JOB 38
38
WAR TƆ̧Ɔ̧-WEN KO GASA WAN
1GASA WAN kifa nú ha̧ Job nɛ ti gba búk-kórò hee mɔ'ɔ ga:
2Nɛ́ ge bíí ge a̧ ɗaŋ ee-zu-mɔ kɔ‘m,
tɔ̧ nɛ wen nɛ bíí iŋ zu-a na’ɛ ge?
3Mɛ̀ yór nɛ̀ wiwii;
mi tɛ ak mɛ, ɓɛɛ mɛ̀ kífí nú ha̧‘m.
Ŋgai ko Sɔ̧ tɛ mɔ n'aa dea
4Mɛ́ duka so déè ŋgimbi n'am dee nɛ nù ge?
Kà mɛ nɛ́ iŋa, ɓɛɛ nɛ mɛ̀ tɔ̧́ ha̧‘m, wen mɛ́ iŋa mɔ nyɛmna.
5Nɛ́ o'o wee naŋ nù o, mɛ iŋa nde?
Nɛ́ o'o pi̧i̧ nyak yɔr nɛ naŋ-a o?
6O naŋ nù duk zu ge?
Nɛ́ o'o ee ta-mgbii-aa,
7ŋgimbi nɛ o sɔra-tuyɛ a nɛ nú tɛ gima,
in o betom ko Sɔ̧ lɛŋ bíí nɛ gima nɛ desee o?
8Nɛ́ o'o kpee nú tua e zu tɔp
ŋgimbi n'aa ŋmai̧a nɛnɛ gbonɛ kɔ̧ zaŋ nàà kɔ̧-a̧ o?#Jer 5.22
9Nɛ́ mi a̧ pi̧i̧ kutu tɛ-a hee laa ga,
in mi a̧ kpee tɛ-a nɛ tura-zan hee kúfa ga.
10Mi a̧ gɔna so heembea dor nɛ ŋgai-kin-tɛ-a,
mi a̧ mana so o nú tua-a,
11tɔ̧ nɛnɛ: «Mɛ tɛ́ tɛ hɔ hɛ̧ɛ̧,
ɓɛɛ mɛ beka yak siti na;
ŋmaŋa-tɛ kɔ-mɛ#38.11 ŋmaŋa-tɛ kɔ-mɛ: texte tɔ̧ɔ̧ nɛ́ pɛŋa-yì. tɛ kaɗi hɛ̧ɛ̧.»
12Nɛ̀ mɛ̀ dúk nɛnɛ‘i,
mɛ ha̧a̧ nú kóó war kpɔk ha̧ wese mɛ kur nde?
Mɛ usa fara ha̧ gɔna ndaa-zan
13wen ha̧ a̧ mɛ kasi nù nɛ ka̧ nú-a,
ŋmɛkɛsi nɛ o wi-ɗaŋ nde?
14Nɛ́ tɛ ŋgimbi'i a̧ nù gbo nɛnɛ,
hee dap nɛ‘i gɔn zaŋ kpáná-gìì ga;
ɓɛɛ mɔ lɛŋ zu nù gboo a zan hee de goia-laa ga.
15Ŋgimbi'i sa̧a̧mɔ ko o wi-ɗaŋ bia,
ɓɛɛ er nɛ wa hu̧i̧a̧ nɛ ŋgɔn gbina.
16Mɛ hɔɔ fara nɛ gba-tɔp gbo nɛnɛ tɛnɛ nde?
Mɛ yara hɔ nduti ɗuka-fara nde?
17Mɛ zɔka nú tua ko fio nde?
Mɛ zɔka nú tua gba tum-fio kpɔ̧ɔ̧-kpɔ̧ɔ̧ nde?
18Mɛ iŋa gasa nù nde?
Mɛ̀ tɔ̧ wen-aa, wen mɛ́ iŋa o mɔɔ nɔ‘i lɛŋ.
19Fara ko sa̧a̧mɔ a̧a̧ si de?
Ye ko tum a̧a̧ déè?
20Mɛ̀ nɛ́ɛ̀ kíí wa fara kɔ-wa mɛ tɛnɛ
kà mɛ nɛ́ iŋa yuwar-nɛ sitɛ kɔ-wa.
