LUKE 20
20
Jesu thuneihna a dotna uh
1Huleh hichi ahung hi a, Pathian biahinn a mite thu a hilh a, tanchinpha a soi laiin, ni khat chu siampu lalte leh lehkhagialtute upa haw toh a kawmah ahung va. 2Huchi'n a kawmah, Bang thuneihna in ahiai hi silte na bawl? hung hilh in, a chi va. 3Ama’n a dawng a, a kawmvah, Ken zong sil khat ka hung dong diing, hung dawng un; 4John baptisma hi vaan a kipan ahiai, mihinga kipan? a chi a. 5Huin amahuh chu a kingaihtuah va, Vaan apat ahi chi leilah, Ahihleh bang diinga gingta lou, ahung chi diing a, 6Huleh, Mihinga kipan ahi chi leilah mipi zousiah in suang in ahung sep diing uh; ajiahchu John hi zawlnei ahi a chiveh ngal va, a chi va. 7Huin amahun, Khoi apat ahih ka soi thei sih uh, chi'n a dawng va. 8Jesu’n a kawmvah, Ken zong bang thuneihna-a hi silte bawl ka hiai chih ka hung hilh sih diing hi, a chi a.
Grep huan tehkhinthu
9Huin mipite kawmah hi tehkhinthu a soi a; Mi koi ahakhat in grephuan a bawla; lou enkoltu kawmah hohloh diingin a pia a; huleh gam tuamah sawtpi taam diingin a chiahta hi. 10Huleh a gahloh hunin grep huana gah chu ana piah diingun lou enkoltute kawmah suaah khat a sawl a; hizongleh lou enkoltute’n amah chu ana vua va, khutguaahin a sawlmangta uh. 11Huin ama’n suaah dang a sawl kiit a; amah zong ana vua va, zumhuai tahin a bawl va, khutguaahin a sawlmangta uh. 12Huin ama’n a thumna a sawl kiita; huleh amah zong ana suliam va, a delhdohta uhi. 13Huin grep huan neitu in, Bang chi bawl diing ka diai? ka tapa deihtah ka sawl diing hi, amah beeh a muh chiangun ana zahtaatkha moh sih diing uh, a chi a. 14Hizongleh lou enkoltute’n amah a muh tahun, Hipa gouluahtu diing chu ahi; a gou i tan theihna diingin i that diing uh, chi'n a kihou va. 15Huchi'n grep huan apat a delhdoh va, a thatta uhi Ahihleh grep huan neitu in a tungvah bangchi’n a bawl diai le? 16Ahung diing a, lou enkoltute chu a sumang diing a, huleh grep huan chu mi dangte kawmah a pe diing hi, a chi a. Amahun hi a jah tahun, Huchi lawm lawm zaw tundah heh, a chi va. 17Huin ama’n amahuh a ena, Ahihleh hi thu kigial bang ahiai? Inn bawltute suang deih louh, hu pentah chu a ning a suang poimohpen ahung hita, chih hi. 18Koipouh hi suang tunga puuh chu a kitatgawp diing a; huleh a kiahkhum photmahte chu a gawijan diing hi, a chi a.
Siahtawi thua dotna
19Huleh hulai mahin siampu lalte leh lehkhagialtute’n amah mat a tum va; hizongleh mipite a lau uh; ajiahchu hu tehkhinthu amahuh demna-a a soi ahi chih a he uhi. 20Huin amah chu a taang va, gam optu vaihawmna leh thuneihna a, a tut theihna diingun a thusoi khial man diingin midih kipang enkhemi a sawlkheta uh. 21Huleh amahun a kawmah, Houtupa, dihtahin na soia, na hilh veu, huleh koimah khentuam nei louin Pathian lampi dihtahin na hilh ahi chih ka he uh. 22Kei uh diing a Kaisar kawm a siah tawi siang ahiai, sianglou? chi'n a dong va. 23Hizongleh ama’n a doha bawl uh a he a, a kawmvah, Bang diinga hung ze-et na hi viai? 24Makhai khat hung ensah un. Koi lim leh koi min ahiai tuang? a chi a. Amah un a dawng va, Kaisar-a, a chi va. 25Ama’n a kawmvah, Hujiahin Kaisar silte chu Kaisar kawmah pia unla, Pathian silte chu Pathian kawmah pia un, a chi a. 26Huin mipite ma-ah a thusoi khial mat diing a mu sih va; a dawnna chu limdang a sa mahmah va, a sipta uhi.
Thohkiitna thua dotna
27Huzohin misi thohkiitna a um sih chi Sadukaite laha mi hunkhop a kawmah a hung va; amah chu a dong va; 28Houtupa, Mosi’n, Koipouh a unaupa in ji nei a, ta bei a, a sihsan leh a naupa in a ji a luah diing a, a upa diingin chi a haahsah diing ahi, chi'n ahung gelhsah hi. 29Huchi'n unau pasal sagih a um a; a upa penin ji a neia, ta nei louin a si a. 30Huin a nihna in a luah a, ta nei louin a si a. 31Huin a thumna in a luah a, huchimahbangin sagihin a nei va, ta nei louin a si chiatta uh. 32A bawnva nungah numeinu zong a sita hi. 33Hujiahin thohkiit ni chiangin amahnu chu koipen ji ahita diai? sagihin ji in a nei chiat ngal va, a chi va, 34Jesu’n a dawng a kawmvah, Hi khovel tate chu a kiteeng va, huleh ji leh ta in a kipia uh; 35Hizongleh hu khovel luah taah diing leh misi lah apat thohkiitna-a tel taah diing a guatte chu a kiteeng sih va, ji leh ta in zong a kinei sih uh; 36Amah u’chu si zong a sithei nawn sih uh; ajiahchu angelte bang ahi va; huleh thohkiitna tate ahihjiahun Pathian tate ahi uh. 37Huchi'n misite kaihthohin a um chih Mosi’n zong loubawh munah, Lalpa chu Abraham Pathian, Isaak Pathian, huleh Jakob Pathian a chih laiin a hesah hi. 38Huchi'n amah chu misi Pathian ahi sih a, mihing Pathian ahi zaw hi; ajiahchu amah ngaihin mi zousiah a hing hi, a chi a.
Jesu’n lehkhagialtute a dotna
39Huin lehkhagialtu koite ahain a dawng va, Houtupa, na soi dih ngeel hi, a chi va. 40Hu nungin amahun thudang mawngmawng a dong ngam nawn ta sih uhi. 41Huleh ama’n a kawmvah, Khrist chu David tapa ahi bangchidana a chih uh ahiai? 42Amah David ngei in Psalm bu ah, Lalpa’n ka Lalpa kawmah, Ka jiat lamah touin, 43Na meelmate na keeng ngahna a ka bawl masiah, a chi a. 44Hujiahin David in amah chu Lalpa a chihleh bangchidana a tapa hi ahiai? a chi a. 45Huzohin mipi kikhawmte zousiah jahin a nungjuite kawmah, 46Puannaah tual silha vaah uh, dawlmunte-a chibai buuh bang, kikhopna inn a touna hoihpente leh gual vaahna a mun hoihpente tan ngaina lehkhagialtute lahah kiveeng un. 47Meithaite innsung a negam va, mi heemna in sawtpipi a haamtei uh; huchibang mite’n chu siamlouh a hahtan sem diing uhi, a chi a.
Actualmente seleccionado:
LUKE 20: SIMTBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.