TƏŊMORFANNE 42
42
Wee pah Yuseɓ gera sǝr Egiɓ ka lee sorre
1Ne cok Yakuɓ mo laa ɓǝ sor lee no sǝr Egiɓ, faa nyi wee ahe: We hai ẽe ki ɗǝne? 2So faa nyi ra: Me laa sor lee no sǝr Egiɓ. We ge gŋ ka we lee ge ne ko, ka na wuk ka. 3Wee pah Yuseɓ jemma gera sǝr Egiɓ mor ka lee sor gŋ. 4Amma Yakuɓ pee Benyaamin naa mah Yuseɓ ge ne wee pam ya, mor Yakuɓ faa ka ɓeɓ mo ge lwaa ko gŋ ka. 5Wee Yakuɓ ɓaŋra fahlii ne za ki mor ga lee sorre, mor koŋ wǝ ɓo sǝr Kanaan pǝlli.
6Yuseɓ ye ne swah tǝ sǝr Egiɓ, ako yee nyi sor nyi za sǝr daŋ leeni. Wee pah Yuseɓ ge daira, keara ge sǝŋ pel ah ɗǝmra zahpel ge tǝ sǝrri. 7Yuseɓ kwo wee pah ahe, tǝ ra, amma joŋ ra na za gwǝǝre, faa ɓǝ nyi ra ne swahe. So fii ra: We gee kẽe ge ne? Zyiira faa: Ru gee sǝr Kanaan ge ka lee sorre. 8Yuseɓ tǝ wee pah ah ɓe, amma ma ɓǝǝ tǝra ko ya. 9Yuseɓ foo ɓǝ lom ah mo looko tǝ ɓǝǝra, faa nyi ra: We ye za foo sǝrri, we ge ɓo tǝ ẽe cok sǝr ma tǝjokri. 10Zyiira faa: Ka nai ya dǝɓlii ɓuuru, aru ge ɓo tǝ lee farelle. 11Aru daŋ ru ye wee dǝɓ tǝ vaŋno, aru ye za matǝ goŋga, aru ye ka za foo sǝr a. 12Amma Yuseɓ zyii faa nyi ra: Ka noo ya, we ge ɓo tǝ ẽe zah sǝr ma tǝjok ahe. 13Zyii faara: Aru wee pa tǝ vaŋno aru jemma tǝtǝl gwa. Aru ye wee dǝɓ tǝ vaŋno sǝr Kanaan. Ru soɓ kahkǝr ɓuu ɓo yaŋ ne pa ɓuuru, maki vaŋno zyak ɓe. 14Yuseɓ faa nyi ra: A tǝgbana mai me faa ko, awe ye za foo sǝrri. 15A ga joŋra we naiko: me haa zah ne tǝɗii Farao, we ka pǝ̃ǝ nyee kal a, sai ka kahkǝr ɓii ge ɓe. 16We pee dǝɓ vaŋno kǝsyil ɓii ka mo ge zaŋko naa pa ɓii ge ne ko. Amma ma ɓii we yea daŋgai nyeeko. A ga liira ɓǝ faa zah ɓii we tǝ faani, ɗah we faa goŋga ɓo ne? Wala we gwah ber ɓo ne? Mo ber ye ɓe, tǝtǝl Farao no sǝŋ, we ye za foo sǝrri. 17So rǝk ra daŋ ge pǝ daŋgai zah'nan sai.
18Ne zah'nan sai ah Yuseɓ faa nyi ra: Ame ye dǝɓ ma ɗuu Masǝŋ. Mor ahe, me ga soɓ we, we ka wuk ya. Sai we joŋ fan maino: 19Awe ye za tǝ goŋga ɓe, naa pa ɓii vaŋno mo kaako pǝ daŋgai pǝ cok ɓiiri. Amma ma ɓii we gyo, we ɓaŋ sor ge za yaŋ ɓii ne ko mor ara ne koŋne. 20Sai we gee me ne kahkǝr ɓiiri, mo nai ɓe, ka ɓǝ faa ɓii goŋga yo, we ka wuk ya. Zyiira zah ah faa: Pǝsãhe, ru ga joŋ naiko. 21So faara kǝsyil ki: 'Manna na joŋ faɓe' wo naa pa man ɓe. Ne cok ah na kwo bone mazwãhsuu ah ɓe, mor pǝǝko na ka na kwo syak tǝl ahe, na zyii laa pǝǝ ah ya. Bone mai ge ɓo tǝ man mor ahe. 22Ruben zyii zah ɓǝǝ faa: Me faa nyi we, we joŋ faɓe' wo we sye ka ya ne? Amma we zyii laa zah ɓe ya, mor ah zǝzǝ̃ǝ syim ah tǝ gin tǝ man o. 23Amma tǝra sõone Yuseɓ a laa ɓǝ faa ɓǝǝ no ya, mor dǝɓ ki ye tǝ fer ɓǝ kǝsyil ɓǝǝra. 24Yuseɓ jiŋ fahfal ɓoo nyi ra kalle, so ge yeyee. Fahfal ah pii soo ge wo ɓǝǝ faa ɓǝ ne ra, so ɓaŋ Simon gin kǝsyil ɓǝǝ gaa ne nahnǝn ɓǝǝra.
