Luké 14
14
Ko e Fakamo‘ui ‘e Sīsū ha Tangata Mahaki
1PEA ko e Sāpate ‘e taha na‘a ne hū ki he fale ‘o ha toko taha ‘o e hou‘eiki Fālesi ke kai, pea na‘e ‘i ai foki ‘a e hou‘eiki ko ia, ‘o lamasi ia. 2Pea tā na‘e nofo ‘o fehangahangai mo ia ha tangata na‘e mahaki fatu. 3Pea tali ‘e Sīsū ‘o ne pehē ki he kau tufunga lao mo e kau Fālesi, ‘Oku ngofua koā ke faito‘o ‘i he ‘aho Sāpate, pe ‘ikai?
4Pea nau felongoi pē. 5Pea ne puke ‘a e tangata, ‘o fakamo‘ui, ‘o tukuange: ‘o ne tali kiate kinautolu, tau lau ko ha toko taha ‘iate kimoutolu, pea kuo tō hano foha, pe ko ha‘ane pulu ki ha luo, ‘ikai te ne hanga leva ‘o fusi hake neongo ko e ‘aho Sāpate?#Māt 12.11
6Pea na‘e ‘ikai te nau lava ke tali ‘a e me‘a ko ia.
Ko e ‘Ulungāanga ke Fai ‘i ha Fakaafe
7Pea ne hanga ‘o lea‘aki ha fakatātā kiate kinautolu na‘e tala ki he kātoanga, ko ‘ene vakai ‘oku nau fili ‘a e ngaahi nofo‘a mu‘a; pea ne pehē kiate kinautolu, 8‘Oka tala koe ‘e ha toko taha ke ha‘u ki ha kātoanga, ‘oua te ke tokoto ‘i he ‘uluaki nofo‘a; na‘a kuo tala ‘a e kātoanga ki ha toko taha ‘oku mā‘olunga ‘iate koe.#Pal 25.6-7 9Pea ‘i he faifai pea hū mai ‘a e matāpule ‘a ia ko ‘ene kātoanga ‘oku mo fakatou ‘i ai, pea ne pehē kiate koe, Tuku ‘a e potu ko ena ki he toko taha ni; pea ke toki hanga ‘o hiki ki he potu ki mui kuo ke mā. 10Ka ‘oka tala kātoanga kiate koe, ‘alu ‘o tokoto ‘i he potu ki mui; koe‘uhi ‘oka hū mai ‘a e matāpule ‘oku ‘a‘ana ‘a e kātoanga, pea ne pehē atu, Nga‘ata, ma‘uma‘u hake ki mu‘a: pea te ke toki faka‘apa‘apa‘ia ‘iate kinautolu kotoa pē ‘oku mou keinanga. 11He ko ia ‘oku ne hākeaki‘i ia ‘e fakavaivai‘i; pea ko ia ‘oku ne fakavaivai‘i ia ‘e hākeaki‘i.#Māt 23.12; Luk 18.14
12Pea ne hanga ‘o lea foki kiate ia na‘a ne fai ‘a e kātoanga, ‘oka ke ka fai ha fu‘u pelekifasi pe ha tina, ‘oua na‘a tala ia ki ho ngaahi kaume‘a, ‘uma‘ā ho ngaahi tokoua, pe ko ho ngaahi kāinga, pe ko ho ngaahi kaungā‘api ‘oku koloa‘ia; na‘a toe tala kātoanga kiate koe ‘e kinautolu, pea fai ai ha totongi kiate koe. 13Ka ‘oka ke ka fai ha kātoanga, tala ia ki he kau masiva, ‘a e mamatea, ‘a e heke, ‘a e kui: 14pea te ke toki monū‘ia; he ‘oku ‘ikai ha‘anau me‘a ke totongi ‘aki kiate koe, ka ‘e toki totongi kiate koe ‘i he Toetu‘u ‘a Lotumo‘oni.
Ko e Kai Kātoanga ‘i he Pule‘anga ‘o e ‘Otuá
(Māt 22.1-10)
15Pea ko e toko taha ‘iate kinautolu na‘a nau keinanga, ‘i he‘ene fanongo ki he me‘a ko ia, na‘a ne pehē kia Sīsū, Ha monū‘ia ā ka ko ia te ne keinanga ‘i he Pule‘anga ‘o e ‘Otua!
16Ka ka tali ‘e ia ki ai, Tokua na‘e ‘i ai ha tangata na‘a ne teu ha fu‘u tina, ‘o ne tala ki he tokolahi: 17pea ‘i he hokosia ‘a e taimi ‘o e kātoanga, na‘a ne fekau atu ‘ene tamaio‘eiki ke fanongonongo kiate kinautolu kuo tala, Mou omi; he kuo ‘osi hono teu.
18Ka na‘e hu‘ufataha ‘enau tali, ‘o nau lolou kotoa pē. Ko e ‘uluaki, na‘a ne pehē ki he tamaio‘eiki, ‘ā, kuo u fakatau ha ngoue‘anga, pea kuo pau ke u ‘alu ‘o vakai ia: ke ke tala ange ke ne fakamolemole au.
