Mark 7
7
Shipixive Chekeqo
1Jerusalem lono ighi kemi Phariseemi ngò ayeza kükütsümiqo khami no Jisü sühope kumqoluve, 2ikelo Jisü khopemiqo khami no au mithemo no akeu mütsüvemo püzü achuqupu chu aghí keu panongu no ithulue. 3(Phariseemi eno Jewmiqo kümtsü panow kichimiqo kukhuaye pape ghi panongu u pesü chine-chini kiqi lono shikimtheve paghi mphi züu ye chu-sho chemoe. 4Panongu ye kughou lhidikishi-a lono ideghini keno, au mütsü mphi züu ye chu-sho chemoe. Eno panongu ye akukhuaye kütau kutomo pepimhe che, kümsüju kelo ajikhu, alikoli eno sünizüliqo küsü-mithe keu toi keu.)
5Ike Phariseemi eno ayeza kükütsümiqo no Jisü vilo ishi iniju, “O khopemiqo ye kushiye kichimiqo kukhuaye kiqi lono xü nike züqhulo panongu u shikuchubeve keu pesü achuqupu chu cheni kea?”
6Jisü no khochile, “Isaiah no tungkuptsa lono nongu kühaküghaqo ghili pi kelo pa ye achipi shi pie; Tiye ishi yèpüani:
“ ‘Timi hipaqo ye pano kichí lo ye I gihu cheni,
ikemu panongu mlo ye I lau no putosü pe anie.
7Panongu ye adou lono I mülá cheni;
panongu kükütsü ye timi yezaqo ghola likhi ke.’#7:7 Isa 29:13
8Nongu ye Alhou zakütsüqo pheve no timi kukhuayeqou pape achenie.”
9Eno Jisü no kibe ghi pi, “Nongu ye nolikhi no kukhuayeqo pape anike ghenguno Alhou zakütsüqo ye akivishi ghakütsü pesü akou qhive anie! 10Kughengu Moses no ishi pi, ‘O pù eno O zá gihu lo,’#7:10 Ipe 20:12; Zaki 5:16 eno, ‘Khukhumu papù momu pazá ghusho aye pìthíve kepue.’#7:10 Ipe 21:17; Achine 20:9 11Ikemu nongu no ishi pi cheni, tsalá timi khukhumu papù momu azá kuphulu kepu shi akemu, hiye Corban shivea (tipau kiqi ye, Alhou ghenguno qhive keu) ipi shupheve aye, 12nongu ye panongu pelo panongu papù momu azá ghenguno kiumu shipemove chenie. 13Ikehu nongu no pekishesü ighi keu pimheye no Alhou tsa pesü avehu küha keu shive tsü anie. Eno nongu ye titoi keu thime kutomo shi achenie.”
14Itaghi Jisü no aqokitikhi vilo pa lau ighilo pi ku no ishi pi, “Kümtsü no I tsa inilo eno hi vethalulo. 15Ashou thime kiunomu timi lakhi lolo ilo no shikuchube mülae. Ikemu timi lakhi lolo no ipeghi keu no pa shikuchubeve chenie. 16Chilu nishi kemiqo pelo chilu pelo.”#7:16 Kaku khami lo ye ajo 4:23 lo akeu ghí süpüani
17Jisü no aqokitikhi qhive no aki lo iloghive kethiu, pa khopemiqo no pa vilo aholetsa hipau kiqi iniju. 18Ikelo Jisü no ishi iniju, “Nongu ye itehi kutólo vethamla aphi keshea? Ashou no timi lolo ilo keu ye kiumu pa shikuchubeve müla ipi nongu ye mtha keshea? 19Kughengu tiye timi mlo lo ilo chemoe ikemu akive lo ilove no aphimpi lono ipeve chenie.” (Hi pikeu vechewo, Jisü no achuqupu kümtsü akimthe kepi shupheve tsüe.)
20Pa no ishi pikibe: “Timi lakhi lolo no ipeghi keu no pa shikuchubeve chenie. 21Kughengu timi lakhi mlo alou no küsakügha kükümsü hipaqo ipeghi chenie: kipito xüküpsa, aküpüka, ghikiqhi, 22ashupu, alakimine, axeküsü, pishikiqhi, ghasü kümlà, anhekushu, piküpüsa, aqheküza eno aghüzünikha. 23Küsakügha hipaqo kümtsü alolo no ipeghi püzü timi lakhi shikuchubeve chenie.”
Jisü no Syrophoeniciami Totimi Lakhi Küpülü Gihu tsü
24Jisü no tipa-a qhive püzü Tyre kupunú lo wue. Pa no aki lakhi lo iloghi eno timi khuu pelomu ithi penishimo no ae; tishimu pa no ngo akeu ye tuqhou shimlave. 25Topumi lakhi ye Jisü ghili chilukhavi ighi püzü Jisü pukhuphi lo itsaqiluve. Li ngá ye mithekumo ghungu no tsüghape acheke. 26Topumi hu ye Greekmi lakhi eno li ye Syria lo Phoenicia ipikeu lono punú kemi. Li no Jisü vilo tüghaküsa hu li ngá phi lono hapheve tsülo ipi qhüinijue.
27Jisü no li vilo pi, “Atüghishi anuliqo pelo panongu no chunishi akeu thaqhü chuluve pelo, kughengu anuliqo sho pesü atsǜqo veqhitsü nikeu ye achipi kumoe.”
28Li no khochile, “Iye Ampeu, atsǜqo ghí akibepu qholo anuliqo no chu keu phekiqhi-kighiqo chu chenie.”
29Ike Jisü no li vilo pi, “Hitoi khochile keu ghenguno, no ye wolu nanie, tüghaküsa hu ye O ngá qhive no wuvae.”
30Li no aki lo idewo kelo angá ye alipa lo zü aghí keu ithulu eno tüghaküsa ye angá qhive no wuve aghí.
Jisü no Akìní kughupomi eno Amilitshü Kemi Shipivi
31Tisheno Jisü ye Tyre hokümxa qhive no Sidon vechesü Galilee züghi küdau iqi no Decapolis ko-aqha lo ilo. 32Tilehi timi khami no akìní-ipove no akushukulu atsa pilu kemi lakhi Jisü lau sasü ighi, eno panongu no Jisü vilo pa u pesü timi tipau shou be tsülo pi qhüiniju.
33Jisü no aqokitikhi lau no timi tipau sawuve no pa u loti pesü timi tipau kìní lo chhosü tsü. Tisheno pa no pa u loti lo amití müsü pukuve püzü timi tipau mili bu tsü. 34Pa no atsütsǘ lo jupuku no atuthu kijè shè ghi timi tipau vilo ishi pi, “Ephphatha!” (hipau kiqi ye “Khaqhivelo!”). 35Ikelo timi tipau kìní ye khaqhive eno chiluve, pa mili ye kuqhove eno pa ye mütsümishei atsa pithuve.
36Khuu vilomu pi kevilo pi Jisü no azah panongu tsüve. Ikemu pa no khijehi ghasü keno tijehi panongu no tipau ghili küghae. 37Timiqo ye shishe akümza keu no chhitoive. Panongu no ishi pi, “Pa ye thowkha kümtsü aghileshi shivae. Pa ye akìní kughupomi pelo chilu pe eno amili-kütshümi pelo ghí atsa pilu pe ke.”
Actualmente seleccionado:
Mark 7: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.