João 7
7
Hawẽ betsabũ Jesus ikũwãriama inibukiaki, na hãtxarã
1Hanushũ judeu shanẽ ibubũ Jesus detekatsi ikĩ benaibuwẽ taea Judéia anu ana kakatsi ikama Galiléia anu besti mae tibi anu kakũkaũkĩ hatu uĩkĩ yusĩkubaunaya 2ha ushetiã ni pei meshtetã peãtã judeubũ shenipabu ushakubaũpaunibu hawẽ xinãti beya nawai pi besishanaibu ma kemaya 3-5hawẽ betsabũ ikũwãkĩ kayatiwariabumabia Jesus yunukĩ:
—Nenu hanus kesu kesu isama Judéia anu besiaibu anu kashũ uĩtãwẽ, kashũ harishũ mĩ damiwai miki txiti ikabu itxashũ uĩ Habaa! iki Yuu! hau ishanũbunã. Tsuara shabakabi shanẽ ibukatsi ikinã, hawẽ pepa hune akĩ hamapai aisbumaki. Haskakẽ mĩ akairã, pepakiaki. Jerusalém anuabu harishũri dasibi haska mĩ damiwamis shabakabi hatu uĩmaritãwẽ, mianã— akabu 6-7Jesusũ hatu yuikĩ:
—Haska ẽ ishanairã, kemariamaki. Maturã, tsuã matu hawa danãbuma hamapaiaibutiã mã katiruki. Hakia eãnã, hatũ txakabukiri shabakabi ẽ hatu yuiaiwẽ taeshũ eki sinatakĩ ea danãkanikiki. Haskawẽ taea ẽ daya ẽ meneriamawẽ taea ẽ kayutirumaki. 8-9Haskakẽ ẽ hatu uĩmashanai kemariamakẽ matube ẽ kamaki. Matũ mesti uĩtãkãwẽ— hatu wa buaibũ Galiléia anu Jesus baxikui niti ikẽ
Judeubu hanu besimisbutiã Jesusũ hatu yusĩnikiaki, na hãtxarã
10nawai besiaibu anu hawẽ betsabu buxiãbũ Jesusũ tsua banabimama hari hatu itxũ kai Jerusalém merã hune hikikẽ 11nawai taeaibũ Jesus benakĩ judeu shanẽ ibubũ hatu yukakubauni:
—Hania mã uĩaĩ, ha huni Jesusrã?— ikaibũ 12yurã kaiã Jesuskiri hãtxai yuinamei betsa betsapabũ hakiri yuikĩ:
—Harã, huni txakabuma pepaki— akaibũ betsabũri yuikĩ:
—Haskamaki. Huni pemaki. Nukunabu parãmiskiaki— ariaibũ 13haskabiakĩ tsua nĩkamama habu judeu shanẽ ibubuki datei Jesuskiri hune hãtxanameakeakeaibũ
14usha dabe inũ besti kaya napũriama nawaibu hatishũbukũs namakis Templo hemaĩtĩ anu Jesus ka tsaushũ itxabu hatu yusĩkĩ taewaya 15shanẽ ibubũ uĩ e itã haki sinatai yuinamei:
—Haskatã haska yusĩa unãhairai ikimẽkaĩ, nukubetã kene tapĩsmabiarã?— ikaibũ
16haska hãtxaibu unãkĩ Jesusũ hatu yuikĩ:
—Na ẽ yusĩaĩ mã nĩkairã, enamaki. Ea hatũ yununitũ xinãwẽ ẽ matu yusĩ ikaii. 17Tsuabũra Deusũ xinã akatsi ikinã ẽ akai unãtã haska txanimamẽkaĩ ikĩ na ẽ yusĩaĩ: “Deus anua huimẽkaĩ, ẽ ibubis ẽ xinãnẽ ikimẽkaĩ”, mã unãtirubuki. 18Hamẽ huni betsa ibubis hatu kẽwãmakatsi ikirã, yusĩnã pepai hawẽruamisbuki. Hakia hatũ ea yununi ẽ matu kẽwãmakatsis ikaiwẽ taea txakabuuma pepa besti yui ẽ txani txakamaki. Haskawẽ taeshũ tsuã ha yusĩakiri ekiri metutirubumaki. 19Txanima Deusũ hãtxa Moisés matu yusĩbiani mestẽwãtã matũ huĩtinĩ Deusũ hãtxa tsuã mã txibaĩsbumaki. Haskawẽ taeshũ haska xinãma mã ea detekatsis ikanaii— hatu waya
20ha dapi mapushũ betsã yuikĩ:
—Mĩ yushĩ txakabu hayaki. Mĩ haska xinaĩnã, tsuã mia tenãkatsis ikimẽkaĩ?— aka
21nĩkabiai habe hãtxama shanẽ ibubu Jesusũ ana yuikĩ:
