KOLOSIƐN 3
3
1Hee mɔ'ɔ n’ɛnɛ kpasa in Krist kaɗi ga, ɛ̀nɛ̀ kíí nɛ̀ mɔ wan mɛ́ si ŋgɔn, fara nɛ̀ Krist duk sɛnɛ nɛ̀ war wii-er Sɔ̧;#Gima 110.1 2wen mgbák mɔ k’ɛ́nɛ́ nɛ̀ mɔ wan mɛ́ ŋgɔn mɛ, nɛ̀ bó nɛ́ sɛn zaŋnu’ɛ na. 3Ɛ́nɛ́ nɛ́ o bíí nɛ̀ fea, ɓɛɛ duka-kpasa k’ɛ́nɛ́ duk nɛ̀ hu̧sa̧-a̧ in Krist tɛ Sɔ̧ mɛ. 4Duka-kpasa k’ɛ́nɛ́ nɛ́ Krist, ɓɛɛ ŋgimbi n'aa bé tɛ̀ɛ́ hɔ, ɛ́nɛ́ tɛ́ tɛ̀ in a̧ mbɛt zaŋ gasamɔ.
Gba̧‘a̧ bíí in mbe bíí
5Ɛ̀nɛ̀ gbɛ́ o mɔɔ-zaŋnu nɛ̀ a̧a̧ tɛ‘nɛ́ yinɛ: mɛ̀ nɛ́ dàlà, ndiŋmɔ, wɔ-tɛ-ŋmaa in wɔ-ɗaŋmɔ, ká bá nɛ̀ zɔm wɔ-mɔ nɛ̀ duk nɛ́ ŋma gasa géé-sɔ̧. 6Nɛ́ o mɔɔ nɔ‘i a̧ dak nyimsea ko Sɔ̧ pi̧ zu bíí. 7Deemɔ in duka-a k’ɛ́nɛ́ nɛti duka so hee mɔ‘i ga.
8Ɓɛɛ kinii, ɛ́nɛ́ mbɛt, ɛ̀nɛ̀ síŋ o pɛrti mɔɔ nɔ'ɔ lɛŋ a nù: nyimsea, kura-see in ɗaŋ, dara in ndiŋ-wen nɛ̀ gbo nɛ̀ kɔ̧ nú-wi. 9K’ɛ́nɛ́ de ndela mgbara ŋmaa ɓɔna, wen ɛ́nɛ́ kpɔ̧i̧a̧ gba̧‘a̧ bíí yinɛ tɛ‘nɛ́ hee laa ga in o deemɔ kɔ̧-a̧,#Ef 4.22 10ɓɛɛ ɛ́nɛ́ pi̧ nɛ́ mbe bíí tɛ‘nɛ́, wan nɛ̀ kaɗi kpaia tɛ nɛ̀ mbe-a mɛ́ hɔ ŋmaa in gi̧ɔ̧-tɛ wi nɛ̀ dee a̧ na, wen ha̧ a̧ mɛ́ kpa iŋamɔ.#Ku̧u̧ 1.26; Ef 4.24 11Ɓɛɛ ha'i mɛ́ tɔ̧‘e, ɛ̧ɛ̧ wi’ɛ nɛ́ Grɛk, kóó Juif, wi-mbii, wi nɛ̀ gɔna bɔr, gɔni-dùk, wi-zaŋbɛɛ, o bara, o bíí nɛ̀ bó nɛ́ bara na, bo ɓɔna. Ɓɛɛ Krist duk nɛ́ mɔ lɛŋ in a̧ a̧a̧ tɛ bii lɛŋ.#3.11 Krist dúk nɛ́ mɔ lɛ́ŋ ín a̧ a̧a̧ tɛ́ bíí lɛ́ŋ: ó ŋma texte tɔ̧a: Krist nɛ́ mɔ lɛ́ŋ tɛ́ mɔ lɛ́ŋ.
