye tilehi aküsümi khami shou pa u be no shipivi keu nguno alau ye akümzapu kümlà kiumu shitsü mülave. 6Pa ye panongu küpülü küküha ju pesü akümzave ke.
Jisü no Pano Chighikini Puwu
Tisheno Jisü ye ache-axü lo aphu lakhi lono lakhi lo kütsüsü wue. 7Jisü no pano Chighikiniqo ku püzü mithekumo ghunguqo shou kükagha pesü panoqo tsü no timi kini-ni shi püzü panongu puwu.
8Pa no hitoi panongu mijetsü: “Kicheghüzü ghenguno aküsǘ likhi kumo aye kiumu pemoni. Achuqupu ngò jolabo pemoni momu apokhaqo lo pisa süpumoni. 9Apukhuqho pulo ikemu aphiküzü xakili kepu pemoni. 10Kughou nongu no aki lakhi lo ilo ngoni keno, mishiphu tipau qhimo ke kutólo tile ngo lo. 11Eno khile-khilemu nongu sasümo momu nongu tsa inimo aye, tipau-a qhivelo eno panongu lachile akeu thopi michi shi nongu pukhu müzá lo ayeghimukhu kukhuqhivelo.”
12Panongu no chewu püzü timiqo vilo amlo pebide masa keu tsa kütsüe. 13Panongu no tüghaküsa kutomo haphe eno thazü pesü küsükinimi kutomo nu tsü püzü panongu shipivi tsüe.
John Baptiz Kishiu Kütsü Lovetsü
14Jisü je ighono ajekipi shi akehu, akükau Herod ghí hipau ghili chiluve. Khami no ishi pia, “John Baptiz kishiu ye akithí lono xüputhuvae, hi ghenguno akümzapu kükaqo no pa lolo mülà anie.”
15Kütami no ishi pi, “Pa ye Elijah ke.”
Eno itaghi khami no ishi pia, “Pa ye khaghi lo tungkupumiqo toi keu ke.”
16Ikemu kughou Herod no hi chilu keno pa no ishi pi, “John, khuu I no akütsü lovetsü keno, pa ye akithí lono xüputhuvae!”
17Kughengu Herod ampi no John küghaluve penike azah tsüve püzü tshüve no akughuki lo sǘve pe ke. Pa no hitoi shikeu ye pa no sasü küghünauve keu pa thiküzüu Philip nipu Herodias ghenguno ke. 18Kughengu John no tamo no Herod vilo ishi pi ache, “O thiküzüu nipu sasü küghünave keu ye ayeza lo achipi kumoe.” 19Ikehu Herodias ye John shou aghakupu xapuve no pa pìthíve nishiqhiyi acheke. Ikemu li ye tishi müla no ache, 20kughengu Herod no John ye amikuchomi eno akimthemi lakhi kepi ithi no pa sümsa eno süsho acheke. Kughou Herod no John ghili chilu keno pa ye ighono avehuizüve; tishimu pa ye John tsa ini nishive.
21Ashekha lo adokivi ighi. Ike Herod no pa punu tsalà lo paw hiyampemi kijemiqo ngò ghüshimi zatsümiqo eno Galilee lo sakiphemiqo kusü no aghulhu kijè lakhi tsüe. 22Kughou Herodias nonga no iloghi no ilhe keno, li vechewo Herod eno pa no aghulhu lo kusü kemiqo mlo vepiqilue.
Akükau no angá vilo pi, “Nono kiu-kiumu lunishi keu I vilo khulo, eno I no ti O tsü nani ke.” 23Eno pa no li vilo tushoqhi no ishi piqhi, “Nono kiu khuni keno I no O tsü nani, I kükaphu tüxa kutólomu O tsünie.”
24Li no khalau ipe no pazá vilo ishi iniju, “Ni ye kiu khuni kea?”
Li pazá no ishi khochile, “John Baptiz kishiu kütsü khulo.”
25Paikhavi ayiliu no akìmighi shi iloghi no akükau vilo ishi qhüiniju, “Ni ye O pelo itehi John Baptiz kishiu kütsü akhu lakhi lo sǘ no I tsüpe nishi anie.”
26Akükau ye ighono amloküsa shive, ikemu pa shoqhi eno avelau ghulhu lo kusüpüa kemiqo ghenguno pa ye li no khu akeu mili keu shini shimove. 27Ikehu pa no tipau mütsa no timi pìthíve chekeu lakhi pelo wu no John kütsü lopesü ighi penike azah tsüve. Timi hu no wu püzü akughuki lono John kütsü lovetsü no, 28akhu lakhi lono pesü ideighi. Pa no ti pesü ayiliu tsü eno li no pesü pazá tsüve. 29Hipau sütsa chilu kelo John khopemiqo no ighino John sükumo pesü akumoki lo kütsüve tsü.
