Luké 15
15
Ko e Sipi Na‘e Heé
(Māt 18.12-14)
1PEA na‘e toutou fe‘unu‘i atu ‘a e kau pōpilikane kotoa pē mo e kau angahala ke fanongo kiate ia.#Luk 5.29-30 2Pea femuhumuhu‘i ai ‘a e kau Fālesi, mo e kau sikalaipe foki, ‘o nau pehē, Ko e siana ni ‘oku ne tali ‘a e kau angahala, mo ne keinanga mo kinautolu. 3Pea na‘a ne lea‘aki ‘a e fakatātā ni kiate kinautolu, ‘o pehē.
4Tau lau ko e toko taha ‘iate kimoutolu, ko e tangata, ‘oku ‘i ai ‘ene fanga sipi ‘e toko teau pea kuo mole hanau taha, ‘ikai te ne tuku ‘a e toko hivangofulu mā hiva‘i he toafa, ka ne ‘alu ‘o kumi ‘a ia kuo mole kae ‘oua ke ne ‘ilo ‘a e toko taha ko ia? 5Pea ka ‘ilo leva ia, te ne fiefia, mo fua ia ‘i hono uma ‘o‘ona. 6Pea ‘i he‘ene a‘u ki ‘api, te ne fakataha hono ngaahi kaume‘a, mo hono ngaahi kaungā‘api, mo ne pehē kiate kinautolu, Tau fakafiefia; he kuo u ‘ilo ‘eku sipi na‘e mole. 7Tala atu, ‘e pehē ha fiefia ‘i he langi ‘i he fakatomala ‘a ha fo‘i angahala e toko taha, ‘io, ‘o hulu atu ‘i ha toko hivangofulu mā hiva faitotonu, ‘a ia ‘oku ‘ikai ha‘anau me‘a ke fakatomala ai.
Ko e Pa‘anga Na‘e Puli
8Pea tau lau ko ha toko taha kehe, ko ha fefine, ‘oku ‘i ai ‘ene pa‘anga ‘e hongofulu; pea ka mole ha fo‘i pa‘anga ‘e taha, ‘ikai te ne tutu ha maama, pea tafi ‘a e fale, ‘o kumi fakamātoato kae‘oua ke ‘ilo? 9Pea ‘i he‘ene ‘ilo leva te ne fakataha ‘a e kau fefine ‘oku nau kaume‘a, mo e kaungā‘api, mo ne pehē, Tau fakafiefia: he kuo u ‘ilo ‘a e pa‘anga na‘e mole. 10Tala atu, ‘e hoko ha fiefia pehē ‘i he ha‘oha‘onga ‘o e kau ‘āngelo ‘a e ‘Otua ‘i he fakatomala ‘a ha fo‘i angahala ‘e toko taha.
Ko e Ongo Tautehina
11Pea ne lea ‘o pehē, Tokua na‘e ai ha tangata mo hono ongo foha ‘e toko ua. 12Pea pehē ‘e he tehina ki he‘ene ‘eiki, ‘Alā tamai, vahe‘i mai mu‘a hoku ‘inasi ‘i he koloa. Pea ne tufa kiate kinaua, ‘io, mo e me‘a kotoa na‘e tauhi ‘aki si‘ene mo‘ui. 13Pea hili ‘a e ngaahi ‘aho–na‘e ‘ikai loko lahi–na‘e tānaki ‘e he tehina ‘ene me‘a kotoa, ‘o ne hiki ki ha fonua mama‘o; pea ‘i he potu ko ia na‘a ne toloveka ‘aki ‘ene koloa ‘i he‘ene mo‘ui fakalusa. 14Pea ‘i he faifai pea ‘osi atu ‘ene me‘a kotoa, ‘iloange na‘e honge vale ‘a e fonua ko ia, pea na‘a mo ia na‘a ne kamata masiva me‘akai. 15Pea ne ‘alu ‘o musu ia ki ha toko taha, ko e tangata totonu ‘o e fonua ko ia; pea ne fekau ia ke ‘alu ki he‘ene ngoue‘anga, ‘o tauhi ‘ene fanga puaka. 16Pea ne mo‘u faka‘amu ki he ngaahi fo‘i piini na‘e kai ‘e he fanga puaka ke ne mānava ‘aki; he na‘e ‘ikai ke ‘ange ‘e ha taha ha‘ane me‘a. 17Pea faifai pea foki mai hono loto, pea ne pehē, ‘E ta‘inga ā ‘a e kau ngāue totongi ‘a ‘ete ‘eiki ‘oku fokotu‘u ‘enau toenga kai, ka ko kita ‘oku te mate‘i heni ‘i he honge! 18Ka u tu‘u mu‘a ‘o ‘alu ki he‘eku tamai; pea u pehē kiate ia, ‘Alā tamai, kuo u fai angahala ki he langi, kae tautonu kiate koe. 19‘Oku ‘ikai te u kei taau ke lau ko ho foha; ka ke fai kiate au ‘o hangē ko ha taha ‘i ho‘o kau ngāue totongi. 20Pea ne tu‘u pē ‘o ‘alu ki he‘ene ‘eiki. Pea ‘i he‘ene kei mama‘o, na‘e sio ki ai ‘e he‘ene ‘eiki, pea langa hono fatu ‘i he ‘ofa, ‘o ne lele, ‘o tāupe ‘i he u‘a ‘o e tama, ‘o ne ‘uma lolomi kiate ia.
