EZEKIƐL 1
1
Kuti hɔɔ-zu ko Sɔ̧ ha̧ Ezekiɛl
Damti ko Gasa Wan
(Zɔk 1.1—7.27)
1Tɛ ɓu-taar pɛ, tɛ naar fio-zɛ, tɛ mɔɔrɔ ɔɔ-zɛ, mi duka so mgbara o bara-biro ká̧ zaŋ Kebar mɛ. Yiwese hu̧i̧a̧, ɓɛɛ Sɔ̧ hɔ zu ha̧‘m.#Tɔ̧ɔ̧ Hu̧ 19.11 2Ŋgimbi'i, ɓɛɛ ká wannu Jɔakim duka bara-biro pɛ mɔɔrɔ kaɗi; ɓɛɛ nɛ tɛ mɔɔrɔ ɔɔ-zɛ‘i,#2 Wan 24.10-16; 2 Kal Ny 36.9-10 3a̧ GASA WAN tɔ̧ɔ̧ nɛ wen ha̧‘m Ezekiɛl wi-ɗafi-sɔ̧, bem ko Buzi sɛn ká̧ zaŋ Kebar tɛ nu ko o be Kaldee. Nɛ fara'i a̧ GASA WAN Sɔ̧ yora nɛnɛ ɗoŋ-am.
4Kà‘m tɛ zɔk mɔ wó, ɓɛɛ gba ŋga hara-búk nɛ mɔ'ɔ nɛ ɓoɓi nɛ war ŋgɔn mɛ‘i tɛnɛ'ɛ, in gba hama bu-zan in leɓe-wee nɛ sɔi in gba sa̧a̧mɔ nɛ duk kɔ‘i tok nɛnɛ lak-lak, ɓɛɛ ŋma mɔ hee yi wee-ndɛrɛ nɛ nɔ̧́í̧ ga, gbo nɛ see mɔ‘i daŋnɛ. 5Ɓɛɛ nɛ mɔ'ɔ n'am zɔka ŋma mɔ naar nɛ gbo nɛ yi mɔ‘i tɛnɛ nɛ hɔɔ ŋmaa in bíí.#Tɔ̧ɔ̧ Hu̧ 4.6 6Wa kpɔk kpɔk a̧a̧ nɛ saŋa-yí naar naar, in wɔr-ɓaa-wa naar naar mbɛt. 7Ɓɛɛ wa yor nɛ tana-a zeeŋ, sɔ̧ɔ̧ naŋ-wa duk hee sɔ̧ɔ̧ naŋ ndai ga nɛ̀ duk tok nɛnɛ ŋgol-ŋgol hee ndɛrɛ ga. 8O er-wa hee er bíí ga a̧a̧ ɗɔɔ wɔr-ɓaa-wa, ɓɛɛ er-wa in ɓaa-wa ká bá nɛ̀ sɔnti-wa naar lɛŋ zika zɔk mɔ tan ti wa dam mgbii-zan naar. 9Nú wɔr-ɓaa-wa hɔŋ nɛ nu ŋmaa; kà wa kur mɛ nɛ nɔ, wa zik tɛ na, kóó o ndé nɛ nɔ tan sɔnti wi fara n'aa e zu si sɛnɛ‘i.
10Saŋa yí-wa mɛ ti hɔɔ ŋmaa in saŋa-yí bíí, wan mɛ wiiko hɔɔ ŋmaa in saŋa-yí dila, wan mɛ gale hɔɔ kɔ‘i ŋmaa in saŋa-yí ndai, ɓɛɛ wan mɛ ɗoŋ hɔ ŋmaa in saŋa-yí zua.#Ez 10.14; Tɔ̧ɔ̧ Hu̧ 4.7 11Wa kaia ɛ̧ɛ̧ ɓaa-wa yiitoo nɛ ŋgɔn ɓɛɛ ndɔŋ nu ɓaa-wa duɓi ŋmaa, ɓɛɛ oi ɓaa-wa yiitoo duk nɛ mɔɔ-kpe-tɛ-wa. 12Kóó o ndé nɛ́ nɔ tan sɔnti wi, ba nɛ̀ yuwar nɛ taamɔ usa ha̧ a̧, wa gir tɛ-wa na.
13Wa hɔɔ ŋmaa in o mɔ nɛ ya kpasa; ŋma mɔ gboo mgbara wa hee ŋga kɛ̧i̧-wee ga, nɛ hɔɔ ŋmaa in wee-kan, nɛ wee-aa duk pi̧ nɛnɛ hee pi̧i̧-kórò ga. 14O saɗi nɔ‘i nɛ nɔ siti, ɓɛɛ wa tɛɛ nɛ nɔ si ɗoŋ mbɛt nɛ haya-a hee mbaŋa-kórò ga.
