LUKE 19
19
Zakai pianthah thu
1Huleh Jesu chu Jeriko khua ah a luut a, a paisuaah a. 2Huleh ngai in, mi khat a min Zakai kichi, siahdong houtu a um a, amah chu mi hausatah ahi. 3Huleh ama’n Jesu chu mi bangtobang ahiai chih muh a tum a; hizongleh mipi lahah a din ngiam jiahin a muthei sih hi. 4Huchi'n a taikhelh a, a en diingin theipi dawnah a kal a; ama’n hu lampi hung tawn diing ahihjiahin. 5Jesu hu mun ahung tunin a daahtou a, amah chu a mu a a kawmah, Zakai, kintahin hung kum in; ajiahchu tuni’n na inn a tung diing ka hi, a chi a. 6Huin kintahin ahung kum a, kipaahtahin amah chu a zintunta hi. 7Huleh amahun hichu a muh tahun, Misual kawma tung diingin a chiahta ve, chi'n a phun uh a. 8Huleh Zakai chu a dinga, Lalpa kawmah, Ngai in, Lalpa, ka sum kimkhat tagahte kawmah ka pe diing a; huleh mi thuampua bangaha dihloutaha ka laah a um leh a lehli in ka dit diing, a chi a. 9Huin Jesu’n a kawmah, Tuni’n hi inn ah hutdamna ahung tungta hi, amah zong Abraham tapa ahi ngal a. 10Ajiahchu beimangte hawl diing leh hundam diing a mihing Tapa chu hung ahi, a chi a.
Talent tehkhinthu
11Huleh hi thute a ngaihkhiah laiun Jerusalem a naih taah jiah leh Pathian gam hung langpah diing a a ngaihtuah jiahun tehkhinthu khat a soi beh a. 12Ama’n hujiahin a soi a, Mi loupi koi ahakhat a lalna gam diing khat va neia, hung kilehkiit diingin kho gamlatah ah a chiah a. 13Huleh ama’n a suaah sawmte a koua, sanasum sawm a kawmvah a pia a, huleh, Ka hung kiit masiah hikhu in sumkawl na vei un, a kawmvah a chi a. 14Hizongleh a mite’n amah chu a hua va, Hipa ka tungva vaihawm diingin ka deih sih uh, chi'n a nungah palai a taisah uhi. 15Huleh hichi ahung hi a, gam chu va nei a ahung kilehkiitin, a sum veipungdan uh heetna diingin a suaah sum a piahte chu a kawmah a kousah a. 16Khatnapa chu a hung a, Lalpa na sanasum sawmin a pung hi, a chi a. 17Ama’n a kawmah, Hoih e, nang suaah pha; sil tawmtakhat tunga na ginum jiahin kho sawm tungah vaihawmtu in pangin, a chi a. 18Huin a nihnapa a hung a, Lalpa, na sanasum nga in a pung hi, a chi a. 19Ama’n huchimahbangin a kawmah, Nang zong kho ngaa tungah vaihawmtu in pang in, a chi a. 20Huleh a dang a hung a, Lalpa, en in, na sanasum hi-ah a um hi, kisiaahna puana tuam in ka koih heh hi; 21Ajiahchu mi gumtat na hi a ka hung lau hi; na koih louh bang na la veu a, huleh na tuh louh bang na aat veu hi, a chi a. 22Ama’n a kawmah, Nang suaah gilou, na kamsuah ngei in siamlouh ka hung tangsah diing. Mi gum tat ka hiha, ka koih louhna a ka laah veua, huleh ka tuh louhna a ka aat veu na he hi. 23Huchi ahihleh ka hung tuncha ka sum a pung toh ka laah theih diing a bangchidana ka sum chu sum-inn a na koih lou na hiai? a chi a. 24Huin ama’n a kawma dingte kawmah, A sanasum chu laahsah unla, sawm neipa kawmah pia un, a chi a. 25(Huin amahun a kawmah, Lalpa, ama’n sanasum sawm a nei hi, a chi va; ) 26Ajiahchu ka hung hilh ahi, A nei taphot chu piahbeh ahi diing a, huleh a nei lou chu a neihsun zong laahsah ahi diing hi. 27Hizongleh hu ka meelmate, a tungva ka vaihawm diing deihloute chu hung pui unla, ka ma-ah that un, a chi a.
Jesu gualzoutaha Jerusalem a luutna
28Huleh ama’n huchia a soi zohin a makai a, Jerusalem lam zuanin a chiah tou va. 29Huleh hichi ahung hia, Olive kichi taanga Bethphage leh Bethani kho kawm naih ahung tunun a nungjuite laha mi nih a sawl a, 30Na mazawn va khua ah va chiah unla, na luut tahun sabiltung nou koimah tuanna ngei nai louh na va mu diing uh; huchu hung suut unla, hung kai un. 31Huleh mi koipouh in, Bang diinga na suut uh ahiai? chia ahung dot leh, Lalpa’n a mamoh ahi, chi'n a kawmah soi un, a chi a. 32Huleh a sawlte chu a va chiahta va, a kawmva a soi bang ngei in a va mu uh. 33Huleh sabiltung nou chu a suut uleh a neite’n a kawmvah, Sabiltung nou bang diinga na suut uh ahiai? a chi va. 34Amahun, Lalpa’n a mamoh ahi, a chi va. 35Huin Jesu kawmah ahung kai va; huleh sabiltung nou tungah a puante uh a phah va, a tungah Jesu a tuangsah uh. 36Huleh a chiah laiin lampi ah a puante uh a phah va. 37Huleh ahung tun kuana Olive taang liamsuhna diing tah ah nungjui mipi zousiah in a sil loupi bawlte zousiah a muh jiahun a kipaah va, aw ngaihtahin Pathian a paahtawi va. 38Lalpa mina hung Kumpipa chu a hampha hi; vaan ah lemthu leeng henla, tungnungpen ah loupina um heh, chi'n. 39Huin mipi laha Pharisai khenkhat in a kawmah, Houtupa, na nungjuite tai in, a chi va. 40Ama’n a dawng a, a kawmvah, Ka hung hilh ahi, hite a sip unchu suang te a kikoudohpah diing uh, a chi a.
Jesu’n Jerusalem a kahkhumna
41Huleh a tun kuanin khopi chu a mu-a, a kahkhum a. 42Aw, nang mahmah in tu na hun sung beehin na hamuanna thu hung he tamai lechin maw! himahleh tuin chu na mit apat a kiphual ta hi. 43Ajiahchu hitobang nite na tungah ahung tung diing, na gaalte’n na kimvelah leikua a tou diing va; na kiimkotin pawt thei louin ahung uumkhum diing uh. 44Huleh nang leh na sunga na tate tualsaatna’n ahung nei diing va, na sungah suang khatbeeh kithuap in a nuse sih diing uh; ahung kiveh lai nite na heet louh jiahin, chi'n.
Jesu’n Pathian biahinn a suhsiangna
45Huin amah chu Pathian biahinn ah a luut a, sil zuahte leh leite a nohdoh a. 46A kawmvah, Ka inn chu haamteina inn ahi, chih gelh ahi; hizongleh nangun gutate kua in na siamta uh, a chi a. 47Huleh ama’n ni chinin Pathian biahinn ah thu a hilh a. Hizongleh siampu lalte leh lehkhagialtute leh mipi houtute’n amah suhmang a tum uh. 48Himahleh mipi zousiah in phatuamngaitaha a thu a ngaihkhiah zing jiahun a lohnadan diing a he sih uhi.
Actualmente seleccionado:
LUKE 19: SIMTBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.