21Pea lea ange ‘e he tama, ‘Alā tamai, kuo u fai angahala ki he langi, kae tautonu kiate koe; ‘oku ‘ikai te u kei taau ke lau ko ho foha. 22Ka ka pehē ‘e he tangata‘eiki ki he‘ene kau tamaio‘eiki, Fai vave to‘o mei he puha ha pulupulu ‘a e fungani pea ‘ai kiate ia; pea ‘ange ha mama ma‘a hono nima, mo ha sū ma‘a hono va‘e: 23pea ‘omi ‘a e ki‘i pulu, ‘a e pulu vakai ‘eiki; tāmate‘i ia, pea tau kai mo fakafiefia: 24he ko eni si‘oku foha na‘e mate, pea kuo toe mo‘ui; na‘e mole, pea kuo ‘iloa. Pea nau kamata fiefia.
25Kae lolotonga ia na‘e ‘i he ngoue ‘a hono foha lahi: pea ‘i he faifai ‘o ne foki, ‘o ne ofi ki he ‘api, tā na‘e ongo mai ha tā nafa mo e me‘e. 26Pea ne ui ange ha taha ‘o e kau tama, ‘o ne fehu‘i pe ko e hā fua ‘a e me‘a ko ia. 27Pea ne tali, Kuo ha‘u ho tehina, pea kuo tāmate‘i ‘e ho‘o ‘eiki ‘a e ki‘i pulu, ‘a e pulu vakai ‘eiki, koe‘uhi ko ‘ene toe ma‘u mo‘ui ia. 28Pea ne ‘ita ai, ‘o ‘ikai fie hū ki fale: pea ‘alu kitu‘a ‘ene ‘eiki ‘o kole kiate ia. 29Ka ka tali ‘e ia, ‘o ne pehē ki he‘ene ‘eiki, ‘ā, ko futu ta‘u mo ‘eku ngāue kiate koe ‘o hangē ha pōpula; ‘io, ‘anefē ‘eku li‘aki ha‘o fekau ‘e taha? kae ‘anefē ha‘o tuku mai, ‘io, ha ki‘i kosi ke u fakafiefia ‘aki hoku ngaahi kaume‘a? 30Ka ‘i he ha‘u leva ho foha ko ena, ‘a ia kuo ne kai ‘o ‘osi ‘a e me‘a na‘e tauhi ‘aki ‘a ho‘o mo‘ui ‘i he‘ene fafanga ‘a e kau fe‘auaki, pea ke tāmate‘i ma‘ana ‘a e pulu vakai ‘eiki. 31Pea tali ‘e ia ki ai, Nga‘ata, ko e me‘a kiate koe, ‘oku ke ‘iate au ma‘u pē, pea ko ‘eku me‘a kotoa ko ho‘o me‘a. 32Ka na‘e taau pē foki ke tau fakafiefia mo nēkeneka, he ko si‘o tehina ‘eni na‘e mate, pea kuo mo‘ui; na‘e mole pea kuo ‘iloa.
Actualmente seleccionado:
Luké 15: TMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Tongan Moulton Bible © Bible Society of the South Pacific, 2011.