—Sábado huĩrukũtitiã huni bestitxai shushawakĩ ẽ merabewaima matuki txanimabu haska xinaĩ mã eki sinataibu ẽ unaiĩ. 22Hakia Moisés nuku yusĩkĩ yuikĩ: “Hawẽ Deus unãmati wakĩ matũ huni bake oito shaba kaya hawẽ hina kubitxi bikubaĩshãkãwẽ”, akĩ nuku yununiki. Hanũkaĩ ha hina kubitxi bikĩ Moisés taewama nukũ shenipabu Abraãonẽ dukũ bikĩ taewani Moisés xinãkĩ habiaskari nuku yununiki. Haskakẽ huĩrukũtitiãbiakẽ kaneama hina kubitxi mã biriamisbuki. 23Hanua Moisés hãtxa mã kanekatsi ikamawẽ taea huĩrukũtitiãbiakẽ matũ huni bake kaĩxina hina kubitxi bi maturi mã dayakubaĩmisbuki. Habiaskari keska wakĩ huĩrukũtitiãri huni betsa hawẽ yura hirabi ẽ shushawaimawẽ taeshũ haska xinaĩ eki sinatakĩ mã txakabu ekiri tanaki. 24Haskakẽ hawara bemakia uĩtã xinaĩ hawaira hãtxayamakubaĩkãwẽ. Hakia hawara mã unãti wakatsi ikairã, hawa kaneama uĩ pehairawatã pe xinãkĩ unãti watã ikubaĩkãwẽ— hatu waya
Hania Jesus huni tsuã unãma inibukiaki, na hãtxarã
25hanushũ Jesusũ yusĩaĩ Jerusalém anu hiwemisbũ nĩkatã yuinamei:
—Ha hunirã, detekatsis ikĩ benakubaunaiburã, habiamẽ? 26Ũ unu naxui ika yusĩ hãtxairã, hawa tsuã nemama uĩnãmãri! Nukũ shanẽ ibubunã, “Messias Cristoki”, iwanã, xinãkanimẽkaĩ? 27Hakia Messias Cristo hushanairã, harakiriara hushanai tsuã nũ unãmaki. Haskakẽ hanua Jesus huni nukũ nũ unaĩwẽ taea Messias Cristo itirumaki— ikaibũ
28Templo hemaĩtĩ anushũ yusĩkĩ haska habu hãtxaikiri xinaĩ hãtxaibu nĩkatã hãtxa kuxipawẽ Jesusũ hatu xinãmakĩ:
—Matunã, ea unãkĩ hanua ẽ yumeriani mã unãriaii. Emebi ẽ xinãnẽ ibubis ẽ huamaki. Hakia parananaĩsmatũ ea yununirã, matunã, mã ha unãmaki. 29Hakia eã ibubis hatũ ea yununi anua ẽ tashnikiraniwẽ taeshũ ẽ ha unaiĩ— hatu wa
30hanua haskaiwẽ taeshũ atxinũ ishũ xinãbiaibũ hanu mawashanai kemariamawẽ taeshũ tsuã meabuma iniki. 31Hanua hakiri haskabiaibu itxapabũ ikũwaĩ yuinamei:
—Messias Cristo hushũ dami itxapa nuku washũshanaikiri nuku yusĩmisbu na hunĩ haska nuku yusĩmisbu keska waikiki. Txipu Messias Cristo hushũ na hunĩ akai binutirumamẽkaĩ? Nũ xinãnã, atirumaki— iki
Jesus hanu kashanai tsuã unãma hatu yuinikiaki, na hãtxarã
32Jesuskiri yuiaibu fariseubũ nĩkabaĩ Deusbe nukunabu hãtxashunika shanẽ ibubu anu bushũ habube yubakatã hau Jesus atxitanũbũ habũ Templo mekemisbu betsabu hatu yunuabũ 33hanushũ mapuabu Jesusũ ana hatu yuikĩ:
—Haskaira ea wayamakãwẽ, usha eskarabes besti matube ẽ iyuairã. Hanua hatũ ea yununi anu ẽ ana txĩtũshanairã. 34Haskakẽ matunã, hanira ẽ kai anu mã unãmabia ea benakĩ ea betxiama mã ishanaii, mã hari katirumawẽ taearã— hatu waya
35haskai nĩkai judeu shanẽ ibubu yuinamei yuka iki:
—Hani ka nũ betxiama itiru txani ikimẽkaĩ, harã? Nukunabu nawabube txai hiwebaunabu anu kashanũ ika xinaĩ ikimẽkaĩtsa? Gregonawabũ Deus unãbumanu yusĩtanũ ika ikimẽkaĩ? 36Na haska yuiairã, haskara xinaĩ ikimẽkaĩ: “Hanira ẽ kai anu mã unãmabia ea benakĩ ea betxiama mã ishanaii, mã hari katirumawẽ taearã”, ikai nũ nĩkairã— ikĩ xinãnibukiaki.
