LUCAS 14
14
Si Jesus Nagaayo sang Tawong Bilbilon
1Sa adlaw nga inugpahuway sang nagsulud sia sa pagkaon sa balay sang manugdumala nga Fariseo, ginapanilagan nila sia. 2Kag yari karon, sa atubangan niya may tawong bilbilon. 3Kag si Jesus nagpamolong sa mga mangin-alamon sa kasogoan kag sa mga Fariseo, nga nagasiling, “Tugut bala ang pag-ayo sa adlaw nga inugpahuway, ukon indi?” 4Apang naghipus sila. Niyan gin-uyatan niya sia kag gin-ayo, kag ginpalakat sia. 5Kag nagsiling sia sa ila, “Sin-o bala sa inyo, nga may asno ukon baka nga naholog sa bobon, kag indi magkuha sini gilayon sa adlaw nga inugpahuway?”#Mat. 12:11. 6Kag indi sila makasabat sini.
Ang mga Inagda sa Sinalosalo
7Karon nagpamolong sia sing paanggid sa mga inagda, sang namolalongan niya kon daw ano ang pagpili nila sang pinasulabing mga duug, nga nagasiling sa ila, 8“Kon agdahon ka sang bisan sin-ong tawo sa sinalosalo sang kasal, dili ka maglingkod sa pinasulabing duug, basi kon nakaagda sia sing tawo nga dungganon pa sa imo; 9kag ang nag-agda sa imo kag sa iya magpalapit sa imo kag magsiling, ‘Hatagi sing duug ining tawo,’ kag niyan magasugud ka sa pagkuha nga may kahuya sang labing kubus nga duug. 10Apang kon ginaagda ikaw, kadto ka kag maglingkod sa labing kubus nga duug, agud nga kon mag-abut ang nag-agda sa imo makasiling sia sa imo, ‘Abyan, paibabaw ka’; niyan may himaya ka sa atubangan sang mga nagalingkod sa pagkaon kaupud nimo.#Hulu. 25:6-7. 11Kay ang tagsatagsa nga nagapakataas sang iya kaugalingon paubson, kag ang nagapaubus sang iya kaugalingon pataason.#Mat. 23:12; Luc. 18:14.”
12Si Jesus nagsiling man sa nag-agda sa iya, “Kon nagahimo ikaw sing paniaga ukon panihapon, dili pag-agdaha ang imo mga abyan ukon ang imo mga utud ukon ang imo mga himata ukon ang imo mga kasilingan nga manggaranon, basi nga sila mag-agda man sa imo, kag mahimo sa imo ang balus. 13Apang kon nagahimo ikaw sing sinalosalo, agdaha ang mga imol, ang mga pingkaw, ang mga piang, ang mga bulag, 14kag manginbulahan ikaw, bangud nga wala sila sing ibalus sa imo. Kay balusan ka sa pagkabanhaw sang mga matarung.”
Ang Paanggid nahanungud sa Dakung Sinalosalo
15Sang nabatian ini sang isa sang nagalingkod sa pagkaon kaupud niya, nagsiling sia kay Jesus, “Bulahan yadtong magakaon sa ginharian sang Dios!” 16Apang nagsabat si Jesus sa iya, “May tawo nga naghimo sing dakung sinalosalo, kag nag-agda sia sing madamu; 17kag sa tion sang sinalosalo ginpakadto niya ang iya ulipon sa pagsiling sa mga inagda, ‘Kari kamo; kay ang tanan nahanda na.’ 18Apang tanan sila nagsugud sa pagpamalibad. Ang nahauna nagsiling sa iya, ‘Nakataba ako sing uma, kag kinahanglan nga kadtoan ko kag tan-awon ini; ginapangabay ko sa imo, pasaylohon mo ako.’ 19Kag ang isa nagsiling, ‘Nakabakal ako sing lima ka pares nga baka, kag malakat ako sa pagtilaw sa ila; ginapangabay ko sa imo, pasaylohon mo ako.’ 20Kag ang isa nagsiling, ‘Nakapangasawa ako, busa indi ako makakara.’ 21Gani nag-abut ang ulipon kag nagsugid sa iya agalon sini. Niyan ang agalon sang panimalay nga naakig nagsiling sa iya ulipon, ‘Gowa ka sing dalidali sa mga dalan kag sa mga banas sang banwa, kag dalha diri ang mga imol kag mga pingkaw kag mga bulag kag mga piang.’ 22Kag nagsiling ang ulipon, ‘Ginoo, nahimo ang imo ginsogo, kag may duug pa.’ 23Kag ang agalon nagsiling sa ulipon, “Kadto ka sa mga dakung dalan kag sa mga hinabongan, kag pilita ang katawohan sa pagkari, agud nga mapuno ang akon balay. 24Kay nagasiling ako sa inyo, nga walay isa sadtong mga tawo nga gin-agda nga makatilaw sang akon sinalosalo.’”
Ang Pag-isip sang Kabilihanan
25Karon nag-upud sa iya ang dalagkung mga kadam-an; kag nagliso sia kag nagsiling sa ila, 26“Kon ang bisan sin-ong tawo nagakari sa akon kag wala nagadumut sang iya kaugalingon nga amay kag iloy kag asawa kag mga anak kag mga utud nga lalaki kag mga utud nga babayi, hoo, kag bisan sang iya kaugalingon nga kabuhi, indi sia mangin-akon gintoton-an.#Mat. 10:37. 27Ang bisan sin-o nga wala nagapas-an sang iya kaugalingon nga cruz kag nagasonod sa akon, indi mangin-akon gintoton-an.#Mat. 10:38; 16:24; Mar. 8:34; Luc. 9:23. 28Kay sin-o bala sa inyo, nga nagahandum sa pagtukud sing torre, nga indi anay maglingkod kag mag-isip sang kabilihanan, kon may igapahuman sia? 29Basi kon, sang nabutang niya ang sadsaran, kag indi makasarang sa pagtapus, ang tanan nga makakita sini magasugud sa pag-uligyat sa iya, 30nga nagasiling, ‘Ining tawo nagsugud sa pagtukud, kag wala makasarang sa pagtapus.’ 31Ukon sin-o bala nga hari, sang nagakadto sia sa pagsumpung sa isa ka hari sa pag-awayan, indi anay maglingkod kag magbinagbinag kon makasarang sia upud sang napulo ka libo sa pagsugata sa nagaabut batok sa iya nga may duha ka pulo ka libo? 32Kag kon indi, sa malayo pa gid ang isa, nagapadala sia sing manugpangatubang kag nagapangayo sing kasugtanan sang paghidait. 33Busa gani, ang bisan sin-o sa inyo nga indi magbiya sang tanan niya nga pagkabutang indi sia mangin-akon gintoton-an.
Asin nga Nagtab-ang
(Mat. 5:13; Mar. 9:50)
34“Ang asin maayo; apang kon ang asin magtab-ang, ano bala ang pagpaasin sini? 35Wala ini sing pulus bisan sa duta ukon sa bulutangan sang higko; ginapilak ini sa gowa. Ang may mga idulungug sa pagpamati, magpamati sia.”
Actualmente seleccionado:
LUCAS 14: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society