Génesis 15
15
Tata Diosqa Abramwan tratota ruwan
1Chaymanta Tata Diosqa Abramman mosqoypi jina parlarqa: Ama manchachikuychu, Abram, imaraykuchus noqa waqaychasojniyki kani. Qanpa t'inkaykeqa may chhikapuni kanqa, nispa.
2Abramtajrí kuticherqa: Tukuyta Kamachej Tata Dios, imapajtaj imatapis qowankiri? Qan yachanki waway mana kasqanta. Chayrayku wañupojtiy, Damascomanta kamachiy Eliezer tukuy imayta chayaqeta jap'enqa, nispa. 3Chantá Abram nillarqataj: Tata Dios, mana wawata qowankichu. Chayrayku tukuy imay kajtapis wasiypi paqarej kamachillaychá chayaqeta jap'enqa ari, nispa. 4Tata Diostajrí kuticherqa: Chayaqetaqa mana kamachiykichu jap'enqa, manachayqa wawaykipuni, nispa.
5Chantá Tata Diosqa Abramta jawaman pusaspa, nerqa: Janajta qhawarispa, ch'askakunata yupay. Yupayta atiwajchu? Mirayniykeqa ajina mana yupay atina kanqa, nispa.#Ro 4.18; Heb 11.12.
6Chantá Abramqa Tata Diospa nisqanta jap'ikorqa,#15.6 Diospa nisqanta jap'ikorqa: Abraham tukuy sonqo Diospi atinikorqa. Ro 4.3,9,22; Gl 3.6; Stg 2.23. Diosqa Abramta cheqan runapaj qhawasqa Diospa nisqanta jap'ikusqanrayku, mana imata ruwasqanraykuchu. Chaypacha Diosqa manaraj kamachisqankunata rejsichisqarajchu. Gl 3.17. Chayrayku Pablo qhespichisqa kanapaj, Diospi atinikunamanta parlaspa, Abram Diospi atinikusqanmanta parlan. Ro 4; Gl 3.6-20. chayraykutaj Tata Dios chaynejta Abramta cheqan runapaj qhawarqa. 7Tata Dios nillarqataj: Noqa Tata Dios kani. Noqamin Caldea suyupi Ur llajtamanta orqhomorqayki, kay jallp'ata qanman chayaqeta qosunaypaj, nispa.
8Chantá Abram nerqa: Tukuyta Kamachej Tata Diosníy, imaynapitaj sut'ita yachasaj kay jallp'ata chayaqeypaj jap'inaytari? nispa.
9Tata Diostaj nerqa: Apamuy uj wakata, uj cabrata, uj carnerota ima, sapa ujtaj kinsa watayojkama kachun. Jinallataj apamuy uj jurk'utata, urpi irpatawan, nispa.#15.9 Ñawpata ima tratota ruwaspa, uywakunata ñak'aspa, Diosta yupaychaj kanku. Jer 34.18-19.
10Jinataj Abram chay uywakunata apamuspa, Diospa ñawpaqenpi ñak'arqa, chantá khuskanmanta khuchuspataj, chimpapurata churarqa. Jurk'utata, urpi irpatawanrí mana khuchorqachu. 11Jinapi suwintukuna ñak'asqa uywakunaj patanman tiyaykojtinku, Abram chaykunata manchacherqa.
12Inti yaykuykushajtin, Abramqa sinch'ita puñurparerqa, chantá manchay laqhapi rikhurispa, manchachikorqa. 13Chantá Tata Dios payta nerqa: Kunan ujta nisqayki: Mirayniykeqa runaj llajtanpi tiyakonqanku, chaypitaj wata runa jina tawa pachaj watata sinch'ita ñak'arenqanku. 14Qhepanejmanrí noqa wata runaman tukuchej suyumanta llajtayojkunata ñak'arichisaj, mirayniykitaj chaymanta manchay qhapaj llojsimonqanku.#Hch 7.6-7. 15Qantajrí allin machuña, sonqo tiyaykusqa kawsaypi wañupunki, jinataj maypichus ñawpa tataykikuna kashanku, chayman rinki. 16Tawa pachaj wata tukukuytataj mirayniykeqa kay jallp'aman kutimponqanku, imajtinchus kaypi tiyakoj amorreokunaj millayta ruwasqankoqa manaraj chaykamachu. Chayrayku paykunata manaraj chinkarparichisajchu, nispa.
17Laqhayaykuytataj uj horno manchayta q'oshñishaj rikhurerqa, jinallataj lawrashaj nina,#15.17 Horno, nina lawrashaj: Tata Dios Abramman kay iskay imakunanejta rikhurispa, tiluspa payman imatachus nisqanta junt'ananta nisqa. chaykunataj uywa ñak'asqaj chawpinta pasasharqa. 18Chay p'unchay Tata Diosqa Abramwan kay tratota ruwarqa: Noqa kay jallp'ata mirayniykiman qosaj Egipto mayumantapacha Éufrates jatun mayukama. 19Chay jallp'api kunan tiyakushanku quenitakuna, quenizitakuna, cadmoneokuna, 20jeteokuna, ferezeokuna, refaitakuna, 21amorreokuna, cananeokuna, gergeseokuna, jebuseokuna ima, nispa.
Actualmente seleccionado:
Génesis 15: DQPC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Revisión Biblia Quechua Boliviano © Sociedad Bíblica Boliviana, 2017.