21Mɛ́ tɛ iŋ mɔ‘i lɛŋ wen wa baa ko so mɛ kaɗi;
zɛ duka-a kɔ-mɛ dɔka batɛ.
22Mɛ yee fara ko o ɓɔrɔ#38.22 o ɓɔrɔ: texte tɔ̧ɔ̧ nɛ́ neige in grêle. zɔk nde?
23Mi ɗafa so wa e wen ŋgimbi bɔnɛ,
wen wese ŋgamɔ in wese biro.
24Sa̧a̧mɔ gbo tɛnɛ nɛ̀ ge fara ge?
Búk mɛ ndaa-zan yu tɛnɛ nɛ̀ déè nde?
25Nɛ́ o'o mbaŋa yuwar ha̧ yì-kórò o?
Nɛ́ o'o pi̧i̧ war ha̧ dika-zan o?
26Nɛ́ o'o de ha̧ kórò mɛ hɔ a zu nù nɛ bíí bo sɛnɛ na o,
in a zu ŋga-gbárà nɛ̀ bó nɛ́ fara-duk ko bíí na o?
27Kórò‘i de ha̧ nù fara'i mɛ mɔk,
ha̧ o mɔ mɛ hɔ in ha̧ o zɔ̧ mɛ ɓɔ hi̧i̧.
28Kórò a̧a̧ nɛ dáà kɔ‘i nde?
Nɛ́ o'o de ha̧ mbɛŋ mɛ hui o?
29Nàà ko ɓɔrɔ nɛ o?
Mbɛŋ nɛ ba gɛ̧ɛ̧ kifi ɓɔrɔ, nɛ́ o'o dea o?
30Nɛ́ mɔ‘i a̧ de ha̧ yì mɛ ŋgai hee ta ga,
ɓɛɛ zu yì ɔ kpoe-kpoe.
31Mɛ nyɛma mɛ hɛr Gbaayí-be-zɔŋa
kóó bura Hɛr-paa nde?#Job 9.9; Amɔs 5.8
32Mɛ nyɛma mɛ de ha̧ o zuduk sɔra mɛ gbo tɛ́ ŋgimbi-a,
in foo o gasa sɔra gú nɛ̀ o be-a gbonɛ nde?
33Mɛ iŋa heembea mɔ mɛ́ yiwese?
Nɛ́ mɛ́ a̧ ha̧a̧ ŋgai ha̧ o sɔra zu nù nde?
34Mɛ nyɛma mɛ tɔ̧ wen ha̧ tura-zan
ɓɛɛ gba kórò hɔɔ a zu mɛ nde?
35Nɛ́ mɛ a̧ de ha̧ kórò mɛ pi̧,
ɓɛɛ o pi̧i̧-kórò tɔ̧ɔ̧ ha̧ mɛ: «Ɛɛ a̧a̧ hɛ̧ɛ̧» nde?
36Nɛ́ o'o ha̧a̧ iŋamɔ ha̧ gata-kɔra o?
Nɛ́ o'o ha̧a̧ iŋa-mgbara-mɔ ha̧ desa#38.36 desa: texte tɔ̧ɔ̧ nɛ́ ibis, ŋma nɔ́í nú Egiptɛ nɛ̀ hɔɔ ŋmaa in desa. o?
37Nɛ́ o'o tɛ mɔi̧ o tura-zan
gbai nɛ̀ o dak-yì mɛ yiwese,
38ha̧ fuunu mɛ kifi ɓɔtɛ,
ɓɛɛ o kìí-nù#38.38 kìí-nù: ŋgimbi nɛ̀ nù ŋgai hee boi ga. lata ŋmaa o?
Gasamɔ ko Sɔ̧ tɛ o saɗi
39Nɛ́ mɛ a̧ gbɛ saɗi ha̧ nana dila nde?
Nɛ́ mɛ a̧ ha̧ nyɔŋmɔ ha̧ o be dila,
40nɛ̀ wa mgbuti nù kɔ̧ kɔ-wa,
hu̧si nɛnɛ ti mɔ nde?
41Nɛ́ o'o kii nyɔŋmɔ ha̧ o gba-kɔra,
ŋgimbi nɛ o bem kɔ-wa ai nɛ nú sitɛ Sɔ̧, tik nɛ̀ ŋgata o?
Currently Selected:
JOB 38: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.