Yohana 11
11
Khuufwa khwa Lazaaro
1 #
Luk 10.38,39 Abawo umusaani mutweela isi balaanga bari Lazaaro, abe umenya i Besaniya, uwaba abe waminyikhile. Besaniya shaba nisho shishaalo abe sheesi Mariya amenya, atweela ni yaayawe, Maliza. 2#Yoh 12.3Mariya yuno niye uwahakha bikyele by'Omukasya kamafura kakawunya bulayi, wabisiimulila litsuune lyeewe. Lazaaro uwaba umutsiina, abe ali wandaaye weewe. 3Nashiryo bakooko ba Lazaaro abo barumanisa isi Yezu, nga bamuloma bari, “Mukasya, umusaale woowo waminyikhile.”
4Ne Yezu n'awulila shino waloma ari, “Butsiina buno sibunamilamo khufwa khwa Lazaaro ta, akhali bunamilamo khuuwa shiriifwa isi Wele. Nio akile khulwe butsiina buno, Umwaana uwa Wele afune khubuyilisibwa.”
5Yezu abe wasiima Maliza ni yaayawe, ni Lazaaro. 6Ne shitweela busa nga n'awulila ari Lazaaro waminyikhile, weloosela khumenya isi aba khumala bifukhu bibindi bibili. 7Lwanyuma lwe bifukhu ibyo, Yezu waloma baleekelwa beewe ari ni mwiitse khutsye i Yuda lundi.
8Baleekelwa beewe bamuloma bari, “Umuleekeli, s'abirirewo imbuka ingali khukhwaama nga Bayudaaya abo ni bakana bakhukhupe kamabaale ta; ne ari ukana wileyo lundi?”
9Yezu wabaloma ari, “Kumuusi sikulimo tsisaawa liikhumi na tsibili? Nashiryo umuundu ukyenda kumuusi s'etuya taawe. Khulwekhuba abonela buwaanga bwe shiibala shino. 10Ne umuundu n'akyeenda mu shilo etuya, khulwekhuba iba mbaawo buwaanga ta.” 11Yezu n'amala khuloma shino walooselakho ari, “Umusaale wefwe Lazaaro wakonele; ne indikho intsya khumwinyusa.”
12Baleekelwa bamuloma bari, “Ne noola wakonele liilo, kane awone.” 13Yezu aba amanyisa ari Lazaaro wafwiile, ne nibo bambaasa bari aloma khu liilo lya busheele.
14Lwanyuma Yezu wababoolela lubuula ari, “Lazaaro wafwiile. 15Ne khulwenywe nekhoyele, khulwekhuba ise sinabayo ta, nio manya mwafukiililamo. Ne ari lekha khutsye is'ali.”
16Ne Tomasi, ulaangibwa ari Mukhwana, waloma baleekelwa baashe ari, “Lekha nafwe khutsye, khufwile atweela ni naye.”
Yezu niye khulamukha nalundi niye bulamu
17Yezu n'olayo, wanyoola nga Lazaaro wamalile mu ŋani bifukhu bine. 18Besaniya yaba ambi ni Yerusalemu, lukyeendo lulukhoola ni tsikilomota tsitaru ta. 19Bayudaaya bakali baaba beetsile isi Maliza ni Mariya, khubasaasila ni khukonelesa luufu lwa wandayaabwe. 20Ne Maliza n'awulila ari Yezu alikho etsa, wenyukha watsya khumwakaanila. Mariya niye warama mu ntsu. 21Maliza waloma Yezu ari, “Umukasya, uba nga uwabeele ano, khali wandaayase s'afwiile ta. 22Ne namanyile ndi akhaba aluno ari, shoosi shoosi sheesi kane uloombe, Wele kane ashikhuwe.”
23Yezu wamuloma ari, “Wandaayo alilamukha abe umulamu lundi.”
24 #
2 Mak 7.22,23; 12.44 Maliza wamwiilamo ari, “Naamanyile nga alilamukha lundi mu khulamukha khwe baafu, khu shifukhu shimaliilisi.”
25Yezu wamuloma ari, “Ise niye khulamukha, nalundi ise niye bulamu. Umuundu uwufukiilila mus'iise, akhaba nga wafwiile, aliba umulamu. 26Nalundi, buli uyo yeesi uwufukiilila mus'iise nga ashiili umulamu, s'alifwa ta.”
Kila Yezu areeba Maliza ari, “Ufukiilila shino?”
27Maliza welamo ari, “Ee, Umukasya, ifukiilila ndi iwe niye Kristu, Umwaana uwa Wele, abe isi shiibala shaliindilila.”
Yezu alila kamasika
28Maliza n'amala khuloma bino, watsya walaanga yaayawe Mariya mushimoonyo, nga aloma ari, “Umuleekeli wetsile ali antsye alikho akhulaanga.” 29Mariya n'awulila shino, wenyukha wangu watsya isi Yezu ali. 30Ne Yezu abe ashiili khwinjila mu shishiitsa sheesi abe bamenyamo ta; abe ashiili mu shifwo sheesi Maliza amwakananamo. 31Ne Bayudaaya babaaba ni Mariya mu ntsu, nga beetsile khumwolakho khu masika, ni babona nga enyukha atsya antsye, bamuloondakho, nga bambaasa bari alikho atsya khulilila khu ŋani.
