EZEKIƐL 2
2
Sɔ̧ saa Ezekiɛl mɛ tɔ̧ wen oi nú-wí
1A̧ tɔ̧ɔ̧ ha̧‘m: «Mɛ́ bíí,#2.1 bíí: texte tɔ̧ɔ̧ «bem ko bíí» mɛ́ usi'e Ezekiɛl nɛ́ bíí, ɓɛɛ Sɔ̧ nɛ̀ Sɔ̧. mɛ̀ kúr mɛ̀ yór ŋgɔn ai; mi a̧a̧ nɛ ŋma wen mɛ tɔ̧ ha̧ mɛ.»
2Ɓɛɛ tɛ ŋgimbi n'aa tɔ̧ nɛ wen ha̧‘m'i, a̧ ɔmi ko Sɔ̧ yee nɛ tɛ‘m ɓɛɛ ba'm e ŋgɔn, ɓɛɛ mi zii gba̧a̧ wen nɛ wi’ɛi tɔ̧ ha̧‘m. 3A̧ tɔ̧a̧: «Mɛ́ bíí, mi tom mɛ sitɛ o be Israɛl, o yaa-ŋga-zu nɔ‘i nɛ mbo zu ha̧‘m na'i. Wa kaɗi dee ŋgazu in am na, hee mɔ'ɔ nɛ o zɔmdáa kɔ-wa duka so de ga. 4O wi nɔ‘i nɛ o wi-ŋgazu in o wi-ŋga-see. Mi tom mɛ sitɛ wa, mɛ tɔ̧ ha̧ wa'e nde: ‹Mɔ nɛ GASA WAN Sɔ̧ tɔ̧ ha̧ wa nɛ mɔ'ɔ.› 5Kóó wa a̧ zii wen nú-mɛ, kóó wa a̧ zii wen nú-mɛ na, wen wa nɛ o wi-ŋgazu, wa tɛ iŋ‘e, ŋma wi-tɔ̧-wen oi nú‘m a̧a̧ mgbara wa.
6«Ɓɛɛ kɔ-mɛ Ezekiɛl, ká kíì wa de mɛ na, ká kíì ŋga wen kɔ-wa de mɛ na mbɛt. Wa tɛ yo wen e nú-mɛ. Tɛ duk hee mɛ duk mgbara o tɛn-dara in o tore ga; mɔ kpɔk, ká wen mɛ́ nú o wi-ŋgazu nɔ‘i in gbaayí-wa pi̧ kíì tɛ-mɛ na. 7Mɛ̀ wé ɗoŋ mɔ n'am tɔ̧ ha̧ mɛ'ɛ ha̧ wa; kóó wa a̧ zii, kóó wa a̧ zii na, oi ŋgazu kɔ-wa so a̧‘i̧.
8«Kɔ-mɛ bíí'ɛ, ká mɛ de ŋgazu hee o wi nɔ‘i ga na; mɛ̀ zíí mɔ n'am tɔ̧ ha̧ mɛ'ɛ; mɛ hú̧í̧ nú-mɛ mɛ nyɔŋ mɔ n'am tɛ ha̧ ha̧ mɛ.»
9Ɓɛɛ kà‘m tɔ̧‘e ha̧‘m zɔk mɔ wó, er bíí nɛ mɔ'ɔ nɛ nyɛi̧ kara kalata tɛnɛ pii tɛ‘m’ɛ.#Tɔ̧ɔ̧ Hu̧ 5.1 10Ɓɛɛ er'i bur kara kalata'i e ti'm. Wa yɔra mɔ sɛn zaŋ-aa nɛ kɔ̧ a̧ in ɗoŋ-aa nɛ zan mbɛt. O gba̧a̧ wen nɛ yɔra zaŋ-aa nɛ aia-nú, gɔfamɔ in o hiɗimɔ.
Currently Selected:
EZEKIƐL 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.