15Mi zɔka o saɗi nɔ‘i, ɓɛɛ mi zɔk naŋ keekee fara yor katɛ wa kpɔk kpɔk tan sɔnti-wa naar lɛŋ.#Ez 10.9-13 16O naŋ keekee nɔ‘i ya tok nɛ kɔ‘i bar-bar hee ŋma de ta ga. Wa naar lɛŋ duk hee ŋmaa ga, ɓɛɛ duk hee wi dee wa ha̧ wa mɛ ye kɔ̧ ŋmaa ga. 17O naŋ keekee nɔ‘i kpɔk kpɔk nɛ nɔ tan ti-wi dam mgbii-zan naar lɛŋ, wa wɛr tɛ-wa na. 18Kusa-wa nɛ mɔɔ-kíì, ɓɛɛ ɗoŋ-wa lɛŋ tok tok.#Tɔ̧ɔ̧ Hu̧ 4.8 19Kà o saɗi nɔ‘i nɛ nɔ, ɓɛɛ o naŋ keekee nɛɛ nɔ; kà o saɗi kur daŋ si ŋgɔn, ɓɛɛ o naŋ keekee kura daŋ si ŋgɔn mbɛt. 20Wa nɛ si fara lɛŋ nɛ see-wa#1.20 see-wa: texte tɔ̧ɔ̧ nɛ́ esprit. kɔ̧a̧, ɓɛɛ o naŋ keekee nɛɛ in wa, wen mɔ nɛ o saɗi nɔ‘i kɔ̧a̧, a̧ o naŋ keekee de. 21Kà o saɗi nɛ nɔ siti, ɓɛɛ o naŋ keekee nɛɛ kana in wa; kà o saɗi gbasi yor, ɓɛɛ o naŋ keekee yora; kà o saɗi kur daŋ si ŋgɔn, ɓɛɛ o naŋ keekee kura daŋ si ŋgɔn mbɛt, wen nɛ́ kpɔk taamɔ#1.21 taamɔ: texte tɔ̧ɔ̧ nɛ́ esprit (zɔk 1.21 mbɛt). nɛ̀ duk tɛ o saɗi nɔ‘i, a̧ duk tɛ o naŋ keekee mbɛt.
22Ŋma mɔ nɛ hɔɔ ŋmaa in yiwese guu zu o saɗi nɔ‘i tok nɛnɛ hee bu ta ga.#Tɔ̧ɔ̧ Hu̧ 4.6 23O saɗi nɔ‘i nyɛi̧a ɓaa yiitoo si ɗɔɔ mɔ‘i nɛ hɔɔ ŋmaa in yiwese'i, ɓɛɛ oi ɓaa-wa yiitoo yiitoo ya mɛ kpe tɛ wa. 24Ŋgimbi nɛ wa kur mɛ nɛ nɔ, mi zii nɛ giti ɓaa-wa fara gɔm ŋmaa hee giti ŋga som-yì ga, kóó hee tiger Wan nɛ a̧a̧ nɛ ŋgayamɔ lɛŋ ga, hee giti naŋ o gba gii wi-biro ga; kà wa yor, ɓɛɛ wa lɛŋ mɔ̧i̧a ɓaa-wa si ɗɔɔ.#Tɔ̧ɔ̧ Hu̧ 1.15; 19.6 25Ŋma tiger bíí tɛa nɛ fara nɛ mɔ hɔɔ ŋmaa in yiwese nɛ guu zu o saɗi nɔ‘i. 26Ɓɛɛ wi zɔk ŋma mɔ hee tu̧ ta nɛ‘i sa'e safir ga nɛ ɗoŋ-aa hɔɔ ŋmaa in damti. Ŋma mɔ duka zu mɔ‘i woyo ŋgɔn mɛ hee bíí ga.#Ez 10.1; Tɔ̧ɔ̧ Hu̧ 4.2-3 27Mi zɔka mɔ‘i nɛ duk tok nɛnɛ lak-lak hee bu boi ga'i; ŋma mɔ hee wee ga zika ɗoŋ-aa kpa nu ŋmaa, ɓɛɛ de ha̧ sa̧a̧mɔ mɛ gɔn zik a̧ nɛ ŋgɔn hɔ ɗɔɔ.#Ez 8.2 28Sa̧a̧mɔ‘i hɔɔ ŋmaa in dap ɓutu nɛ yɔr mɛ ɓar’ɛ ga; mɔ‘i nɛ gasamɔ ko GASA WAN. Mi zɔka mɔ‘i, ɓɛɛ mi yo nu, ba yí‘m gu nu, ɓɛɛ mi zii tiger ŋma bíí nɛ duka tɔ̧ nɛ wen ha̧‘m.
Currently Selected:
EZEKIƐL 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.