LUCAS 13
13
Maghinulsul ukon Mawala
1May pila sa sadto gid nga tion nga nagsugid sa iya nahanungud sa mga Galileanhon nga ang ila dugo ginsimbog ni Pilato sa mga halad nila. 2Kag nagsabat sia sa ila, “Nagahunahuna bala kamo nga ining mga Galileanhon mga makasasala labaw sa tanan nga Galileanhon, bangud nga nag-antus sila sining mga butang? 3Nagasiling ako sa inyo, Indi; apang kon indi kamo maghinulsul tanan kamo mapatay man. 4Ukon yadtong mga napulog walo nga napukanan sang torre sa Siloe kag nagpatay sa ila, nagahunahuna bala kamo nga malinapason sila sing labi sa tanan nga tawo nga nagapuyo sa Jerusalem? 5Nagasiling ako sa inyo, Indi; apang kon indi kamo maghinulsul tanan kamo mapatay man.”
Ang Paanggid nahanungud sa Higuerang Walay Bunga
6Kag nagpamolong sia sining paanggid: “Ang isa ka tawo may higuera nga natanum sa iya ulubasan; kag nagkadto sia sa pagpangita sing bunga sa sini kag walay nakita. 7Kag nagsiling sia sa manugtatap sang uvas, ‘Yari karon, sa tatlo na ka tuig nagakari ako sa pagpangita sing bunga sa sining higuera, kag wala ako sing nakita. Tapsa ini, ngaa bala nagasablag pa ini sang duta?’ 8Kag nagsabat sia sa iya, ‘Ginoo, pabayai ini anay sa sining tuig pa, tubtub nga makutkutan ko ang palibut sini kag mabutangan ko sing abono. 9Kag kon magapatubas ini kutub niyan, maayo: apang kon indi, tapson mo ini.’”
Isa ka Babaying Sioktot Ginaayo sa Adlaw nga Inugpahuway
10Karon nagapanudlo sia sa isa sang mga sinagoga sa adlaw nga inugpahuway. 11Kag may babayi nga may espiritu sang masakit sa napulog walo ka tuig; nagsioktot kag indi sia nga mas-a makatadlong. 12Kag sang si Jesus nakakita sa iya, gintawag niya sia kag nagsiling sa iya, “Babayi, nahuklasan ka sang imo masakit.” 13Kag gintakdungan niya sia sang iya mga kamut, kag sa gilayon nagtadlong sia, kag naghimaya sa Dios. 14Apang ang punoan sang sinagoga, nga nangakig bangud nga si Jesus nagpang-ayo sa adlaw nga inugpahuway, nagsiling sa katawohan, “May anum ka adlaw nga dapat ipangabudlay; gani sa ila magkari kamo kag magpaayo, kag dili sa adlaw nga inugpahuway.”#Ex. 20:9-10; Deut. 5:13-14. 15Niyan ang Ginoo nagsabat sa iya, “Mga salimpapaw! Wala bala ang tagsatagsa sa inyo nagahubad sa adlaw nga inugpahuway sang iya baka ukon sang iya asno sa pasungan, kag nagadala sa iya sa pagpainum? 16Kag indi bala dapat ining babayi, nga anak ni Abraham nga nagapus ni Satanas sa napulog walo ka tuig, paghuklasan sining gapus sa adlaw nga inugpahuway?” 17Sang pagsiling niya sini, ang tanan niyang mga kasumpung nahuy-an; kag ang bug-os nga katawohan nagkalipay sa tanan nga mahimayaon nga butang nga nahimo niya.
Ang Paanggid nahanungud sa Binhi nga Mostaza
(Mat. 13:31-32; Mar. 4:30-32)
18Busa nagsiling sia, “Kaangay bala sa ano ang ginharian sang Dios? Kag sa ano bala ipaangay ko ini? 19Kaangay ini sa lamigas nga binhi sang mostaza nga ginkuha sang isa ka tawo kag ginpanggas sa iya kaugalingon nga katamnan; kag nagtubo ini kag nahimo nga kahoy, kag ang mga pispis sa langit nagpugad sa mga sanga sini.”
