Génesis 14
14
Abramqa Lotta kacharichin
1Chaypacha Amrafelqa Babilonia suyupi kuraj kamachej karqa, Arioctaj Elasar suyuta, Quedorlaomertaj Elam suyuta, Tidaltaj Goyín suyuta kamacherqa. 2Paykuna tantaykukuspataj, Sodomapi kuraj kamachej Beraj contranta, Gomorrapi kuraj kamachej Birsaj contranta, Admapi kuraj kamachej Sinabpa contranta, Zeboyinpi kuraj kamachej Semeberpa contranta, chantá Soarpi kuraj kamachejpa contranta ima maqanakorqanku. 3Chay phishqantin kuraj kamachejkunaqa Sidín vallepi soldadonkukunata tantaykorqanku, maypichus kunan Wañusqa Qocha nisqa kashan, chaypi. 4Paykuna chunka iskayniyoj watataña Quedorlaomer sutiyoj kuraj kamachejpa makinpi kasqanku. Chunka kinsayoj kaj watapitajrí phishqantin kuraj kamachejkuna Quedorlaomerpa contranta oqharikusqanku.
5Qhepan watapi kuraj kamachej Quedorlaomer, pikunachus paywan kasharqanku chaykunapiwan ima Astarot Carnayinman rispa, Refayinpi tiyakojkunata maqanakuspa atiparqanku. Chaymantataj Jam cheqapi Zuz suyumanta kajkunata atiparqanku, Savé Quiriatayin cheqapitaj Em suyumanta kajkunata atiparqanku. 6Seir nisqa orqokunapipis Hor suyumanta kajkunata atiparqanku, paykunatataj Parán pampakama qhatiykorqanku. Chaynejqa ch'innej qayllapi kashan. 7Quedorlaomerqa, pikunachus paywan kasharqanku, chaykunawan kutimushaspa, Enmispatman chayarqanku. Chay cheqajta ujnin sutin Cadés karqa. Chantá Amalec llajtayojkunaj jap'iyninkupi tarisqanku chhikata, tukuyninta tukucherqanku. Jinallataj Jasesón Tamarpi tiyakoj amorreokunatapis wañucherqanku.
8Chantá phishqantin kuraj kamachejkuna ujchakuspa, maqanakoj llojserqanku. Paykuna Sodomata, Gomorrata, Admata, Zeboyinta chantá Soarta ima kamacherqanku. Paykunataj Sidín vallepi chay waj tawa kuraj kamachejkunaj contrankuta maqanakorqanku: 9Quedorlaomerpa contranta, Tidalpa, Amrafelpa chantá Ariocpa contranta ima. Paykunaqa Elammanta, Goyinmanta, Sinarmanta, chantá Elasarmantawan ima kuraj kamachejkuna karqanku. 10Chaypacha Sidín vallepi ashkha pujyukuna breawan junt'a karqa. Chantá Sodomata kuraj kamachej, jinataj Gomorrata kuraj kamachej ima maqanakupi atipaykuchikorqanku. Chaymanta ayqeshaspataj, soldadonkukunaqa breayoj pujyukunaman urmaykorqanku, wakin soldadokunataj orqokunaman ayqekorqanku.
11Chantá maqanakupi atipajkunaqa Sodomamanta, Gomorramanta ima valorniyoj kaj chhikata, mikhunata ima apakaporqanku, jinaspataj chaymanta riporqanku. 12Abrampa sobrinon Lottapis jap'ispa aparqanku, jinallataj imanchá tiyaporqa, chaytapis, imaraykuchus Lot chaypacha Sodomapi tiyakusharqa.
13Chantá uj runa maqanakumanta ayqemuspa, imachus pasasqanta hebreo nisqa Abramman#14.13 Abram: Kay chijllaypi nin Abramqa “hebreo” kasqanta. “Hebreo” kay simikunamanta rikhurisqa: Apiru, hapiru, chayrí habiru. Unay ajinata niyta yachasqanku, pikunachus mana chaykama allinpajchu qhawasqa kasqanku, chaykunata: Qhatuwan purejkunata, pagasqa soldadokunata, suwaspa purejkunata, chayrí ima jawa ayqeykachaspa purejkunata ima. Gn 10.21; 1 S 14.11. willarqa. Chaypacha Abramqa Mamrej encina sach'arara qayllanpi tiyakusharqa. Mamreqa amorreo llajtayoj karqa, jinataj Escolpata, Anerpatawan wawqenku, paykunataj Abramman sayasqa karqanku.
14Abramrí sobrinon preso kasqanta yachaspa, wasinpi paqarej kamachinkunata#14.14 Wasinpi paqarej kamachinkuna: Rantikusqan kamachinkunaj churinkuna karqanku. tantarqa. Tukuyninpi 318 qharikuna karqanku. Chantá Abramwan, kamachinkunawan ima tawantin kuraj kamachejkunata Dan llajtakama qhatiykorqanku. 15Chantá tutayaykojtin, Abramwan, chantá kamachinkunawan ima kuraj kamachejkunata muyuykuspa, ujllata maqanakoj yaykuykorqanku. Atipaykuspataj, paykunata Hobakama qhatiykorqanku. Hobaqa Damasco llajtamanta wichaynejpi kashan. 16Paykunata atipaykuspataj, tukuy ima apasqankuta qhechorqanku. Ajinata Abramqa Lot sobrinonta, chantá imanchá tiyaporqa, chaytawan qhechukamporqa. Jinallataj warmikunata, chay waj runakunatawan ima kacharicherqa.
Melquisedecwan Abramwan
17Abram Quedorlaomerta, jinallataj paywan khuska kaj kuraj kamachejkunatapis atipasqanmanta kutimushajtin, Sodoma llajtata kuraj kamachej Savé valleman payta taripaj rerqa. Chaynejqa Kuraj Kamachejpa vallen nisqa karqa. 18Jinapi Salemmanta kuraj kamachej Melquisedec t'antata, vinotawan ima Abramman aparqa. Melquisedecqa Patapi Kaj Diospa sacerdoten karqa. 19Chantá pay Abramta kay jinata samincharqa:
Patapi Kaj Dios saminchasuchun,
pichus janajta, kay pachatawan ruwaj, chay.
20Patapi Kaj Dios yupaychasqa kachun,
pichus awqaykikunata atipachisorqa, chay, nispa.
Chantá Abramqa tukuy imatachus qhechusqanmanta, sapa chunkamanta ujta Melquisedecman qorqa.
21Chaymanta Sodomata kuraj kamachejrí Abramta nerqa: Chay qhechusqayki runakunallata kutichipuway. Chay waj imakunatatajrí jap'ikapullay, nispa.
22Abramtajrí Sodomata kuraj kamachejman ajinata kuticherqa: Noqaqa chhika kaj Patapi Kaj Tata Diosman tiluspa niniña, pichus janajta, kay pachatawan ruwajman: 23Qanpata kajmanta ni imata jap'ikusajchu, ni q'aytullatapis, ni juk'uta watanallatapis, ama ninaykipaj: Noqaj tiyapuwasqanwan Abram qhapajyan, nispa. 24Noqapajqa mana imatapis munanichu. Runaykuna imatachus mikhorqanku, chayllata kutichipuway. Pikunachus riysiwajkuna, Aner, Escol, chantá Mamré ima, paykunapis imachus paykunaman chayajta jap'ikapuchunku, nispa.
Actualmente seleccionado:
Génesis 14: DQPC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Revisión Biblia Quechua Boliviano © Sociedad Bíblica Boliviana, 2017.