یوهَنّا 10
10
نێکێن شپانک
1”شمارا راستێنَ گوَشان، اگن کَسے چه پَسانی گواشئے#10:1 گْواش، بزان واڑ. دپا مپُتریت و چه دگه نێمگے سر بکپیت، بزان دُزّ و رَهزَنے#10:1 رَهزن، بزان هما دُزّ که راها بندیت و مردمانَ پُلیت، راهزَن.. 2بله آ کَس که چه گواشئے دپا پُتریت، پَسانی شپانک اِنت. 3دَروازگپان، گواشئے دپا په آییا پَچَ کنت و پَس شپانکئے تئوارئے نێمگا دلگۆشَ بنت. آ وتی جندئے پَسان په نام تئوارَ جنت و آیان ڈنّا بارت. 4وتی سجّهێن پَسانی ڈنّا برگا رند، وت پێسرَ بیت و پَس آییئے رَندا گۆنَ بنت، چێا که آییئے تئوارا پَجّاهَ کارنت. 5پَس دَرامدێئے رَندا نکپنت، چه آییا تچنت، چێا که دَرامدئے تئوارا پَجّاهَ نئیارنت.“ 6ایسّایا اے مِسال آورت، بله مردم سرپد نبوتنت که آ چے گوَشگا اِنت.
7گڑا پدا گوَشتی: ”شمارا راستێنَ گوَشان، من پَسانی گواشئے دپ و دروازگ آن. 8آ سجّهێن که چه من و پێسر آتکنت دُزّ و رَهزن اَتنت#10:8 ایسّائے مکسد هما دگابازێن سرۆک اَتنت که مردمان گُمراهَ کننت. و پَسان آیانی تئوار گۆش نداشت. 9دروازگ من آن، هرکَس که چه منی راها بگوَزیت، رَکّیت. تها کئیت یا ڈنّا رئوت، چَراگاهێا#10:9 چَراگاه، بزان دَلوتانی چَرگئے جاگه، چَراگجاه، چَراگ. سرَ بیت. 10دُزَّ کئیت که دُزّی بکنت، بکُشیت و تباه بکنت. من آتکگان که مردمان زِندے برسیت، اَلکاپ و شائِگانێن زندے.
11نێکێن شپانک من آن. نێکێن شپانک وتی ساها په پَسان نَدرَ کنت. 12بله کَسے که په مُزّ کارَ کنت، پَسانی واهند نه‌اِنت. وهدے گندیت که گُرک دێم په پَسان پێداک اِنت، آیان یلهَ کنت و تچیت. گڑا گُرک پَسانی سرا هَمله و اُرُشَ#10:12 اُرش، بزان هَمله. کنت و آیان شِنگ و شانگَ کنت. 13مُزّورێن شپانکَ تچیت، چێا که آ په مُزّ کارَ کنت، پَسانی هئیالداریا نکنت.
14نێکێن شپانک من آن، من وتی پَسانَ زانان و آ هم منا زاننت، 15هما ڈئولا که پت منا زانت و من پتا زانان. من وتی ساها په پَسان نَدرَ کنان. 16منا دگه پَس هم هست که چه اے رمگا نه‌اَنت.#10:16 اَسلیگێن یونانی نبشتانکَ گوَشیت: ”چه اے گواشا نه‌اَنت“. باید اِنت آیان هم بیاران. آ منی تئوارا دلگۆشَ کننت. نون رمَگ یکّے بیت و شپانک یَکّے بیت. 17پت منا دۆستَ داریت، چێا که من وتی ساها نَدرَ کنان که پدا وتی زِندئے واهند ببان. 18کَسّ منی ساها چه من پچ گپتَ نکنت، من گۆن وتی جندئے واهگا وتی ساها نَدرَ کنان. منا وتی ساهئے دئیگئے اهتیار هست‌اِنت و پدا آییئے دستا آرگئے اهتیار هم هست‌اِنت. اے کار پتا منا پرماتگ.“
19اے هبرانی سرا پدا یَهودیانی نیاما ناتِپاکی کپت. 20بازێنێا گوَشت: ”آییا جِنّے پِر، گنۆکے، چێا آییئے هبران گۆشَ دارێت؟“ 21آ دگران گوَشت: ”کَسێا که جِنّے پِر ببیت، اے ڈئولێن هبر کرتَ نکنت. جِنّ کۆران بینا کرتَ کنت؟“