Jisü no Timi 5,000 Loji
30Apostolmiqo no Jisü sühope kumqo no panongu no kiu shilu eno kütsülu keno kümtsü pesü Jisü vilo pi. 31Timi kutomo no ighi eno wove akeu ghenguno panongu ye chu-sho kepu do ghí ithulumo kehu Jisü no panongu vilo ishi pi, “I gholo iqüighai keu-a lakhi lo ighino ado hami akulhoqhilulo.”
32Ike panongu likhi ashuka lono iqüighai keu-a lakhi lo wuve. 33Ikemu timi kutomo no panoqo no wuche keu ithive püzü mishiphuqo kümtsü lono Jisü eno pa khopemiqo züu no apukhu lono posü a-a hu tove aghí. 34Kughou azü mükü toluve püzü Jisü no timi kutomo ithulu keno, pa ye panongu ju pesü kimiyeqhiyive, kughengu panongu ye akheu küha keu ambe lakhi toi ke. Ikehu pa no panongu vilo thime kutomo pesü kütsüe.
35Tishi ake dolo avelau shive, ike Jisü khopemiqo no pa lau ighino ishi pi, “Hiye timi no küghünamokeu-a lakhi ke eno atsala ye tsüzüvae. 36Timiqo puwovelo, tishianguno panongu ghí aphughi sükümxa lo eno aphuqo lo wu no pano sala kiualamu chu kepu qhülu nani ke.”
37Ikemu Jisü no ishi khochile, “Nongu no kiuala chu kepu pesü panongu tsülo.”
Panongu no Jisü vilo pi, “Tiye ampe tüxa jume#6:37 Momu denarii 200 qhemi nguno akichiù avehupu shi nanie! Panongu lojí nike ghenguno ningu ye wu püzü pisa tijejehi puwove no asho qhüni keshea?”
38Jisü no iniju, “Nongu u lo asho khijehi ani kea? Wu no julo.”
Kughou panongu no phuluve keno ishi pi, “Ashopa pungu eno akha kini anie.”
39Tipathiu timi kümtsü amqo-amqo shi atsüni huzüi keu shou iqave penike Jisü no akhopemiqo kichetsü. 40Ike timiqo no aqhe mqo eno lhopungu mqo shi no iqae. 41Jisü no ashopa pungu eno akha kini ikhiluve no atsütsǘ lo jupuku püzü shikimthi tsü no asho süphoe. Tisheno timiqo kijé tsü penike pa no pa khopemiqo tsü. Jisü no akha kini ghí kijé pesü panoqo kümtsü tsüe. 42Panongu kümtsü aghakiqi shi chuluve, 43eno akhopemiqo no asho eno akha chukha kumo munomughoqo ashoghi chighikini kichelu. 44Tilehi chu kemi dolo kipitimi asatheve kemi kikihi likhi no aqó lo 5,000 ae.
Jisü no Azü Shou Alache
45Tishive kemtsa Jisü no pa khopemiqo pelo ashuka lo ikuvepe püzü pa züu no Bethsaida lo wuve pe, tisheno pa no aqokitikhi küghüxa puwove. 46Panongu puwuve kethiu, Jisü ye naghuto küdau akighini shi niye iqhove.
47Tsüzüve kethiu, ashuka ye ayizükucho mtá lo ae, eno Jisü ye pa likhi ayeghi shou ae. 48Azü shou amlhü no ashuka fuchile akehu akhopemiqo no akijiküsa shi ashuka lo helisa mjo akeu Jisü no ithulue. Tsütho nikeu zülo Jisü no ayizükucho shou alà chesü akhopemiqo lau wu. Pa ye panoqo vechesü wuve niye shive, 49ikemu kughou Jisü no azü shou alà cheche keu akhopemiqo no ithulu keno, panongu ye aghawu küghashi kümsüve. Panongu no igha ipeghi, 50kughengu panongu kümtsü no pa ithulu no shishe msàve ke.
Paikhavi Jisü no panongu pütsa no ishi pi, “Amlo mutotoilo! Ni ke. Msà kevilo.” 51Tisheno pa no panongu gholo ashuka lo ikughive eno amlhü ye iqünheive. Akhopemiqo ye shishe akümzaqhiyive, 52kughengu panongu ye asho ghili hu vethamla no ake eno panongu mlo ye mükamüghai ake.
53Kughou panongu no ayizükucho kathasü ighi keno, panongu ye Gennesaret lo ighilu eno tilehi ashuka tshüpe qhive. 54Panongu no ashuka lono ikighi khavi, timiqo ye Jisü jukimchiluve. 55Panongu no tipau ko-aqha kümtsü lo posü wu no küsükinimiqo ayephu lono xapusü Jisü no khilehi ani ipi panongu no chilu keno tipau-a lo saighi. 56Eno Jisü no aphu, mishiphu momu aphughi hokümxaqo khilehi wu keno timiqo no aküsümi pesü alhikishi-aqo lo sawo qhi. Panongu no Jisü no uche keu ubephi ashe lo likhimu bulu penike qhüiniju, eno tipau bulu kemi kümtsü no viluve.
Actualmente seleccionado:
Mark 6: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.