Wee pah Yuseɓ pii soora ge sǝr Kanaan
25Yuseɓ faa ka za mo woora sor baa dah ɓǝǝra, ka mo jinra lak zune daŋ maa ge pǝ dah ahe, ka mo nyira farel fahlii nyi ra ta. So joŋra laŋ wo ɓǝǝ naiko. 26Wee pah Yuseɓ woora sor ge tǝ korro ɓǝǝra, so kalra. 27Amma ne cok mo ge ɗǝrra ka swah sǝŋ, dǝɓ vaŋno kǝsyil ɓǝǝ gbǝr zah dah sor ka nyi farel nyi korro ahe. Kwo lak ah maa ɓo zah dah ahe. 28So faa nyi wee pamme: Jinra lak ɓe maa ge ɓo pǝ dahe, ako zah dah korro ɓe nyeeno. Zahzyil nǝǝ ra, ne cok mo tǝ ẽera ki suu coora coo faara: Ɓǝ fẽe Masǝŋ joŋ ɓo wo man mai ne?
29Ge daira wo pa ɓǝǝ Yakuɓ sǝr Kanaan. Keera ɓǝ mai mo joŋ wo ɓǝǝ daŋ nyi ko. 30Faara: Dǝɓ ki no, dǝɓ ah dǝɓlii sǝr o, faa ɓǝ nyi ru ne swahe, lǝŋ aru ye za foo sǝrri. 31Ru faa nyi ko aru ye za tǝ goŋga, ru ye ka za foo sǝr a, 32aru wee pa tǝ vaŋno, aru jemma tǝtǝl gwa, aru wee dǝɓ tǝ vaŋno, vaŋno zyak ɓe, ru soɓ kahkǝr ɓuu ɓo yaŋ ne pa ɓuu sǝr Kanaan. 33Amma dǝɓ mai mo dǝɓlii sǝr Egiɓ zyii faa nyi ru: Ka me tǝ awe za goŋga ɓe, we soɓ naa pa ɓii maki wo ɓe vaŋno, we ɓaŋ sor we gyo, mor za yaŋ ɓii ne koŋne. 34We ge ne kahkǝr ɓiiri, ka me tǝ, we ye ka za foo sǝr a, we ye za goŋga. Fahfal ah me ga soɓ naa pa ɓii nyi we, we kyãh lea fan pǝ sǝr Egiɓ.
35Ne cok mo tǝ vǝlra sor ɓǝǝra, zune daŋ lwaa lak ah pǝ dah ahe. Mo kwora lak ɓǝǝ naiko, ara ne pa ɓǝǝ daŋ ɗuura galle. 36So pa ɓǝǝ Yakuɓ faa nyi ra: We zyak wee jol ɓe ɓe, Yuseɓ zyak ɓe, Simon laŋ kǝkao ta. So we tǝ ga ɓaŋ Benyaamin kpǝ. Ɓǝ mai daŋ joŋ ɓo wo ɓe. 37Ruben faa nyi pah ahe: Me pii soo ge mo ne ya ɓe, ka mo ik wee ɓe gwa pǝ wulli. Mo soɓ nyi me o, me ga jin gee mo ne ki. 38So Yakuɓ faa: We ɓe ka ga ne we ya, naa mah ah wǝ ɓe, coŋ ko ɓo syak ah to o. Ɓǝɓe' mo ge lwaa ko fahlii gwǝǝ we tǝ ga ɓe, ɓǝ ah ga joŋ me wǝ gwari, mor ame tam ɓe.
Currently Selected:
TƏŊMORFANNE 42: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.