19Pea lea ‘e hono ua, ‘o pehē, ‘ā, kuo u fakatau ha taulua‘i pulu ‘e nima, pea ko ‘eku ‘alu ‘eni ke ‘ahi‘ahi kinautolu: ke ke tala ange ke ne fakamolemole au.
20Pea lea ange ‘e hono tolu, ‘o pehē, ‘ā, kuo u ma‘u uaifi, pea ko ia ‘e ‘ikai te u lava atu.
21Pea ha‘u ‘a e tamaio‘eiki, ‘o tala ‘a e ngaahi me‘a ko ia ki he‘ene ‘eiki. Pea tuputāmaki ‘a e tangata‘eiki, ‘o ne pehē ki he‘ene tamaio‘eiki, ‘alu ke vave ki he ngaahi hala lalahi mo e ngaahi hala iiki ‘o e kolo, pea taki mai ‘a e kau masiva, mo e mamatea, mo e kui, mo e heke.
22Faifai pea pehē ‘e he tamaio‘eiki, ‘Eiki, kuo fai pē ‘a e me‘a na‘a ke tu‘utu‘uni mai, ka ‘oku kei ‘atā pē. 23Pea me‘a ‘e he ‘eiki ki he tamaio‘eiki, ‘alu ki he ngaahi hala pule‘anga, mo e ngaahi lolo ‘akau, pea ‘omi fakamālohi ‘a e kakai: kehe pē ke fonu hoku ‘api. 24He ‘oku ou tala atu kiate kimoutolu, ‘e ‘ikai ha taha ‘i he kau tangata ko ia na‘e tomu‘a tala te ne mama ha me‘a ‘i he‘eku kātoanga.
Ko e Faingata‘a e Kau he Muimui kia Sīsuú
(Māt 10.37,38)
25Pea na‘e ‘i ai ha ngaahi fu‘u kakai lahi na‘e fononga fakataha mo ia; pea ne tafuli ‘o lea kiate kinautolu, ‘o pehē, 26Kapau ‘oku ‘ikai ke fehi‘a ‘e ha tangata ki he‘ene tamai, mo ‘ene fa‘ē, mo hono uaifi, mo ‘ene fānau, mo hono ngaahi tokoua, mo hono ngaahi tuofāfine, ‘io, mo ‘ene mo‘ui ‘a‘ana foki, neongo ‘ene ha‘u kiate au ka ‘e ‘ikai te ne fa‘a hoko ko ‘eku ako.#Māt 10.37 27Pea ko ia ‘e ‘ikai fua hono kolosi ‘o muimui kiate au, ‘e ‘ikai te ne fa‘a hoko ko ‘eku ako.#Māt 10.38; 16.24; Ma‘ake 8.34; Luk 9.23 28‘ē, tau lau ‘oku ai hamou toko taha ‘oku ne loto ke langa ha fu‘u taua, ‘ikai te ne nofo mu‘a ‘o fatu hono totongi, pe ‘oku fe‘unga ‘ene pa‘anga mo hono fai ke ‘osi? 29Na‘a ‘iloange, kuo hili ‘ene ‘ai ‘a e tu‘unga, ‘oku ‘ikai te ne lava ke faka‘osi; 30pea ko e kakai kotoa pē te nau sio ki ai te nau hanga ‘o luma‘i ia, he‘enau pehē, ūē! ko e siana ni na‘a ne kamata ke langa, ka na‘e ‘ikai te ne lava ke faka‘osi! 31Pea tau lau ko ha tu‘i ‘oku ne ‘alu ke fakahoko ‘a e tau mo ha tu‘i ‘e taha, ‘ikai te ne nofo mu‘a ‘o fifili, pe te ne lava mo ‘ene taha mano ke tali ‘a e ‘eiki ‘oku ha‘u ke tau‘i ia mo ha ua mano? 32Pea ka hā ‘e ‘ikai, pea lolotonga ‘oku kei mama‘o ‘a e fili te ne fekau atu ha fakafofonga ke kole ‘a e fakalelei. 33Pehē foki, ‘ilonga kimoutolu ‘oku ‘ikai te ne fai ene tatau ki he ngaahi me‘a kotoa pē ‘oku ‘a‘ana, ‘e ‘ikai te ne fa‘a hoko ko ‘eku ako.
Ko e Māsimá
(Māt 5.13; Ma‘ake 9.50)
34‘ē, ko e me‘a ‘aonga ‘a e māsima: ka ‘oka mole mei he māsima foki hono kona, pea ‘e fakamahimahi ‘aki ia ‘a e hā? 35‘Oku ‘ikai taau ke laku ki he ngoue, pe ki he tu‘unga veve: ka ‘oku laku pē kitua‘ā. Ko ia ‘oku ma‘u telinga ke ongo ‘aki, ke ne ongo‘i.
Actualmente seleccionado:
Luké 14: TMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Tongan Moulton Bible © Bible Society of the South Pacific, 2011.