یَهودی ایسّایا نمَنّنت
22نون اورشَلیما، مزنێن پرستشگاهئے شُشت و شۆد و وَپْکئے#10:22 وَپْک، بزان چیزّے که په هُدایا گیشّێنگ بوتگ. اَربی و پارسیا ”وقف“. ائیید بوت. زمستان اَت. 23ایسّایا مزنێن پرستشگاها، سُلئیمانئے ائیوانا کدَم جنَگا اَت. 24یَهودی آییئے چپّ و چاگردا مُچّ بوتنت، گوَشتِش: ”تان کدێن مارا اے ڈئولا شکّئے تها دارئے؟ اگن تئو مَسیه ائے، راست و پکّا بگوَش.“ 25ایسّایا گوَشت: ”من وَه شمارا گوَشتگ، بله شما باوَرَ نکنێت. آ کاران که من چه پتئے نێمگا کنگا آن، وت په من گواهیَ دئینت. 26بله شما باوَرَ نکنێت چێا که منی پَس نه‌اێت. 27منی پَس منی تئوارا گۆشَ دارنت، من آیان جاهَ کاران و آ منی رَندگیریا کننت. 28من آیان اَبدمانێن زِندَ بَکشان و آ هچبرَ نمرنت. کَسّ آیان چه من پَچ گپتَ نکنت. 29منی پتا که اے پس منا داتگ‌اَنت، چه سجّهێنان مستر اِنت و هچکَس اِشان چه منی پتئے دستا پَچ گپتَ نکنت. 30من و پت یکّ اێن.“
31یَهودیان یکّ برے پدا سنگ و ڈۆک چِت که آییا سِنگسار بکننت. 32ایسّایا گۆن آیان گوَشت: ”من چه پتئے نێمگا بازێن نێکێن کارے کرتگ و شمارا پێش داشتگ. په کجام کارا منا سِنگسارَ کنێت؟“ 33یَهودیان درّاێنت: ”په نێکێن کارێا ترا سِنگسارَ نکنێن، په تئیی کُپران اے کارا کنێن. تئو بنی‌آدمے ائے، بله گوَشئے که من هُدا آن.“ 34ایسّایا گوَشت: ”شمئے شَریَتا اے پئیما نِبیسگ نبوتگ: منِ هُدا گوَشان که شما هُدا اێت#10:34 زَبور 82:6. اے هبرئے مانا اِش اِنت که هُدایی شئور بُرّگئے اِهتیار مردمان دئیگ بوتگ.؟ 35اگن آ مردم که هُدائے هبر آیانی کِرّا سر بوتگ، ’هُدا‘ گوَشگ بوتگ‌اَنت و ما زانێن که هُدائے پاکێن کتاب هچبرَ نکپیت و ناکارَ نبیت، 36گڑا شما هما مردمئے سرا چۆن کُپرئے بُهتاما#10:36 بُهتام، بزان ملامت، تُهمت. جنێت که پتا آ گچێن کرتگ و اے جهانا رئوان داتگ؟ آ هم تهنا په اے هبرا که من گوَشتگ: ’هُدائے چُکّ آن.‘ 37اگن من وتی پتئے کاران مکنان، منی سرا ایمان مئیارێت. 38بله اگن پتئے کارانَ کنان، تُرے منی سرا ایمانَ نئیارێت، منی کارانی سرا ایمان بیارێت، تانکه شما سَرپد ببێت و بزانێت که پت منی دل و درونا اِنت و من پتئے دل و درونا آن.“ 39گڑا آیان پدا لۆٹت که ایسّایا دَزگیر بکننت، بله ایسّا چه آیانی دَزرسا دور بوت.
40رَندا ایسّا چه اُردُنئے کئورا گوَست و هما جاگها شت و داشتی که پێسرا یَهیایا اۆدا پاکشۆدی داتگ‌اَت. 41بازێن مردمے آییئے کِرّا آتک. وت‌مان‌وتا گوَشگا اَتنت: ”یَهیایا هچّ مۆجزه و اَجَبَّتێن نشانی پێش نداشت، بله اے مردئے بارئوا هر چیزّے که گوَشتگی، راست اِنت.“ 42اۆدا بازێن مردمێا ایسّائے سرا ایمان آورت.
Actualmente seleccionado:
یوهَنّا 10: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.