12Hee mɔ'ɔ nɛ̀ Sɔ̧ kɔ̧ɔ̧‘nɛ́ ɓɛɛ hok'nɛ́ ha̧ war-tɛ‘nɛ́ mɛ́ sa̧ ga, ɛ̀nɛ̀ pí̧ laa-deako, dee demɔ, mɔka-see, ga̧a̧-see in nɔɔ-ŋgiɗi.#Ef 4.2 13Ɛ̀nɛ̀ de munyal ha̧ ŋmaa in o ŋmaa; ɓɛɛ kà ŋma bíí mgbara'nɛ́ nɛ́ bòó nɛ̀ wen in sɛm kɔ‘i, ɓɛɛ wa a̧ é nɛ́ ɗaŋmɔ ha̧ ŋmaa. Hee mɔ'ɔ nɛ̀ Gasa Wan ee nɛ̀ ɗaŋmɔ k’ɛ́nɛ́ h’ɛ́nɛ́ ga, ɛ́nɛ́ mbɛt, ɛ̀nɛ̀ dé kale-a hegɔ.#Ef 4.32 14Ɓɛɛ zu-a'i lɛŋ, ɛ̀nɛ̀ dúk nɛ̀ kɔ̧ɔ̧mɔ nɛ̀ duk nɛ́ kpasa mɔɔ-mɔi̧-bíí mɛ́ duk ndaɗi kpɔk in o ŋmaa. 15Ga̧a̧mɔ ko Krist a̧ ɔ́ wan kɔ̧ see'nɛ́; mɛ̀ nɛ́ ga̧a̧mɔ‘i a̧ Sɔ̧ saa'nɛ́ lɛŋ si sɛnɛ sɛn tɛ kpɔk kiitɛ. Ɓɛɛ ɛ̀nɛ̀ dúk tɛ dee osoko. 16Wen ko Krist a̧ dúk mgbara'nɛ́ nɛ̀ oi demɔ kɔ‘i lɛŋ; ɛ̀nɛ̀ úsí mɔ, tɔ̧ nɛ̀ mbɔrɔ ha̧ ŋmaa nɛ̀ kpasa iŋa-mgbara-mɔ. Ɛ̀nɛ̀ bíí gima de nɛ̀ osoko ha̧ Sɔ̧ sɛn kɔ̧ see'nɛ́, ɛ̀nɛ̀ bíí gima-wor-sɔ̧, o gima-zɔn-sɔ̧, in o gima nɛ̀ Sa̧a̧ Ɔmi usi h’ɛ́nɛ́.#Ef 5.19-20 17Mɔ n’ɛnɛ tɛ́ tɔ̧ in mɔ n’ɛnɛ tɛ́ de lɛŋ, ɛ̀nɛ̀ dé mɔɔ nɔ‘i nɛ̀ nin Gasa Wan Jesu, de nɛ̀ osoko ha̧ Sɔ̧, Dáà, nɛ̀ ɗoŋ Jesu.
Mbe duka-a
18Okoo, ɛ̀nɛ̀ mbó zu ha̧ o wíì k’ɛ́nɛ́, hee mɔ'ɔ nɛ̀ bíí ko Gasa Wan tɛ́ de ga.#Ef 5.22; 1 Pi 3.1
19Wiwii, ɛ̀nɛ̀ kɔ̧́ o kóò k’ɛ́nɛ́, ɓɛɛ ká see'nɛ́ tú̧ zu wa na.#Ef 5.25; 1 Pi 3.7
20O bem, ɛ̀nɛ̀ mbó zu ha̧ o dáà in nàà k’ɛ́nɛ́ tɛ́ mɔ lɛŋ; nɛ́ mɔ‘i a̧ Gasa Wan kɔ̧ɔ̧ tɛ‘nɛ́.#Ef 6.1
21O dáà in o nàá, k’ɛ́nɛ́ ha̧ tu̧u̧-see ha̧ o bem k’ɛ́nɛ́ na, wen ká nɔɔ-ŋgiɗi kɔ-wa tɛɛ kaɗi.#Ef 6.4
22Ɓɛɛ war k’ɛ́nɛ́ o bara, ɛ̀nɛ̀ mbó zu ha̧ dáa-bara k’ɛ́nɛ́ mɛ́ zaŋnu’ɛ tɛ mɔ lɛŋ; mboozu k’ɛ́nɛ́ ha̧ wa bó nɛ́ h’ɛ́nɛ́ mɛ́ de tɛ-wa wen nɛ̀ wa duk zu'nɛ́ na, ɓɛɛ ɛ̀nɛ̀ mbó zu ha̧ wa nɛ̀ kpasa mboozu tɛ yuu kíí Gasa Wan.#Ef 6.5-8 23Kóó ɛ́nɛ́ de nɛ́ ge tom ge, ɛ̀nɛ̀ dé nɛ̀ desee hee ha̧ Gasa Wan ga, nɛ̀ bó nɛ́ hee ha̧ bíí ga na. 24Ɛ̀nɛ̀ íŋ ndé, Gasa Wan tɛ́ ha̧ mɔɔ-oi n'aa ɗafa e ha̧ o bíí kɔ̧-a̧ h’ɛ́nɛ́, oi tom k’ɛ́nɛ́. Wan-tom nɛ́ Krist, ɓɛɛ ɛ́nɛ́ nɛ́ wi-de-tom kɔ̧-a̧. 25Ɓɛɛ wi nɛ̀ de mɔ nɛ̀ yuwar-a na tɛ́ kpa mɔɔ-oi-tom kɔ‘i, ɓɛɛ kɛ̧ɛ̧-mgbara-mɔ beka bo na.#Wee-ɗoŋ-he 10.17; Ef 6.9
Currently Selected:
KOLOSIƐN 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.