TƏŊMORFANNE 43
43
Wee pah Yuseɓ jinra ge sǝr Egiɓ ne Benyaamin
1Koŋ so ge pel pǝ sǝr Kanaan. 2Ne cok mo rera sor mai mo gera gin sǝr Egiɓ ne ko vǝrri, so Yakuɓ faa nyi wee ahe: We pii soo ge lee farel mor man biŋ ɗao. 3Yuda zyii faa nyi ko: Dǝɓlii sǝr Egiɓ faa nyi ru njaŋ, we ka ge pel ɓe ya, sai ka we ge ne naa pa ɓii ɓe. 4Amma moo soɓ na pa ɓuu ga ne ru ɓe, ru ganne, ru ga lee farel nyi mo. 5Amma mo soɓ ge ne ru ya ɓe, ru ka gan a, mor dǝɓ ah faa: We ka ge pel ɓe ya, sai ka naa pa ɓii ge ne we ɓe. 6Yakuɓ faa: We joŋ ɓǝɓe' mai wo ɓe nai mor fẽe ŋhaa ka we so faa nyi dǝɓ ah naa pa ɓii maki ah no ne? 7Zyiira faa: Dǝɓ ah fii ru ne ɓǝ suu ɓuu tǝkine morsǝ̃ǝ ɓuuru, so faa: Pa ɓii no sǝŋ ba ne? Naa pa ɓii maki ah no ne? Ru zyii faa nyi ko tǝgbana fii ahe. Ru so tǝ gin kẽe a ga faa nyi ru we ge ne naa pa ɓii ne? 8Yuda faa nyi pah ahe: Mo soɓ we nyẽe ka ga ne me, ka ru ur kalle, ka aru ne mo tǝkine wee ɓuu daŋ na wuk ka. 9Val ɓǝ ah mo yea tǝ ɓe, me pii soo ge wo ɓo ne ko me kan ko pel ɓo ya ɓe, ka me yea wo ɓo na pa faɓe' zah'nan Masǝŋ daŋ. 10Kǝnah ru gbǝ rol ɓo ya ɓe, ka ru ge pii soo ɓo zahlǝŋ gwa o.
11So pa ɓǝǝ faa nyi ra: Ɓǝ ah mo nai ɓe, we joŋ naiko: we woo fan sǝr mai masãh ah pǝ dah ɓii ka we ge haozah wo dǝɓ ah ne ko. We ɓaŋ fan ma fuŋ 'nyah biŋ, we ɓaŋ tǝnjwǝǝ biŋ, we ɓaŋ fan gbãh biŋ, we ɓaŋ zwahre tǝkine gooro. 12We ge ne lak mor jol zahlǝŋ gwa ne mai mo rǝkra zah dah sor ɓii kŋ, ɗah maki zyakra rǝk ɓo gŋ zyak ne? 13We ɓaŋ naa pa ɓii ta, ka we ur we pii soo ge wo dǝɓ ahe. 14Masǝŋ ma ne swah ga joŋ dǝɓ ah kwo syak tǝ ɓiiri, ŋhaa ka mo wǝǝko Simon tǝkine soɓ Benyaamin daŋ. Ma ɓe me bai wee ko o laŋ, ka me yea bai ɓǝǝ o.
15Wee Yakuɓ woora fan haozah woli, so woora lak ma zahlǝŋ tǝ gwa mor jol ɓǝǝra, ɓaŋra Benyaamin ta. So ur kalra ge sǝr Egiɓ. Gera pel Yuseɓ. 16Ne cok Yuseɓ mo kwo Benyaamin kǝsyil ɓǝǝra, faa nyi wakiili yaŋ ahe: Mo zaŋ za rai ge yaŋ ne ko, mo ŋgoŋ dǝǝ ka mo joŋ farel ne ko, mor za rai ga rera farel ne me ne com kǝsyitǝtǝl tǝ'nahko. 17Dǝɓ ah joŋ tǝgbana Yuseɓ mo faa nyi ko, zaŋ ra kal ge yaŋ Yuseɓ ne ko.
