Daniele 8
8
Cilengano camugutu asijembwe
1Mumwaka watatu wabwami bwamwami Belisazara, cilengano cakaboneka kulindime nde-Daniele, nkokuti acimwi musule lyaceeco ncendakataanguna kubona, 2#Neh 1:1; Es 2:8; Matl 10:22Mbuboobu mbundakabona mucilengano cangu. Ndakali mu-Susani dinga lyamucisi ca-Elamu, Alimwi mucilengano ncendakabona ndakali kunkomwe yamulonga Ulai, 3Lino nendakatambya meso aangu akulanga, ndakabona mugutu uliimvwi kunkomwe yamulonga. Oyu mugutu kajisi meja malamfu, pele lumwi lwakali lulamfu kwiinda lweenzinyina, nkabela olo lulamfu ndolwakasyaalila kumena. 4#Dan 11:3Lino ndakabona kuti mugutu ulaya budinkaula koonse koonse, kumbo akunyika akumusanza, nkabela katakwe munyama naba omwe iwakakonzya kwiima kunembo lyakwe, alimwi katakwe muntu iwakakonzya kuvuna munguzu zyakwe. Wakali kucita kufumbwa ncaakayanda akulisumpula.
5Lino nendakacili kuyeeya makani, ndakabona sijembwe ulazwa kumbo, ulainda atala lyanyika yoonse cakutaguma ansi. Oyo sijembwe kajisi luja lugambya akati kameso aakwe. 6Lino wakasika kumugutu uuli ameja obile ngondakabwene uliimvwi kunkomwe yamulonga, wamuzuzaanina cabukali acanguzu. 7Ndakabona kuti waswena afwaafwi kumugutu, wamulwisya cabukali. Wakauma mugutu akumutyolela meja aakwe oonse obile. Mugutu wakabula inguzu zyakumulwisya, aboobo wakamuwaala ansi akumulyataula, nkabela katakwe naba umwi iwakakonzya kuvuna mugutu kulinguwe. 8#Dan 7:6Mpawo sijembwe wakalisumpula loko, pele naakacijisi inguzu luja lwakwe lupati lwakatyoka, elyo mucimanga calo kwakamena meja one aagambya aalangene amyuuwo yoonse yone yakujulu,
9 #
Dan 11:25; Int 48:2 Lino kuzwa kuluja lumwi lwayaaya kwakamena keja kamwi kaniini. Aka kakakomenesya kulubazu lwakumusanza alwakujwe alwakucisi cibotu. 10#Is 14:13; Dan 11:28; Ciy 12:4Kakacili kuya bukomena mane kakasika kumakamu aakujulu, elyo zimwi inyenyeezi kakazilosezya ansi akuzilyataula, 11#Jer 48:26; Dan 5:23; 2 Tes 2:4Kakalisumpula mane kusikila kulisilutwe wamakamu, nkabela cipaizyo camazuba oonse cakalesegwa, abusena bwacikombelo cakwe bwakamwayigwa. 12Kakapegwa impi, aboobo zipaizyo zyalyoonse zyakalesegwa, nkaambo kakubisya, Luzinizyo lwakawaalwa ansi. Kakali kucita ncekakayanda mukujana coolwe, 13#1 Pet 1:12Mpawo ndakamvwa uusalala ulaamba, aumwi uusalala wakavwiila oyo iwakaamba, wati, Ayooba mazuba ongae, aya makani aamucilengano cazipaizyo zya lyoonse acakubisya kusaazya acakulyatauzigwa kwacikombelo akwampi? 14Nkabela wakamuvwiila kuti, Mazuba ayooba zyuulu zyobile amyanda yotatwe, mangolezya acifumo, lino cikombelo ciyoosalazigwa.
15Lino mebo nde-Daniele, nindakabona cilengano, ndakali kuyandaula kucimvwa, Elyo kwakaimvwi kubusyu bwangu cili mbuli muntu. 16#Dan 9:21; Lk 1:19,26Nkabela ndakamvwa ijwi lyamuntu akatikati kankomwe zya-Ulai, lyakali koongolola, liti, Gabriyeli, pandulwida muntu oyu cilengano, acimvwisye. 17#Ciy 1:17Lino wakaswena afwaafwi mpondakaimvwi, nkabela naakaswena, ndakayoowa, ndavunduma ansi. Pele wakandaambila kuti, Swiililisya, O mwana amuntu, cilengano ncecaciindi camamanino.
18Lino naakacili kundaambila, ndakafwida mutjonzi cakuvundama, pele wakandaampa akundiimika amaulu aangu. 19Wakati, Bona! Ndakuzibya ciyooba kumamanino aaciindi cabukali, nkaambo ciindi ceelede cakumamanino cilibikidwe. 20Mugutu ngowakabona uuli ameja obile-nkokuti bami ba-Mediya aba-Persia, 21Asijembwe uuli aboya ngu mwami waba-Helene, aluja lupati luli akati kameso aakwe ngumwami mutaanzi, 22Lino mbubonya mbowakabona kuti, luja nelwakatyoka, kwakamena ambi one mucibaka calo, nkokuti mami one ayoozwa mubwami obo, pele taakooyooelana abo munguzu, 23#Dt 28:50Lino kumamanino aaciindi cabo cakweendelezya, basikubisya nebanooyoozwide bubi bwabo, kuyoobuka mwami muyumu moyo uumvwisya tulabi. 24#Ciy 13:7Inguzu zyakwe ziyoovula, nkabela uyoonyonyoona cakuyoosya akujana coolwe mumilimo yoonse njacita. Uyoonyonyoona basinguzu abantu basalala. 25#Job 34:20; Malo 4:6Mubucenjezu bwakwe uyoocita kuti lweeno luyume mujanza lyakwe, alimwi uyoolisumpula mumoyo wakwe. Uyoongomoka kunyonyoona bantu banji, alakwe Mwami wabami uyoomubusizya inkondo, pele uyootyolwa kutali kumaanza aabantu. 26#Ezk 12:27; Dan 10:14; Ciy 22:10Cilengano camazuba, magolezya acifumo, ncowalwiidwa ncakusinizya, pele kocivumbilila, nkaambo ncecamazuba aacili kule.
27 #
Dan 2:48,49 Mpawo mebo nde-Daniele ndakawizuka ndakaciswa mazuba amwi. Kabe kaindi ndakabuka akucita milimo yamwami. Cilengano cakandiyoosya, pele kumvwa teendakamvwa pe.
Currently Selected:
Daniele 8: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.