JOB 39
39
1Mɛ iŋa ŋgimbi nɛ o gbadua zu kaya ko nɛnɛ?
Mɛ zɔka o zambɛrɛ#39.1 zambɛrɛ: texte tɔ̧ɔ̧ nɛ́ biches. fara koa-a?
2Mɛ tɔra zɛ zaŋ kɔ-wa dam lɛŋ?
Mɛ iŋa ŋgimbi nɛ wa ko nɛnɛ nde?
3Wa gu ko nɛ̀ bem,
ɓɛɛ zaŋ-wa kaɗa nyima-a.
4Kà gba̧a̧-tɛ o bem kɔ-wa ŋgáí,
kà wa gásí mɔ kɔ-wa ɛ̀nɛ́-wa kaɗi,
ɓɛɛ wa yaka, wa pii ɗoŋ tɛ nàà kɔ-wa ɓɔna.
5Nɛ́ o'o bura tuifuu-zaŋbɛɛ
ha̧ a̧ mɛ yak yar nɛnɛ sɔɔ géè o?
6Gbárà nɛ́ fara n'am ha̧a̧ ha̧ a̧;
nù tɔŋ nɛ́ fara-ɔ kɔ̧-a̧.
7A̧ mam kɔ̧-a̧ nɛ o gasa giti mɔ mɛ saaye;
a̧ zii tuɓa da̧ ko wan-tuifuu na.
8A̧ yar nɛ mgbara kaya kii nɛ be mbɔɗi zɔ̧ wen nyɔŋa-a:
fara-nyɔŋ-mɔ kɔ̧-a̧ nɛ́ mɔ‘i.
9Nám tɛ kɔ̧ mɛ de tom ha̧ mɛ,
kóó ɔa-a kɔ̧ tua nɛ̀ mɛ̀ á o mɔ-dai kɔ-mɛ sɛnɛ nde?
10Mɛ tɛ pi̧ kpáŋá ger-a,
ha̧ a̧ mɛ wa fɔ kɔ̧ ɗɔŋgɔ ha̧ mɛ nde?
11Mɛ tɛ e ta nɛ a̧ wen nɛ a̧ ɔ ŋgaya,
ɓɛɛ mɛ ee tom kɔ-mɛ ha̧ a̧ mɛ de nde?
12Mɛ tɛ e ta-mɛ nɛ a̧
ha̧ a̧ mɛ mɔi̧ nyɔnɔ kɔ-mɛ a kɔ̧ dam nde.
13Ndao gɔm ɓaa nɛ desee,
ɓɛɛ wɔr-ɓaa-a in buma tɛ-a de hee war ko nɔ̧́í̧-gba-dɔya ga na.#39.13 o ŋma wi-kpai-kalata tɔ̧a: saa-ndao in buma tɛ-a nɛ́ demɔ nyɛmna.
14A̧ pi̧ o kui kɔ̧-a̧ mbɔɗɔnu,
ɓɛɛ a̧ ee ha̧ wee-nù mɛ de ha̧ wa mɛ mbaŋ.
15A̧ ta'e naŋ bíí nyɛma mɛ gba wa,
kóó saɗi zaŋbɛɛ nyɛma mɛ i̧si̧ wa mbaŋ na mbɛt.
16A̧ de mɔ in o bem kɔ̧-a̧ hee gɔni nàà ga;
wen kɔ̧-a̧ bo tɛ bɔnɛ n'aa zɔka géè na.
17Wen nɛ̀ Sɔ̧ dɔɔ a̧ nɛ iŋa-mgbara-mɔ;
a̧ kɛ̧ ŋma iŋamɔ ha̧ a̧ na.
18Mɔ kpɔk, kà a̧ kúr mɛ ma yí,
nyaŋa in wan kɔ‘i nɛ geemɔ ti a.
19Nɛ́ mɛ a̧ ha̧ ŋgai ha̧ nyaŋa?
Nɛ́ mɛ a̧ de ha̧ dɛdɛ mɛ hɔ gun ger-a?
20Nɛ́ mɛ a̧ de ha̧ a̧ mɛ kpíɗí hee gbarŋgaɗi ga nde?
Hiɗimɔ-duk-tɛ kɔ̧-a̧ nɛ mɔɔ-pi̧-kíì tɛ-wi.
21A̧ nɔn nù zu ŋgai kɔ̧-a̧ nɛ desee kɔ̧ ɗɔŋgɔ,
ma nɛ yì si nú boi-biro.
22Wen kɔ̧-a̧ bo nɛ̀ kíì in bele na;
a̧ yu mɔ ti gba-paa na.
23Yi gba-paa in labo tok see zu a,
giti ɓaro de mɔ gɔn see-aa.
24Kà a̧ zíí dɔma mbia, a̧ yor ɓɔna;
tɛ-a nak, ɓɛɛ a̧ bu̧i̧ bu̧i̧.
25Tɛ giti mbia, a̧ ufa zɔ̧ɔ̧-a̧a̧;
ɓɛɛ só ɓéé nɛ̀ nyɛi̧a-a, a̧ kɔɓa biro,
in tuɓa da̧ ko o gasawi bá nɛ̀ gayamɔ-biro kaɗi.
26Nɛ́ tɛ iŋamɔ kɔ-mɛ a̧ fambɛɛ hu̧i̧ nɛ ɓaa-a
si ka̧-zan-mɛ́-ɗɔɔ,
wen ha̧ mbe buma tɛ-a mɛ hɔ woyo nde?
27Nɛ́ tɛ ha̧a̧nú kɔ-mɛ a̧ zua#39.27 zua: o ŋma wi-kpai-kalata tɔ̧ɔ̧ nɛ́ tama. bu̧i̧ nɛnɛ nɛ̀ kusa-a,
in a̧ a̧ de nɛ yaa kɔ̧-a̧ mgbara ta zu kaya mɛ nde?
28A̧ ɔ kɔ̧ ta;
fara-duk kɔ̧-a̧ nɛ ndɔŋ zu kaya mɛ.
29A̧ duk hi̧i̧ zɔk nɛ mɔ nɛ nyɛi̧a-a,
kii nɛ̀ saɗi n'aa tɛ ba.
30O bem kɔ̧-a̧ nyɔŋ nɛ tɔk-saɗi zaŋ sur;
fara lɛŋ nɛ̀ wɔr-mɔ#39.30 wɔr-mɔ in tama: zɔk Mat 24.28.#Mt 24.28; Lk 17.37 a̧a̧ sɛnɛ, a̧ a̧a̧ hi̧i̧.
Currently Selected:
JOB 39: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.