18Ne cok wee pah Yuseɓ mo tǝ syeera ga tǝ fahlii, a ɗuura galle, faara tǝgǝǝ ki: Gera ɓo yaŋ nyee ne na mor lak mai mo rǝkra zah dah man kǝpel kŋ, mor ka baŋra zah tǝ man ka gbah na ciŋ byak ne ko ne korro man ra daŋ. 19Mor ahe, tǝɓra ge wo wakiili yaŋ Yuseɓ, faara ɓǝ ne ki zahfah yaŋ. 20Faara: Mo laa ɗao dǝɓlii, gin ɓuu ma kǝpel ru ge lee sorre, 21-22ne cok ru ge dai pǝ cok ɗǝrri, ru gbǝr zah dah ɓuuru, ru lwaa lak zune daŋ maa ɓo zah dah ahe, lak zune daŋ na kee ah mo kee ɓo. Ru tǝ dǝɓ mai mo ge rǝk lak ɓuu zah dah ɓuur a. Ru so woo jin ge ɓo ne ko, ru so woo lak maki ah ge ɓo ne ka lee farel ne ta. 23Wakiili zyii faa: Jam mo yea ne we, we ɗuu gal ka. Lak ɓii ge jol ɓe sye ɓe. Amma Masǝŋ ɓii ne Masǝŋ pa ɓii ako ye rǝk lak ɓii zah dah ɓiiri. So nǝǝ Simon pǝ̃ǝ ge wo ɓǝǝ ne ko.
24Wakiili dan ge yaŋ Yuseɓ ne ra, nyi bii nyi ra vãh ɓal ne ko. So nyi wom nyi korro ɓǝǝ ta. 25Wee pah Yuseɓ zyeɓra fan haozah wol kyaŋ tǝ Yuseɓ mo tǝ ga ge yaŋ ne com kǝsyitǝtǝl ne ko. Mor laara tǝ ga rera farel gŋ.
26Ne cok Yuseɓ mo ge yaŋ, nyira fan haozah wol mai mo jol ɓǝǝ nyi, so keara ge sǝŋ pel ahe. 27So haozah wo ɓǝǝ fii jam ɓǝǝ faa: Pa ɓii matam we faa ɓǝ ah nyi me kŋ a no jam ne? A no sǝŋ ba ne? 28Zyiira faa nyi ko: Byak ɓo pa ɓuu no jam, a no sǝŋ ba. So keara ge sǝŋ ɗǝm tǝtǝlli.
29Yuseɓ ɓaŋ nahnǝn ah kwo naa mah ah Benyaamin, so faa: Ako ye kahkǝr ɓii mai we faa ɓǝ ah nyi me ko ne? So faa: Masǝŋ mo ẽe mo na ɓe. 30So Yuseɓ hǝǝ pǝ̃ǝ ge lalle, mor zahzyil ah yee syak ɓo tǝ naa mah ahe, ŋhaa mĩi yee ge nahnǝn ah so dan ge ɓǝr yaŋ ah ge yeyee gŋ. 31Ne cok mo so 'wǝ̃ǝ nahnǝnni, pǝ̃ǝ ge lalle. Swaa suu ah so faa: We ge ne farelle. 32Ge kanra mǝ ah nyi ko syak ahe, ma ɓǝǝ laŋ cam, mǝ Egiɓien mai moo renra farel yaŋ ah laŋ cam ta. Mor Egiɓien ka renra fan tǝkine Yahuduen ya, mor a pǝrenjẽa wo ɓǝǝra. 33Fahfal ah Yuseɓ zyeɓ ra hai zah farel ne patǝtǝlli, tǝŋ daga we malii ŋhaa dai kahkǝrri. Za rai so ẽera ki kaara gǝriŋ. 34So pee farel mai mo pel ah ge nyi ra. Amma nyira farel nyi Benyaamin kal mǝ za ki zahlǝŋ dappe, zwahra fan ne ki laara pǝ'nyahre.
Currently Selected:
TƏŊMORFANNE 43: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.