32Mariya n'ola mu shifwo isho wabona Yezu, wamukwa mu bikyele wamuloma ari, “Umukasya, uba nga uwabeele ano, khali wandaayase s'afwiile ta.”
33Yezu n'abona Mariya nga elootsa, atweela ni Bayudaaya babaaba ni naye nga nabo belootsa, shamuwambakho naabi nalundi shiisa shamuwamba. 34Wabareeba ari, “Mwamusiikhile waheena?”
Bamwiilamo bari, “Mukasya yiitsa ubone.” 35Yezu walila kamasika. 36Bayudaaya baloma bari, “Kale ni mubone nga abeele n'amukana!” 37Ne batweelakho khu nibo baloma bari, “Umuundu uyuno niye uwabiimbula tsimoni tsy'omubofu, abe s'anyala wawonesa Lazaaro walekha khufwa ta?”
Yezu alamusa Lazaaro
38Nga Yezu shiisa shamuwaambile lundi, watsya khu ŋani. Iŋani yaba mwifuluma, nga imulyaango walyo bareerekho libaale. 39Yezu waloma ari, “Ni muruseyo libaale.” Kila Maliza, umukooko w'omufu aloma ari, “Umukasya, nambaasa ari khuwunya khukali, khulwekhuba khukhwaama nga ni khwamusiikha, abirirewo bifukhu bine.”
40Yezu wamureeba ari, “Ise s'ikhulomeele iwe ndi n'ukane ufukiilile kane ubone shiriifwa sha Wele ta?”
41Beetsa barusakho libaale. Yezu wenyusa tsimoni mu ngaaki waloomba ari, “Paapa, ikhusiima lwekhuba iwe wumba byeesi ikhuloomba. 42Namanya ndi busheele umba byeesi ikhuloomba. Ne inoma shino khulwe bulayi bwe lituuli lye babaandu babeemile ano nga bandoleleele, nio akile bafukiilile bari iwe niye uwandumana ise.”
43Yezu n'amala khuloma aryo, walaanga ni likono likali ari, “Lazaaro, rura antsye!” 44Lazaaro uwaba abe wafwiile, warura antsye, nga bamuboweleele tsingubo tseesi bamusiikhilamo. Abe kamakhono ni bikyele, ni mu moni namwo, nga bamuboweleele ingubo.
Yezu wabalakila ari, “Nimumukangulule, mumulekhe busa.”
Luwomelo lwe khukhwiira Yezu
(Mat 26.1-5; Mrk 14.1-2; Luk 22.1-2)
45Bakali khu Bayudaaya babaaba beetsile khulilisa Mariya, ni baabona sheesi Yezu akhola, bamufukiililamo. 46Ne babaandi belayo isi Bafarisaayo, bababoolela byeesi Yezu akholile. 47Nashiryo basaayi bakhulu ni Bafarisaayo balaanga Lukhobo Lukhulu, baloma bari, “Khunakhola khuryeena? Khulwekhuba umuundu yuno alikho akhola bye kamakaanga bikali. 48Ni kane khumulekhe eloosele aryo, babaandu boosi kane bamufukiililemo. Shino kane shikile bawuli Baroma beetse bonakise Lisaayilo Likhulu ni linaambo lyeefwe.”
49Ne mutweelakho khu be lukhobo, abe ulaangibwa ari Kayafa, nga niye uwaba Umusaayi ufuura bukhulu kumwiiko kwene ukwo, waloma ari, “Inywe muli nga mumukhamanyile ta! 50Simubona muri shili shilayi umuundu mutweela khufwa mu shifwo she babaandu boosi, khuminyisa linaambo lyoosi ni lihela?” 51Niye s'aloma shino khulwe kamakyesi keewe umweene busa ta, ne khulwekhuba aba Umusaayi ufuura bukhulu kumwiiko ukwo, kila aloma bilomo bye buŋoosi ari Yezu kane afwe khulwe linaambo lyoosi. 52Ne shiili khulwe linaambo ilyo lyonyene ta, ne akhali nio akile anyalise khubusanisa atweela babaana ba Wele babasalaniile ino ni n'eyo. 53Ni khukhwaama khu shifukhu isho, Bayudaaya bakhakakho khuweentsa kumukhoosi kwe khukhwiira Yezu.
54Nashiryo ni khukhwamila awo, Yezu walekha khukalakaalila lundi abulafu mu Bayudaaya ta. Warurayo watsya mu shifwo shishiili ambi ni kumubiimbi, mu shiriimba shishilaangibwa shiri Efurayimu. Wamenya ibweene iyo atweela ni baleekelwa beewe.
55Ari abe shifukhu she Bayudaaya she Kamayiiya ke Khubirakho shili ambi. Babaandu bakali baama tsindulo baniina i Yerusalemu nga Kamayiiya ke Khubirakho kashiili khukhwoola ta, bari bepyeluuse. 56Abe balikho baweentsa Yezu, nga babusaniile mu Lisaayilo Likhulu bareebana bonyene bari, “Mwambaasa muri kane etse khu mayiiya kano namwe ta?”
57Basaayi bakhulu ni Bafarisaayo abe barusile likaambila bari abe umuundu yeesi umanyile isi Yezu ali, ali ni khubaboolela, batsye bamuwambe.
Actualmente seleccionado:
Yohana 11: LCE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Lumasaaba Catholic Bible © The Bible Society of Uganda, 2017.