Daniele 9
9
Daniele mbwaakakomba akuyubunwidwa makani
1 #
Dan 1:21; 5:31 Mumwaka mutaanzi wabwami bwa-Dariyo mwana wa-Ahasuera, umwi walunyungu lwaba-Medi iwakatola bwami bwacisi caba-Kasidi— 2#2 Mak 36:21; Ezr 1:1; Jer 25:11,12; 29:10mu mwaka mutaanzi wabwami bwakwe, mebo nde-Daniele ndakamvwa makani aamumabuku. Ndakamvwa mweelwe wamyaka, ijwi lya-Jehova ngulyakaambila musinsimi Jeremiya, myaka iyakeelede kuzuzikizigwa mane kusaalwa kwa-Jerusalemu kukamane, nkokuti myaka iili makumi aali musanu aabili.
3Mpawo ndakalanzya busyu bwangu ku-Mwami Leza kukumuyandaula azikombyo azikumbizyo cakuliimya kulya acakusama zisani zyamasaka akulibubula mutwe. 4Ndakakomba kuli-Jehova Leza wangu akulyaamba zibi, ndati, Akaka Mwami, Leza mupati uuyoosya, uusyomeka mucizuminano cakwe, uubafwida luzyalo boonse bamuyandisya akubamba milao yakwe! 5#1 Bam 8:47; Ezr 9:6; Neh 1:6; 9:33,34; Int 106:6; Is 64:5-7; Jer 3:25; 14:7Twabisya, twapilingana, twacita zibi, twakupapila, twasia milazyo yako ambeta zyako, 6#2 Mak 36:15,16Teetwakaswiilila balanda bako basinsimi ibakaamba muzina lyako, ibakaambila bami besu abasilutwe besu abamatateesu abantu boonse banyika. 7Kulinduwe, O mwami, kulajanwa bululami, anu kulindiswe kulajanwa bweeme buyo, mbubonya mbokubede sunu. Bafwa bweeme bantu ba-Juda, abaabo bakede mu-Jerusalemu, aba-Israyeli boonse nebaba bali afwiifwi nebaba bali kule, muzisi zyoonse nkowakabatandila nkaambo kalupapilo lwabo ndobakakupapila. 8Twafwa bweeme, O mwami, bami besu abasilutwe besu abamatateesu boonse, nkaambo tulikubisizizye. 9#Kul 34:6; My 14:18; Neh 9:17; Joel 2:13Mwami Leza wesu ngujisi luzyalo alulekelelo, nkaambo twamupapila, 10tatuna kuswiilila ijwi lya-Jehova Leza wesu kukweenda mumilao yakwe njaakatubikila kumilomo yabalanda bakwe basinsimi. 11#Is 1:5,6; Jer 8:10; Dt 27:15-26Ba-Israyeli boonse basotoka milao yako, baleya, babula kuswiilila ijwi lyako, aboobo twatililwa cikonke catusi cilembedwe mubbuku lyamulao lya-Musa mulanda wa-Leza nkaambo twamubisizya. 12#Malo 2:17; Mt 5:18Wazuzikizya majwi aakwe ngaakatupesya mulandu, swebo abeendelezi besu ibakali kutweendelezya. Watuletela mapenzi aayoosya, nkaambo kunsi lyakujulu koonse koonse takukwe nekwakacitwa makani mbuli ayo aacitikide mu-Jerusalemu. 13Aya mapenzi oonse atusikila, mbubonya mbukulembedwe mubbuku lya-Musa, nekubaboobo tatuna kutontozya busyu bwa-Jehova Leza wesu mukuleka zibi zyesu amukupangika myoyo kulusinizyo lwako. 14Nkaambo kako Jehova wakali kulangilila mapenzi, watuletela ngao, nkaambo Jehova Leza wesu uliluleme mumilimo yakwe yoonse njacita, pele tatuna kuswiilila ijwi lyakwe. 15Lino o Jehova Leza wesu, owakagwisya bantu bako munyika ya-Egepita ajanza lyanguzu, aboobo walijanina impuwo imbotu mbucicibede asunu, twabisya, twacita bubi. 16O Mwami, mubululami bwako boonse, bukali bwako alunyemo lwako zileke munzi wako Jerusalemu, cilundu cako cisalala, nkaambo zibi zyesu amilandu yabamatateesu zyaletela Jerusalemu abantu bako lusampuko akati kabantu beengelede. 17Lino, O Leza wesu, swiilila cikombyo camulanda wako ankumbilo zyakwe, Munika abusyu bwako acikombelo cako cimwaikide. Cita obo nkaambo kazina lyako, O mwami, 18Cenjeka matwi aako, O Leza wangu, uswiilile. Bbanuna meso aako, ubone mapenzi esu, amunzi uuli azina lyako. Tatuleti inkumbizyo zyesu kulinduwe nkaambo kabululami bwesu, pe, tulazileta nkaambo kaluzyalo lwako lupati. 19O mwami, swiilila. O mwami, kotulekelela. O mwami, swiilila akucita, utamuki pe, nkaambo kazina lyako omwini, O Leza wangu, nkaambo izina lyako lililembedwe amunzi wako abantu bako.
20Lino nendakacili kwaamba, akukomba, akulyaambilila zibi zyangu azibi zyabantu bangu ba-Israyeli, akuleta inkumbizyo zyangu kubusyu bwaJehova Leza wangu nkaambo kacilundu cisalala ca-Leza wangu— 21#Lk 1:19,26nendakacili kwaamba mukukomba kwangu, oyo muntu Gabrieli ngundakabwene mucilengano citaanzi wakanduulukila caluno, wandaampa kuciindi cacipaizyo camagolezya. 22Asike, wandaambila kuti, Daniele, ndeza lino kuzookutya busongo aluzibo. 23Kumatalikilo aakukumbila kwako, kwakazwa ijwi, lino ciindi ecino ndeza kukulwiida, nkaambo uli muntu uuyandwa loko. Lino teelela ijwi, umvwisye cilengano,
24Kwabikwa insondo zili makumi aali musanu aabili kubantu bako akumunzi uusalala, kuti insotoko zimane azibi zimanisigwe, milandu yabubi ilobelele, bululami buteeli buletwe, cilengano camusinsimi cizuzikizigwe, abusena busalalisya bunanikwe. 25Lino uleelede kuziba akumvwisya kuti, kuzwa kuciindi camulazyo wakubusya awakuyakulula Jerusalemu kusikila kuciindi cakusika kwamwami uunanikidwe, kuyooba insondo zili musanu azibili. Lino insondo zili makumi aali musanu alimwi ansondo zyobile uuyooyakululwa, uyooba amigwagwa amufolo wakuutabilila, muziindi zyamapenzi. 26#Is 53:8Zimane insondo zili makumi aali musanu alimwi azibili, uunanikidwe uyoonyonyoonwa, cakubula sikulya izina, Nkabela bantu bamwami uuboola bayoonyonyoona munzi acikombelo. Izambangulwe ndeliyooumanisya, alimwi kuyooba inkondo mane kusikila kumamanino. Insaalo zilibikidwe. 27#Dan 11:31; 12:11; Mt 24:15; Mk 13:14Lino uyootanga cizuminano ciyumu abantu banji kunsondo yomwe, alimwi cisela cansondo yomwe uyoolesya zipaizyo azituuzyo. Nkabela sikusaala uyooboola amababa aazisesemyo, mane lumwi mamanino aabikidwe atililwe sikusaala.
Currently Selected:
Daniele 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.