Ang Paanggid nahanungud sa Tapay
(Mat. 13:33)
20Kag sa liwat nagsiling sia, “Sa ano bala ipaangay ko ang ginharian sang Dios? 21Kaangay ini sang tapay nga ginkuha sang babayi kag gintago sa tatlo ka sukub nga harina, tubtub nga ang bug-os nalatum.”
Ang Makitid nga Gawang
(Mat. 7:13-14, 21-23)
22Nagpadayon sia sa iya dalanon nga nagaagi sa mga banwa kag sa mga minoro, nga nagapanudlo, kag nagapanlakatan pa Jerusalem. 23Kag ang isa nagpamangkot sa iya, “Ginoo, diotay lamang bala ang maluwas?” Kag nagsabat sia sa ila, 24“Panikasug kamo sa pagsulud sa ganhaan nga makitid; kay, nagasiling ako sa inyo, madamu ang magapaninguha sa pagsulud kag indi makasarang. 25Sa tion nga ang agalon sang panimalay nakatindug kag nakatakup sang ganhaan, magasugud kamo sa pagtindug sa gowa kag sa pagpanoktok sa ganhaan, nga nagasiling, ‘Ginoo, buksi kami.’ Magasabat sia sa inyo, ‘Wala ako makahibalo kon tagadiin kamo.’ 26Niyan magasugud kamo sa pagsiling, ‘Nagkaon kami kag nag-inum sa imo atubangan, kag nagpanudlo ikaw sa amon mga dalan.’ 27Apang magasiling sia, ‘Nagasiling ako sa inyo, wala ako makahibalo kon tagadiin kamo; palayo sa akon, tanan kamo nga manugbuhat sang kalautan!#Sal. 6:8.’ 28Didto may paghinibi kag pagbalagrut sang mga ngipon,#Mat. 8:12; 22:13; 25:30. kon makita ninyo si Abraham kag si Isaac kag si Jacob kag ang tanan nga manalagna sa ginharian sang Dios kag kamo ginasobol. 29Kag maga-abut ang mga tawo gikan sa sidlangan kag sa katundan, kag gikan sa aminhan kag sa bagatnan, kag magalingkod sa pagkaon sa ginharian sang Dios.#Mat. 8:11. 30Kag yari karon, may mga naolihi nga mahauna,#Mat. 19:30; 20:16; Mar. 10:31. kag may nahauna nga maolihi.”
Ang Panalabiton ni Jesus tungud sa Jerusalem
(Mat. 23:37-39)
31Sa sadto gid nga takna may nagpalapit nga mga Fariseo, kag nagsiling sa iya, “Halin ka kag lumakat, kay si Herodes buut magpatay sa imo.” 32Kag nagsiling sia sa ila, “Lakat kag silingon yadtong ido nga talonon, ‘Yari karon, nagasobol ako sang mga yawa kag nagapang-ayo karon kag buwas, kag sa ikatlong adlaw makatapus na ako. 33Apang kinahanglan nga ako magpadayon sa akon dalanon karon kag buwas kag sa madason nga adlaw; kay indi mahimo nga ang manalagna mapatay sa gowa sang Jerusalem.’ 34O Jerusalem, Jerusalem, nga nagapatay sang mga manalagna kag nagabato sang mga ginpadala sa imo! Makapila kuntani nga buut ko tiponon ang imo mga anak subong sang munga nga nagatipon sang iya mga piso sa idalum sang iya mga pakpak, kag indi ka buut! 35Yari karon, ang inyo balay ginapabayaan. Kag nagasiling ako sa inyo, indi ninyo ako makita tubtub nga magsiling kamo, Dayawon ang nagakari sa ngalan sang Ginoo!’#Sal. 118:26.”
Actualmente seleccionado:
LUCAS 13: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society