Ikũwaĩbu hawẽ hiwekuĩmati ũpash hayakiri Jesusũ hatu yusĩnikiaki, na hãtxarã
37Nawai keyui hawẽ henei ma shaba dabe inũ besti kaya nawai besi bexiã ma kakatsi keyui dasibi itxahairabũ Jesus benikawã hãtxa kuxipawẽ hatu yuikĩ:
—Ũpash manuhairai mã tetsusinairã, eanu beshũ aki bekãwẽ, ea ikũwãkinã. 38Habiaskari Deusũ hãtxa keneni keska wakĩ tsuãra ea ikũwaĩ hawẽ huĩti meranua hiwekuĩmati hene habai netsuama ishanikiki, hatu kuxipa wairã— hatu waniki.
39Haska nuku yuikinã, Deusũ Yushĩ Pepakiri nuku yuiniki. Hanushũ Jesus ikũwaĩbu hawẽ kuxipa Deusũ inanũ ikaya Jesus mawa besteã hawẽ Epanu kariamakẽ Deusũ Yushĩ Pepa nuku inãyuama iniki.
40Hanushũ hatiritũ Jesusũ hãtxa nĩka pewatã yuikĩ:
—Txanima na hunirã, Deusũ hãtxa yuishunikakiri Moisés nuku yuinirã, haki— ikaibũ
41betsabũri yuikĩ:
—Messias Cristorã, haki— akaya betsabũri yuikĩ:
—Hamaki. Galiléia anua Deusũ Messias Cristo tashniama ishanai nuku yusĩmisbuki. 42Hanua tashnikirãshanairã, “Davĩ mae Belém anua Davĩ babarã, Cristo Messias ishanikiki”, akĩ nuku keneshuniki. Haskakenã, Jesusrã, Deusũ Messiasmaki— akaibũ 43Jesusũ hatũ hãtxa nĩkatã hawẽ taea Jesuskiri xinã betsa betsapawaibuwẽ taeshũ 44hatiritũ atxibaĩ bitxi bupanãbũ tsuã hawa meabumakẽ
Judeu shanẽ ibubũ Jesus ikũwãma danãnibukiaki, na hãtxarã
45hanu fariseubu inũ Deusbe nukunabu hãtxashunika shanẽ ibubu itxashũ Templo mekenikabu Jesus anu hatu yunua bua ibai habũ Jesus iweama mais beaibũ shanẽ ibubu betsã hatu yukakĩ:
—Haskakĩ Jesus atxi biai kashũ mã iweama ishumẽ?— hatu wa
46mekenika betsã yuikĩ:
—Haska ha huni hãtxai peaya huni betsari hãtxakĩ nematirumaki, txakabu hatu yuiamawẽ taeshunã— hatu wa
47hanushũ fariseubũ hatu yuikĩ:
48—Habi mã unaĩsmapabenibĩ, maturi paraĩkikirã! Nuku nũ shanẽ ibubu inũ nũ fariseubunã, nũ hawa ikũwãmaki. 49Hakia Moisés hãtxa unãbumawẽ taea ha yuraburã, ibubis yupukunaĩ ikanikiki— hatu waya
50hanua fariseu betsa Nicodemos Jesus anu ka habe hãtxatanimatũ hatu yuikĩ:
51—Hawẽ hãtxa nĩkariama hawara dayai nũ uĩriamabia Moisés hãtxawẽ taeshũ: “Huni txakabuki”, akĩ nũ kupitirumaki— hatu wa
52Nicodemoski sinatakĩ yuikĩ:
—Galiléia anua unaĩsmapabu keska xinãyamawe. Deusũ hãtxa kenenibu una anua uĩtã Galiléia anua Deusũ hãtxa yuishunika tashniama ishanai mĩ unãshanaii— itã 53henebaini hatũ hiwe anu inũ buake buakenibukiaki.
Actualmente seleccionado:
João 7: cbsBR
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.